Oy me lek srasonaltak sventa xi jmuyubaj

JAMAL xvinaj ti xchapet lek snaʼ x-abtej li kʼusitik pasbile, yuʼun lek xchapet ch-abtej li uni bikʼit selulae xchiʼuk lek xchapet ch-abtej li galaxiaetik ti toj echʼ xa noʼox ep kʼuyelan stsopoj sbae. Mu me labaluk sba taje, yuʼun li Jpasvaneje jaʼ tskʼan «ti oyuc smelol cʼusi ta xichʼ pasele» (1 Cor. 14:33, Ch). Veno, pe jaʼ jech toj labal sba ek li organisasion tstunes Jeova sventa x-ichʼat ta mukʼ yuʼun li yajtuneltake. Jaʼ jun mukʼta organisasion ta sjunul vinajel-balumil ti ta sienal miyon xa noʼox anjeletik xchiʼuk krixchanoetik tstsob sbaik ti akʼbil spʼijilik xchiʼuk ti xnop yuʼun stukike, pe jmoj chtunik ta stojolal li Diose. ¡Toj kʼupil xa noʼox sba!

Li ta voʼneal Israele, li jvokʼ s-organisasion ta balumil li Jeovae te laj yakʼ ta chʼulna ta Jerusalén xchiʼuk te ajvalilaj li buchʼu la stʼuje. Xi laj yal jun j-israel vinik ti chukbil batel ta Babilonia ti kʼu to yepal skʼanoj li chʼul lum taje: «Me muʼyuc xa chajnaʼot oe, me muʼyuc xa tsots acʼoplal chcaʼaye, me xcuxet xa noʼox coʼnton ti bu oyune, acʼo spacʼ sba o ta jpacʼo li coqʼue» (Sal. 137:5, 6).

¿Mi jaʼ jech akʼanojbe ek li s-organisasion Diose? ¿Mi jaʼ li kʼusi mas chakʼbot amuyubajele? ¿Mi xojtikin avalab anichʼnab li sloʼilal xchiʼuk ti kʼuxi ch-abtej li jvokʼ s-organisasion Dios ta balumile? ¿Mi snaʼojik ti toj tsots skʼoplal ti jaʼ yutsʼ yalal chilik li ermanoetik ta spʼejel Balumile? (1 Ped. 2:17.) ¿Kʼusi stakʼ xa pas sventa skʼanik mas li s-organisasion Diose? Li kʼusi chkaltik batel tanae xuʼ jaʼ xa pasik li ta Akʼobal sventa Yichʼel ta Mukʼ Jeova ta Kutsʼ Kalaltike.

Loʼiltabo li kʼusi echʼ «ta voʼonee»

Li j-israeletik xchiʼuk yutsʼ yalalike tstsob sbaik jujun jabil sventa tspasik li kʼin Koltaele. Xi laj yal mantal Moisés kʼalal laj yichʼ likesel li kʼin taje: «Cʼalal me jech chasjacʼboxuc ta yocʼomal li anichʼnabique: “¿Cʼusi sventa leʼe?”, me xayutoxuque. Jech xatacʼbeic: “Yuʼun li Mucʼul Diose ta smucʼul stsatsal la sloqʼuesuncutic tal ta Egipto ti bu toʼox tiqʼuiluncutic ta mozoile”» (Éxo. 13:14). Jaʼ jech, li totil-meʼiletike mu me xakʼik xchʼay skʼoplal li kʼusi la spas ta stojolal steklumal li Diose. Ep onoʼox ti la xchʼunik li kʼusi laj yal Moisese, yuʼun xi la spas orasion li jtsʼibajom yuʼun salmo kʼalal echʼem xaʼox jayibuk sigloe: «Dios cuʼun, caʼyojcutic lec ta jchiquincutic, yalojbun caʼicutic jtot jmeʼcutic ti oy cʼusi lec laj apas ta stojolic li jmoltot jyameʼcutic ta voʼonee» (Sal. 44:1).

