Ta jtatik-o kuxlejal sbatel osil kʼalal lek chilutik Diose
Ta jtatik-o kuxlejal sbatel osil kʼalal lek chilutik Diose
«Jaʼ chavacʼbe bendición li bochʼotic tucʼ yoʼntonique; li slequil avoʼntone jaʼ smaquic cʼotem.» (SAL. 5:12)
1, 2. ¿Kʼusi kʼanbat yuʼun Elías li meʼon ants ta Sareptae, xchiʼuk kʼusi albat ta melel?
CHCHAMIK xa ta viʼnal li meʼon ants ta Sarepta xchiʼuk yole, jaʼ jech chcham xa ta viʼnal ek li Eliase. Kʼalal jaʼo lik stsan skʼokʼ sventa tsmeltsan kʼusi tslajesik li abol sba ants taje, kʼanbat pan xchiʼuk voʼ yuʼun li Eliase. Li kʼusi muʼyuk vokol chaʼie jaʼ ti chakʼbe yuchʼ voʼe, pe li kʼusi tslajesike «jop xa arina oy [y]uʼun, xchiʼuc yu juteb xa aceite oy [y]uʼun ta [s]bin». Jaʼ yuʼun laj yalbe li j-alkʼop ti muʼyuk xa kʼusi xuʼ xakʼbee (1 Rey. 17:8-12).
2 Pe xi te xvul-vun-o li j-alkʼope: «Jaʼ baʼyuc xapasbun tal li pan jveʼe; ichʼbun tal ta ora. Jaʼ tsʼacal xapas li pan aveʼic xchiʼuc avole. Yuʼun li Mucʼul Dios yuʼun Israele jech yaloj: “Li arina te oy ta yavile xchiʼuc li aceite te oy ta bine mu xlaj o”» (1 Rey. 17:13, 14).
3. ¿Kʼusi ti tsots skʼoplal skʼan jnopbetik skʼoplale?
3 Oy to kʼusi mas toj tsots skʼoplal skʼan snop spas li meʼon antse, ti jaʼ xkom to skʼoplal li jsetʼ-juteb kʼusi oy yuʼun sventa tslajesike. ¿Kʼusi van mas tsots skʼoplal chaʼi: mi jaʼ van li kʼusitik chtun yuʼun xchiʼuk yole, o mi jaʼ van tsots skʼoplal chaʼi ti lek x-ilat yuʼun Dios xchiʼuk ti xkʼot ta yamigoe? ¿Mi ta van spat yoʼonton ta stojolal Jeova ti chchabiate? Jaʼ me jech oy kʼusi skʼan jnopbetik skʼoplal ek. ¿Kʼusi ti mas tsots skʼoplal chkaʼitike: mi jaʼ ti chbat ta koʼontontik saʼel li kʼusitik chtun kuʼuntike o mi jaʼ ta jkʼan ti lek xilutik Jeovae? Ta melel, toj ep me srasonal kuʼuntik sventa jpat koʼontontik ta stojolal Dios xchiʼuk ti xi jtun ta stojolale. Yalojbutik xtok kʼusi skʼan jpastik sventa lek xilutike.
Sta-o me ichʼel ta mukʼ li Jeovae
4. ¿Kʼu yuʼun sta-o xkichʼtik ta mukʼ li Jeovae?
4 Li Jeovae xuʼ me xalbutik kʼuyelan tskʼan ichʼel ta mukʼ. Taje laj yakʼik ta naʼel jtsop jkʼejimoletik ta vinajel, xi jmoj yechʼomal ye laj yalike: «Cajval, voʼot Diosot cuʼuncutic, voʼot noʼox atuc oy ta aventa albel alequilal, ichʼel ta mucʼ, xchiʼuc voʼot noʼox atuc oy avuʼel. Yuʼun voʼot laj apas scotol li cʼusitic oye, yuʼun jech la scʼan avoʼnton ti jech oye, ti jech iʼayin scotole» (Apo. 4:11). Jaʼ Jpasvanej yuʼun li vinajel-balumile, jaʼ yuʼun sta-o xkichʼtik ta mukʼ.
