¿Mi ep sbalil chkiltik li bendision jtaojtike?

MU TOʼOX jaluk skolelik lokʼel ta mosoil ta Egipto li j-israeletik ta jun skʼelobil juʼelale. ¡Xmuyubajik tajek ti muʼyuk xa kʼusi chmakatik sventa xichʼik ta mukʼ Jeovae! (Éxo. 14:29–15:1, 20, 21.) Pe ta anil noʼox jel li stalelalike, yuʼun likik ta vulajetel. Maʼuk la svules ta sjolik li kʼusitik spasoj Jeova ta stojolalike, jaʼ lik yakʼ ta yoʼontonik ti mu toj lekuk ti bu nakalike xchiʼuk ti ta taki xokol balumil oyike. Jaʼ yuʼun «lic sjolic ta scontrainel ti Diose xchiʼuc ti Moisese, ti xi lic yalilanique: “¿Cʼu chaʼal laj aloqʼuesuncutic talel ta Egipto? ¿Mi yuʼun tal amiluncutic ta sbajtical banomil yaʼyel? Yuʼun chʼabal xa ti caʼalcutique, mi jaʼuc jveʼelcutic. ¡Yuʼun xtaet xa ta slajesel ta xcaʼicutic ti [mu maná] veʼlil ti muʼyuc smuile!”» (Núm. 21:5, Ch).

Echʼ jayib siglo ta mas tsʼakale xi laj yalbe Dios ta jun kʼejoj li ajvalil Davide: «Jchʼunoj ti ep cʼuxun ta avoʼntone; xcuxet noʼox coʼnton, yuʼun jnaʼoj ti chacoltaune. Xilaʼet noʼox ta sqʼuejintael li Mucʼul Diose, yuʼun toj lec li cʼusi la spas ta jtojole» (Sal. 13:5, 6). Li ajvalil ta voʼne Israel taje muʼyuk bu xchʼay ta sjol ti ep ta velta laj yilbe slekil yoʼonton Diose. Nopem xaʼi tsnopbe skʼoplal li kʼusitik lek pasbate (Sal. 103:2). Jaʼ jech toj ep kʼusitik lekik spasoj ta jtojolaltik li jTotik ta vinajel eke, pe yikʼaluk me xchʼay ta joltik. Ti kʼusi tskoltautike jaʼ ti jnopbetik skʼoplal li epal bendision jtaojtik avie.

«Mero xchiʼil sbaic xchiʼuc [li] Mucʼul Diose»

Xi kʼejin li jtsʼibajom yuʼun salmoe: «Li bochʼo mero xchiʼil sbaic xchiʼuc Mucʼul Diose jaʼ li bochʼo yichʼoj ta muqʼue» (Sal. 25:14). ¡Jaʼ jun mukʼta matanal ti xuʼ mero jchiʼil jbatik xi jkʼot xchiʼuk li Jeovae, akʼo mi lum achʼelutik noʼox! Kʼux ta alel, pe yikʼaluk van mu xa masuk ta jkʼopontik li jTotik ta vinajel ta  skoj ti ep kʼusitik ta jpastik jujun kʼakʼale. Mi jeche, skʼan me jnoptik lek ti xuʼ sok ti kʼuyelan xkil jbatik xchiʼuke. Ta skoj ti jaʼ kamigotik li Jeovae, tskʼan ti jpat koʼontontik ta stojolale, ti ta sjunul koʼonton xkalbetik li kʼusi chi jxiʼoe, li kʼusitik oy ta koʼontontike xchiʼuk ti jchapbetik li kʼusitik ta jvul-o koʼontontike (Pro. 3:5, 6; Fili. 4:6, 7). Ta melel, tsots me skʼoplal ti jkʼeltik lek kʼuyelan ta jpastik li orasione.

Kʼalal lik snop kʼuyelan tspas orasion jun kerem ti Paul sbie, laj yakʼ venta ti skʼan slekubtase. a Xi chal kaʼitike: «Jaʼ nop xkaʼi ti jaʼ noʼox chkalilan ta j-orasion li kʼusi komem xa ta jole». Lik saʼ mantal ta Índice de las publicaciones Watch Tower, vaʼun laj yakʼ venta ti oy van 180 orasionetik chalbe skʼoplal li sKʼop Diose. Te laj yakʼ ta ojtikinel yajtuneltak Dios ta voʼne li kʼusi oy ta yoʼontonik ta melele. Xi chal li Paule: «Kʼalal la jnopbe lek skʼoplal ti kʼuyelan la spasik orasione, jaʼ te la jchan ti skʼan jamal lek xkal li kʼusitik ta j-orasione, taj une jaʼ skoltaojun sventa ta sjunul koʼonton jkʼopon li Jeovae. Li avi une xi muyubaj noʼox chi nopaj ta stojolal».

