¿Mi jkontrainojtik li kʼusi chopole?
¿Mi jkontrainojtik li kʼusi chopole?
«Jaʼ chacontrain li cʼusi chopole.» (HEB. 1:9)
1. ¿Kʼu yelan skʼan xkʼanvanik laj yalbe yajtsʼaklomtak li Jesuse?
XI LAJ yalbe jun velta yajtsʼaklomtak Jesús ti kʼuyelan skʼan stalelalike: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Taje jaʼ jun mantal laj yalbe yajtsʼaklomtak ti akʼo skʼan sbaik ta melel ta jujuntale, ti jaʼ chvinajik-o ti jaʼik melel yajtsʼaklomtake. Xi albatik jun velta xtoke: «Cʼuxubino avajcontraic; cʼopanbeic Dios ta stojol li bochʼotic chayutsʼintaoxuque» (Mat. 5:44).
2. ¿Kʼusi skʼan jkontraintik li yajtsʼaklomutik Cristoe?
2 Pe maʼuk noʼox laj yalbe yajtsʼaklomtak Jesús ti kʼusi skʼan skʼanike, yuʼun laj yalbe xtok ti kʼusi skʼan skontrainike. Xi chal Vivlia ta sventa Cristoe: «Jaʼ chacʼan li cʼusitic tuqʼue; jaʼ chacontrain li cʼusi chopole» (Heb. 1:9; Sal. 45:7). Li stalelale chakʼ kiltik ti maʼuk noʼox skʼan jkʼantik li tukʼilale, skʼan jkontraintik xtok li mulile, skotol li kʼusi skontrainojbe smantaltak Jeovae. Lek ti xkalbetik skʼoplal xtok li kʼusi jamal laj yal jtakbol Juan liʼe: «Scotol li bochʼotic ta saʼilan smulique jbajmantal xa chcʼotic noxtoc, yuʼun li mulile jbajmantal chijcʼot yuʼun» (1 Juan 3:4).
3. ¿Kʼusi chantos ta jkʼelbetik skʼoplal ti bu chakʼ kiltik ti skʼan jkontraintik li kʼusi chopole?
3 Lek me ti xi jakʼbe jbatike: «¿Mi jkontrainoj li kʼusi mu xakʼ jpas smantal Diose?». Jkʼeltik echʼel avil tana kʼuxi ta jkontraintik li choplejale, chantos ta jkʼelbetik skʼoplal: 1) ti chbat ta mas yuchʼel li poxe, 2) li kʼusi mu stakʼ nabel lek smelolale, 3) li mulil ta jun vinik xchiʼuk jun antse xchiʼuk 4) ti kʼuyelan skʼan xkiltik li buchʼutik kʼupil chaʼiik mulile.
Oyuk noʼox me spʼisol xavuchʼ li poxe
4. ¿Kʼu yuʼun tsots lek yoʼonton laj yal Jesús ti mu me xbat ta mas yuchʼel li poxe?
4 Oy jayibuk velta laj yuchʼ yaʼlel tsʼusub li Jesuse, yuʼun snaʼoj ti jaʼ jun matanal yakʼoj Diose (Sal. 104:14, 15). Pe mi junuk velta bat ta mas yuʼun (Pro. 23:29-33). Jaʼ yuʼun tsots lek yoʼonton laj yal ti mu me xbat ta mas yuchʼel li poxe (kʼelo Lucas 21:34). Kʼalal muʼyuk noʼox spʼisol chichʼ uchʼel li poxe xuʼ me jpas-o tsots jmultik. Jaʼ yuʼun xi la stsʼiba li Pabloe: «Mu me xayacubic, yuʼun jaʼ chabolibic yuʼun. Jaʼ acʼo nojuc ta avoʼntonic li Chʼul Espiritue» (Efe. 5:18). Xchiʼuk laj yalbe xtok li ermanaetik ti oy xa sjabilalik ti «mu me xyacubi[ke]» (Tito 2:3).
5. ¿Kʼusi skʼan sjakʼbe sba li yajtsʼaklom Cristo ti snaʼ yuchʼel poxe?