5. ¿Kʼu yuʼun skʼan stij koʼontontik sventa xi jtun ta stojolal Dios ti skʼanojutik tajeke?
5 Oy yan srasonal xtok ti chi jtun ta stojolal Jeovae: jaʼ ti stuk xa noʼox jech skʼanojutike. Yuʼun «cʼalal la spas cristiano li Diose, jaʼ la slocʼta sba jech cʼu chaʼal stuc. Vinic xchiʼuc ants la spas» (Gén. 1:27). Laj yakʼ jmotontik xtok, jaʼ li jnopbentik ta jujuntale, jaʼ xkaltik, ti xi jtojob ta rasone xchiʼuk ti xnop kuʼun jtuktik li kʼusi ta jkʼan ta jpastike. Jaʼ jTotik, yuʼun jaʼ laj yakʼ jkuxlejaltik (Luc. 3:38). Ta skoj ti jaʼ jech kʼuchaʼal jun lekil totile, chakʼbutik skotol li kʼusi chtun kuʼuntik sventa xi jmuyubaj noʼoxe. Li Jeovae «coʼol ta xacʼ qʼuepuc» xchiʼuk «coʼol chacʼbe voʼ» li krixchanoetike, pe taje maʼuk noʼox me sventa xchʼi lek kʼusi jlajestik, yuʼun kʼupil sba xyaxal chkiltik xtok (Mat. 5:45).
6, 7. 1) ¿Kʼuxi laj yakʼbe svokol snitilulal li Adane? 2) ¿Kʼuxi tstabeik sbalil li pojelal laj yakʼ Cristo li buchʼutik chakʼbeik yipal sventa lek x-ilatik yuʼun Diose?
6 Jech xtok, la spojutik sventa mu jnuptantik li kʼusitik chkʼot ta pasel yuʼun li mulile. Kʼalal la stoy sba li Adane, xkoʼolaj kʼuchaʼal jun totil ti tspojbe skotol stakʼin li yajnil xchiʼuk xnichʼnab sventa chbat tajinuk ta takʼine. ¿Kʼu yuʼun? Yuʼun kʼalal muʼyuk la xchʼunbe smantal Diose, muʼyuk laj yakʼbe xkaltik li kʼusi tsta ox xnichʼnabe: ti jaʼ li muyubajel sbatel osile. Kʼalal jech la spase la xchonutik ta stojolal jun chopol ajvalil xkaltik: jaʼ ta stojolal li mulile. Jaʼ yuʼun toj abol jbatik ta chamel, chkat koʼontontik xchiʼuk chi jcham. Sventa xichʼ koltael junuk mosoile skʼan manel, jaʼ yuʼun la smanutik Jeova sventa xi jkol lokʼel ta yok-skʼob li kʼusi toj chopol chkʼot ta pasel yuʼun li mulile (kʼelo Romanos 5:21). Jaʼ la smanutik-o li xNichʼone, yuʼun xi laj yal li Jesuse: «Tal jpoj loqʼuel ep cristianoetic sventa mu xbatic ta chʼayel» (Mat. 20:28). Skotol li buchʼutik lek ch-ilatik yuʼun Diose poʼot xa me stabeik lek sbalil li pojelal laj yakʼ Cristoe.
7 Ta melel muʼyuk buchʼu yan, jaʼ noʼox stuk li Jpasvanej yakʼoj muyubajel li ta jkuxlejaltike xchiʼuk oy lek sbalil. Mi laj kakʼbetik yipal sventa lek xilutik li Diose ta me xkiltik kʼuyelan chchʼaybe svokol li krixchanoetike. Batsʼi ta jujuntal me chkiltik ti kʼuyelan «ch-acʼbat smoton [yuʼun Jeova] li bochʼo ta saʼe» (Heb. 11:6).