Li kerem-tsebetik avie yikʼaluk van tsnopik ti voʼne xa li kʼusi kʼot ta pasel ta stojolal yajrextikotak Jeova leʼ xa ta 100 jabile. ¿Kʼusi xuʼ xa pas sventa masuk melel xilik avalab anichʼnab taje? Junantik totil-meʼiletike jaʼ tstunesik li livro Los testigos de Jehová, proclamadores del Reino de Dios, Anuario, li sloʼil xkuxlejal kermanotaktik ta jrevistatike xchiʼuk yantik sloʼilal organisasion kʼuchaʼal li achʼ DVD ti chalbe skʼoplal steklumal Jeova avie. Li utsʼ-alaliletik ti chil svokolike jaʼ me tspat-o mas yoʼontonik ta stojolal Jeova kʼalal tskʼelik li videoetik ti chalbe skʼoplal ti kʼuyelan lajik ta nutsel li ermanoetik ta Alemania nazi xchiʼuk li ta Unión Sovieticae. ¿Kʼu yuʼun mu jaʼuk xa kʼelbeik skʼoplal kʼalal chavichʼik ta mukʼ Jeova ta avutsʼ avalalike? Jaʼ me jech tstsatsub li xchʼunel yoʼonton avalab anichʼnabike xchiʼuk jaʼ me jech lek chapalik kʼalal chil preva li stukʼil yoʼontonike.

Skʼan onoʼox me xkakʼtik lek venta ta melel ti xuʼ van xchʼajubik-o ta jyalel li kʼoxetik kʼalal jaʼ chichʼ kʼelbel skʼoplal li kʼusi kʼotem tal ta pasele. Jaʼ yuʼun toj tsots me skʼoplal ti oyuk kʼusi spasik eke. ¿Kʼuxi? Albo akʼo stʼujik junuk lum ti lek chilike, mi laje akʼo sabeik skʼoplal kʼuyelan li kabteltik tee, vaʼun akʼo xchapbeik skʼoplal ta stojolal li utsʼ-alalile. Yikʼaluk van oy junuk ermano ta atsobobbail ti jal xa tajek tukʼ tunem tal ta stojolal Jeova ti xuʼ xavikʼik tal kʼalal cha chanunajik li ta Akʼobal sventa Yichʼel ta Mukʼ Jeova ta Kutsʼ Kalaltike. Albo avalab  anichʼnabik ti akʼo sjakʼbeik sloʼile. Yan xtoke, jaʼ ti spasik divujar jun mukʼta tsobajel internasional, kʼuxi tsvaʼanik Betel, kʼuxi chcholik mantal kʼalal tstunesik toʼox li gramófonos (stijobil son ti xkoʼolaj kʼuchaʼal jun tokadiskoe) o yan kʼusitik ti tsots skʼoplale.

Kʼelo lek «li cʼusitic [yabtelik] ta jujuchope»

Li jtakbol Pabloe la skoʼoltas ta jbekʼtal jtakopaltik li stsobobbail yajtsʼaklom Cristoe. Xi laj yale: «Vuʼutic sbecʼtal cʼotemutic, lec jtsacojan jbatic, lec jnitojan jbatic ta jtsʼacaliltic, ta jchʼuxuviltic. Jech coʼol ta jcolta jbatic jcotoltic ta sventa li cʼusitic cabteltic ta jujuchope. Jech coʼol chijchʼiutic batel jcotoltic, coʼol chijtsatsubutic batel ta sventa ti lec jcʼanoj jbatique» (Efe. 4:16). ¿Mi mu jechuk ti toj labal to chkiltik li Jpasvanej kuʼuntik kʼalal ta jkʼeltik lek kʼuyelan pasbilutike? Jaʼ me jech mas to labal sba chkiltik «ti ep ta chop sbijil li [Dios]» mi ta jchanbetik skʼoplal kʼuyelan ch-abtej li tsobobbail ta spʼejel Balumile (Efe. 3:10).

Li Jeovae ep kʼusitik yakʼoj kojtikintik ta sventa li jvokʼ s-organisasion ta vinajele. Kalbetik skʼoplal avaʼi li kʼusi laj yil jtakbol Juane. Baʼyuk laj yalbe xNichʼon li Jeovae. Vaʼun li Jesucristoe «la stac tal yajʼalmantal, tal yacʼbe snaʼ li yajtunel Juane. Jaʼ li Juan ti chal ta jamal ti jaʼ melel» li kʼusi laj yile (Apo. 1:1, 2). Mi yakʼoj kiltik Dios kʼuyelan li abtelal ta vinajele, ¿mi mu oyuk ta yoʼonton xa naʼ ti akʼo xkojtikintik lek «li cʼusitic [yabtelik] ta [jujuchop]» liʼ ta Balumile?