5 Skʼan me xi jakʼbe jbatik mi xakʼ jol koʼontontik ti xkuchʼtik poxe: «¿Mi jaʼ jchanojbe stalelal Jesús ti muʼyuk bu chbat ta mas kuʼune? Ati persa skʼan xkakʼbe mantal jun ermano ta sventa taje, ¿mi tsots van koʼonton chkalbe? ¿Mi chkuchʼ pox sventa xchʼay ta jol li jvokoltake xchiʼuk ti jaʼ ta jkux-o chkaʼie? ¿Kʼu yepal chkuchʼ jujun xemana? ¿Kʼu yelan chkaʼi kʼalal chalbikun ti chbat ta mas yuchʼel kuʼune? ¿Mi ta van jpak jkʼoplal o chi ilin-o?». Mi chkakʼtik smosoinutik li poxe mu xa me xakʼ xi jrasonaj xchiʼuk mu xa me lekuk kʼusi chbat ta nopel kuʼuntik. Taje mu jkʼantik jech xkʼot ta jtojolaltik kʼuchaʼal yajtsʼaklomutik Cristoe, yuʼun ta jkʼantik ti skotol ora tukʼuk jnopbentike (Pro. 3:21, 22, Ch).
Jkontraintik li kʼusi mu stakʼ nabel lek smelolale
6, 7. 1) ¿Kʼusi la spas Jesús kʼalal pasat ta preva yuʼun li Satanás xchiʼuk spukujtake? 2) ¿Kʼu yuʼun pukem tajek skʼoplal li kʼusitik mu stakʼ nabel lek smelolale?
6 Ti kʼu sjalil ay ta Balumil li Jesuse ta sjunul yoʼonton la skontrain li Satanás xchiʼuk spukujtake. Tukʼ laj yakʼ-o sba ta stojolal Dios kʼalal kontrainat yuʼun Diabloe (Luc. 4:1-13). Kuch yuʼun xtok kʼalal toj manya kʼuyelan tsokesbat ox yaʼi snopben xchiʼuk stalelale (Mat. 16:21-23). Jech xtok, ep krixchanoetik la skolta kʼalal la slokʼesbe pukujetik ta stojolalike (Mar. 5:2, 8, 12-15; 9:20, 25-27).
7 Kʼalal ochem xaʼox ta Ajvalil li Jesús ta 1914 la sta slekilal yuʼun li buchʼutik te ta vinajele, yuʼun la snuts lokʼel li Satanás xchiʼuk spukujtak ti te toʼox tsokesvanike. Jech oxal yakʼojbe tajek yipal «tsloʼla scotol cristianoetic ta sbejel [balumil]» li Diabloe (Apo. 12:9, 10). Jaʼ yuʼun yantik x-epaj li buchʼutik tskʼupinik li kʼusitik mu stakʼ nabel lek smelolale. Ta melel, xkoʼolaj kʼuchaʼal veneno ti tanijem tajeke, jaʼ yuʼun skʼan me jkʼel jbatik. Pe ¿kʼusi stakʼ jpastik un?
8. ¿Kʼusitik skʼan jakʼbe jbatik ta sventa li kʼusitik ta jchʼay-o koʼontontike?
8 Jamal me lek tspʼijubtasutik Vivlia ti toj chopol kʼusi ta jnuptantik yuʼun li espiritismoe xchiʼuk ti kʼutik yelan tspasik li kʼusitik mu stakʼ nabel lek smelolale (kʼelo Deuteronomio 18:10-12). Ch-abtej ta snopben krixchanoetik li Satanás xchiʼuk spukujtak avie, ti te chichʼ tael ta pelikulaetik, ta livroetik xchiʼuk ta videojuegoetik li kʼusitik mu stakʼ nabel lek smelolale. Jech oxal toj tsots me skʼoplal ti jkʼeltik lek li kʼusi ta jchʼay-o koʼontontike. Xi jakʼbe jbatike: «¿Mi oy jaʼ to jkʼeloj pelikulaetik, kʼusitik ch-echʼ ta television, videojuegoetik, livroetik xchiʼuk revista sventa loʼiletik ti te chalbe skʼoplal majia xchiʼuk li kʼusi mu xa staleluk jech chkʼot ta pasele? ¿Mi xkaʼibe lek smelolal ti toj tsots skʼoplal skʼan jkontrain li kʼusi mu stakʼ nabel lek smelolale o mi muʼyuk mas chopol chkil? ¿Mi oy jnopoj junuk velta kʼuyelan chil Jeova li kʼusi ta jchʼay-o koʼontone? ¿Mi muʼyuk xa mas ta jchabi jba li ta spetsʼtak Satanás taje? Mi jeche, ¿mi jpʼel koʼonton ti muʼyuk xa ta jtikʼ ta jnopben yan velta xchiʼuk ti chkakʼ ta ilel ti jkʼanoj li Jeova xchiʼuk li stukʼil mantaltake?» (Hech. 19:19, 20).