«Li avinictaque yutsil yoʼnton chacʼ sbaic ta acʼob»
8. ¿Kʼusi ta jchantik ti kʼalal ta jkʼelbetik skʼoplal li stalelal Isaías ta sventa ti kʼuyelan la spasbe yabtel Diose?
8 Li Jeovae muʼyuk tsujvan sventa xi jtun ta stojolal. Chakʼ ti akʼo snop stuk li jujun krixchanoe. Vaʼun lek chil li buchʼutik chlokʼ ta yoʼonton chtunik ta stojolale. Xi la sjakʼ Jeova ta skʼakʼalil Isaiase: «¿Bochʼo ta jtac batel? ¿Bochʼo xuʼ chbat cʼopojuc ta jventatic?». Kʼuchaʼal chkiltike, li Jeovae laj yichʼ ta mukʼ li j-alkʼope yuʼun laj yakʼbe snop stuk mi chchʼam li abtelale. Ta melel xmuyubaj Isaías kʼalal xi la stakʼe: «Liʼ oyun vuʼune, tacun batel» (Isa. 6:8).
9, 10. 1) ¿Kʼusi mu stakʼ jpastik mi ta jkʼantik lek chil kabteltik li Jeovae? 2) ¿Kʼu yuʼun jaʼ lek ti ta sjunul koʼontontik xi jtun ta stojolal li Diose?
9 Voʼotik ta jnop jtuktik mi ta jkʼan ta jpasbetik yabtel li Diose o mi moʼoj. Li Jeovae tskʼan ti xlokʼ ta koʼonton jtuktik kʼalal chkichʼtik ta mukʼe (kʼelo Josué 24:15). Muʼyuk me lek chil mi maʼuk ta sjunul koʼontontik chkichʼtik ta mukʼe o mi jaʼ noʼox sventa lek xilutik krixchanoetike (Col. 3:22). Mi chkakʼ smakutik li kʼusitik ta balumil sventa li yichʼel ta mukʼ Jeovae, maʼuk me ta «scotol [koʼontontik]» ta jpasbetik li yabtele, mi jech ta jpastike muʼyuk me lek chilutik (Sal. 119:2). Li Jeovae snaʼoj ti voʼotik baʼyel ta jtabetik sbalil kʼalal ta sjunul koʼonton ta jpasbetik li yabtele. Liʼe jaʼ jun srasonal ti albatik yuʼun Moisés li j-israeletik ti akʼo stʼujik li kuxlejale. ¿Kʼuxi van tstʼujik taje? Jaʼ kʼalal tspasik liʼe: «Cʼanic li Mucʼul Dios avuʼunique. Chʼunbeic li cʼusi chayalboxuque, xchiʼuc junuc avoʼntonic o ta stojol» (Deu. 30:19, 20).
10 Xi la skʼupil kʼopta Jeova li ajvalil David ta voʼnee: «Li avinictaque yutsil yoʼnton chacʼ sbaic ta acʼob ti cʼalal yorail chvinaj ch-abtej li avuʼele. Jaʼ jech chtalic ta atojol jech chac cʼu chaʼal li job osil chyal ta poʼot saque; jaʼ jech chtalic ta atojol li querem soldadoetic avuʼune» (Sal. 110:3). Li krixchanoetik avie jaʼ noʼox batem ta yoʼontonik li takʼine xchiʼuk li chʼayob oʼontonale. Pe jaʼuk li buchʼutik skʼanojik Jeovae snaʼojik ti jaʼ baʼyel skʼan spasbeik li yabtele. Kʼalal ta sjunul yoʼonton chbat xcholik li lekil aʼyeje te chvinaj kʼusi ti baʼyel yakʼoj ta xkuxlejalike. Spatoj lek yoʼontonik ti ch-akʼbatik yuʼun Jeova li kʼusi chtun yuʼunik jujun kʼakʼale (Mat. 6:33, 34).
