Li kʼusitik tsjakʼ jkʼel vunetike

¿Mi laj van yalbe yajtsʼaklomtak Jesús ti akʼo xichʼ batel snamteʼik xchiʼuk xonobik kʼalal laj yal ti akʼo xbat xcholik mantale?

Oy buchʼutik chalik ti mu xkoʼolaj li kʼusi chal li oxib Evanjelioetike, ti te chalbe yajtsʼaklomtak Jesús ti kʼusi skʼan spasik kʼalal la stak echʼel ta chol mantale. Pe mi ta jkoʼoltastike labal to me chkaʼitik ti kʼusi skʼan xal ta melele. Kalbetik skʼoplal baʼyel li chaʼvoʼ jtsʼibajometik yuʼun Evanjelioe. Li Marcose chal ti «laj yalbe [yajtsʼaklomtak Jesús] ti mu me cʼusi xichʼic batel ta sventa bee. Jaʼ noʼox acʼo yichʼic batel snamteʼic. Mu me xichʼ batel sveʼelic, me snutiʼic, o me staqʼuinic. Jaʼ noʼox acʼo slap batel xonobic; mu me xichʼ batel chaʼlic scʼuʼic» (Mar. 6:7-9). Yan li Lucase xi chal li mantal laj yal Jesuse: «Mu me cʼusi xavichʼ batel ta sventa abeic. Mu me xavichʼ batel anamteʼic, anutiʼic, aveʼelic, xchiʼuc ataqʼuinic. Mu me xavichʼ batel chaʼlic acʼuʼic» (Luc. 9:1-3). Liʼe jaʼ ti bu chchibal kʼopta sba yaʼeluk li Vivliae. Li kʼusi laj yal Marcose jaʼ ti akʼo la yichʼ batel snamteʼ li jtakboletike xchiʼuk ti akʼo slap batel xonobike, yan li Lucase chal ti mu kʼusi stakʼ xichʼik batel ta jyalele, mi jaʼuk snamteʼik, xchiʼuk mi jaʼuk bu chalbe skʼoplal li xonobile.

Li kʼusi xuʼ skoltautik ta yaʼibel smelolal li kʼusi la skʼan laj yalbe yajtakboltak Jesuse, jaʼ ti jkʼelbetik smelolal li jpʼel kʼop ti te ta jtatik ta yoxibal Evanjelioe. Li chib loʼil laj xa kalbetik skʼoplale, jech kʼuchaʼal li ta Mateo 10:5-10, te laj yal Jesús ti «mu me [x]ichʼ batel chaʼlic [skʼuʼike]». Ta melel, li jtakboletik taje slapoj onoʼox jchop skʼuʼik. Ti kʼusi noʼoxe jaʼ ti mu stakʼ xichʼ batel yan skʼuʼike. Li Marcose laj yal ti «acʼo slap batel [li] xonobic» ti tstunesik xa onoʼoxe, ti mu sjelike. Pe ¿kʼusi xuʼ xkaltik ta sventa li namteʼile? Xi chal li vun The Jewish Encyclopedia: «Yileluke jaʼ jech nopem xaʼiik ta yichʼel batel snamteʼik li voʼneal j-hebreoetike» (Gén. 32:10). Li Marcose chal ti «mu me cʼusi xichʼic batel» li jtakboletike, ti jaʼ noʼox xichʼ batel li snamteʼik te stomojik kʼalal albatik mantal yuʼun Jesuse. Li kʼusi la skʼan laj yalik ta melel li jtsʼibajometik yuʼun Evanjelioe, jaʼ li mantal laj yal Jesús ti mu la me xbatik ta yan be sventa tsaʼik li kʼusitik xuʼ xtun yuʼunik kʼalal mi batik ta chol mantale.