Jnoptik avaʼi ti chbat svulaʼan atsobobbail li jkʼelvanej ta sirkuitoe. ¿Mi mu lekuk xa naʼ ti xa kʼelbeik skʼoplal xchiʼuk avutsʼ avalal kʼusi yabtel li jkʼelvanejetike, kʼusitik ti sbainojike xchiʼuk ti kʼuyelan tskoltautike? Ta yan veltae xuʼ van xichʼ kʼelbel skʼoplal li sjakʼobiltak liʼe: ¿Kʼu yuʼun tsots skʼoplal ti xkakʼ j-informetik sventa chol mantale? ¿Bu chlik tal li takʼin chtun ta s-organisasion Diose? ¿Kʼuxi chchʼakbe sba yabtelik li Jtsop Jbeiltasvaneje? ¿Kʼuxi chakʼik tal li jveʼeltik ta mantal taje?

¿Kʼusitik sbalil ta jtatik kʼalal chkojtikintik lek kʼuxi chapal ch-abtej li steklumal Jeovae? Chkaltik oxibuk avaʼi: Mas oy sbalil chkiltik li yabtel tspasik li buchʼutik tsots ch-abtejik ta jtojolaltike (1 Tes. 5:12, 13). Mas me oy ta koʼontontik ta jchʼuntik li mantal chi j-albate (Hech. 16:4, 5). Mas ta jpat koʼontontik ta stojolal li buchʼutik tsbeiltasik chol mantale, yuʼun chkakʼtik venta ti ta Vivlia tslokʼes li kʼusi chkʼot ta nopel yuʼunike xchiʼuk li kʼusitik tspasike (Heb. 13:7).

«Qʼuelo lec avilic ti cʼu xʼelan setbil ta coraltoneti[k] [...] li mucʼtic naetique»

«Xanovanic ta spat xocon li Sione; ato avilic cʼu yepal li toyol qʼuelub osiletic yuʼune. Qʼuelo lec avilic ti cʼu xʼelan setbil ta coraltonetique, xchiʼuc li mucʼtic naetique, yuʼun jech xuʼ chlic avalbe yaʼyic ec li tsʼacal olnichʼonetique.» (Sal. 48:12, 13.) Taje jaʼ jech la stijbe yoʼonton jteklum li jtsʼibajom yuʼun salmo sventa xbat skʼelik lek ta nopol li Jerusalene. ¿Mi xnop xa noʼox avuʼun yaʼeluk ti mu xchʼay ta sjolik chʼul lum li utsʼ-alaliletik ta Judá kʼalal chkʼotik ta kʼin jujun jabile xchiʼuk ti toj labal xa noʼox chilik li chʼulna tee? Toj labal sba li kʼusitik chilike, jaʼ yuʼun oy ta yoʼonton «chlic [yalbeik] ec li tsʼacal olnichʼonetique».

Jnopbetik skʼoplal avaʼi li meʼ ajvalil ta Sabá ti muʼyuk bu la xchʼun li kʼusi toj kʼupil sba albat ta sventa li ajvalilal yuʼun Salomone xchiʼuk ti toj echʼ xa noʼox pʼije. ¿Kʼusi la spas sventa xchʼun li kʼusi albate? Xi chal stuke: «Muc toʼox jchʼun, pero tana ta jchʼun, yuʼun lital jqʼuel ta jsat jtuc» (2 Cró. 9:6). Jamal xvinaj ti mas chkʼot ta koʼontontik li kʼusi chkil ta jsat jtuktike.

