¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼuxi xuʼ chakʼ ta vokol ti jmoj oyutik ti kʼalal chkakʼbetik yil yileluk jun krixchano ti lek chkiltike?

Xuʼ xi jnamaj ta stojolal Jeova xchiʼuk ta tsobobbail, yuʼun li tajimol taje ch-ikʼvan batel ta mulivajel. Mi nupunem li buchʼu tsloʼla jolile, xuʼ me xmulivaj xchiʼuk xiʼel van xtuchʼ snupunelik ta registro civil. Ta skoj taje tsyayijesbe yoʼonton li snup xchiʼil ti muʼyuk smule xchiʼuk li yalab xnichʼnabe. Ta melel, li talelal taje chchʼakvan (15/9, pajina 19).

• ¿Buchʼu li anjel la stak batel Dios sventa tsbeiltas lokʼel ta Egipto li j-israeletike? (Éxo. 23:20, 21.)

Ta skoj ti xi laj yal li Jeovae: «Yuʼun te oy ta yut yoʼonton li jbie», xuʼ jnoptik ti jaʼ li sbaʼyel Nichʼone, ti Jesús la sbiin kʼalal echʼem xaʼox jayibuk sigloe (15/9, pajina 21).

• ¿Mi ta xlaj li Balumile?

Li Vivliae muʼyuk chchanubtasvan ti chlaj li Balumile (Sal. 104:5). Li Jesucristoe laj yal ti oy jvokʼ krixchanoetik kuxul chkom mi tal li slajeb kʼusitik chlaj skʼoplale (Mat. 24:21, 22) (1/10, pajina 5).

• Mi oy kʼusi la spas anup achiʼil ti chopol chavaʼi aba yuʼune, ¿kʼusi stakʼ xa pas sventa oyuk noʼox smelolal xavalbe?

Nopo kʼuyelan chavalbe ti jaʼuk junuk avamigo o avajval ta avabtel li kʼusi kʼot ta pasele. Skʼan xa tsʼibaik ta jujuntal ti kʼu yuʼun skʼan xavichʼ abaik ta mukʼe xchiʼuk ti ta smelolal xa chiʼin abaik ta loʼile, ti maʼuk noʼox jech kʼuchaʼal junuk avamigo o avajval ta avabtele (Col. 4:6) (1/10, pajina 12).

• ¿Kʼu yuʼun skʼan xkaltik ta jamal li jmultike?

Li srasonal mas tsots skʼoplal sventa xkal ta jamal li jmultike, mi ta stojolal jun jchiʼiltik o mi ta stojolal Dios, jaʼ ti ta jkʼan lek xilutik li Diose. Li Jesucristoe laj yal ti skʼan jchapan jkʼoptik xchiʼuk yantik xchiʼuk ti lekuk xkil jbatike (Mat. 5:23, 24). Jaʼ jech chaʼa, mi ta jbikʼtajes jbatik ta stojolal Jeova xchiʼuk ti ta jkʼanbetik pertone, lek chilutik xchiʼuk chakʼbutik sbendision (1 Ped. 5:6) (1/10, pajina 24).

• ¿Kʼu yelan chil Jeova kʼalal tsaʼ kʼusi tspak-o skʼoplalik li buchʼutik oyik ta melel relijione?

«Toj echʼ noʼox tsots.» «Mu jkʼan jpas chkaʼi.» «Yuʼun mu xi xokob.» «Mu spas kuʼun chkaʼi.» «Chopol chkaʼi li kʼusi la spasbikune.» Li kʼusitik laj xa kaltike maʼuk me srasonal sventa jpak-o jkʼoplaltik ti mu xa jchʼunbetik li smantaltak Diose (15/10, pajina 12 kʼalal ta 15).

• ¿Kʼusi xuʼ jpastik sventa stsatsubtas koʼontontik li tsobajeletike?

Baʼyel jchapan jbatik. Batik ta skotol tsobajeletik. Sob xi jkʼot. Kichʼtik echʼel li vunetik chichʼ chanele. Mu me kʼusi xchʼay koʼontontik. Kal me jloʼiltik. Mu me toj jaluk xkal jloʼiltik. Ketʼes me li jpartetike. Jpatik me oʼontonal. Jchiʼintik me ta loʼil li yantik kʼalal skʼan toʼox tsobajele xchiʼuk mi tsutse (15/10, pajina 22).

• ¿Kʼusi chakʼ jchantik ti tsʼuj ta sujel yuʼun xchiʼiltak li Aarone?

Kʼalal jaʼo chʼabal te oy li Moisese, li j-israeletike laj yalbeik Aarón ti akʼo spasbat junuk sdiosike, vaʼun la spas li kʼusi kʼanbate. Taje jaʼ me chakʼ kiltik ti maʼuk noʼox jech chkʼot ta stojolal kerem-tsebetik ti tsujat yuʼun xchiʼilike. Xuʼ jaʼ jech snuptanik ek li krixchanoetik ti oy xa sjabilalik ti oy ta yoʼonton tspasik li kʼusi leke. Skʼan me stsal kuʼuntik li sujel taje (15/11, pajina 8).

• ¿Kʼu yuʼun tsots skʼoplal ti ta sjunul koʼontontik xi jkʼejin li ta tsobajeletike?

Oy xa mas ta sien jabile, li revista Zionʼs Watch Tower ta inglese, xi laj yale: «Skʼejintael li kʼusi melele jaʼ jtos kʼusi lek stakʼ pasel sventa x-och ta snopben xchiʼuk ta yoʼonton mantal li steklumal Diose». Ta skoj ti ep te lokʼem ta Vivlia li sletrail kʼejoje, mas me tstsʼun sba ta koʼontontik mantal mi ta jkomes ta joltike (15/12, pajina 22).