¿Mi kakʼojtik venta kʼusi tstunes Dios sventa tsbeiltasutik?

MUʼYUK bu xilik-o jech li j-israeletik xchiʼuk j-egiptoetike. Kʼalal ilokʼik ta Egipto li j-israeletike, te ichiʼinatik batel yuʼun jvol tok ti chkʼataj ta kʼokʼ ta akʼobaltike. ¡Toj labal xa noʼox sba! Pe ¿bu lokʼ tal un? ¿Kʼusi sventa? Xchiʼuk ¿kʼusi chakʼ jchantik ta sventa ti kʼuyelan laj yil «toc xchiʼuc [kʼokʼ]» li j-israeletik ti oy xa ta oxmil jabil xchiʼuk oʼlol ikʼot ta pasele? (Éxo. 14:24.)

Xi jamal chal kaʼitik Vivlia bu ilik tal li kʼusi toj labal sba taje xchiʼuk ti kʼusi itun-oe: «Li Mucʼul Diose jaʼ baʼyucbe ital yuʼunic. Ta cʼacʼaltique laj yacʼ sba ta ilel ta jun toc, yuʼun jaʼ tsbeiltasatic ti bu xuʼ chbatique. Yan ta acʼubaltique, ta cʼocʼ laj yacʼ sba ta ilel yuʼun jech chil sbeic. Jaʼ jech ivuʼ yuʼun ixanovic ta cʼacʼal ta acʼubal» (Éxo. 13:21, 22). Kʼuchaʼal chkiltike, la stunes jvol tok li Dios sventa tsbeiltas li j-israeletik ta taki xokol balumil kʼalal lokʼik tal ta Egiptoe. Skʼan me lek chapalik skotol ora sventa te xbatik ti bu chbat li jvol toke. Jech xtok, sventa chchabi j-israeletik li Jeova ta skoj ti tstsakvanik ta kʼop li j-egiptoetike te laj yakʼ ta oʼlol li jvol toke (Éxo. 14:19, 20). Muʼyuk te x-ikʼatik batel li ta tukʼil bee, akʼo mi jech, skʼan onoʼox me xakʼ sbaik ta beiltasel yuʼun li jvol tok sventa xkʼotik li ta Albil Balumile.

Li jvol tok taje jaʼ me svinajeb ti ta melel te xchiʼuk j-israeletik li Diose. Jaʼ skʼoplal Jeova, yuʼun te ikʼoponatik bakʼintik (Núm. 14:14; Sal. 99:7). Jaʼ laj yakʼ ta ilel xtok ti jaʼ tʼujbil yuʼun Jeova li Moisés sventa chbeiltasvane (Éxo. 33:9). Jech xtok, kʼalal slajeb xa velta laj yichʼ albel skʼoplal li jvol toke jaʼo kʼalal laj yakʼ ta ojtikinel ti jaʼ ch-och ta xkʼexol Moisés li Josuee (Deu. 31:14, 15). Ta melel, mi tskʼan lek chbat xkuxlejal li j-israeletik ti lokʼik xa ta Egiptoe skʼan me xakʼik venta kʼusi tstunes Dios sventa chbeiltasatik xchiʼuk skʼan stsakik ta mukʼ.