Jaʼ mas jamal xvinaj li kʼusi chal Mateo ta sventa taje, yuʼun jaʼo te oy kʼalal laj yichʼik li mantale jech oxal la stsʼiba komel. Jech kʼuchaʼal laj yal Mateoe xi laj yal ek li Jesuse: «Mu me xavichʼ batel ataqʼuinic, me cʼanal taqʼuin, me saquil taqʼuin, o me cobre. Mu me xavichʼ batel anutiʼic sventa be. Mu me xavichʼ batel chaʼlic acʼuʼic xchiʼuc axonobic xchiʼuc anamteʼic. Yuʼun li bochʼotic ta xʼabtejique te ta xʼacʼbat sveʼelic» (Mat. 10:9, 10). ¿Mi laj van yal Jesús ti akʼo mu xichʼik batel li xonob slapojik xchiʼuk snamteʼ stomojike? Moʼoj. Yuʼun ti kʼusie jaʼ ti mu xbat saʼik yane. ¿Kʼu yuʼun ti jech laj yale? «Yuʼun li bochʼotic ta xʼabtejique te ta xʼacʼbat sveʼelic». Taje jaʼ li kʼusi tskʼan chakʼ ta aʼiele. Jvules ta joltik ti jechtik xa onoʼox laj yal li ta Mantaletik ta Vitse: ti mu xloʼilaj yoʼontonik kʼusi tslajesik, kʼusi chuchʼik xchiʼuk ti bu tsta skʼuʼ spokʼike (Mat. 6:25-32).

Kʼalal anil noʼox ta jkʼeltike chchibal kʼopta sba yaʼel li kʼusi ta jkʼeltik ta Evanjelioetik taje, pe jmoj li kʼusi chal une: li jtakboletike skʼan jaʼ noʼox xichʼik batel li kʼusi te xa onoʼox yichʼojik kʼalal chbat xcholik mantale, ti mu jaʼuk xbat ta yoʼontonik saʼel li yan kʼusitike, yuʼun li Jeovae chakʼbe li kʼusitik chtun yuʼunike.

 ¿Mi lek van ti xi jbat ta skʼinal snupunel junuk kutsʼ kalaltik o junuk buchʼu xkojtikintik ti maʼuk yajrextiko Jeovae?

Jaʼ jun muyubajel li skʼinal nupuneletike, jaʼ yuʼun tskʼan chbat li yajtsʼaklomtak Cristoe. Veno, pe mi takbilik ta ikʼel li ololetike skʼan me xchʼunbeik smantal li stot smeʼike o li jchabivanej yuʼunike, yuʼun jaʼ oy ta sbaik ta yalel mi chbatik o mi moʼoj li ta kʼine (Efe. 6:1-3). Pe ¿kʼusi van xuʼ xkaltik kʼalal chikʼ echʼel yajnil li jun vinik ti maʼuk yajrextiko Jeova ta jun kʼin nupunel ti tspasik ta chʼulnae? Xuʼ van xakʼ sjol yoʼonton chaʼi li ermana sventa xbat noʼox skʼele, pe jpʼel ta yoʼonton ti muʼyuk bu tstikʼ sba ta spasel li kʼusitik tspasik sventa relijione.

Voʼotik onoʼox me ta jnop jtuktik mi chi jbat o mi moʼoj li ta kʼin nupunele. Pe ta jujuntal me skʼan jnoptik ti chkaltik ta stojolal Jeova ti kʼuyelan ta jpas jbatike. Jech xtok, skʼan me jtsaktik ta mukʼ li beiltaseletik ta Vivlia kʼalal ta jkʼelbetik skʼoplal mi chi jbat li skʼinal snupunel jun krixchano ti maʼuk yajrextiko Jeovae.

Li kʼusi mas tsots skʼoplal chkaʼitik li yajtsʼaklomutik Cristoe jaʼ ti lekuk xilutik li Diose. Xi laj yal li Jesuse: «Li Diose jaʼ jun Espiritu, xchiʼuk li buchʼutik chichʼik ta mukʼe skʼan me ta espiritu xchiʼuk ta melel chichʼik ta mukʼ» (Juan 4:24, NM). Jaʼ yuʼun li yajrextikotak Jeovae muʼyuk jmoj tspasik orasion xchiʼuk li yan relijionetike, ti kʼuyelan chichʼ ta mukʼ sdiosike o li kʼusitik chichʼ pasel ti chal Vivlia ti mu stakʼ pasele (2 Cor. 6:14-17).