Jchʼuntik li pʼijubtasel chal Jesús ta sventa li mulil ta jun vinik xchiʼuk jun antse
9. ¿Kʼuxi tstikʼ ta yoʼonton skʼanel choplejal li jun krixchanoe?
9 Kʼalal chalbe skʼoplal chiʼinejbail ta vayel li Jesuse persa onoʼox ta sKʼop Dios tslokʼes. Xi laj yale: «¿Me muʼyuc aqʼuelojic ta scʼop Dios ti jun vinic xchiʼuc jun ants la spas Dios cʼalal la spas cristiano ta sliquebe? Jech chal: “Jaʼ yuʼun li vinique ta scomtsan stot smeʼ; yuʼun ta xicʼ yajnil. Li chibic toʼoxe jun noʼox sbecʼtal ta xcʼotic”, xi. Jech muc xa chibicuc, jun xa noʼox icʼotic. Jaʼ yuʼun li bochʼotic laj xa spas ta jun li Diose, muʼyuc bochʼo xuʼ ta svocʼ» (Mat. 19:4-6). Snaʼoj onoʼox Cristo xtok ti chkʼot ta koʼontontik li kʼusi chil jsatike. Jaʼ yuʼun xi laj yal li ta Mantaletik ta Vitse: «Avaʼbinojic xi albatic ti amolmucʼtotique: “Mu xasaʼ avantsic. Antsetic, mu xaloʼlabe sjol viniquetic.” Ta xcalboxuc avaʼiic, buchʼuuc noʼox ta sqʼuel jun ants ti oy ta yoʼnton ta scʼupin yaʼie, coʼol sʼelan laj xa scʼupin ta xʼile yuʼun ti Diose» (Mat. 5:27, 28, Ch). Mi oy jun krixchano ti mu skʼan xchʼun li kʼusi laj yal Jesuse yakal me tstikʼ ta yoʼonton li skʼanel choplejale.
10. Alo kʼusi kʼotem ta pasel ti chakʼ kiltik ti xuʼ xkom kuʼuntik li skʼelel pornografia mi nopem xkaʼitike.
10 Li Satanase tspukbe skʼoplal li mulil ta jun vinik xchiʼuk jun antse, sventa tspase spukoj lokʼoletik sventa pornografia. Toj vokol xa ta tupʼel ta jnopbentik mi la jkʼeltike xchiʼuk chnop tajek xkaʼitik skʼelel. Jaʼ jech kʼot ta stojolal jun yajtsʼaklom Cristo ti xi chal kaʼitike: «Lik jkʼel ta mukul li pornografiae. Lek tajek chkaʼi ta skʼelel li kʼusitik chopol taje, laj nop ti partee, ti mu teuk tsakal skʼoplal xchiʼuk li yabtel Jeovae. Jnaʼoj ti chopol li kʼusi yakal ta jpase, pe ta jnop ti lek chil Dios ti kʼuyelan chkichʼ ta mukʼe». ¿Kʼusi koltaat sventa la sjel li stalelale? Xi chale: «Laj kalbe moletik li kʼusi ta jpase, akʼo mi jaʼ li kʼusi toj tsots laj kaʼie». Ta mas jelavele kom yuʼun li kʼusi toj ibal sba nopem xaʼi tspase. «Kʼalal kom kuʼun spasel li mulil taje, jaʼ to sak ta melel laj kaʼi un li jol koʼontone», xi. Ta melel, mi jkontrainojtik li kʼusi chopole ta me jkontraintik li pornografiae.
11, 12. ¿Kʼuxi xuʼ xkakʼtik ta ilel ti jkontrainojtik li kʼusi chopol kʼalal ta jtʼujtik li son chkaʼitike?