Mu xa kʼusi stu chilik li jvol toke

Toj labal van sba laj yilik j-israeletik kʼalal laj yilik ta sba velta li jvol toke. Kʼux ta alel, pe muʼyuk bu la spat mas yoʼontonik ta stojolal Jeova akʼo mi laj yilik jujun kʼakʼal. Kʼajomal lik xchibal kʼoptaik ep ta velta li beiltasel ch-akʼbatik yuʼun Diose. Jech kʼuchaʼal liʼe, muʼyuk bu la spat yoʼontonik ta stojolal Dios ti xuʼ xkoltaatik kʼalal te tijil batel ta spatik li j-egiptoetike. Ti kʼusie, ta skoj ti chlaj xa laj yaʼiike, lik yakʼbeik smulin Moisés ti jaʼ yajkʼopojelike (Éxo. 14:10-12). Kʼalal i-echʼik xaʼox li ta Tsajal Nabe, la xchopol kʼoptaik Moisés, Aarón xchiʼuk la xchopol kʼoptaik Jeova ta skoj ti la snopik ti muʼyuk bu tsta sveʼelik xchiʼuk yaʼalike (Éxo. 15:22-24; 16:1-3; 17:1-3, 7). Te van jayibuk xemana ta mas tsʼakale la sujik Aarón xtok sventa spas jkotuk chʼiom tot vakax pasbil ta kʼanal takʼin. Nopo xa noʼox avaʼi. Toj labal xa noʼox sba yutsil, xvinaj batel lek li jvol tok xchiʼuk kʼokʼ ta jsep osil ti nopol yiloj skarpanaike, taj une jaʼ svinajeb ti te chiʼinbilik yuʼun li Jkoltavanej yuʼunike, li Jeovae. Pe jech xtok un, mu toj nomuk yiloj taje yakalik ta yichʼel ta mukʼ jun jecheʼ dios ti muʼyuk kuxule, xi chalike: «Liʼi jaʼ dios cuʼuntic vuʼutic li israelutique, jaʼ ti la sloqʼuesutic tal ta Egiptoe». ¡«Batsʼi toj ven chopol ta jyalel li cʼusi la spasique»! (Éxo. 32:4; Neh. 9:18.)

Kʼalal la stoy sbaik li j-israeletike te laj yakʼik ta ilel ti mu skʼan xbeiltasatik yuʼun Jeovae. Snuptanojik jun tsots vokol, jaʼ ti muʼyuk lek satik ta mantale. Xilik li jvol toke, pe ti  kʼusi une mu xa kʼusi stu chilik. Kʼajomal «laj yacʼbeic yat yoʼnton li Chʼul Dios yuʼun Israele», akʼo mi jech, ikʼuxubinatik xchiʼuk ibeiltasatik batel ta jvol tok kʼalal to ta Albil Balumil (Sal. 78:40-42, 52-54; Neh. 9:19).

Kakʼtik venta kʼusi tstunes Dios sventa tsbeiltasutik li avie

Yakal tsbeiltas-o steklumal Jeova li avie. Yuʼun muʼyuk onoʼox ta yoʼonton ti akʼo sbeiltas sba stuk li j-israeletik ta taki xokol balumile, jaʼ jech li avi eke, mu skʼan ti te jkʼel jba jtuktik ti kʼuxi xuʼ xijkʼot li ta albil achʼ balumile. Jaʼ sbiiltasoj ta Jolil yuʼun tsobobbail li Jesucristoe (Mat. 23:10; Efe. 5:23). Taje jaʼ yakʼojbe sbain jlom yabtel li tukʼil j-abtele, li buchʼutik tʼujbil chbatik ta vinajel ti liʼ to oyike. Vaʼun li ermanoetik taje, tsvaʼan moletik sventa chchabiik li tsobobbailetike (Mat. 24:45-47; Tito 1:5-9).

¿Kʼuxi jnaʼojtik buchʼu jaʼ li tukʼil j-abtele? Xi laj yal li Jesuse: «¿Buchʼu ti lequil jʼabtel ti oy sbijile, ti ta xʼacʼbat sventain comel sna yuʼun ti yajvale yoʼ ta xacʼbe sveʼel ti xchiʼiltac ta abtel ti cʼalal ta sta yorail ta xveʼique? Jun yutsil ti jʼabtel cʼalal yacal ta spas yabtel ta xvul taeuc yuʼun ti yajvale» (Luc. 12:42, 43, Ch).