Jech xtok, li yajtsʼaklom Cristoe ta me stsak ta mukʼ ti yikʼaluk van chopol xil yantike. Ati xbat une, ¿mi ch-ilin-o van yutsʼ yalal mi muʼyuk tspas stekel li kʼusitik tspasik ta skʼinal nupunele? Skʼan me jnoptik lek xtok ti kʼuyelan chil li ermanoetik ta tsobobbaile (Rom. 14:13). Pe mi muʼyuk chopol chaʼi sjol yoʼonton xchiʼuk yutsʼ yalal ti chbatik li ta kʼin nupunele, ¿mi xuʼ van jaʼ chopol xaʼi sjol yoʼonton li yermanotake o mi oy van buchʼu yan chopol xaʼi sba yuʼunik?

Jech xtok, yikʼaluk van oy kʼusitik spasik ti mu junuk koʼontontik yuʼun li ta skʼinal snupunel junuk kutsʼ kalaltik ti maʼuk yajrextiko Jeovae. Jech kʼuchaʼal liʼe, ¿kʼusi van cha pas ti xa yalbeik ti akʼo xa koltavan ta sventa li kʼusi nopem xaʼi tspasik li ta nupunele? ¿Kʼu van yelan chavaʼi xtok mi tskʼan tspas skotol li kʼusitik tspasik ta skʼinal nupunel li anup achiʼil ti maʼuk yajrextiko Jeovae? Pe mi jaʼ skʼoplal li nupunel ta civil chakʼ jun jues o yan j-abtel ti chakʼ nupunele yikʼaluk van jaʼ noʼox cha kʼel ti kʼuyelan chnupunike.

Pe oy to me yan kʼusi skʼan kʼelbel skʼoplal mi ta chʼulna chnupunike o kʼalal jaʼ chakʼ nupunel li jun pale o jun pastore. Yikʼaluk van mu xa bat ta skoj ti cha chʼun li kʼusi chal ajol avoʼonton ti lek chanubtasbil ta Vivliae. Jaʼ me jech muʼyuk bu cha valopatin li kʼusitik achʼunoje o ti muʼyuk cha pas li kʼusitik xuʼ xkʼexavik-o li buchʼutik chnupunike xchiʼuk li yutsʼ yalalike (Pro. 22:3). Mi baʼyel cha chapbe lek smelolal li kʼusitik achʼunoj ta Vivliae xchiʼuk ti jamal lek chaval li kʼusitik mu xuʼ xa pase o ti xaval jutuk kʼuxi ta pasele, xuʼ me jaʼ xkoltavan sventa mu sujbiluk xavaʼi aba xchiʼuk ti mu jechuk xaʼi sba li avutsʼ avalal eke.

Kʼalal mi laj xaʼox skʼelbe lek skʼoplal skotol li yajtsʼaklom Cristoe, yikʼaluk van mu chopoluk mi la snop chbat tskʼel chnupun li yutsʼ yalale o li buchʼu xojtikin ti maʼuk yajrextiko Jeovae. Pe mi xuʼ stsʼuj chaʼi ta spasel li kʼusi chal Vivlia ti mu stakʼ jpastike, yikʼaluk van xakʼ venta ti jaʼ ep li vokolil tsnuptane xchiʼuk ti jaʼ jutuk sbalile. Mi la snop muʼyuk chbat li ta nupunele, pe mi jaʼ la xchʼam li takel ta ikʼel ta sventa li kʼusitik tspasik ta tsʼakale skʼan me «acʼo [spas] sventa lec chbat scʼoplal [yuʼun] li Diose» (1 Cor. 10:31). Kʼalal ta jnoptik taje teuk me ta joltik ti «jaʼ cuʼun jtuctic li cʼusi ta jpastique» (Gál. 6:5). Kʼusiuk ti xkʼot ta nopel avuʼune, naʼo me ti jaʼ me mas tsots skʼoplal ti lek jol koʼontontik ta sat li Jeova Diose.