Mu me jtentik komel li kermanotaktike

«LAJUNEB jabil bat ta koʼontonkutik li saʼ takʼin liʼ ta balumile xchiʼuk la jkʼupinkutik jutuk maʼ kʼulejale. Manchuk mi koʼol laj kichʼkutik chanubtasel ta mantal ta jbikʼtalkutik, la jchʼak jbakutik lokʼel xchiʼuk toj vokol xa chkaʼikutik ti xi sutkutik tale», jaʼ jech chalik li Jarosław xchiʼuk yajnil ti Beata sbie. a

Xi chal jun ermano xtok ti Marek sbie: «Nopajtik noʼox muʼyuk kabtel chi kom ta skoj li kʼusitik kʼotanuk ta pasel ta stojolal li politikae xchiʼuk li ta xkuxlejal krixchanoetik ta Poloniae. Mu xa jnaʼ kʼusi ta jpas xchiʼuk mu jkʼan jlikes kabtel jtuk ta skoj ti mu xi tojob lek chkaʼi li ta pʼolmale. Pe la jpas persa, yuʼun la jnop ti jaʼ to jech xuʼ xkakʼbe lek li kʼusitik chtun yuʼun kutsʼ kalale xchiʼuk la jnop ti muʼyuk bu ta jchʼay ta koʼonton li kʼusitik chtun yuʼunik ta mantal xtoke. ¡Pe bu cha ta, chʼayemun ta mas!».

Oy ermanoetik ti mu xa snaʼ kʼusi tspasike xchiʼuk ti muʼyuk xa lek li kʼusitik chkʼot ta nopel yuʼunik ta skoj ti mas xa toj tsots ta tabel stojol li kʼusitik chtun kuʼuntike xchiʼuk ti chʼabal xa lek abtel avie. Jlome tsnopik ti jaʼ to jech xuʼ skolta yutsʼ yalalik xchiʼuk ti muʼyuk chlubtsajik ta mantal ti jal ch-abtejike, jaʼ yuʼun chib to stsakoj yabtelik li jlome, o moʼoje tslikes yabtel stukik manchuk mi mu xtojobik. Akʼo mi lek ti kʼuyelan la snopike xchiʼuk ti jaʼ sventa slekilal  yalojike, yikʼaluk mu jechuk kʼot ta pasel un ta skoj li vokolil ta takʼin ta slumalike o yan kʼusitik chmakvan. Vaʼun, li jlome tstsʼujik li ta pichʼ-oʼontone xchiʼuk chakʼik ta vokol li yabtelik ta stojolal Dios ta skoj li takʼine (Ecl. 9:11, 12).

Jlom ermanoetik xchiʼuk ermanaetike jaʼ chbat ta yoʼontonik li saʼel kʼulejale, vaʼun jaʼ mu xa xokobik ta xchanel li Vivlia ta stukike, li tsobajeletike xchiʼuk muʼyuk xa chlokʼik ta chol mantal. Taj une jaʼ tsikubik-o ta mantal xchiʼuk muʼyuk xa lek chil sbaik xchiʼuk Jeova. Pe maʼuk noʼox taje, yuʼun tstenik komel xtok «ti bochʼo coʼol jchʼunojtic Dios jchiʼuctique», xchiʼuk chnamajik ta stojolal li tsobobbaile (Gál. 6:10). Skʼan me jkʼeltik lek taje.

Li kʼusi jbainojtik ta stojolal kermanotaktike

Mi ermanoutik o mi ermanautike, toj ep me bu xuʼ xkakʼbetik yil kermanotaktik ti jkʼanojantike (Rom. 13:8). Kilojtik van ta melel ta jtsobobbailtik ti oy «meʼonetic ti [...] xvocoletique» (Job 29:12). Jech kʼuchaʼal liʼe, yikʼaluk van oy buchʼutik ti vokol tstaik li kʼusitik tslajesike. Veno, li jtakbol Juane tsvules ta joltik ti oy kʼusi jbainojtik ta stojolalike: «Li bochʼo oy cʼusi oy yuʼune, me chil ti oy bochʼo abul sbae pero me mu scoltae, ¿cʼu xʼelan chvinaj ti oy ta yoʼnton li cʼuxubinel yuʼun Diose?» (1 Juan 3:17).