Matanaletik ti lek chil Diose
11. ¿Kʼusi bendision smalaoj tstaik li j-israeletik kʼalal chakʼbeik matanal li Jeovae?
11 Li trato la spas Jeova xchiʼuk j-israeletike te chal ti skʼan la xakʼbeik matanaletik ti lek chil sventa lek x-ilatik yuʼun li Diose. Xi albatik ta Levítico 19:5: «Chavacʼbicun milbil matanal sventa coʼol coʼntonti[k]», taje jaʼ sventa ti «lec tsacbil chcʼot [yuʼune]». Xi chal xtok li livro taje: «Cʼalal chavacʼbicun jmoton sventa oy cʼusi chatojbicun ta vocole, jaʼ me jech xapasic jech chac cʼu chaʼal tscʼan pasel ta sventa lec tsacbil chcʼote» (Lev. 22:29). Kʼalal chchikʼik matanal ta skajleb matanal li j-israeletike jaʼ tstʼujik li lekil chonbolometike, vaʼun li xchʼailal chmuye jaʼ sventa Jeova ti «lec mu yicʼ chcʼot ta [stojolale]» (Lev. 1:9, 13). Kʼalal jech la spasik sventa chakʼik ta ilel ti skʼanojik li Jeovae xkuxet yoʼonton yuʼunik xchiʼuk kʼupil laj yaʼi (Gén. 8:21, NM, tsʼib ta yok vun). Li kʼusi chal Mantal taje oy kʼusi chakʼ kiltik ek: lek me chilutik Jeova mi jaʼ chkakʼbetik li matanal ti lek chile. ¿Kʼusi jaʼ li matanaletik taje? Jkʼeltik echʼel chaʼtosuk: li kʼusitik ta jpastike xchiʼuk li ta jkʼopojeltike.
12. ¿Kʼusi skʼan mu spasik li buchʼutik chakʼbe sbekʼtal stakopalik kʼuchaʼal kuxul matanal li Dios yoʼ mu x-ilin yuʼunike?
12 Xi laj yalbe ermanoetik ta Roma li jtakbol Pabloe: «Ta jcʼanboxuc vocol ta atojolic ti acʼo avacʼbeic sventain o abecʼtalique, yuʼun jech jaʼ cuxul matanal chcʼot, jaʼ chʼul matanal; toj lec xcuxet yoʼnton yuʼun li Diose. Jaʼ jech li mero yichʼel ta mucʼ Dios tscʼan chapasique» (Rom. 12:1). Kʼuchaʼal chkiltike, skʼan me lekuk jbekʼtal jtakopaltik yoʼ xchʼam Jeova sventa lek xilutike. Ta me spʼaj li matanal chkakʼbetik Jeova mi ta jsokestik ta pox li jbekʼtaltike, mi ta jbutsʼtik moye, mi ta jmatsʼtik li sbekʼ jtos teʼ ti betel sbie (o sbekʼ areca teʼ ti mas ojtikinbil ta Asiae) xchiʼuk mi ta jtunestik yan chopol drogaetike (2 Cor. 7:1). Muʼyuk me lek chil xtok mi chopol jtalelaltike, yuʼun «li mulivajele jaʼ xa ta jsaʼ jmultic ta stojol li jbecʼtaltique» (1 Cor. 6:18). Ta melel, skotol li viniketik xchiʼuk antsetik ti tskʼan tslekubtasbeik yoʼonton Diose skʼan me «tucʼ scotol cʼusi [tspasik]» (1 Ped. 1:14-16).
13. ¿Kʼu yuʼun sta-o ti jkʼupil kʼoptatik li Jeovae?
