Jpat koʼontontik ta stojolal Jeova ta skoj ti toj poʼot xa li slajebal kʼusitike
Jpat koʼontontik ta stojolal Jeova ta skoj ti toj poʼot xa li slajebal kʼusitike
«Jʼechʼel pato avoʼntonic o yuʼun li Mucʼul Diose.» (ISA. 26:4)
1. ¿Kʼusi jelel-o xchiʼuk yan krixchanoetik li yajtuneltak Jeovae?
TA SMIYONAL xa noʼox li krixchanoetik avie mu xa snaʼ buchʼu o kʼusi tspat-o yoʼontonik ta skoj ti ep van ta velta yiloj svokolik xchiʼuk lajemik ta loʼlaele. ¡Pe mu jechuk maʼ yajtuneltak Jeovae! Ta skoj ti beiltasbilutik ta spʼijil Diose, jnaʼojtik ti muʼyuk me lek mi jaʼ ta jpat-o koʼontontik li balumil liʼe xchiʼuk «li banquilaletique» (Sal. 146:3). Jaʼ yuʼun kakʼojbetik ta skʼob Jeova li jkuxlejaltike xchiʼuk jpatoj koʼontontik ta stojolal ta sventa li kʼusi ta jtatik ta tsʼakale, yuʼun jnaʼojtik ti skʼanojutik xchiʼuk ti persa onoʼox chkʼot ta pasel li kʼusi chale (Rom. 3:4; 8:38, 39).
2. ¿Kʼuxi laj yakʼ ta ilel Josué ti melel xkʼopoj li Diose?
2 Li Josuee laj yakʼ ta ilel ta voʼne ti melel xkʼopoj li Diose. Xi laj yalbe xchiʼiltak kʼalal poʼot xaʼox xchame: «Ta jcʼan acʼo cʼotuc lec ta ajol ta avoʼntonic ti icʼot ta pasel scotol li cʼusi yalojboxuc Mucʼul Dios cuʼuntique» (Jos. 23:14).
3. ¿Kʼusi chakʼ jnaʼtik ta sventa Dios li sbie?
3 Persa onoʼox chkʼot ta pasel li kʼusi chal Jeova ta skoj ti skʼanoj li yajtuneltake. Pe oy to srasonal ti mas tsots skʼoplal ti jech tspase: jaʼ ta skoj li sbie (Éxo. 3:14; 1 Sam. 12:22, NM). Li ta slikebal sloʼil jlik Vivlia ta inglés ti jaʼ li The Emphasized Bible, yuʼun J. B. Rotherham, xi chal ta sventa li biil taje: «Jaʼ li kʼusi albil chkʼot ta pasel ta melel ti ta slekil oʼontonal chichʼ akʼele; tspas onoʼox Dios li kʼusi yaloje, akʼo mi oy kʼusi chmakvan, akʼo mi oy vokolil, chakʼbutik li kʼusi chtun kuʼuntike [...]. Jaʼ li kʼusi albil ta melele, [...] li kʼusi akʼbil ta naʼele, li kʼusi chichʼ vulesel ta jolile xchiʼuk ti yakʼoj yee. Li Diose tukʼ stalelal yakʼoj sba ta stojolal li Biil liʼe; mi jaʼuk bu chkʼexav ta stojolal».
4. 1) ¿Kʼusi mantal chalbutik Isaías 26:4? 2) ¿Kʼusi ta jkʼeltik batel li ta xchanobil liʼe?
4 Xi jakʼbe jbatike: «¿Mi xkojtikin lek Jeova sventa jpat lek koʼonton ta stojolal? ¿Mi muʼyuk chi xiʼ ta sventa li kʼusi chtal ta jelavel ta skoj ti jnaʼoj ti oy ta skʼob skotol li Diose?». Xi chalbutik mantal li Isaías 26:4: «Jʼechʼel pato avoʼntonic o yuʼun li Mucʼul Diose, yuʼun jaʼ noʼox jnacʼubbailtic o ta sventa sbatel osil». Melel onoʼox ti muʼyuk xa kʼusi tspas ta skʼelobil juʼelal ta stojolal li krixchanoetik jech kʼuchaʼal la spas ta skʼakʼalil Vivliae. Akʼo mi jech, «jaʼ noʼox jnacʼubbailtic o ta sventa sbatel osil», jaʼ yuʼun ta «jʼechʼel» me jpatoj-o koʼontontik ta stojolal. ¿Kʼuxi tskoltautik li jTotik ti tukʼ koʼontontik chi jtun ta stojolale? Jkʼeltikik batel oxtosuk: chakʼ kipaltik sventa stsal kuʼuntik li akʼel ta prevae, tskoltautik kʼalal mu kʼusi skʼan li krixchanoetike o kʼalal chkontrainvanike xchiʼuk tspat koʼontontik kʼalal oy kʼusi ta jvul-o koʼontontike. Kʼalal ta jkʼeltik batel taje skʼan me jnopbetik skʼoplal kʼuxi stakʼ jpat mas koʼontontik ta stojolal Jeova.
