Jnopbetik skʼoplal li kʼusi spasoj Jeova ta jtojolaltike

KʼALAL mu toʼox jaluk xchaʼkuxiel li Cristoe, te xbatik chaʼvoʼ yajtsʼaklomtak ta sbelel Jerusalén ti chbat ta Emause. «Cʼalal jaʼo chloʼilajique, te ital ta spatic li Jesuse. Jech te la xchiʼinic batel ta xanubal. Pero imacbat satic, muc xotquinic me jaʼ li Jesuse. Jech ijacʼbatic yuʼun li Jesuse: “¿Cʼusi ti chaloʼiltaic tal ta be laj caʼye?”, xut. Te ivaʼiic, ep chat yoʼntonic.» ¿Kʼu yuʼun chat yoʼontonik? Yuʼun spatoj yoʼontonik ti chpojatik ta stojolal jromaetik li steklumal Israele. Pe muʼyuk xkʼot ta pasel, yuʼun laj ta milel li Jchanubtasvanej yuʼunike. Jaʼ yuʼun stalel onoʼox ti jech laj yaʼi sbaike (Luc. 24:15-21; Hech. 1:6).

Li Jesuse lik rasonajuk xchiʼuk li chaʼvoʼ yajtsʼaklomtake. «Jech yepal lic yalbe sba scʼoplal stuc ti tsʼibabil ta chʼul cʼop ti oy ta jujupoc svuntac ti Moisese, ti xcholet laj yal batel ti cʼot cʼalal to ta jujupoc svuntac ti cʼusi laj stsʼiba comel ti yan jʼalcʼopetique.» La svulesbe ta sjolik ti kʼalal la spas yabtel liʼ ta Balumile, ep kʼusitik tsots skʼoplal kʼot ta pasel ti la stsatsubtasbe yoʼonton li yajtsʼaklomtake. Kʼalal yakal chaʼiik li kʼusitik chchapbe batel smelolale, kʼataj ta muyubajel li at-oʼontone. Ta mas tsʼakal li ta akʼobal taje, xi laj yalbe sbaike: «Cʼalal yacal ta xiyalbotic talel ta be smelol ti cʼusi tsʼibabil ta chʼul cʼope, ¿mi mu lajuc caʼitic ta coʼnton[t]ic ta melel ti jun yutsile?» (Luc. 24:27, 32, Ch). ¿Kʼusi chchanubtasutik li kʼusi kʼot ta nopel yuʼunik li yajtsʼaklomtak Jesuse?

Kʼalal muʼyuk chkʼot ta pasel li kʼusi jmalaojtike

Li chaʼvoʼ yajtsʼaklom Jesús ti te xbatik ta sbelel Emause, chat yoʼontonik ta skoj ti muʼyuk xkʼot ta pasel li kʼusi smalaojike. Jech laj yaʼiik kʼuchaʼal chal Proverbios 13:12 ti xie: «Me mu jtatic ta ora li cʼusi ta jmalatique ta xloʼilaj coʼntontic». Jaʼ jech chkʼot ta pasel li avi eke: jlom li voʼotike —mas to li buchʼutik oy xa ta sjaylajunebal jabil tukʼ yakal xi jtun ta stojolal Jeovae— jnopojtik van ti jelavem xaʼox avi «li tsots vocole» xchiʼuk ti te xa oyutik ta achʼ balumil ti jechuke (Mat. 24:21; Apo. 7:14, Ch). Chkaʼibetik smelolal chaʼa ti chkat jutuk koʼontontik kʼalal muʼyuk chkʼot ta pasel li kʼusi jmalaojtike.

Pe jvules ta joltik ti chaʼvoʼ yajtsʼaklomtak Jesuse, lik muyubajikuk yan velta kʼalal koltaatik yuʼun Jesús sventa chakʼ ta yoʼontonik li albil kʼopetik ti kʼotemik xaʼox ta pasele, ti laj yilik kʼot ta pasel jlome. Mi jech ta jpastik eke,  xuʼ xi jmuyubaj yan velta ek xchiʼuk tstsal kuʼuntik li at-oʼontone. Jun mol ta tsobobbail ti lek xa chanem ti Michael sbie, xi laj yale: «Mu jaʼuk xbat ta avoʼonton li kʼusi muʼyuk to spasoj Jeovae. Jaʼ batuk ta avoʼonton li kʼusi spasoj xae». ¡Toj echʼ xa noʼox lek li tojobtasel taje!

