Chakʼbutik bendision li Ajvalil ti beiltasbil ta chʼul espiritue
Chakʼbutik bendision li Ajvalil ti beiltasbil ta chʼul espiritue
«Te ta xcom o ta stojol li Espíritu yuʼun Mucʼul Diose.» (ISA. 11:2)
1. ¿Kʼusi tsnop jlom krixchanoetik ta skoj li kʼusitik chkʼot ta pasel ta balumile?
«LI TA Balumil ti mu xa snaʼ kʼusi tspasik ta jyalel li politikoetike, li ta sventa krixchanoetike xchiʼuk li sokesel balumile, ¿kʼuxi xa noʼox chkuxiik 100 jabil mas li krixchanoetike?», jech laj yalbe skʼoplal ta 2006 li buchʼu chchanbe skʼoplal jeltos kʼanaletik ti Stephen Hawking, sbie. Jun periodiko xtoke xi laj yale: «Muʼyuk bu lajem skʼoplal kuʼuntik li povreale xchiʼuk chʼabal ayanem lekilal kuʼuntik ta spʼejel Balumil. Moʼoj, batsʼi mu jechuk kʼotem ta pasel kuʼuntik. Pe maʼuk skʼan xal ti muʼyuk jpasojtik prevae, jpasojtik xa preva skotol, jpasojtik preva ta jun ajvalilal ti tskʼan ti jmojuk kʼusitik kuʼuntike (comunista), xchiʼuk jpasojtik preva ti jutuk noʼox tstikʼ sba li ajvalil ta sventa li kʼusitik kuʼuntike, jpasojtik preva li Sociedad de Naciones xchiʼuk ti yichʼoj tunesel vomba atomika sventa jmoj xi j-abteje. Ep tajek ta velta pasbil kʼopetik sventa xlaj-o li kʼope, sventa chkakʼtik ta ilel ti yuʼun xi jtojob ta slajesel li kʼope» (New Statesman).
2. ¿Kʼusi poʼot xa spas Jeova sventa chakʼ ta ilel ti jaʼ li Mukʼul Jpas mantale?
2 Li kʼusitik laj yichʼ alel taje muʼyuk bu labal sba chkaʼitik li yajtunelutik Jeovae, yuʼun jamal onoʼox chal Vivlia ti mu xuʼ sventain sba stuk li krixchanoetike (Jer. 10:23). Jaʼ noʼox stuk Jeova oy sderecho tspas mantal kʼuchaʼal Mukʼul Jpas mantal. Ta skoj taje jaʼ noʼox stuk xuʼ xakʼbutik mantaletik sventa lekil talelal, ti chalbutik kʼu yuʼun laj kichʼtik pasele xchiʼuk tsbeiltasutik sventa xkʼot ta pasel kuʼuntik. Sventa chakʼ ta ilel ti jaʼ tspas mantal li Jeovae poʼot xa me slajes li jeltos ajvaliletik ti svaʼanojik yoʼ tsventain sba stuk li krixchanoe. Jech xtok tslajes skotol li buchʼutik mu xchʼam li mukʼul pas mantal tspase, li buchʼutik mosoinbil yuʼun li mulile, ti chʼabal stukʼilike xchiʼuk ti mosoinbilik yuʼun «li yajval banamile», li Satanase (2 Cor. 4:4).
3. ¿Kʼusi kak laj yal li j-alkʼop Isaías ta sventa Mesiase?
3 Li ta achʼ balumile, li Jeovae tstunes li Ajvalilal yuʼun Mesías sventa chakʼ ta ilel ti ta slekil yoʼonton tspas mantale (Dan. 7:13, 14). Xi laj yal li j-alkʼop Isaías ta sventa Mesiase: «Li jbej chumanteʼ jaʼ li lsaie [Jesé], ta xlocʼ jun sqʼuelum; ta xlic locʼuc tal jbej sqʼuelum ta mero yibel. Te ta xcom o ta stojol li Espíritu yuʼun Mucʼul Diose, jaʼ ta xʼacʼbat lec sbijil, ta xjambat lec sat; ta xʼacʼbat lec snaʼ cʼu xʼelan chtojobtasvan; ta xʼacʼbat lec stsatsal; ta xʼacʼbat lec yotquin cʼusi tscʼan tspas, xchiʼuc cʼu xʼelan lec chichʼ ta mucʼ li Mucʼul Diose» (Isa. 11:1, 2). Li «sqʼuelum» «jbej chumanteʼ» taje jaʼ li Cristoe. Pe ¿kʼutik yelan chchanubtasat yuʼun li chʼul espiritu yoʼ sventain li krixchanoetike? ¿Kʼusitik bendision chakʼ li ajvalilal tspase? ¿Kʼusi skʼan jpastik yoʼ jtatike?