Veno, li buchʼutik tʼujbil chbatik ta vinajele jaʼ jun «lequil jʼabtel», jaʼ xkaltik, tukʼ stalelal. Tukʼ yoʼonton yakʼoj sba ta stojolal Jeova, ta stojolal Jesús, ta steklumal Dios xchiʼuk ta stojolal Vivlia. Oy spʼijil xtok, yuʼun xtojob xchiʼuk lek tsnopbe skʼoplal kʼuxi ta pasel li abtelal ti toj tsots skʼoplale: li xcholel «lequil achʼ cʼop scʼoplal ti ventainel yuʼun ti Diose» xchiʼuk ta spasel ta «jchʼunolajel [...] li cristianoetic ta jujun banamile» (Mat. 24:14, Ch; 28:19, 20). Jech xtok, lek xchʼun mantal, yuʼun «ti cʼalal ta sta yorail ta xveʼi[k]» li xchiʼiltake chakʼbe sveʼelik ta mantal. Jamal xvinaj ti akʼbil bendision yuʼun Jeovae. ¿Kʼuxi jnaʼojtik? Veno, yuʼun jaʼ chakʼ chʼiuk tsobobbail li Jeovae. Jech xtok, chakʼbe spʼijil li steklumal sventa xtojobik ta snopel lek li kʼusi tsots skʼoplal tspasike xchiʼuk sventa xaʼibeik mas smelolal li kʼusi chal Vivliae. Maʼuk noʼox taje, yuʼun chakʼbe slekilalik, xkuxetel yoʼontonik xchiʼuk muʼyuk chakʼ ti slajesatik yuʼun li yajkontraike (Isa. 54:17; Fili. 4:7).

Jtojtik ta vokol ti tsbeiltasutik li Diose

¿Kʼuxi xuʼ jtojtik ta vokol ti tsbeiltasutik li Diose? Xi tstakʼbutik li jtakbol Pabloe: «Chʼunbeic me cʼusi chayalboxuc li bochʼotic sventainojoxuque; ichʼic me ta mucʼ» (Heb. 13:17). Veno, pe taje mu me toj kʼunuk ta pasel. Xi jkoʼoltastike: jnoptik ti j-israelot ta skʼakʼalil Moisese. Oy xa ta sjayibal kʼakʼal atijluoj batel li jvol tok ta taki xokol balumile. Vaʼun ta jech noʼox ipaj. Xi chajakʼbe abae: «¿Kʼu van sjalil chpaj? ¿Mi jun noʼox van kʼakʼal? ¿Mi chpaj van junuk xemana? O ¿mi chpaj van jayibuk u?» Jaʼ yuʼun chajakʼbe aba mi jaʼ van lek ti xalokʼes skotol li kʼusitik akuchoj batele. Ta skoj ti mu xanaʼ leke, jaʼ noʼox chalokʼes li kʼusitik chtun tajek avuʼune. Pe ta skoj ti maʼuk xa noʼox jun-chib kʼakʼale, chtavan tajek chavaʼi saʼel ti bu akʼejoj tal li kʼusitik chakʼane, jaʼ yuʼun lik alokʼes skotol li kʼusitik avuʼune. Pe kʼalal poʼot xa xlaj avoʼonton ta slokʼesele jaʼo xa chlik xanavuk batel li jvol toke, ¡jaʼ yuʼun skʼan xlik atsob li kʼusitik avuʼune! ¡Toj chopol yaʼel! Pe ti kʼusi une «jaʼ yorail chlic tots[an] batel [xchiʼuk] scotol li israeletique» (Núm. 9:17-22).