Xuʼ van oy buchʼu jech la jkoltatik ta slekil koʼontontik. Veno, pe mu me jchʼay ta joltik ti maʼuk noʼox sbainoj ti xakʼ kʼusi oy yuʼun li yajtsʼaklom Cristoe. Yuʼun oy buchʼutik tskʼanik koltael ta skoj ti stuk chaʼi sbaike o ti chat yoʼontonike. Yikʼaluk van tsots ipik, cham junuk yutsʼ yalalik o moʼoje, tsnopik ti mu xa sta-o chaʼi ti chtunik ta stojolal Jeovae. Ti kʼuxi xuʼ jkoltatike jaʼ ti jchiʼintik ta loʼile xchiʼuk ti ta sjunul koʼonton jchikintatik li kʼusi chalik sventa xkiltik li kʼusi oy ta yoʼontonike xchiʼuk ti kʼuyelan skʼan jkoltatik ta mantale (1 Tes. 5:14). Mas me ta jkʼan jbatik mi jaʼ jech ta jpastike.

Li moletik ta tsobobbaile jaʼik me li buchʼutik xtojobik ta xchikintabel lek svokol li ermanoetike, ti xakʼik ta ilel ti xaʼibeik smelolale xchiʼuk ti xkoltavanik kʼalal chalik tojobtasel ti ta Vivlia tslokʼesike (Hech. 20:28). Vaʼun jaʼ jech chchanbeik stalelal Pablo ti xi laj yalbe li ermanoetike: «Batsʼi ep jcʼanojotcutic» (1 Tes. 2:7, 8).

Veno, pe ¿kʼusi van xuʼ xkaltik ta stojolal li buchʼu jaʼ chbat ta yoʼonton li kʼulejale xchiʼuk ti chchʼak sba ta stojolal li chijetike? Jaʼ ti muʼyuk xa tspas li kʼusi sbainoje: skoltael li ermanoetike. Jkotoltik me xuʼ xi jtsʼuj li ta petsʼ taje, kʼalal ta moletik xuʼ stsʼujik ek. ¿Kʼuxi?

Xuʼ me jaʼ slubtsanutik li vul-oʼontone

Kʼuchaʼal laj xa kaltike, xuʼ me slubtsanutik xchiʼuk ti mu xa xkiltik ti kʼusi lek skʼan jpastik li yajtsʼaklomutik Cristo ta skoj ti jaʼ chbat ta koʼontontik saʼel li kʼusi chtun yuʼun kutsʼ kalaltike (Mat. 13:22). Li Marek ti laj xa kalbetik  skʼoplale, xi chal kaʼitik ti kʼusi la snuptane: «Muʼyuk lek xlokʼ li kabtel jtuke, jaʼ yuʼun bat jsaʼ kabtel ta nom ti lek toyol tojolil tee. Oxib noʼox u li bat, laje li bat to oxib u, li bat to oxib u xtok, jaʼ jech li jalij-o batel. Jech oxal muʼyuk xa jal chi paj li ta jnae. Ta skoj taje laj yat tajek yoʼonton li kajnil ti maʼuk yajrextiko Jeovae».

Pe maʼuk noʼox sok li xkuxlejal ta yutsʼ yalale, xi to chale li Mareke: «Jal tajek chi abtej ti bu kʼixin tajeke xchiʼuk jaʼ ta jchiʼin ta abtel li krixchanoetik ti toj bol chkʼopojike, ti ilbaj chutik li yantike xchiʼuk ti jaʼ xa jech stalelalik kʼuchaʼal jmilvanejetike. Toj ilbaj chutikun laj kaʼi xchiʼuk li ipaj ta at-oʼonton. Ta skoj ti mu xuʼ jchabi jba jtuk laj kaʼie, lik jnop ti muʼyuk xa buchʼu xchabi kuʼune».

Ta skoj ti toj chopolik kʼusi kʼotem ta stojolal krixchanoetik kʼuchaʼal Marek, jaʼ me tstij koʼontontik ti jchotan jbatik lek ta snopel kʼalal skʼan toʼox xi jbat ta saʼ abtel ta nome. Akʼo mi jaʼ tskoltautik yilel ta jvokoltik li takʼine, pe ¿mi mu chakʼuk van yan vokolil xa naʼ? Jech oxal skʼan xi jakʼbe jbatike: «¿Mi chlik van yat-o yoʼonton kutsʼ kalal xchiʼuk mi chil-o van svokolik ta mantal? ¿Mi persa van chkikta s-organisasion Jeova ta skoj ti chi bat ta saʼ abtele? ¿Mi tsmakun van ta be ti xi tun ta stojolal kermanotake?» (1 Tim. 3:2-5).