Chanubtasat yuʼun Dios sventa x-och ta ajvalil
4-6. ¿Kʼusitik xojtikin Jesús sventa xkʼot ta jun Ajvalil, ta Mero Bankilal Pale xchiʼuk ta Jchapanvanej ti lek pʼij xchiʼuk ti oy xkʼuxul yoʼontone?
4 Li Jeovae oy ta yoʼonton akʼo staik tukʼilal li buchʼutik tsventain ta balumile. Yoʼ staike skʼan xkoltaatik yuʼun jun Ajvalil, Mero Bankilal Pale, pʼijil Jchapanvanej xchiʼuk ti oyuk xkʼuxul yoʼontone. Jaʼ yuʼun li Jeovae la stʼuj Jesús xchiʼuk la stunes xchʼul espiritu sventa la xchanubtas yoʼ spas yuʼun li abtelaletik taje. Jkʼeltik jaytosuk srasonal ti kʼu yuʼun spas yuʼun lek li yabtel akʼbil yuʼun sTote.
5 Jaʼ noʼox stuk Jesús ti lek xojtikin Jeovae. Toj echʼ xa noʼox ep jabiletik te xchiʼuk li sTote, yikʼaluk van epal miyon jabil. Ti kʼu sjalil taje, li jun noʼox xNichʼon Diose toj echʼ xa noʼox laj yojtikin li sTote, jaʼ yuʼun xuʼ xichʼ alel ti «coʼolic jech chac cʼu chaʼal li Dios ti mu xquiltique» (Col. 1:15). Xi onoʼox laj yal stuk li Jesuse: «Li bochʼotic laj xa yilicune laj xa yilic o li Jtote» (Juan 14:9).
6 Li Jesuse xojtikin lek li kʼusitik pasbile xchiʼuk xojtikin lek li krixchanoetike. ¡Nopo xa noʼox avaʼi liʼe! Li ta Colosenses 1:16, 17 xi chal ta sventa li xNichʼon Diose: «Jaʼ ta sventa iʼayin scotol li cʼusitic oy ta vinajele, li cʼusitic oy ta banamile, xchiʼuc li cʼusitic xquil ta jsatique, xchiʼuc li cʼusitic mu xquil ta jsatique [...]. Yuʼun li stuque te onoʼox oy o ti cʼalal muʼyuc toʼox cʼusitic oye. Jaʼ ta svuʼel lec oy scotol li cʼusitic oye». Ta skoj ti jaʼ li «pʼijil j-abtel, [NM]» ti tunesat yuʼun Jeovae, la skolta sba ta spasel skotol li kʼusitik oye. Jaʼ yuʼun xojtikin lek li kʼusitik pasbil ta vinajel-balumile xchiʼuk xojtikinbe lek xchinab li krixchanoetik ti toj labal sba pasbile. Ta melel: jaʼ skʼuʼinoj li pʼijilale (Pro. 8:12, 22, 30, 31).
7, 8. ¿Kʼuxi koltaat yuʼun chʼul espiritu li Jesús kʼalal la xchol mantale?
7 Li Jesuse laj yichʼ tʼujel ta chʼul espiritu. Xi laj yal stuke: «Li Espíritu yuʼun Diose liʼ oy ta jtojol. Jaʼ yuʼun la stʼujun, jech vocʼbil licom ta sventa yabtel. Jech tal calbe yaʼyic Lequil Aʼyej li bochʼotic abul sbaique. Tacbilun tal ta yalel ti xuʼ chcolic li bochʼotic ochemic ta chuquele, xchiʼuc tal jambe satic li maʼsatetique, xchiʼuc tal jcolta li bochʼotic utsʼintabilique. Tal calbe yaʼyic ti jaʼ xa sjabilal li cʼuxubinel yuʼun Diose» (Luc. 4:18, 19). Yikʼaluk van kʼalal laj yichʼ voʼ li Jesuse, li chʼul espiritue la svulesbe ta sjol li kʼusitik la xchan ta vinajele, ti jaʼ te skʼoplal li kʼusi tskʼan Dios ti akʼo spas kʼalal ay ta Balumil kʼuchaʼal Mesiase (kʼelo Isaías 42:1, Lucas 3:21, 22 xchiʼuk Juan 12:50).