11 Li son xchiʼuk sletraile xuʼ me toj tsots ch-abtej ta jtojolaltik, vaʼun tstsʼun sba ta koʼontontik. Melel onoʼox ti jaʼ jun matanal yakʼoj Dios li sone xchiʼuk oy xa ta sjayibal siglo stunesoj sventa x-ichʼat ta mukʼ (Éxo. 15:20, 21; Efe. 5:19). Pe li sonetik ti lek chaʼiik krixchanoetik ti muʼyuk yichʼojik ta mukʼ Jeovae jaʼ mas tskʼupil kʼopta li mulivajele (1 Juan 5:19). ¿Kʼuxi xuʼ jnaʼtik mi yakal tsokesutik li son chkaʼitike?
12 Xuʼ xi jakʼbe jbatike: «¿Kʼusi chal li sonetik chkaʼie? ¿Mi chalbe skʼoplal milbail, sloʼlael jnup jchiʼiltik, mulivajel xchiʼuk li chopol loʼile? A ti oy buchʼu jkʼelbe yaʼi li sletrail sone, ¿mi tsnop van ti jpʼajoj li choplejale, o mi tsnop van ti sokem xa li koʼontone?». Mu me xuʼ xkaltik ta melel ti jkontrainojtik li mulil mi ta jchikintatik sonetik ti jaʼ tskʼupil kʼopta taje. Mu xchʼay ta joltik li kʼusi laj yal Jesús liʼe: «Li cʼusi ta xlocʼ ta yeique ta yut yoʼntonic ta xlic tal. Jech ta xbolib o yoʼntonic. Yuʼun ta yut yoʼnton cristiano ta xlic tal li cʼusi chopol tsnope, li milvaneje, li mulivajele, li cʼopanejbaile, li eleqʼue, li epalcʼope, li xchopolcʼoptael yantique» (Mat. 15:18, 19; koʼoltaso xchiʼuk Santiago 3:10, 11).
Jechuk jnopbentik kʼuchaʼal Jesús ta sventa li buchʼutik skʼanojik choplejale
13. ¿Kʼu yelan laj yil Jesús li krixchanoetik ti mu skʼan xiktaik spasel mulile?
13 Li Jesuse laj yal ti jaʼ tal yalbe akʼo sutes yoʼontonik li buchʼutik muʼyuk chchʼunbeik smantal Diose (Luc. 5:30-32). Pe ¿kʼu yelan laj yil li krixchanoetik ti mu skʼan xiktaik spasel mulile? La spʼijubtas yajtsʼaklomtak ti xibal sba ta chiʼinel li krixchanoetik taje (Mat. 23:15, 23-26). Xi laj yal xtoke: «Oy ep bochʼotic jech ta xalic: “Cajval, Cajval”, xiyuticun, pero mu scotoluc ch-ochic yoʼ bu chventainvan li Diose. Jaʼ noʼox ch-ochic li bochʼotic tspasic cʼusi tscʼan yoʼnton li Jtot te oy ta vinajele. Oy ep bochʼotic jech ta xalbicun ta slajebal cʼacʼal: “Cajval, Cajval, voʼot ta abi la jcholcutic acʼop. Voʼot ta abi la jloqʼuescutic pucujetic. Voʼot ta abi la jpascutic ep sqʼuelubil atsatsal”, xiyuticun». Li krixchanoetik taje, ti muʼyuk sutesoj yoʼontonik ta melel xchiʼuk ti muʼyuk bu yiktaojik li spasel choplejale, xi ch-albatik yuʼun Cristoe: «Vocʼo abaic ta jtojol» (Mat. 7:21-23). ¿Kʼu yuʼun toj tsots chchapanatik? Yuʼun yakal chkʼexlaltasik Dios li ta xchopol talelalike xchiʼuk chopol kʼusi tspasbe xchiʼiltakik.
14. ¿Kʼu yuʼun chichʼ lokʼesel ta tsobobbail li buchʼu mu skʼan sutes yoʼontone?
14 Li sKʼop Diose chal ti akʼo xichʼ lokʼesel ta tsobobbail li buchʼutik mu skʼan sutes yoʼontonike (kʼelo 1 Corintios 5:9-13). Kalbetik oxtosuk srasonal ti kʼu yuʼun persa jech skʼan xichʼ pasele: 1) sventa mu xichʼ ikʼubtasbel li sbi Diose, 2) sventa mu sok li tsobobbaile xchiʼuk 3) sventa xichʼ tijbel yoʼonton ti akʼo sutes yoʼonton li jpas mulile.