Melel onoʼox chaʼa, xuʼ jaʼ xbat ta yoʼonton yabtel li jun krixchano akʼo mi mu xbat ta nome. Jaʼ jech kʼot ta stojolal Jarosław xchiʼuk Beata. Xi chal li ermanoe: «Ta slikebale muʼyuk kʼusi mas ta jkʼankutik. Kʼalal jaʼtik toʼox li nupunkutike te lik jchonkutik uni veʼlil ti bu ep snaʼ xjelav krixchanoetike. Vaʼun lik jmukʼibtas li jpʼolmajebkutik ta skoj ti ep ta jpaskutik kanal laj kilkutike. Pe ti kʼusi vokol une jaʼ ti mu xa bu xi batkutik likel ta tsobajeletik ta skoj ti mu xa xi xokobkutike. Mu ta sjaliluk une laj kikta li prekursorale xchiʼuk li lokʼ li ta yajkoltaobba mole. Chakʼ tajek muyubajel laj kaʼikutik ti ep ta jpaskutik kanale, jech oxal la jpas jun jmukʼta tiendakutik xchiʼuk jmoj lik j-abtejkunkutik xchiʼuk jun krixchano ti maʼuk jchiʼiltik ta chʼunolajele. Kʼalal laj kakʼ ventae yakalun xaʼox chi batilan ta mukʼtik lumetik sventa ta jpas firmar li kʼusitik sventa takʼin ti ta smiyonal xa noʼox dolare. Bateltik to te oyun li ta jnae, jech oxal sok ti kʼuyelan xkil jba xchiʼuk kajnil xchiʼuk jtsebe. Vaʼun, ta skoj ti lek ta jpaskutik kanale jaʼ la smakunkutik ti mu xa bu chi tunkutik ta stojolal Jeovae. La jchʼak jbakutik lokʼel li ta tsobobbaile xchiʼuk mi jaʼuk xa bu chvul ta jolkutik li ermanoetike».

¿Kʼusi chakʼ jchantik taje? Jaʼ me jun petsʼ kʼalal tskʼan lek yabtel sventa oyuk stakʼin li jun krixchanoe, ti oyuk lek mukʼ sna xchiʼuk ti kʼupil sbae, vaʼun jaʼ xa noʼox tskʼan li kʼusi oy ta yoʼontone xchiʼuk xuʼ xchʼay li «scʼuʼe», jaʼ xkaltik, ti mu xa jaʼuk yajtunel Diose (Apo. 16:15). Taje jaʼ me xuʼ jchʼak-o jbatik lokʼel ta stojolal li kermanotaktike xchiʼuk ti mu xa jkoltatike.

Jkʼel jbatik lek ta melel

Yikʼaluk van oy buchʼu xi xale: «Mi jaʼuk onoʼox xkʼot ta pasel ta jtojolal maʼ taje». Pe ti kʼusie jaʼ ti skʼan xkakʼtik lek venta ta melel kʼusi jaʼ ti mas tsots skʼoplal chkaʼitike. Jvules ta joltik li kʼusi laj yal Pablo liʼe: «Muʼyuc onoʼox jcʼulejaltic ti cʼalal lijvocʼutic liʼ ta banamile. Jech noxtoc muʼyuc cʼusi ta xquichʼtic batel ti cʼalal chijchamutique. Me oy jveʼeltic xchiʼuc jcʼuʼ jpocʼtique, cuxetuc noʼox coʼntontic o» (1 Tim. 6:7, 8). Melel onoʼox chaʼa, jelajtik kʼuyelan oy takʼin li ta jujun lume, li kʼusi persa jtunel yuʼunik yilel li ta jun lum ti oy takʼin tee jaʼ xa jun lujo chilik li ta yantik lume.

Mi oy o mi muʼyuk lek takʼin li bu nakalutike, persa skʼan oyuk ta joltik li kʼusi laj yal Pablo liʼe: «Li bochʼo tscʼan tspas ta jcʼuleje, te ta sujat yuʼun cʼusi chopol, jech te chucbil [ta chʼojon] ta xcʼot o. Ep cʼusi chlic svovil cʼupin. Muʼyuc lec cʼusitic chlic snop, jech te ta soc o yoʼnton, jech chʼayel ta xbat o xchiʼuc» (1 Tim. 6:9). Li chʼojone jismoch chichʼ chukel xchiʼuk chichʼ lek mukel sventa mu xil li kʼusi chichʼ yakele. ¿Kʼusi xuʼ jpastik sventa mu «suj[utik li] cʼusi chopol[e]».

Kʼalal jnaʼojtik lek li kʼusi mas chtun kuʼuntike jaʼ me tstij koʼontontik sventa jaʼ mas jpasbetik  li yabtel Diose, jech kʼuchaʼal ti mas xi jchanunaj jtuktike xchiʼuk ti jpastik orasione. Li abtelaletik sventa mantal taje jaʼ me tskoltautik sventa «chijbijub vuʼutic ti jchʼunolajelutic yuʼun Diose, jech lec chapalutic» sventa jkolta li kermanotaktike (2 Tim. 2:15; 3:17).