¿Kʼu yelan ta jchʼamtik li beiltasel chakʼbutik Dios avie? ¿Mi ta ora «chlic» jpastik li kʼusi lij-albate, o mi jaʼ jech-o ta jpastik ti kʼuyelan nopem xkaʼitike? ¿Mi yakal xa ta jchʼuntik li mantaletik ta sventa chanubtaseletik ta Vivliae, li xcholbel mantal jyanlumetike, li yichʼel ta mukʼ Jeova ta kutsʼ kalaltike, ti kʼuyelan skʼan jtalelaltik kʼalal ch-echʼ mukʼta tsobajeletik xchiʼuk ti kʼuyelan skʼan jkolta jbatik xchiʼuk li Komiteetik ti Tsbeiltasvan batel ta Ospitaletike? Ti kʼuxi xuʼ xkakʼtik ta ilel xtok ti ta jtojtik ta vokol ti tsbeiltasutik Diose jaʼ ti jchʼamtik li tojobtasel chij-akʼbate. Jaʼ yuʼun, muʼyuk bu ta jpat koʼonton ta jpʼijil  jtuktik kʼalal oy kʼusi tsots skʼoplal ta jnop ta jpastike, yuʼun jaʼ te ta jsaʼtik koltael ta stojolal Jeova xchiʼuk ta s-organisasion. Jaʼ jech ta jpastik kʼuchaʼal uni nene olol ti chbat ta anil ta stojolal stot smeʼ kʼalal chtal tsatsal ikʼal voʼe, yuʼun jaʼ te chijbat ta ora ek ta stojolal s-organisasion Jeova kʼalal toj tsots chakʼ jvokoltik li balumil liʼe.

Ta melel, muʼyuk onoʼox me buchʼu tukʼ tajek li buchʼutik jbabeik ta s-organisasion Jeovae. Jaʼ jech li Moisés eke, akʼo mi jech, jamal ivinaj ti vaʼanbil yuʼun Jeova xchiʼuk ti lek ch-ilat ta sventa ti jaʼ jech nopajtik noʼox laj yakʼ ta ilel li jvol tok xchiʼuk kʼokʼe. Jech xtok, jaʼ to tstoy skarpanaik li j-israeletik mi jech albatik yuʼun Jeova ta stojolal Moisese, muʼyuk buchʼu tsnop stuk ti xuʼ xa xbate (Núm. 9:23). Jech oxal un chaʼa, jaʼ chal Moisés kʼusi ora chbatik ta skoj ti jaʼ jkʼopojel yuʼun Jeova ta stojolal steklumale.

Jaʼ jech tsbeiltasutik lek avi ek li tukʼil j-abtele, yuʼun kʼalal jech skʼan chile chal kʼusi skʼan jpastik. Te chalbutik mantal li ta revista Li Jkʼel osil ta toyole, ta Kabteltik sventa Dios, li ta achʼ vunetik chlokʼ tale xchiʼuk li ta mantaletik ch-echʼ ta mukʼta tsobajeletike. Jech xtok, kʼalal tsbeiltas li tsobobbailetike tstunes jkʼelvanejetik ta sirkuito xchiʼuk distrito, kartaetik xchiʼuk li chanubtaseletik chichʼ li buchʼutik oy kʼusi sbainojik ta tsobobbaile.

¿Mi kakʼojtik venta kʼusi tstunes sventa tsbeiltasutik Dios li ta slajebal kʼakʼale? Jaʼ tstunes li s-organisasion sventa tsbeiltasutik li ta xibal sba kuxlejal liʼe, ti xkoʼolaj kʼuchaʼal xibal sba taki xokol balumile. Jaʼ yuʼun chabibil chkaʼi jbatik, kʼanbilutik xchiʼuk jmoj oyutik.

Xi i-albatik yuʼun Josué kʼalal te xaʼox oyik ta Albil Balumil li j-israeletike: «Ta jcʼan acʼo cʼotuc lec ta ajol ta avoʼntonic ti icʼot ta pasel scotol li cʼusi yalojboxuc Mucʼul Dios cuʼuntique» (Jos. 23:14). Jpʼel me skʼoplal chkʼotik ta achʼ balumil ek li steklumal Dios avie. Pe jaʼ to me te chvinaj mi ta jta jkolebaltik mi bikʼit chkakʼ jbatik ta xchʼunel li beiltasel chakʼbutik Jeovae. Kakʼbetik me yipal chaʼa sventa xkakʼtik venta kʼusi tstunes sventa tsbeiltasutik.

[Lokʼol ta pajina 5]

Jaʼ tsbeiltasutik avi li s-organisasion Jeovae

Achʼ vunetik

Chanunetik

Chkichʼtik chanubtasel li ta tsobajeletik sventa chol mantale