15. ¿Kʼusi tsots skʼoplal skʼan sjakʼbe sba li buchʼu tskʼan tukʼ-o yoʼonton ta stojolal Jeovae?
15 ¿Mi jech jnopbentik kʼuchaʼal Jesús ta sventa li buchʼutik yakʼojbeik yipal spasel mulile? Skʼan me xi jakʼbe jbatike: «¿Mi ta van jchiʼin-o kaʼi ta loʼil li buchʼu laj yichʼ lokʼesel ta tsobobbaile o ti yolbaj la xchʼak sbae? ¿Ati mi kutsʼ kalal ti muʼyuk xa jmoj nakalunkutik ti jech kʼot ta stojolale?». Ta melel, li kʼusi chkʼot ta pasel taje jaʼ chakʼ ta preva mi jkʼanojtik li tukʼilale xchiʼuk mi tukʼ-o koʼontontik ta stojolal Jeova. a
16, 17. ¿Kʼusi tsots vokolil la snuptan jun ermana, xchiʼuk kʼusi koltaat sventa jechuk spas ti kʼuyelan skʼan xkiltik li buchʼu chichʼ lokʼesel ta tsobobbaile?
16 Jkʼeltik kʼusi kʼotem ta pasel. Jun ermanae laj yil ti kʼunkʼun chʼay batel kʼanelal yuʼun ta stojolal Jeova li skerem ti staoj xa svaʼleje. Bat ta yoʼonton li spasel mulile xchiʼuk muʼyuk bu sutes yoʼonton, jech oxal laj yichʼ lokʼesel ta tsobobbail. Skʼanoj Jeova li ermanae, pe skʼanoj li skerem xtoke, jaʼ yuʼun toj vokol laj yaʼi ta chʼunel li mantal chal Vivlia ti mu xa stakʼ xchiʼin li skereme.
17 ¿Kʼusi van laj kalbetik jechuk li ermanae? Albat yuʼun jun mol ta tsobobbail ti snaʼoj lek Jeova ti oy svokole. Akʼbat snop xtok ti toj kʼux laj yaʼi Dios kʼalal la stoy sba junantik xnichʼnab ta vinajele. Vulesbat ta sjol ti snaʼoj Jeova ti toj kʼux onoʼox chkaʼitike, akʼo mi jech, chal ti akʼo xichʼ lokʼesel ta tsobobbail li buchʼu mu sutes yoʼontone. La stsak ta mukʼ tojobtasel li ermanae xchiʼuk jaʼ jech la spas ti kʼuyelan skʼan xkiltik li buchʼu chichʼ lokʼesel ta tsobobbaile. b Toj kʼupil me sba chil Jeova kʼalal tukʼ koʼontontike (Pro. 27:11).
18, 19. 1) ¿Kʼusi jkontrainojtik kʼalal mu xa bu ta jchiʼintik li buchʼu tspas smule? 2) ¿Kʼusi xuʼ lek xkʼot ta pasel kuʼuntik kʼalal tukʼ koʼontontik ta stojolal Dios xchiʼuk ti ta jchʼunbetik li smantaltake?
18 Mi oy kʼusi toj tsots ta jnuptantik kʼuchaʼal laj xa kaltike, skʼan me teuk ta joltik ti snaʼoj Jeova ti chkil jvokoltike. Kʼalal mu xa bu ta jchiʼintik li buchʼu lokʼesbil o yolbaj xchʼakoj sba ta tsobobbaile, jaʼ chkakʼtik ta ilel ti jkontrainojbetik li stalelal ti laj yichʼ-o lokʼesel ta tsobobbaile. Jaʼ sventa chkakʼtik ta ilel xtok ti jkʼanojtike xchiʼuk ti jnaʼojtik ti jaʼ sventa slekilal ti jech chichʼ pasbele. Jech ta melel, mi tukʼ koʼontontik ta stojolal li Jeovae ta me xkichʼtik ta mukʼ li mantal laj yichʼ akʼele, vaʼun yikʼaluk me jaʼ sutes-o yoʼonton li jpas mulile xchiʼuk ti sut tal li ta mantale.