¿Kʼuxi xuʼ xa kolta avalab anichʼnab sventa xil ta sat stukik li kʼusitik toj labal sba ta s-organisasion Jeovae? Mi nopol xavilik Betele, toj lek me ti xbat avojtikinike. Jkʼelbetik skʼoplal avil Mandy xchiʼuk Bethany. Te van 1,500 kilometrouk snamal xilik li Betel ti chkʼelbat slumalike, akʼo mi jech, nopajtik noʼox ch-ikʼat batel yuʼun stot smeʼik sventa chbat svulaʼanik, mas to kʼalal chex jchʼieletik toʼoxe. Xi chalike:  «Kʼalal mu toʼox xkojtikinkutik li Betele, la jnopkutik ti mu stakʼ xi jtseʼin tee xchiʼuk ti naka mol-meʼeletik tee. Pe mu jechuk un, yuʼun laj kilkutik kerem-tsebetik ti xmuyubaj noʼox tsots ch-abtejik ta stojolal Jeovae. Te laj kakʼkutik venta ti maʼuk noʼox te chpaj li s-organisasion Jeova ti bu nakalunkutike. Mas chi nopajkutik ta stojolal Jeova xchiʼuk mas oy ta koʼontonkutik chi tunkutik ta stojolal kʼalal chbat jvulaʼankutik jujun velta li Betele». Laj yilik lek kʼuyelan ch-abtej li s-organisasion Jeovae, vaʼun jaʼ tijbat-o yoʼontonik sventa x-ochik ta prekursora, ta mas tsʼakale takatik ta ikʼel sventa xtunik kʼuk sjalil ta Betel.

Li avi une xkiltik xa me kʼuxi ch-abtej s-organisasion Jeova kʼalal ta jtunestik li kʼusitik oy xa ti chʼabal toʼox ta skʼakʼalil j-israeletike. Oy to noʼox jayibuk jabile yichʼoj pasel videoetik ta kaset xchiʼuk ta DVD ti ep ta tos kʼusitik chalbe skʼoplal ta sventa li s-organisasion Jeovae, jech kʼuchaʼal, Hasta los cabos de la Tierra, Los testigos de Jehová: organizados para predicar las buenas nuevas, Toda nuestra asociación de hermanos xchiʼuk Unidos gracias a la enseñanza divina. Kʼalal chavakʼ venta xchiʼuk avutsʼ avalal ti kʼu to yepal ch-abtej li ermanoetik ta Betel, li buchʼutik tskoltaik ermanoetik ti chil svokolike, li misioneroetike, li buchʼutik sbainojik xchapanel mukʼta tsobajeletike mas to me cha kʼan li ermanoetik ta spʼejel Balumile.

Melel onoʼox chaʼa, ti tskoltautik li jtsobobbailtik sventa jcholtik-o mantale xchiʼuk ti tspat koʼontontik ta jujuntale. Pe skʼan me jchʼakbetik yorail sventa jnopbetik skʼoplal xchiʼuk kutsʼ kalaltik «li jchʼunolajeletic [o li kermanotaktik] ti buyuc noʼox oyic ta sbejel banamile». Taj une jaʼ me tskoltautik sventa «jʼechʼel oyuc o xchʼunojel [koʼontontik]» xchiʼuk ti oy lek srasonaltak sventa xi jmuyubaj noʼoxe (1 Ped. 5:9).

 [Rekuadro ta pajina 18]

Toj lek ti jchanbetik skʼoplal li s-organisasion Diose

Toj ep kʼusitik oy kuʼuntik sventa jchanbetik li sloʼilal xchiʼuk ti kʼuyelan ch-abtej li s-organisasion Jeovae. Sventa spas kuʼuntike xuʼ me skoltautik li kʼusitik ta jakʼtik batel tanae:

☞¿Kʼuxi lik tal li yabtel jkʼelvanejetik ta sirkuito xchiʼuk distritoe? (Los testigos de Jehová, proclamadores del Reino de Dios, pajina 222 kʼalal ta 228.)

☞¿Kʼu yuʼun toj tsots skʼoplal li mukʼta tsobajel echʼ ta 1941 ti «Día de los hijos» sbie? (Los testigos de Jehová, proclamadores del Reino de Dios, pajina 86 xchiʼuk 88.)

☞¿Kʼuxi tsnop li kʼusitik tspas li Jtsop Jbeiltasvaneje? (“Testimonio cabal” del Reino de Dios, pajina 108 kʼalal ta 114.)