Sbi Dios ta stenlejaltik

SAINT MORITZ. ¿Mi oy avaʼioj li biil taje? Yikʼaluk van, yuʼun jaʼ jun jteklum ti chkʼot jvulaʼaletik xchiʼuk ti lek ojtikinbil ta spʼejel Balumile. Pe li jteklum taje, ti te oy ta suresteal Suiza ti stsʼakinoj Italiae, maʼuk noʼox stuk lek kʼupil sba ti voʼne xa tajek chkʼot svulaʼanik li stenlejaltik Engadinae, ti te kakal ta tayal vitsetik ta Suiza ti pim staivale. Jech xtok chkʼot skʼelik li Parque Nacional Suizo, ti toj kʼupil sba li teʼtikaltike, li tsʼiʼleletike xchiʼuk li chonbolometike, ti tskʼupil kʼopta li Mukʼta Jpasvanej kuʼuntike, li Jeovae (Sal. 148:7-10). Maʼuk noʼox li kʼupil kʼoptael taje, oy to yan, ti vinajem tal skʼoplal kʼalal to avi ti lik tal leʼ xa ta oʼlol siglo 17.

Oy kʼusi chchʼay-o koʼontontik yuʼun li naetik ta stenlejaltike. Ep li ta naetik taje tsʼibabil sbi Dios li ta yelovale, jech kʼuchaʼal li ta sjol tiʼnae.  Leʼ xa ta jayibuk sigloe, nopem toʼox xaʼiik ti oy kʼusi tstsʼibaik kʼalal tstʼujomtas li snaike, mi tsbonik, anbil ta ton o chjuxbeik li ta spakʼobale. Li ta lokʼole te chavil jpʼej na ta bikʼit lum ta Bever ti oy kʼusi te tsʼibabil ti xi chal kʼalal ta jelubtastike: «Ta sjabilal 1715. Jaʼ slikeb li Jeovae xchiʼuk jaʼ slajeb li Jeovae. Xuʼ kuʼuntik ta skoj Dios skotol li kʼusitike xchiʼuk muʼyuk kʼusi xuʼ mi muʼyuk chkoltavane». Jech kʼuchaʼal chkiltike, li voʼneal tsʼib taje chib to velta chalbe skʼoplal li sbi Diose.

Mi chi jbat ta steklumal Madulaine, oy kʼusi tsʼibabil ta jtatik ti mas to voʼnee: «Salmo 127. Mi maʼuk tsvaʼan naʼ li Jeovae, altik ch-abtejik li jpasnaetike. Lucio Rumedio. Ta sjabilal 1654».

¿Kʼu yuʼun jech chil skotol krixchanoetik li sbi Diose? Li ta skʼakʼalil Reforma protestante, li Vivliae laj yichʼ tsʼibael ta romanche, jun kʼop ti likem tal ta latin kʼop ti chichʼ tunesel ta Engadinae. Jech, jaʼ li baʼyel livro ti laj yichʼ jelubtasel li ta kʼop taje. Li skʼelel sKʼop Diose kʼot ta yoʼontonik li jnaklejetike. Jaʼ yuʼun kʼalal oy kʼusi tstsʼibaik ta yeloval snaike, maʼuk noʼox la stsʼiba sbiik, yuʼun la stsʼibaik xtok tekstoetik ta Vivlia ti te tsakal sbi Diose.

Akʼo mi voʼne xa tajek, tskʼupil kʼoptabeik to sbi Dios li tsʼibetik taje. Mi te nakalot li ta stenlejaltik taje o mi chbat avulaʼane, chkalbotkutik avaʼi ti akʼo xa chanbe mas skʼoplal li Mukʼul Dios ta yan na ti te tsʼibabil sbie: li Salon sventa Tsobobbail yuʼun yajRextikotak Jeova ta Bever.

[Stojel ta vokol ta pajina 7]

© Stähli Rolf A/age fotostock