19 Xi laj yal jun ermana ti laj yichʼ lokʼesel ta tsobobbail xchiʼuk ti och yan velta ta yajrextiko Jeova ta tsʼakale: «Xi muyubaj tajek yuʼun Jeova ti skʼanoj tajek li stsobobbaile, ti jaʼ venta yuʼun sventa sakuk-oe. Yikʼaluk van toj tsots chil li krixchanoetik ti muʼyuk chchanik mantale, pe ti kʼusie yuʼun persa jech skʼan pasel xchiʼuk jaʼ svinajeb ti kʼanbilutike». ¿Mi jech van chal jechuk ti lekuk-o tskʼoponik li ermanoetik ta tsobobbail —xchiʼuk li yutsʼ yalaltak— kʼalal laj yichʼ lokʼesel ta tsobobbaile? Mi jech ta jpastik kʼuchaʼal chal Vivlia ti kʼuyelan skʼan xkiltik li buchʼu chichʼ lokʼesel ta tsobobbaile yakal me chkakʼtik ta ilel ti jkʼanojtik li tukʼilale xchiʼuk ti jaʼ oy sderecho chal Jeova ti kʼuyelan skʼan jpas jtalelaltike.
«[K]ontrainic [li] cʼusitic chopole»
20, 21. ¿Kʼu yuʼun persa tajek skʼan jchantik skontrainel li kʼusi chopole?
20 Xi tspʼijubtasutik li jtakbol Pedroe: «Bijanic me, viqʼuiluc me asatic». ¿Kʼu yuʼun jech chal? «Yuʼun li [kajkontratike], jaʼ li pucuje, yuʼun xjoyet noʼox jech chac cʼu chaʼal león ti xʼavet noʼox ta saʼel li bochʼo tscʼan tstiʼe» (1 Ped. 5:8). ¿Mi te kapalutik ek li ta sveʼel tstsake? Muʼyuk mi kakʼojbetik yipal ta skontrainel li kʼusi chopole.
21 Mu kʼunuk ti ta jchantik skontrainel li kʼusi chopole. Jpas mulilutik xchiʼuk nakalutik ta jun balumil ti jaʼ batem ta yoʼontonik li kʼusi tskʼan stukike (1 Juan 2:15-17). Pe mi ta jchanbetik stalelal Jesús xchiʼuk ta jchʼiestik li kʼanelal ta stojolal Jeovae muʼyuk me lek chkiltik li mulile. Skotol li yajtsʼaklomutik Cristoe skʼan me «[jkontraintik li] cʼusitic chopole». Jaʼ yuʼun chaʼa, jchʼuntik me ta sjunul koʼontontik li mantal taje, yuʼun li Jeovae «jaʼ chchabi lec li bochʼotic jun yoʼntonic ta stojole; tscolta loqʼuel ta scʼob li chopol cristianoetique» (Sal. 97:10).
[Tsʼibetik ta yok vun]
a Taje te chalbe mas skʼoplal ta revista La Atalaya ta 15 yuʼun noviembre ta 1981, pajina 20 kʼalal ta 25.
b Kʼelo La Atalaya ta 15 yuʼun enero ta 2007, pajina 17 kʼalal ta 20.
¿Kʼusi cha takʼ?
• ¿Kʼusi tskoltautik sventa jkʼel jtalelaltik ta sventa li poxe?
• ¿Kʼu yelan skʼan jkʼel jbatik ta sventa li kʼusi mu stakʼ nabel lek smelolale?
• ¿Kʼu yuʼun xibal sba li pornografiae?
• ¿Kʼuxi chkakʼtik ta ilel ti jkontrainojtik li kʼusi chopol kʼalal chichʼ lokʼesel ta tsobobbail junuk kutsʼ kalaltike?
[Sjakʼobiltak sventa xchanobil]
[Lokʼol ta pajina 29]
¿Kʼusitik skʼan stsak ta venta li jun yajtsʼaklom Cristo kʼalal chuchʼ poxe?
[Lokʼol ta pajina 30]
¡Chabio me aba lek ta skoj li kʼusitik tstunes Satanás sventa chʼayob oʼontonale!
[Lokʼol ta pajina 31]
¿Kʼusi tstikʼ ta yoʼonton kʼalal tskʼel pornografia li jun krixchanoe?