Kʼalal echʼ jayib jabile ep moletik la stijbeik yoʼonton li Jarosław xchiʼuk ti stsatsubtasbeik li xchʼunel yoʼontone, jech oxal ep kʼusi la sjel ta xkuxlejal. Xi chale: «Kʼalal oy kʼusi toj tsots skʼoplal laj yalbikun li moletike, jaʼ laj yakʼbikun kil li kʼusi kʼot ta pasel chal Vivliae. Jaʼ skʼoplal li jun kerem ti tskʼan chkuxi sbatel osile, pe ti mu skʼan xikta li skʼulejale. Toj pʼij kʼuyelan la sjakʼbikun mi oy jech xkʼot ta jkuxlejal taj eke. Vaʼun jaʼ te jam-o tal jsat» (Pro. 11:28; Mar. 10:17-22).

Li Jarosław la skʼel lek ti kʼuyelan oye, vaʼun kʼot ta nopel yuʼun ti jaʼ lek ti xikta li yabtel ti leke. Chib jabil ta mas tsʼakale, la xchaʼtsak yip ta mantal xchiʼuk li yutsʼ yalale. Li avie yakal chtun ta mol ta stsobobbail. Xi chale: «Kʼalal tstikʼ sbaik tajek ta pʼolmajel li ermanoetik ti mu xa bu tskʼel sbaik ta mantale, chkalbeik li kʼusi la jnuptane, ti mu lekuk ti tsnop skʼopik xchiʼuk li buchʼutik mu jmojuk kʼusi jchʼunojtik xchiʼukike. Yuʼun xuʼ me xakʼbutik li kʼusi toj lek yilele o xuʼ me xi stikʼutik ta spasel li kʼusitik mu lekuk ta pasele, pe taje mu toj kʼunuk ta tsalel» (2 Cor. 6:14).

Li Marek eke jaʼ to laj yaʼibe smelolal ti kʼalal oy kʼusi chopol kʼot ta stojolale. Akʼo mi ep chakʼbe takʼin li yutsʼ yalal ta skoj ti ch-abtej ta nome, sok ta jyalel ti kʼuyelan lek xil sbaik xchiʼuk yermanotake xchiʼuk namaj ta stojolal Dios. Ta mas tsʼakale la skʼel lek ti kʼusi skʼan xakʼ baʼyuk ta xkuxlejale. Xi chale: «Jaʼ jech echʼ jkuxlejal jayibuk jabil kʼuchaʼal Baruc ti jaʼ bat ta yoʼonton saʼel li «cʼusi tsots scʼoplal» kʼuchaʼal chal Vivliae. Ta mas tsʼakale laj kalbe Jeova li kʼusi oy ta koʼonton xchiʼuk li kʼusi ta jvul-o koʼontone, vaʼun oy xa noʼox smelolal yileluk li kʼusitik ta jpase» (Jer. 45:1-5). Li Mareke yakal tspas persa sventa sta li «lequil abtel[e]»: jaʼ ti xtun ta mol ta tsobobbaile (1 Tim. 3:1).

Li Mareke xi chalbe pʼijubtasel li buchʼutik tsnop mi jaʼ van lek ti xbat saʼ lek yabtelik ta nome: «Kʼalal nom oyutike ta anil me chi jtsʼuj li ta spetsʼtak balumil liʼe. Mi mu xa nabe lek xtok skʼop li krixchanoetik tee, toj tsots me chavaʼi. Xuʼ van ep xa atakʼin cha sut tal ta ana, pe ep me lajemot ta mantal chavaʼi ti mu xkol ta orae».

Mi oy noʼox smelolal chkiltik li abtelal xchiʼuk ti skʼan jkʼeltik li kermanotaktike, lek me chkil jbatik xchiʼuk li Jeovae. Xchiʼuk xtok lek me ta chanel chilik li jtalelaltike. Li buchʼutik lubtsajem chaʼiike skʼan me jkoltatik, jkʼuxubintik xchiʼuk ti lekuk ta chanel jtalelaltik xilike. Li moletik ta tsobobbaile xchiʼuk li yan ermanoetik ti lek yijik ta mantale skʼan me skoltaik li ermanoetik ti chchibajike xchiʼuk ti mu slajesatik li vul oʼontone (Heb. 13:7).

Mu me jtentik komel li kermanotaktik ta skoj li abtele (Fili. 1:10). Ti kʼusie skʼan me xkakʼbetik yipal sventa xi jpas ta jkʼulej ta stojolal Dios, jaʼ xkaltik, ti baʼyel xkakʼ ta jkuxlejaltik li kʼusitik skʼan pasel ta sventa li Ajvalilal yuʼun Diose (Luc. 12:21, NM).

[Tsʼib ta yok vun]

[Lokʼol ta pajina 21]

¿Mi muʼyuk chi jkʼot ta tsobajeletik ta skoj li abtele?

[Lokʼol ta pajina 23]

¿Mi jtsakojtik lek ta mukʼ ti kʼusi ora skʼanik koltael chkiltik li kermanotaktike?