Jpat koʼontontik ta stojolal Dios kʼalal chkichʼtik akʼel ta prevae
5. ¿Bu ti mas vokol chkaʼitik chkakʼtik ta ilel mi jpatoj koʼontontik ta stojolal Jeovae?
5 Yikʼaluk van mu vokoluk chkaʼitik ta jpat koʼontontik ta stojolal Jeova ti chkʼot ta pasel li kʼusi yaloj ti jmalaojtik tajeke, jech kʼuchaʼal li Paraiso o li chaʼkuxesele. Pe xuʼ van jaʼ toj vokol chkaʼitik ti jpat koʼontontik ta stojolal Jeova kʼalal skʼan chʼunbel smantal ta sventa lekil talelal ta skoj li kʼusitik ta jnuptantike. Yuʼun skʼan xkakʼtik ta ilel ti jpatoj lek koʼontontik ti jaʼ mas toj lek xchiʼuk ti jaʼ mas chakʼ jmuyubajeltik li xchʼunbel smantal xchiʼuk li beiltaseletik yuʼune. Xi chalbutik pʼijil tojobtasel li ajvalil Salomone: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be» (Pro. 3:5, 6). Jkʼeltik lek avil ti «ta tuqʼuil be», xie, taje jaʼ skʼan xal ti skʼan jpat koʼontontik ta stojolal Jeova ta sjunul jkuxlejaltike, maʼuk noʼox skʼan oyuk xchʼunel koʼontontik ti chkʼot ta pasel li kʼusi yaloj tspas ta tsʼakale. Tana une jkʼeltik batel kʼuxi xuʼ xkakʼtik ta ilel ti jpatoj koʼontontik ta stojolal Jeova kʼalal chkichʼtik akʼel ta prevae.
6. ¿Kʼuxi xuʼ mas jpʼeluk ta koʼontontik ti mu jnoptik li kʼusi chopole?
6 Skʼan jkʼel lek li jnopbentike yuʼun jaʼ te chlik tal li kʼusi chopol ta jpastike (kʼelo Romanos 8:5 xchiʼuk Efesios 2:3). ¿Kʼuxi xuʼ mas jpʼeluk ta koʼontontik ti mu jnoptik li kʼusi chopole? Jkʼeltik voʼtosuk: 1. Jkʼanbetik koltael Dios (Mat. 6:9, 13). 2. Jnopbetik skʼoplal li buchʼutik te skʼoplalik ta Vivlia ti la stsʼet chikintaik li kʼusi laj yal Jeova xchiʼuk ti la stabeik sbalile xchiʼuk li buchʼutik laj yil svokolik ta skoj ti muʼyuk la xchikintaike (1 Cor. 10:8-11). a 3. Jnoptik ti toj echʼ xa noʼox chkil jvokoltik xchiʼuk chil svokol kutsʼ kalaltik mi ta jpas jmultike. 4. Jnoptik kʼu to yelan chaʼi sba Jeova kʼalal tspas smul junuk yajtunele (kʼelo Salmo 78:40, 41). 5. Jnoptik ti xmuyubaj tajek Dios kʼalal chil ti tspʼajik choplejal li tukʼil yajtuneltake, ti jaʼ tspasik li kʼusi leke, ti maʼuk noʼox jech tspasik ta sat krixchanoetike (Sal. 15:1, 2; Pro. 27:11). Ta melel, jaʼ me jech ta jpat mas koʼontontik ta stojolal Jeova mi jech ta jpastike.
Jpat koʼontontik ta stojolal Dios kʼalal mu kʼusi skʼan krixchanoetik o ti tskontrainutike
7. ¿Kʼusi prevail la snuptan li Jeremiase, xchiʼuk kʼu yelan laj yaʼi sba bateltik?