8 Maʼuk noʼox ti lek tukʼ snopben xchiʼuk sbekʼtal stakopal li Jesuse, yuʼun te oy ta stojolal li chʼul espiritue. Jaʼ yuʼun maʼuk noʼox li vinik ti mas tsots skʼoplale, yuʼun jaʼ li lekil jchanubtasvanej echʼem ta sjunul kuxlejal ta Balumile. Jech, li Vivliae chal ti «ichʼay yoʼnton li cristianoetique, yuʼun laj yaʼyic cʼu xʼelan ichanubtasvan li Jesuse» (Mat. 7:28). Yuʼun snaʼoj lek ti kʼu yuʼun oy vokolile: jaʼ ta skoj li mulile, ti chʼabal stukʼil li krixchanoetike xchiʼuk ti mu xojtikinik Diose. Jech xtok xil li kʼusi oy ta yoʼonton krixchanoetike, vaʼun jaʼ jech chchiʼin ta loʼil (Mat. 9:4; Juan 1:47).
9. ¿Kʼu yuʼun jpatoj lek koʼontontik ti jaʼ noʼox stuk jaʼ lekil Ajvalil li Jesús kʼalal ta jnopbetik skʼoplal li xkuxlejale?
9 Kuxi kʼuchaʼal krixchano li Jesuse. Jlom li kʼusitik chkʼot-o ta lekil Ajvalil li Jesuse jaʼ ti kuxi kʼuchaʼal krixchanoe xchiʼuk ti la xchiʼin ta naklej li jpas muliletike. Jech kʼuchaʼal xi laj yal Pabloe: «Persa la scoʼlajes sba jech chac cʼu chaʼal li xchiʼiltac ta voqʼuele, yuʼun jech jaʼ jcʼuxubinvanej, jaʼ tuqʼuil Banquilal Pale icʼot yuʼunic ta stojol Dios, jech xuʼ tstaic perdón yuʼun smulic li steclumale. Ta sventa ti laj yaʼay lec ta sbecʼtal stuc li prevae, jech xuʼ yuʼun tscolta ta sventa svuʼel li bochʼotic jech chtal preva ta stojolic [eke]» (Heb. 2:17, 18). Kʼuchaʼal chkiltike, lek xtojob ta xkʼuxubinel li buchʼutik chil svokolike, yuʼun «laj yaʼay lec ta sbecʼtal stuc li prevae». Jech, kʼalal ay xchol mantal ta Balumile laj yakʼ ta ilel ti ta ora xaʼibe smelolal svokol li krixchanoetike. Solel spatoj lek yoʼonton chnopajik ta stojolal Jesús skotol li krixchanoetike: chnopajik li buchʼutik ipike, li buchʼutik chil svokolike, li ololetike, li koxoetike, li maʼsatetike o yan krixchanoetik (Mar. 5:22-24, 38-42; 10:14-16). Chnopajik tal ta stojolal xtok li manxo krixchanoetik ti oy ta yoʼontonik mantale. Yan li buchʼutik tstoy sbaike xchiʼuk li buchʼu mukʼ skʼoplal chaʼi sbaike, muʼyuk bu xnopajik ta stojolal Jesús, kʼajomal la skontrainik xchiʼuk ep kʼusitik chopol la spasbeik, yuʼun «muʼyuc onoʼox [s]cʼanojic li Diose» (Juan 5:40-42; 11:47-53).
10. ¿Kʼuxi toj labal sba laj yakʼ ta ilel Jesús ti skʼanojutike?
10 Laj yakʼ xkuxlejal ta jtojolaltik li Jesuse. Ti jech oy ta yoʼonton cham ta jtojolaltik li Cristoe yikʼaluk van jaʼ li smukʼta vinajeb ti jaʼ noʼox stuk lekil Ajvalile (kʼelo Salmo 40:6-10). Xi laj yal stuke: «Muʼyuc bochʼo jech toj ep cʼanel yuʼun, muʼyuc bochʼo xuʼ ta xacʼ sba ta milel ta scoj li bochʼo lec scʼopan sba xchiʼuque» (Juan 15:13). Li ajvaliletik ta balumile tspasik ta jkʼulej ta stakʼin krixchanoetik, yan li Jesuse laj yakʼ xkuxlejal ta stojolal li krixchanoetike (Mat. 20:28).
Tojobtasbil yuʼun Dios sventa xichʼ tabel sbalil li matanal pojelal laj yakʼe
11. ¿Kʼu yuʼun xuʼ jpat sjunul koʼontontik ta stojolal Jesús kʼuchaʼal Jpojvanej?