«Ta smacʼlin [...] ti cʼalal yorail ta xveʼique»

Jtaojtik yan bendision xtok, jaʼ li epal melel mantaletik ta Vivlia ti yakʼojbutik Dios ti xkoʼolaj kʼuchaʼal epal veʼlile. Jaʼ yuʼun mu labaluk sba ti xi chkʼot ta jtojolaltike: «Xcuxet noʼox yoʼntonic; solol noʼox yoʼnton chqʼuejinic» (Isa. 65:13, 14). Pe skʼan me jkʼel jbatik un, yuʼun mu me jkʼantik xchʼayes jmuyubajeltik ta mantal li kʼusitik chopole. Jech kʼuchaʼal liʼe, mi ta jtsʼetanbetik xchikinal li kʼusitik tspukbeik skʼoplal li jvalopatinej mantaletike xuʼ me xchʼay koʼontontik. Jech xtok, xuʼ me mu xa jkʼuxubintik ti chkichʼtik makʼlinel ta mantal ta yorail yuʼun li «jʼabtel ti jun [«tukʼ», NM] yoʼnton [...], ti lec bije», ti jaʼ vaʼanbil yuʼun Jeovae (Mat. 24:45-47).

Jaʼ jech la snuptan li André ti oy xaʼox ta sjayibal jabil chtun ta stojolal Jeovae. La xchʼun li kʼusi chal jvalopatinej mantaletike, yaloj ti mu kʼusi chopol tsnuptan ta skoj ti jlikel noʼox tskʼel li kʼusitik chalik ta Internete. Xi chvul ta sjole: «Kʼalal lik jkʼele jaʼ labal sba laj kil ti tspakbeik skʼoplal li kʼusitik melel ta alele. Ta xa jkʼan chkiktabe s-organisasion Jeova laj kaʼi kʼalal mas ta jkʼel batel li kʼusi chalike. Laje la jkʼelbe lek smelolal li kʼusitik chopol chalik ta stojolal yajrextikotak Jeovae, vaʼun laj kakʼ venta ti jecheʼ jchanubtasvanejetike xchiʼuk ti toj manyaik li jvalopatinej mantaletik taje. Jecheʼ tsjutik kʼalal chakʼbeik sprevailtak ta alel li kʼusitik chalik ta jtojolaltike. Jaʼ yuʼun lik jkʼel yan velta li jvuntike xchiʼuk lik batkun ta tsobajeletik. Ta ora noʼox laj kakʼ venta ti ep xa kʼusitik muʼyuk jchanoje». Jaʼ jun muyubajel, yuʼun sut ta tsobobbail li Andree.

«Li quermanotactique»

Jaʼ me jun mukʼta bendision yakʼojbutik Jeova ti te kapal jkʼoplaltik li ta jun utsʼ-alalil ta spʼejel Balumil ti chkʼanvanike xchiʼuk ti jmoj oyike (Sal. 133:1). Jaʼ yuʼun xi laj yal Pedroe: «Cʼanic me scotol li quermanotactique» (1 Ped. 2:17, Achʼ Testamento, ta skʼop Chenalhó). Ta  melel, kʼalal te oyutik li ta tsobobbaile xi jmuyubaj noʼox ta jkʼupintik ti skʼanojutik xchiʼuk ti tskoltautik li jtot jmeʼtik xchiʼuk li jchiʼiltaktik ta vokʼel ta mantale (Mar. 10:29, 30).

Pe xuʼ me mu xa lekuk xkil jbatik xchiʼuk li kermanotaktik ta skoj kʼusiuk noʼoxe. Jech kʼuchaʼal liʼe, xuʼ van ta ora noʼox chopol chkaʼitik li spaltail yantike, vaʼun jaʼ chlik chopol kʼopojkutik-o ta stojolalik. Mi laj kakʼtik venta ti oy bu jech ta jpastike, skʼan me jvules ta joltik ti skʼanoj li yajtuneltak Jeova akʼo mi oy spaltailike. Skʼan me jvules ta joltik liʼ xtoke: «Me ta xcaltic ti muʼyuc jmultique, ta jloʼla jba jtuctic; muʼyuc to ta coʼntontic li cʼusi melele» (1 Juan 1:8). Jaʼ me mas lek ti jpastik liʼe: «Talbat xatsʼicbe abaic [...]. Pasbo abaic perdón» (Col. 3:13).