7 Ep yajtuneltak Jeovae jaʼ te chcholik mantal ti bu toj vokole. Jaʼ jech la snuptan li j-alkʼop Jeremiase, yuʼun jaʼo la xchol mantal ta Judá kʼalal poʼot xaʼox xlaj skʼoplal li ajvalilal tee. Skotol kʼakʼal skʼan xakʼ ta ilel ti oy xchʼunel yoʼonton kʼalal laj yalbe skʼoplal ti chchapanvan li Diose. Jaʼ yuʼun, oy bu toj tsots svokol laj yaʼi li Baruque, ti jaʼ li yajtsʼibajom Jeremías ti tukʼ yoʼontone (Jer. 45:2, 3). ¿Mi chibaj van Jeremías ta skoj taje? Veno, jun veltae laj yat tajek yoʼonton. Xi laj yale: «Toj chopol li jun cʼacʼal ti cʼalal livoqʼue [...]. ¿Cʼu yuʼun livocʼ me jaʼ noʼox tal caʼay at-oʼnton xchiʼuc vocole, me ta puru qʼuexlal noʼox chlaj li coraile?» (Jer. 20:14, 15, 18).
8, 9. ¿Kʼusi skʼan jpastik sventa mu xi «[j]paj ta satinel» kʼuchaʼal chal Jeremías 17:7, 8 xchiʼuk Salmo 1:1-3?
8 Akʼo mi jech, muʼyuk bu xchibaj yoʼonton li tukʼil j-alkʼope. Laj onoʼox spat yoʼonton ta stojolal Jeova. Vaʼun laj yil kʼot ta spasel li kʼusi yaloj Dios ta Jeremías 17:7, 8: «Li bochʼo jaʼ noʼox chchʼun ti chcoltaat yuʼun Mucʼul Diose, ti jaʼ noʼox ta spat yoʼnton yuʼune, toj jun noʼox yoʼnton, toj lec chbat o. Jaʼ jech chac cʼu chaʼal jpets teʼ tsʼunbil ta tiʼ ucʼum, ti lec chacʼ batel yisim ta yut voʼe. Cʼalal ta xcʼuxub tal cʼacʼale, muʼyuc cʼu chaʼal sba chaʼay, lec yox o li yanale. Cʼalal ta xlic qʼuepelaltique, muʼyuc ta slusib, muʼyuc ta xpaj ta satinel».
9 Jaʼ jech kʼuchaʼal tsatsal «teʼ tsʼunbil ta tiʼ ucʼum» li Jeremiase, yuʼun «muʼyuc [...] xpaj ta satinel», xkoʼolaj kʼuchaʼal li tsʼunobil ti lek akʼbil yaʼlele. Maʼuk laj yakʼ ta yoʼonton ti toj chopol chlabavan li krixchanoetike, moʼoj, yuʼun la spat lek yoʼonton ta stojolal Jeova ti jaʼ li Nioʼ ti bu chlik tal «ucʼum» sventa kuxlejale xchiʼuk la stsak lek ta mukʼ li kʼusi albate (kʼelo Salmo 1:1-3; Jer. 20:9). ¡Toj lek me ti jchanbetik stalelal li Jeremiase, mas to me skʼan xchanbeik li buchʼutik jaʼ te chcholik mantal ti bu toj vokole! Jkʼanbetik me Jeova ti akʼo skoltautik mi jech jnuptanojtike. Ta me skoltautik sventa stsʼik kuʼuntik vokolil yoʼ «[x]locʼ ta quetic ti jaʼ Cajvaltique» (Heb. 13:15).
10. ¿Kʼusi bendisional jtaojtik li avie, xchiʼuk kʼusi skʼan jakʼbe jbatik?
10 Toj ep kʼusi yakʼojbutik Jeova sventa tskoltautik li ta slajebal kʼakʼal liʼe. Jun bendision taje jaʼ ti yakʼojbutik sliklej li Vivliae, ti yantik x-epaj echʼel ta yan kʼopetik ti tukʼ chichʼ jelubtasele. Jech xtok, ta yorail noʼox chakʼ jveʼeltik ta mantal ta stojolal li tukʼil j-abtele. Chakʼ jkʼupintik xtok ti jun koʼontontik xchiʼuk kermanotaktik li ta tsobajeletike xchiʼuk li ta mukʼta tsobajeletike. ¿Mi ta jsabetik lek sbalil li bendisionetik taje? Skotol li buchʼutik jech tspasike «xcuxet noʼox yoʼntonic; solol noʼox yoʼnton chqʼuejinic». Pe li buchʼutik mu skʼan xaʼiik li kʼusi chal Diose ch-avanik, ch-okʼik ta skoj svokolik xchiʼuk ta skoj ti toj abol sba chaʼiike (Isa. 65:13, 14).