11 Ta melel, sta-o tajek ti jaʼ Mero Bankilal Pale kuʼuntik li Jesuse, ti jaʼ chakʼ jtabetik sbalil ti laj yakʼ sba ta matanale. Jech, ti kʼuyelan ay xchol mantale laj yakʼ kiltik kʼusi tspas kʼuchaʼal Jpojvanej li ta Ajvalilal ta Jmil Jabile, ti xuʼ jkʼupintik mi tukʼ chkakʼ jbatike. La xpoxta jchameletik, la xchaʼkuxes animaetik, la smakʼlin epal krixchanoetik, la spajes li ikʼ xchiʼuk nabe xchiʼuk la xpoxta koxoetik, maʼsatetik o yantik (Mat. 8:26; 14:14-21; Luc. 7:14, 15). Ti jech la spase maʼuk ta skoj ti yuʼun chakʼ ta ilel ti tsots yabtel xchiʼuk ti oy sjuʼele, moʼoj, ta xkʼuxul yoʼonton la spas xchiʼuk chakʼ ta ilel ti kʼanvaneme. Kʼalal kʼanbat vokol yuʼun jun vinik ti ip ta kʼaʼemal chamel sventa xpoxtae, xi laj yal ta anil li Cristoe: «Lec oy» (Mar. 1:40, 41). Jaʼ jech chakʼ-o ta ilel xkʼuxul yoʼonton ta stojolal skotol krixchanoetik li ta Jmil Jabile.
12. ¿Kʼuxi chkʼot ta pasel li kʼusi chal Isaías 11:9?
12 Li Cristo xchiʼuk xchiʼiltak ta ajvalilale chakʼik-o li chanubtasel ta mantale, ti jutuk xa mu chaʼmil jabil slikesoj Jesuse. Jaʼ me jech chkʼot ta pasel li kʼusi chal Isaías 11:9: «Chnoj ta yotquinel Mucʼul Dios sbejel li banamile, jech chac cʼu chaʼal nojem ta voʼ li nabe». Ta melel, li chanubtasele te van tsakal skʼoplal li abtelal akʼbat Adán ta slikebale, ti skʼan chabiel li Balumile xchiʼuk li jeltos chonbolometike. Kʼalal mi tsuts li Jmil Jabile kʼot xaʼox me ta pasel li kʼusi tskʼan tspas Dios ta slikebale, ti te chal ta Génesis 1:28, xchiʼuk xtok laj xaʼox me yichʼ tabel lek sbalil li matanal pojelale.
Chanubtasat yuʼun Dios sventa xkʼot ta jchapanvanej
13. ¿Kʼuxi laj yakʼ ta ilel Jesús ti skʼanoj li tukʼilale?
13 «Iʼacʼbat yabtel yuʼun Dios [li Cristo] sventa chcʼot ta Jchapanvanej yuʼun li bochʼotic cuxajtique xchiʼuc li bochʼotic chamenic xae.» (Hech. 10:42.) ¡Tspat tajek koʼontontik ti jaʼ li buchʼu laj yichʼ tʼujele, yuʼun mi jaʼuk onoʼox bu chakʼ sba ta manel ta takʼin, tukʼ yakʼoj-o sba xchiʼuk oy tukʼilal yuʼun, xkoʼolaj kʼuchaʼal kʼuʼil ti slapoj leke! (Isa. 11:5, Ch.) Jech xtok, laj yakʼ ta ilel ti mu jaʼuk bu lek chil li pichʼ-oʼontonale, li buchʼu jecheʼ tskuy sbae xchiʼuk li yantik choplejale, xchiʼuk xtok tsots mantal laj yakʼbe li buchʼutik mu kʼusi sventaik-o svokol yantike (Mat. 23:1-8, 25-28; Mar. 3:5). Muʼyuk laj yakʼ sba ta loʼlael, yuʼun «xotquinbe yut yoʼnton li cristianoetique» (Juan 2:25).
14. ¿Kʼuxi chakʼ ta ilel avi Jesús ti skʼanoj li tukʼilale, xchiʼuk kʼusi skʼan jakʼbe jbatik?