13 Yan matanal ti xmuyubaj chchʼam Dios xtoke jaʼ li ta jkʼopojeltike. Ta melel, li krixchanoetik ti skʼanojik Diose lek onoʼox chalbeik skʼoplal ta buyuk noʼox (kʼelo Salmo 34:1-3). Kʼalal ta jkʼeltik li Salmo 148 kʼalal ta 150 te chkakʼtik venta ti ep ta velta chalbutik ti akʼo jkʼupil kʼoptatike. Jech ta melel, «cʼalal chalbeic slequilal [Jeovae]» toj lek me, pe jaʼ me chchʼambe «li bochʼotic tucʼ yoʼntonique» (Sal. 33:1). Jtos ti bu toj lek xuʼ jkʼupil kʼoptatik li jTotik ta vinajele jaʼ kʼalal ta jcholtik mantale, jaʼ li kʼusi toj tsots skʼoplal laj yil Jesuse, ti jaʼ li Buchʼu ta jchanbetik stalelale (Luc. 4:18, 43, 44).
14, 15. ¿Kʼusi matanaletik laj yal Oseas ti skʼan xakʼike, xchiʼuk kʼu yelan laj yil li Jeovae?
14 Kʼalal ta sjunul koʼontontik ta jcholtik mantale jaʼ te chkakʼtik ta ilel ti jkʼanojtik li Diose xchiʼuk ti ta jkʼantik lekuk xilutike. Jnoptik avaʼi li tojobtasel laj yakʼbe j-israeletik li Oseas ti mu xa lekuk ilbilik yuʼun Jeova ta skoj ti ochik ta jecheʼ relijione (Ose. 13:1-3). Li j-alkʼope xi laj yalbe ti akʼo skʼanbeik vokol Jeovae: «Pasbuncutic perdón scotol li jmulcutique; tsacbuncutic li cʼusi lec chacacʼbotcutique. Li xqʼuexol amoton chcacʼcutique jaʼuc li cʼusi chlocʼ ta quecutique» (Ose. 14:1, 2).
15 Li «amoton chcacʼcutique jaʼuc li cʼusi chlocʼ ta quecutique», ti xie, jaʼ li kʼusi chlokʼ ta koʼontontik xchiʼuk ti lek nopbil baʼyel ti jaʼ ta jmuyubtatik-o li melel Diose. ¿Kʼu yelan chil Jeova li matanal ch-akʼbate? Xi la stakʼ stuke: «Ta yutsil coʼnton jtuc ta jcʼanic» (Ose. 14:4). Jech kʼuchaʼal chkiltike, ta xlokʼ ta yoʼonton stuk Dios ti chakʼ ta perton li buchʼutik chakʼ li matanaletik taje, ti lek chil li kʼusi tspasike xchiʼuk ti chamigoinane.
16, 17. ¿Kʼu yelan chil Jeova ti chlik kʼupil kʼoptaatuk yuʼun li buchʼutik chlik xcholik mantal ta skoj li xchʼunel yoʼontonike?
16 Li melel yajtuneltak Diose ojtikinbilik ti ta onoʼox skʼupil kʼoptaik ta buyuk noʼox li Jeovae. Li jtsʼibajom yuʼun salmoe toj echʼ noʼox tsots skʼoplal laj yaʼi li skʼupil kʼoptael Jeovae, jaʼ yuʼun xi la skʼanbe vokole: «Mucʼul Dios, avocoluc lec me xavilbun li alequilal ti chlocʼ ta quee» (Sal. 119:108). ¿Kʼusi xuʼ xkaltik li avie? Li Isaiase xi laj yalbe skʼoplal li epal yajtuneltak Dios avie: «Chlic yalbeic batel slequilal li Mucʼul Diose» xchiʼuk «jaʼ smoton chcʼot ti toj lec chile» (Isa. 60:6, 7). Ta smiyonal xa noʼox li yajtunelutik Jeova avie yakal chkʼot ta pasel kuʼuntik liʼe: «Jaʼuc smoton Dios chcʼot cuʼuntic ti chquichʼtic ta muqʼue, ti chlocʼ ta quetic ti jaʼ Cajvaltique» (Heb. 13:15).