Jpat koʼontontik ta stojolal Dios kʼalal oy kʼusi ta jvul-o koʼontontike
11, 12. ¿Kʼusi ti mas lek xuʼ jpastik ta skoj ti tsatsajem li vokoliletike?
11 Toj echʼ xa noʼox chil svokol li krixchanoetik avi kʼuchaʼal chal li albil kʼopetike (Mat. 24:6-8; Apo. 12:12). Kʼalal tstsatsaj tal yok li voʼe skʼan me xi jatavutik ta anil, jaʼ te chi jbat li ta jolnae o buyuk noʼox ti lek toyole. Jaʼ jech li avi eke, ta skoj ti tsatsajem tajek li vokoliletike jaʼ te tsaʼ spojobbailik li epal krixchanoetik ti bu mas toyol chilik xkaltike, jech kʼuchaʼal ta siensia, li ta kʼusitik achʼ chlokʼanuk tale (tecnología), ta vanko, ta politika o ta relijion. Pe mi jaʼuk xuʼ xkoltavanik ta melel maʼ taje (Jer. 17:5, 6). Yan li yajtunelutik Diose oy me lek jpojobbailtik: «Jaʼ noʼox jnacʼubbailtic o [li Jeova] ta sventa sbatel osil[e]» (Isa. 26:4). Ta melel, li jtsʼibajom yuʼun salmoe xi laj yale: «[Li Jeovae] chisnacʼun jech chac cʼu chaʼal mucʼta ton, jaʼ jcoltavanej cuʼun; jaʼ jnacʼubbail cʼotem» (kʼelo Salmo 62:6-9). Veno, pe ¿kʼusi skʼan jpastik sventa xi snakʼutik li «mucʼta ton», jaʼ xkaltik, li Jeovae?
12 Kʼalal tukʼ ta jchʼuntik li kʼusi chal Jeova ta sKʼope jaʼ me jech chkakʼtik ta ilel ti jpatoj koʼontontik ta stojolale, akʼo mi mu stsak sba kʼuchaʼal spʼijil krixchanoetik (Sal. 73:23, 24). Yikʼaluk van xi chalbutik li buchʼutik jech tsnopik kʼuchaʼal balumile: «J-echʼel beutik noʼox, jaʼ yuʼun skʼan jkʼupintik lek li jkuxlejaltike». «Skʼan lek xi jchanunaj sventa jta lek kabteltik.» «Jaʼ lek ti jsaʼ ep jtakʼintike.» «Jmantik skotol ti kʼusi jkʼantike.» «Bat ojtikino namal balumil.» Yan li buchʼutik skʼanojbeik li spʼijil Diose chchʼunik li pʼijubtasel liʼe: «Li bochʼo oy ep cʼusitic oy yuʼun liʼ ta banamile, acʼo muʼyucuc cʼusi oy yuʼun chaʼay. Yuʼun li cʼusitic oy liʼ ta banamile chjelov noʼox» (1 Cor. 7:31). Chchʼunik xtok li tojobtasel laj yal Jesús ti jaʼ akʼo baʼyel spasik li kʼusitik sventa Ajvalilal yuʼun Diose xchiʼuk ti stsob «[s]cʼulejalic te ta vinajel» ti bu mu x-och j-elekʼe (Mat. 6:19, 20).
13. ¿Kʼusi skʼan jakʼbe jbatik ta sventa li kʼusi chal 1 Juan 2:15-17?
13 Xi jakʼbe jbatike: «¿Mi xvinaj lek ti jaʼ jpatoj lek koʼonton ta stojolal Jeova ti kʼuyelan jtalelal ta stojolal li “banamile” xchiʼuk “li cʼusitic chopol oy ta banamile”?» (1 Juan 2:15-17). «¿Mi jaʼ mas tsots skʼoplal chkil li kʼulejal ta mantal xchiʼuk li kʼusitik jbainoj kʼuchaʼal yajtsʼaklomun Cristoe, o mi jaʼ mas tsots skʼoplal chkil li kʼusitik chakʼ balumile?» (Fili. 3:8.) «¿Mi chkakʼbe yipal sventa lek noʼox sba li jsate?» (Mat. 6:22.) Ta melel, li Diose mu lekuk chil ti mu jpastik li kʼusi jbainojtike o ti mu jventatikuke, mas to me mi oy kutsʼ kalaltik ti skʼan jkʼeltike (1 Tim. 5:8). Pe oy ta yoʼonton ti jpat koʼontontik ta stojolale, maʼuk jpat-o koʼontontik li slumal Satanás ti poʼot xa xlaje (Heb. 13:5).
