Ep me sbalil kʼalal chkakʼ kipaltike

LI AKʼOBAL SVENTA YICHʼEL TA MUKʼ JEOVA TA KUTSʼ KALALTIK xchiʼuk li xchanel Vivliae jaʼ li kʼusi toj lek xuʼ jpastik sventa jchanubtas li kalab jnichʼnabtik sventa xkʼot ta pasel kuʼuntik liʼe: «Tojobtasic lec, chanubtasic lec ta sventa li Cajvaltique» (Efe. 6:4). Pe jnaʼojtik ti anil onoʼox chchʼajub li ololetike. ¿Kʼusi xuʼ spas li totil-meʼiletik sventa mu xchʼajub li yalab xnichʼnabike? Jkʼeltikik kʼusi spasoj jlom totil-meʼiletik ta Estados Unidos.

Xi chal George ti te nakal ta Californiae: «Kʼalal mas toʼox bikʼitik li jnichʼnabe, chkakʼ persa xchiʼuk kajnil ti kʼupiluk sba ti kʼuyelan chi chanunajkutike. Bateltike jech ta jlap jkʼuʼ jpokʼkutik kʼuchaʼal ta voʼne sventa chkakʼkutik ta ilel li kʼusi chal li Jlivro ti chal loʼiletik ta Vivliae. Oy kʼusitik la jpaskutik sventa chkakʼkutik ta ilel li kʼusi chkalbekutik skʼoplale, jech kʼuchaʼal espada, vaxton [cetro] xchiʼuk mochetik. Chi tajinkutik xtok ti xi chkalkutike: “Alo kaʼitik buchʼuun”, taje ta Vivlia ta jlokʼeskutik un. La jpaskutik jtos tajimol ti lek xkaʼikutik xtoke, jaʼ ti oy kʼusitik ta jakʼkutik ti kʼunik ta tabel stakʼbil jlome, yan li jlome tsotsik. Ep kʼusitik ta jpaskutik, ta jpaskutik uni neneʼ arka o mi moʼoje ta jcholbekutik sjabilal ti kʼusi ora kʼotanuk ta pasel li kʼusi chal Vivliae. Ta jpaskutik divujar xtok li buchʼutik te skʼoplal ta Vivliae xchiʼuk li yan kʼusitik te chale. Li avie jnopojkutik ta jpaskutik divujar li kabtejebtik ta mantal chal ta Efesios 6:11-17. Vaʼun chkalbekutik skʼoplal ta jujuntal kʼusi sventa li jujutos abtejebale. Kʼalal jech ta jpaskutike jaʼ tskoltaunkutik sventa jkʼupinkutik li chanun ta kutsʼ kalalkutike».

Xi chvul ta sjol li Debi ta Michigane: «Li voʼon xchiʼuk jmalale toj tsots laj kaʼikutik sventa lekuk skʼupin chanubtasel li jtsebkutik ti lapal ta oxib jabile. Jun velta kʼalal jaʼo yakal ta jkʼelbe sloʼilal Isaac xchiʼuk Rebeca li ta Jlivro ti chal loʼiletik ta Vivliae, la jtunes chib munyekaetik ti laj kakʼ kʼopojuk yilele. ¡Jaʼ to la stsak ta mukʼ un li kʼusi chkalbee! Echʼ jayib u une ep ta velta jel yabtel li munyekaetik taje. Kʼalal chlaj koʼontonkutik xchanel jun loʼile, te xtal xbat ta yut na sventa tsaʼ ixtolaletik xchiʼuk yan kʼusitik sventa chakʼ ta ilel li kʼusi la jchankutike. ¡Xkoʼolaj kʼuchaʼal yakal tsaʼ meʼtakʼin yilel! Sventa chakʼbe ta ilel sna Rahab xchiʼuk li tsajal chʼojon te jipile chbat saʼ tal uni kajail xonobil xchiʼuk jlik tsajal chʼojon. Ta jtsʼotkutik ta yok mes jun ixtolal kiletel chon ti cinco pies [jun metro xchiʼuk oʼlol] snatile, vaʼun jaʼ jech chkakʼkutik ta ilel li chon ta kovre [bronse] chal ta Números 21:4-9. Te ta jkʼejkutik ta jun mukʼta volsa li kʼusitik ta jtuneskutike. Toj lek chkilkutik li kuni kʼox tsebkutik kʼalal lek tajek chaʼi chchoti ta sala sventa tskapulan li kʼusitik tikʼil ta volsa ta sventa loʼiletik ta Vivliae, vaʼun chlik xchap li loʼiletike, bateltike mu jechuk tajek chbat ta alel yuʼun».

Mu onoʼox kʼunuk ta tsʼitesel li ololetike, maʼuk noʼox skʼan xi jchanunaj jujun xemana sventa x-ayan ta yoʼonton kuʼuntik ti xtunik ta stojolal Jeovae. Pe li yichʼel ta mukʼ Jeova ta kutsʼ kalaltik xchiʼuk li xchanel Vivliae jaʼ li kʼusi baʼyel skʼan xichʼ pasel sventa lekuk chanubtasbilik ta smantal Jeova xchʼiik tale. Ta melel, ep me sbalil kʼalal chkakʼ kipaltike.