17 ¿Kʼusi xuʼ xkaltik ta atojolal? ¿Mi yakal chavakʼ matanaletik ti lek chil li Diose? Mi muʼyuk to jech cha pase, ¿mi ta van xa jel li kʼusi skʼan xa jel ta akuxlejale xchiʼuk mi ch-och akʼupil kʼopta li ta chol mantal ta naetike? Li matanal taje jaʼ svinajeb ti oy xchʼunel avoʼontone, vaʼun jaʼ me «toj lec chil li Mucʼul Diose, xjelov to jech slequil chil jech chac cʼu chaʼal li vacax[e]» (kʼelo Salmo 69:30, 31). Teuk me ta ajol ti «matanal ti lec mu yiqʼue» ta me xkʼot ti bu tspas mantale, vaʼun lek me chil li kʼusi cha pase (Eze. 20:41). ¡Toj echʼ xa noʼox me cha muyubaj un!
«Jaʼ chavacʼbe bendición li bochʼotic tucʼ yoʼntonique»
18, 19. 1) ¿Kʼusi tsnop jutuk mu skotoluk li krixchanoetik ta sventa ti chi jtun ta stojolal Diose? 2) ¿Kʼusi chkʼot ta pasel kʼalal muʼyuk xa lek chilutik li Diose?
18 Li avie ep mu lekuk chkʼot ta nopel yuʼunik kʼuchaʼal li j-israeletik ta skʼakʼalil Malaquiase: «¿Cʼusi stu ti chijtunutic yuʼun Diose? ¿Cʼusi chlocʼ o ti ta jchʼunbetic smantale?» (Mal. 3:14). Ta skoj ti makem-o satik li saʼel kʼulejale, tsnopik ti muʼyuk chkʼot ta pasel li kʼusitik yaloj Jeovae xchiʼuk ti mu xa jtuneluk li smantaltak avie. Chʼay kʼakʼal chaʼiik li chol mantale, maʼuk noʼox taje, yuʼun la chkap-o sjolik xtok li krixchanoetike.
19 Ti vaʼ yelan tsnopike jaʼ te lik tal li ta nichimaltik Edene. ¿Buchʼu laj yakʼbe xchʼun Eva ti mu la baluk noʼox li labal sba yutsil kuxlejal akʼbatik yuʼun Jeovae? ¿Buchʼu laj yakʼbe xchʼun ti mu la kʼusi bal-o ti chakʼbeik yipal sventa lek x-ilatik yuʼun li sTotik ta vinajele? Jaʼ li Satanase, ti jaʼ chakʼbe xchʼun krixchanoetik avi ti mu la kʼusi bal-o li spasbel kʼusi tskʼan yoʼonton Diose. Pe li Eva xchiʼuk smalale laj yakʼik venta ti la xchʼay xkuxlejalik ta skoj ti muʼyuk xa lek x-ilatik yuʼun li Diose. Li kʼusi toj chopol la snuptanik taje, jaʼ me jech poʼot xa xkʼot ta stojolalik li buchʼutik jech tspasike (Gén. 3:1-7, 17-19).
20, 21. 1) ¿Kʼusi la spas li meʼon ants ta Sareptae, xchiʼuk kʼuxi la stabe sbalil? 2) ¿Kʼu yuʼun skʼan jchanbetik stalelal, xchiʼuk kʼusi stakʼ jpastik?
20 Ti buchʼu toj lek kʼusi kʼot ta nopel yuʼune jaʼ li meʼon ants ta Sareptae, yuʼun mu jechuk la spas kʼuchaʼal li baʼyel jtot jmeʼtike. ¿Kʼusi la spas kʼalal laj yaʼi li kʼusitik laj yal Elías ti tspat oʼontonale? Lik spas pan, manchuk mi toj juteb xa li sveʼele jaʼ baʼyuk laj yakʼbe li Eliase. Pe tukʼ kʼot ta pasel yuʼun Jeova li kʼusi laj yalbe meʼon ants ta stojolal j-alkʼope, yuʼun xi chal kaʼitik li tekstoe: «Jech ep cʼacʼal oy sveʼelic o xchiʼuc li yole, xchiʼuc li Eliase. Li arina te oy ta yavile xchiʼuc li aceite te oy ta bine muc xlaj o. Jaʼ icʼot o ti jech iʼalbat yuʼun Mucʼul Dios li Eliase» (1 Rey. 17:15, 16).