14-16. ¿Kʼusi bendision staoj jlom ermanoetik ta skoj ti lek noʼox sba li satike xchiʼuk ti jaʼ baʼyel tspasik li kʼusitik sventa Ajvalilal yuʼun Diose?
14 Jkʼelbetik skʼoplal Richard xchiʼuk Ruth ti oy oxvoʼ yalab xnichʼnabike. Xi chal li Richarde: «Chalbun koʼonton ti xuʼ to xi abtej batel mas ta stojolal Jeovae. Xi muyubaj noʼox ti ep kʼusitik ta jkʼupin ta jkuxlejale, pe jaʼ noʼox chkakʼbe Dios laj kaʼi li kʼusi tspas sovra kuʼune. Kʼalal la jpas orasion ta sventa taje xchiʼuk ti la jkʼel lek ti kʼuyepal ta jlajeskutik takʼine, la jnop xchiʼuk Ruth ti chkalbe li buchʼu tskʼel abtelal mi xuʼ chanib xa noʼox kʼakʼal xi abtej ta xemana, akʼo mi jaʼo chil tajek svokol ta takʼin li lume. Laj yalbun ti xuʼe, kʼalal lokʼ xaʼox jun ue jaʼ xa jech chi abtej un». ¿Kʼu yelan chaʼi sba Richard li avie?
15 Xi chale: «Akʼo mi yal 20% li jtojole, li avi une oy xa 50 kʼakʼal mas ti muʼyuk chi abtej ta jabil sventa jchiʼin li kutsʼ kalale xchiʼuk ti jchanubtas li jnichʼnabe. Oʼlol xa epajem ti kʼuyepal ta jchol mantale, mas ta oʼlol epaj li buchʼutik ta jchanubtas ta Vivliae xchiʼuk mas xa ta jkolta jba li ta tsobobbaile. Abtejem junantik u ta prekursora auksiliar li Ruth ta skoj ti mas xa te jchiʼuk li ololetike. Jaʼ jech ta jpas-o batel mi xuʼ chkile».
16 Yan ermanoetik ti mas xa jutuk ch-abtejik xtok sventa spasbeik yabtel Dios ta tsʼakal orae jaʼ li Roy xchiʼuk Petinae, ti te to nakal ta snaik li stsebike. Xi chal li ermanoe: «Oxib kʼakʼal chi abtej ta xemana, li kajnile kʼajomal chib. Jech xtok li batkutik ta naklej ta jun bikʼit na, ti jaʼ mas kʼun ta kʼelele. Abtejemunkutik xa onoʼox ta prekursor kʼalal chʼabal toʼox li chaʼvoʼ kalab jnichʼnabkutike, jech oxal muʼyuk chʼayem ta koʼontonkutik. Jaʼ yuʼun li ochkutik ta abtel ta tsʼakal ora yan velta kʼalal chʼiik xaʼox li kalab jnichʼnabkutike. Li bendisionetik jtaojkutik avie mi jaʼuk xkoʼolaj kʼuchaʼal li epal takʼine».
«Chaspasboxuc o ta jun avoʼntonic li Diose»
17. ¿Kʼuxi tspatbot avoʼonton li Vivlia ta skoj ti mu jnaʼtik li kʼusi chkʼot ta jkuxlejaltike?
17 Mu jnaʼtik kʼusi chkʼot ta pasel leʼ okʼom chaʼeje, «yuʼun li yorail xchiʼuk li kʼusitik muʼyuk malabil chkʼot ta pasele chkʼot ta stojolal skotolik» (Ecl. 9:11, NM). Pe taje mu me jaʼuk xchʼaybutik ti jun koʼontontike, ti jaʼ jech muʼyuk jun yoʼontonik li buchʼutik mu lekuk xil sbaik xchiʼuk Diose (Mat. 6:34). Ti kʼusi mas lek xuʼ jpastike jaʼ ti jchʼuntik li tojobtasel chal Pablo liʼe: «Mu me cʼusi xloʼilaj avoʼntonic yuʼun. Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol. Jech chaspasboxuc o ta jun avoʼntonic li Diose. Li jun oʼntonal chacʼ Diose echʼem to xjelov jech chac cʼu chaʼal ta jnop ta jcʼantic li vuʼutique, jaʼ chaxchabiboxuc avoʼntonic xchiʼuc cʼusitic chanopic» (Fili. 4:6, 7).