14 Skʼanoj-o tukʼilal li Jesuse, kʼuchaʼal jnaʼojtik leke jaʼ tsbeiltas-o li chol mantale xchiʼuk li xchanubtasel krixchanoetik ti muʼyuk jech ilbil-oe. Chichʼ-o pasel batel li abtelal jaʼ to mi kʼot ta pasel ti kʼuyelan xmuyubaj-o lek yoʼonton Diose, muʼyuk buchʼu xuʼ spajes, mi jaʼuk krixchano, ajvaliletik xchiʼuk mi jaʼuk pukujetik. Ta melel, jnaʼojtik lek ti tspas kanal ta Armagedón li tukʼilal yuʼun Diose (kʼelo Isaías 11:4 xchiʼuk Mateo 16:27). Lek me ti xi jakʼbe jbatike: «¿Mi jech jtalelal kʼuchaʼal Jesús kʼalal ta jvulaʼan krixchanoetik ta chol mantale? ¿Mi lek chi tun ta stojolal Jeova ti bu kʼalal xuʼ kuʼun akʼo mi oy noʼox jvokole?».
15. ¿Kʼusi tskoltautik sventa ta sjunuluk koʼonton jpasbetik yabtel li Diose?
15 ¿Kʼusi tskoltautik sventa ta sjunuluk koʼontontik jcholtik li mantale? Jaʼ ti teuk ta joltik ti jaʼ yabtel Jeovae. Ta melel, jaʼ laj yal ti akʼo xichʼ pasele, ti ta stojolal xNichʼon tsbeiltase xchiʼuk ti chakʼbutik xchʼul espiritu sventa spas kuʼuntike. ¿Mi oy sbalil chkiltik ti ta jkolta jbatik ta spasbel yabtel Dios xchiʼuk li Ajvalil ti tsbeiltas ta xchʼul espiritue? Jaʼ noʼox stuk Jeova xuʼ stijbe yoʼonton mas ta vukub miyon krixchanoetik —«ti muʼyuc chanubtasbilic, xchiʼuc ti muʼyuc yabteli[k]» ch-ilatik yuʼun li krixchanoetik ta balumile— sventa spukik echʼel li aʼyej sventa Ajvalilal yuʼun Dios ta mas ta 236 mukʼtik lumetik xchiʼuk bikʼtal lumetike (Hech. 4:13).
Kakʼtik persa sventa jtatik bendision ta stojolal Cristo
16. ¿Kʼusi chal ta melel ti chkʼot ta pasel li Génesis 22:18?
16 Xi albat li Abraham yuʼun Jeova ta sventa li kʼusi chkʼot ta pasel yuʼun li snitilulale: «Chichʼ bendición scotol li mucʼtic lumetic liʼ ta banamile, yuʼun laj achʼun li cʼusi laj calbote» (Gén. 22:18). Taje jaʼ chakʼ ta aʼiel ta melel ti tstaik bendision li krixchanoetik ti skʼanojik Diose: li bendision chakʼ Nitilulal ti jaʼ li Mesiase. Ta skoj ti snaʼojik ti chtal li bendisionetik taje, xmuyubaj noʼox chtunik ta stojolal Dios.
17, 18. ¿Kʼusi laj yal tspas ta melel Jeova li ta Deuteronomio 28:2, xchiʼuk kʼusi skʼan xal ta jtojolaltik ek?
17 Xi albat ta melel li steklumal Israel ti te likem tal stsʼunobalik ta stojolal moltotil Abrahame: «[Ta sventa li trato la spas Jeova xchiʼuk li j-israeletike] ta xvul ta atojolic, ta xavichʼic scotol li bendición ta sventa ti chachʼunbeic scotol li cʼusitic yalojboxuc Mucʼul Dios cuʼuntique» (Deu. 28:2). Li kʼusi laj yichʼ alele jaʼ me jech chkʼot ta pasel ta stojolal ek li yajtuneltak Dios avie. Jaʼ yuʼun chaʼa, mi ta jkʼan ta jtatik li bendisionetik chakʼ Diose, jchʼunbetik me skotol li kʼusi yalojbutike. Vaʼun mi jech ta jpastike, chkiltik chkʼot ta pasel liʼe: «Ta xvul ta atojolic, ta xavichʼic scotol li [bendisionetike]». Pe ¿kʼuxi chkakʼtik ta ilel ti ta jchʼunbetik skotol li kʼusi yalojbutik Jeovae?