Li kʼusi spasoj xa Jeovae

Nopo jlomuk li kʼusitik toj alakʼik sba spasoj xa Jeovae. Xi laj yal li Jesuse: «Ti buchʼu ta xcʼot ta yoʼnton ta xchʼunelune, jaʼ jech ta spas ec jech cʼu chaʼal ta jpase. Xuʼ ti xʼechʼ to xjelav ta spas [ti stuke]» (Juan 14:12, Ch). Li yajtunelutik Dios avie yakal jpastik li abtelal ta chol mantal ti muʼyuk bu ilbil-o jeche. Mas ta vukub miyon yajtsʼaklomtak Cristo spatoj yoʼonton kuxul chkomik mi tal li tsatsal vokolile. ¡Muʼyuk onoʼox bu jech yepal ilbil yajtuneltak Jeova ti chtunik ta stojolal ta epal lumetike! Li Jeovae jaʼ skoltaoj li yajtuneltak sventa chkʼot ta pasel li kʼusi laj yal xNichʼone. Ta melel, li steklumale «xʼechʼ to xjelav» spasoj ti jaʼ xkom to ti la spas li Jesuse.

¿Kʼusi to mas spasoj ta jtojolaltik li Jeovae? Yakʼoj akʼo xlokʼik ta chopol balumil epal krixchanoetik ti tukʼ yoʼontonike xchiʼuk akʼo x-ochik li ta paraiso chkaltik ti bu xchapanoj ta sventaike (2 Cor. 12:1-4). Nopo jlikeluk avaʼi li kʼusitik oy li ta paraiso chkaltike xchiʼuk ti xuʼ jtatik li kʼusitik taje. Jech kʼuchaʼal liʼe, kʼelo noʼox avil li skʼejobil livroetik avuʼune o li ta Salon sventa Tsobobbaile. Kʼelo li Índice de las publicaciones Watch Tower o kʼelo li ta Watchtower Library. Chikintao avaʼi junuk drama lokʼem ta Vivlia. Vuleso ta ajol li kʼusitik la avil xchiʼuk li kʼusi laj bakʼanuk ta jun mukʼta tsobajel ti mu to jaluk yechʼele. Nopo xtok ti kʼuyelan lek xkil jbatik xchiʼuk li kermanotaktike. ¡Toj echʼ xa noʼox lek yoʼonton Dios ti yakʼoj ep jveʼeltik ta mantale xchiʼuk ti oy kermanotaktik ti lek xkʼanvanike! Ta melel, nakalutik xa ta jun paraiso yaʼeluk.

Xi laj yal li jtsʼibajom yuʼun salmo Davide: «Mucʼul Dios, Dios cuʼun, toj ep xa li cʼusitic labalic sba laj apase; liʼ oy o avoʼnton ta jtojolcutic» (Sal. 40:5). Jech, mi ta jnopbetik skʼoplal li kʼusitik toj alakʼik sba spasoj Jeovae xchiʼuk ti ta slekil yoʼonton tsnop ta jtojolaltike, ta me jchaʼtsak kipaltik xchiʼuk tukʼ chkakʼbetik batel yipal ta spasel li abtelal chkakʼbetik ta sjunul koʼontontik li jTotik ta vinajele, li Jeovae (Mat. 24:13).

[Lokʼol ta pajina 31]

Li Jesuse la skolta yajtsʼaklomtak ta snopbel skʼoplal li kʼusi spasoj xaʼox Jeova ta stojolalike

[Lokʼol ta pajina 32]

Vuleso ta ajol li kʼusitik la avil xchiʼuk li kʼusi laj bakʼanuk ta jun mukʼta tsobajel ti mu to jaluk yechʼele