18, 19. ¿Kʼutik yelan tspat koʼontontik li Jeovae? Alo jtosuk kʼusi kʼotem ta pasel.
18 Akʼo mi ep vokoliletik li avie, ep ermanoetik ti tstaik li jun oʼontonal chakʼ Jeovae. Xi chal jun ermanae: «Li doktore la sibtasun ep ta velta sventa xkichʼ li chʼichʼe. Li kʼusi baʼyel chalbune jaʼ liʼe: “¿Kʼuxi xa noʼox ti jech abolilik ti mu xa kʼan xavichʼik chʼichʼe?”. Ti kʼalal jech ta jnuptane ta jkʼopon li Jeovae, vaʼun la spasbun ta jun koʼonton. Akʼo mi toj echʼ xa noʼox kʼunibemun ta skoj ti jutukajem li hemoglobina ta jchʼichʼele, toj lek tsots laj kaʼi jba kʼuchaʼal ton, jaʼ yuʼun laj kalbe ta sjunul koʼonton ti kʼusi chal Vivlia ta sventa taje».
19 Bateltike, li Diose tskoltautik ta stojolal junuk ermano o chakʼbutik li veʼlil ta mantal sventa tspat koʼontontik ti kʼalal mas chtun kuʼuntike. Oy onoʼox van kaʼiojtik xi chal kermanotaktike: «Li mantal liʼe jaʼ li kʼusi chtun kuʼune. Xkoʼolaj kʼuchaʼal voʼon chalbikun tal chkaʼi». Akʼo mi jelajtik ti kʼusitik chtun kuʼuntike o ti kʼusi ta jnuptantike, li Jeovae chakʼ kiltik ti chchabiutik ta slekil yoʼonton mi jpatoj koʼontontik ta stojolale. Yuʼun ti kʼusie voʼotik xchijutik, steklumalutik ti chkichʼtik ta mukʼe (Sal. 100:3; Juan 10:16; Hech. 15:14, Ch, 17).
20. ¿Kʼu yuʼun jun xa noʼox yoʼontonik li yajtuneltak Jeova kʼalal mi laj li sbalumil Satanase?
20 Li «scʼacʼal yoʼnton li Mucʼul [Dios]» Jeova ti poʼot xa xvule tslajes skotol li kʼusitik spatoj-o yoʼonton li steklumal Satanase. Ta melel mu kʼusi xtun-o ta jyalel li kʼusitik toj ep sbalile, li kʼanal takʼin xchiʼuk li sakil takʼine (Sof. 1:18; Pro. 11:4). «Jaʼ noʼox jnacʼubbailtic o [li Jeova] ta sventa sbatel osil[e].» (Isa. 26:4.) Jaʼ yuʼun, kakʼtik me ta ilel ti jpatoj koʼontontik ta stojolal Jeova kʼalal tukʼ ta jchʼunbetik li stukʼil mantaltake, kʼalal chkaltik batel li lekil aʼyej ta sventa Ajvalilal yuʼun Dios akʼo mi mu skʼan li krixchanoetike o ti chkontrainvanike xchiʼuk kʼalal oy kʼusi ta jvul-o koʼontontike. Li buchʼu jech tspase «jun noʼox [me] yoʼnton; mu xloʼilaj yoʼnton, mu xiʼ me oy cʼusi xiʼbal sba chtal ta [stojol]» (Pro. 1:33).
[Tsʼib ta yok vun]
a Kʼelo li livro «Tey me comanic o ta stojol ti scʼuxul yoʼnton ti Diose», ta pajina 102 kʼalal ta 106.
¿Mi xuʼ xavalbe smelolal?
¿Kʼuxi xuʼ jpat koʼontontik ta stojolal Dios...
...kʼalal chkichʼtik akʼel ta prevae?
...kʼalal mu kʼusi skʼan krixchanoetik o ti chkontrainvanike?
...kʼalal oy kʼusi ta jvul-o koʼontontike?
[Sjakʼobiltak sventa xchanobil]
[Lokʼol ta pajina 13]
Mi ta jchʼunbetik li smantaltak Diose xi jmuyubaj noʼox me chi jkuxi
[Lokʼol ta pajina 15]
Jaʼ jnakʼobbailtik kʼuchaʼal mukʼta ton ta sbatel osil li Jeovae