21 Li kʼusi la spas meʼon antse, muʼyuk ep krixchanoetik ti oy ta yoʼonton jech tspasik avie akʼo mi ta smilal xa noʼox miyon li krixchanoetike. Laj yakʼ xchʼunel yoʼonton ta stojolal li jpojvanej Diose, vaʼun koltaat. Li kʼusi kʼot ta stojolal ants taje xchiʼuk li yan loʼiletik ta Vivliae jaʼ me chakʼ kiltik ti sta-o jpat lek koʼontontik ta stojolal li Jeovae (kʼelo Josué 21:43-45 xchiʼuk 23:14). Jaʼ jech li avi eke, toj ep svinajeb ti muʼyuk bu tsten komel Jeova li buchʼutik lek chile (Sal. 34:6, 7, 17-19). a
22. ¿Kʼu yuʼun skʼan xa noʼox xkakʼbetik yipal ta anil yoʼ lek xilutik li Diose?
22 Li skʼakʼalil chchapanvan Jeovae jaʼ me sventa «scotol li cristianoetic ta sbejel banamile», taje muʼyuk tstselpʼuj xchiʼuk mu me stakʼ makel ta be (Luc. 21:34, 35). Muʼyuk me kʼusi chtun-o li kʼulejale xchiʼuk li kʼusitik lek oy kuʼuntike. Jaʼ noʼox me toj jtunel ti ta jchikintatik kʼusi chal li Jchapanvanej ti vaʼanbil yuʼun Diose, yuʼun xi chalbutike: «Laʼic ta jtojol ti voʼoxuc laʼichʼatic ta cʼux yuʼun ti Jtote. Ochanic ti bu ta xventainvan ti Jtote, yuʼun jech onoʼox chapanbil acʼoplalic» (Mat. 25:34, Ch). Vaʼun ta me xkiltik chkʼot ta pasel liʼe: «Jaʼ chavacʼbe bendición li bochʼotic tucʼ yoʼntonique; li slequil avoʼntone jaʼ smaquic cʼotem» (Sal. 5:12). Ta melel, jaʼ xa me yorail ti xkakʼbetik yipal sventa lek xilutik li Diose.
[Tsʼibetik ta yok vun]
a Kʼelo La Atalaya ta 15 yuʼun marso ta 2005, pajina 13, parafo 15, xchiʼuk ta 1 yuʼun agosto ta 1997, pajina 20 kʼalal ta 25.
¿Mi xvul ta ajol?
• ¿Kʼu yuʼun sta-o ti xkichʼtik ta mukʼ ta sjunul koʼontontik li Jeovae?
• ¿Kʼusi matanaletik lek chil avi li Jeovae?
• Li «amoton chcacʼcutique jaʼuc li cʼusi chlocʼ ta quecutique», ¿kʼusi jaʼ taje?
• ¿Kʼu yuʼun skʼan xkakʼbetik yipal ti lekuk xilutik li Diose?
[Sjakʼobiltak sventa xchanobil]
[Lokʼol ta pajina 13]
¿Kʼusi ti tsots skʼoplal laj yakʼbe snop tspas jun abol sba meʼon ants li Eliase?
[Lokʼol ta pajina 15]
¿Kʼusi ta jtatik ti chkakʼbetik smoton Dios kʼalal ta jkʼupil kʼoptatike?
[Lokʼol ta pajina 17]
Ta me xkʼot ta pasel yuʼun Dios li kʼusi chalbutik mi jpatoj lek koʼontontik ta stojolale