Jun tseb ti Ann sbie chopol kʼusi la spas, vaʼun jaʼ to te laj yakʼ venta ti toj ep sbalil ti te oyutik xchiʼuk li kermanotaktike. Li tsebe jaʼ jech la spas kʼuchaʼal laj yal Jesús ta slokʼolkʼop ta sventa li jtoyba nichʼonile, lokʼ echʼel li ta s-organisasion Jeovae; pe laj yakʼ venta ti mu lekuk ti kʼusi la spase, jaʼ yuʼun sut tal li ta mantale (Luc. 15:11-24). ¿Kʼusi te laj yakʼ venta un? Xi chal kaʼitike: «Ti kʼalal li sut tale mas xa jkʼanoj stekel li ermanoetike, manchuk mi oy spaltailik. Ta ora toʼox ta jchopol kʼoptaik, pe li avi une mu xkakʼ ti oy kʼusi xtal smakune, yuʼun ta jkʼan ta jkʼupin-o li bendision ti te jchiʼuk-o li kermanotake. Li ta tsobobbaile xkoʼolaj xa kʼuchaʼal te oyutik ta jun paraiso yaʼeluk. Mu me kʼusi ta jtatik-o ti ta jtentik komele, yuʼun mu kʼusi chakʼbutik ta jyalel li balumile».

Jtojtik me ta vokol li bendisionetike

Li spatobil koʼontontik ti chakʼbe slajeb vokoliletik li Ajvalilal yuʼun Diose, mu kʼusi xkoʼolaj-o ta jyalel. ¡Laj van jtojtik tajek ta vokol kʼalal laj kaʼitik ta sba velta li kʼusi chakʼ li Ajvalilal yuʼun Diose! Jech ta jpastik kʼuchaʼal li jpʼolmajel li ta lokʼolkʼope, yuʼun sventa tsman «li natsʼil ti bu toyol stojole, chbat xchon scotol li cʼusitic oy yuʼune» (Mat. 13:45, 46). ¿Mi muʼyuk xa van sbalil laj yil ta mas tsʼakal li kʼusi la smane? Muʼyuk bu chakʼ kaʼitik Jesús mi jech la spas. Li voʼotik eke skʼan me jtojtik ta vokol li kʼusi yan sba yutsil ta jtatik ta jelavele (1 Tes. 5:8; Heb. 6:19).

Jkʼelbetik skʼoplal Jean ti oy xa mas ta 60 jabil yakal chtun ta stojolal Jeovae. Xi chale: «Ti kʼusi skoltaojun sventa teuk noʼox ta jol li Ajvalilal yuʼun Diose jaʼ ti chkalbe yaʼiik li krixchanoetike. Toj lek chkaʼi kʼalal chkil ti xmuyubajik noʼox kʼalal chaʼibeik smelolal kʼusi jaʼ li Ajvalilal yuʼun Diose. Kʼalal chkil kʼuyelan chjel xkuxlejal li buchʼu ta jchanubtas ta Vivlia ta skoj li aʼyej chkaltik batele, xi ta jnope: “¡Toj labal xa noʼox sba li mantaletik ta jpukbetik skʼoplale!”».

Jech kʼuchaʼal chkiltike ep srasonal kuʼuntik sventa ta jtojtik ta vokol li bendision chakʼbutik Diose. Melel onoʼox, li avie ta jnuptantik kontrainel, chamel, malubel, chcham kutsʼ kalaltik, chkil jvokoltik ta takʼin xchiʼuk oy buchʼutik ch-ipajik ta at-oʼonton. Pe jnaʼojtik ti j-echʼel be noʼox maʼ taje. Li ta achʼ Balumil kʼalal ch-ajvalilaj xaʼox li Ajvalilal yuʼun Diose chʼabal xaʼox me vokoliletik, vaʼun maʼuk noʼox ta jkʼupintik li bendisionetik avie, yuʼun ta jkʼupintik yan bendisionetik xtok (Apo. 21:4).

Jech oxal chaʼa, jaʼuk me kakʼ ta koʼontontik li bendisionetik jtaojtik avie, jech kʼuchaʼal oy tajek sbalil laj yil li jtsʼibajom yuʼun salmo ti xi laj yale: «Mucʼul Dios, Dios cuʼun, toj ep xa li cʼusitic labalic sba laj apase; liʼ oy o avoʼnton ta jtojolcutic. Muʼyuc bochʼo yan coʼol jech chac cʼu chaʼal voʼot. Chac cal caʼay, chac jpuc caʼay li cʼusi lec apasoje, pero mu xuʼ cuʼun yalel scotol, yuʼun toj ven ep ta jyalel» (Sal. 40:5).

[Tsʼib ta yok vun]

[Lokʼol ta pajina 18]

Li Jeovae chakʼbutik sbendision, yuʼun tskoltautik ta mantal sventa stsʼik kuʼuntik li vokoliletike