18 Ta melel, kʼalal ta jtsakbetik lek ta mukʼ li sKʼop Jeovae xchiʼuk li veʼlil ta mantal chakʼbutike jaʼ me jech ta jchʼunbetik li kʼusi chalbutike (Mat. 24:45). Taje jaʼ skʼan xal ti skʼan jchʼunbetik smantal Dios xchiʼuk xNichʼone. Xi pʼijubtasvan li Jesuse: «Oy ep bochʼotic jech ta xalic: “Cajval, Cajval”, xiyuticun, pero mu scotoluc ch-ochic yoʼ bu chventainvan li Diose. Jaʼ noʼox ch-ochic li bochʼotic tspasic cʼusi tscʼan yoʼnton li Jtot te oy ta vinajele» (Mat. 7:21). Kʼalal ta jchʼunbetik smantal Diose jaʼ me skʼan xal xtok ti ta slekil koʼontontik ta jchʼunbetik smantal li s-organisasione: li stsobobbail melel yajtsʼaklom Cristoe, ti te «laj yakʼ krixchanoetik kʼuchaʼal matanaletik» li Diose, jaʼ xkaltik, li buchʼutik biiltasbil ta moletike (Efe. 4:8, NM).
19. ¿Kʼusi skʼan jpastik sventa jtatik li bendision chakʼ Diose?
19 Li ta «krixchanoetik kʼuchaʼal matanaletik» laj yakʼ Diose jaʼ skʼoplal li ermanoetik ti ch-abtejik ta Jtsop Jbeiltasvaneje, ti chtunik ta yajkʼopojel skotol li stsobobbail yajtsʼaklom Cristoe (Hech. 15:2, 6). Mu me xchʼay ta joltik ti jaʼ chichʼ tsakel ta venta kʼuyelan jtalelaltik ta stojolal yermanotak ta mantal Cristo kʼalal chkichʼtik chapanel ta mukʼta tsatsal vokolile (Mat. 25:34-40). Jaʼ yuʼun chaʼa, toj tsots me skʼoplal ti ta slekil koʼontontik jchʼunbetik smantal li buchʼutik tʼujbil chbat ta vinajel mi ta jkʼan ta jtatik li bendision chakʼ Diose.
20. 1) ¿Kʼusi abtelal tsots skʼoplal tspasik li «krixchanoetik kʼuchaʼal matanaletik[e]»? 2) ¿Kʼuxi xuʼ xkakʼtik ta ilel ti jkʼanojtik li ermanoetik taje?
20 Li «krixchanoetik kʼuchaʼal matanaletik» laj yakʼ Dios xtoke te skʼoplalik ek li Komite ta jujun Betele, jkʼelvanejetik ta sirkuito xchiʼuk distrito xchiʼuk li moletik ta tsobobbaile, stekelik taje vaʼanbilik yuʼun chʼul espiritu (Hech. 20:28). Li yabtel ermanoetik taje jaʼ ti tstsatsubtasik ta mantal li steklumal Dios sventa «jcotoltic coʼol oy xchʼunojel coʼntontic chijcʼot, jcotoltic chcotquinbetic lec Xnichʼon li Diose, xchiʼuc ta jtatic lec vinical; jech coʼol jchʼieltic chijcʼot jech chac cʼu chaʼal li Cristoe» (Efe. 4:13). Melel onoʼox, jpas muliletik ek li jchabichijetik taje. Akʼo mi jech, kʼalal ta slekil koʼontontik ta jchʼamtik li koltael chakʼike ta me jtatik bendision (Heb. 13:7, 17).
21. ¿Kʼu yuʼun toj tsots skʼoplal ti jchʼunbetik xa noʼox ta anil smantal li xNichʼon Diose?
21 Mu xa jaluk skʼan slajesbe slumal Satanás li Jesuse . Kʼalal mi la slajese jaʼ xa me oy ta skʼob li jkuxlejaltike, yuʼun jaʼ vaʼanbil yuʼun Dios sventa «[chikʼ] batel ta nioʼ sventa cuxlejal» li «epal cristianoeti[ke]» (Apo. 7:9, 16, 17). Jech oxal chaʼa, oyuk me tajek ta koʼontontik jtojtik ta vokol, ta muyubajeluk me jchʼunbetik smantal li Cristoe, ti jaʼ li Ajvalil beiltasbil ta xchʼul espiritu Jeovae.
¿Kʼusi la jchantik li ta...
• Hechos 10:42?
[Sjakʼobiltak sventa xchanobil]
[Lokʼol ta pajina 17]
Laj yakʼ ta ilel ti oy tajek xkʼuxul yoʼonton Jesús kʼalal la xchaʼkuxesbe stseb Jairoe
[Lokʼol ta pajina 18]
Li Jesuse jaʼ tsbeiltas-o li chol mantal ti muʼyuk jech ilbil-oe