¿Mi kʼoxik to tajek sventa chichʼik voʼ?

«SOLEL ximuyubaj ti jaʼ xa yajtunel Jeova li jtsebe, jnaʼoj ti xmuyubaj tajek eke», xi laj yal Carlos a ti likem ta Filipinase. Xi la stsʼiba xtok jun totil ti likem ta Greciae: «Ximuyubaj xchiʼuk kajnil ti laj yichʼik voʼ li oxvoʼ kalab jnichʼnabkutik ti kʼalal chexik toʼoxe. Yakal chchʼiik ta mantal xchiʼuk xmuyubajik ti chichʼik ta mukʼ li Jeovae».

Li totil meʼiletik ti jaʼik yajtsʼaklom Cristoe xuʼ lek xmuyubajik kʼalal chichʼ voʼ li yalab xnichʼnabike. Manchuk mi jech, bateltike oy kʼusi te xvulvun ta yoʼontonik xchiʼuk muʼyuk chmuyubajik ta skoj ti chat yoʼontonike. Xi laj yal jun meʼile: «Ximuyubaj tajek, pe te xvulvun jol xtok». ¿Kʼu yuʼun jech chaʼi sba li meʼile? «Yuʼun chaʼibe smelolal ti oy xa kʼusi tsots chlik sbain stuk ta stojolal Jeova li skereme.»

Li kʼusi skʼan oyuk ta yoʼontonik skotol li kerem tsebetik ti jechuke jaʼ ti xichʼik voʼe. Pe oy van jlom yajtsʼaklomtak Cristo ti xuʼ xi tsnopike: «Jnaʼoj ti lek chʼiem ta mantal li jkereme, pe ¿mi tsots van yoʼonton sventa mu xpʼaj li ta mulivajel xchiʼuk ti sakuk-o ta stojolal li Jeovae?». Xuʼ van xi tsjakʼbe sba li yantike: «¿Mi jun yoʼonton chtun-o van batel ta stojolal Dios li jkereme o mi jaʼ chbat ta yoʼonton li saʼel kʼulejale?». Ta skoj ti jech xnaʼetike, ¿kʼusi beiltaseletik ta Vivlia xuʼ xkoltaatik sventa snaʼik mi chapalik xa yoʼ xichʼik voʼ li yalab xnichʼnabike?

Jaʼ mas tsots skʼoplal ti jaʼuk xa jun yajtsʼaklom Cristoe

Li Vivliae muʼyuk chal jayib jabilal skʼan oy yuʼunik li buchʼutik tskʼan chichʼ voʼe, ti kʼusi chale jaʼ ti kʼuyelan oyik ta mantale. Xi laj yalbe mantal li yajtsʼaklomtak Jesuse: «Jaʼ yuʼun batanic me; bat pasic ta jchʼunolajel cuʼun li cristianoetic ta jujun banamile. Acʼbo yichʼic voʼ» (Mat. 28:19). Jech oxal, jaʼ noʼox xuʼ xichʼik voʼ li buchʼutik jaʼik xa yajtsʼaklom Cristoe.

¿Buchʼu jaʼ jun yajtsʼaklom Cristo? Li livro Perspicacia para comprender las Escrituras chal: «Jaʼ mas chalbe skʼoplal li buchʼu chchanbe batel li kʼusitik laj yakʼ ta chanel Cristoe, maʼuk li buchʼu jaʼ noʼox ta xchʼune». ¿Mi xuʼ van xkʼot ta yajtsʼaklom Cristo li buchʼu uni kʼoxiktoe? Jun yajtsʼaklom Cristo ti mas xa ta 40 jabil chtun ta misionera ta Latinoamérica, xi chale: «Oy xaʼox lek jabilal [xchiʼuk li chaʼvoʼ jchiʼiltak ta vokʼel]  sventa jnaʼkutik ti ta jkʼan chitunkutik ta stojolal Jeova xchiʼuk ti chinakikutik li ta Paraisoe. Ti laj kakʼ jbakutik ta stojolal Diose jaʼ la skoltaunkutik sventa mu xibajkutik li ta prevaetik tstaik li kerem tsebetike. Muʼyuk ta jsutes koʼontonkutik ti ta jbikʼtalkutik noʼox laj kakʼkutik ta ilel ti kakʼoj jbakutik ta stojolal Diose».

Totil meʼiletik, ¿kʼuxi xuʼ xanaʼik mi jaʼ xa jun melel yajtsʼaklom Cristo li avalab anichʼnabike? Li Vivliae xi chale: «Li jun quereme xuʼ chichʼ otquinel ta sventa cʼusitic tspas, me lec me mu lecuc stalel» (Pro. 20:11). Jaʼ yuʼun, skʼan xakʼelik jun chibuk kʼusitik ti «jech chil scotolic ti lec chbat [yuʼunik]» kʼuchaʼal jun yajtsʼaklom Cristoe (1 Tim. 4:15).

Sprevailtak ti jaʼ jun melel yajtsʼaklom Cristoe

¿Mi lek xchʼun mantal? (Col. 3:20.) ¿Mi chchʼun li kʼusitik chavalbeik akʼo spas li ta anaike? Li Vivliae chal ti lek la xchʼunbe smantal stot smeʼ kʼalal lajcheb toʼox sjabilal li Jesuse (Luc. 2:51). Melel onoʼox ti muʼyuk alab-nichʼnabiletik ti solel lek xa noʼox tajek chchʼunbeik smantal stot smeʼike. Pe tsots skʼoplal ti xchanbeik Jesús xchiʼuk «jech acʼo [s]tsʼaclinic batel» skotol li melel yajtsʼaklomtake. Jaʼ yuʼun, li buchʼu tskʼan chichʼ voʼe skʼan lek ojtikinbil ta tsobobbail ti lek xchʼunbe smantal stot smeʼe (1 Ped. 2:21).

Xi xajakʼbe abaik xtoke: ¿Mi jun yoʼonton chchol mantal ti jaʼ jech chakʼ ta ilel ti «baʼyuc [chakʼ sba] ta ventainel yuʼun li Diose»? (Mat. 6:33.) ¿O mi persa sujbil chlokʼ ta cholmantal xchiʼuk tstij li tiʼnae? ¿Mi tspas skotol li kʼusitik sbainoj kʼuchaʼal jcholmantal ti muʼyuk to yichʼoj voʼe? ¿Mi oy van ta yoʼonton tsut skʼel li buchʼu lek laj yaʼi mantale? ¿Mi chalbe xchiʼiltak ta chanun o smaestrotak ti jaʼ yajrextiko Jeovae?

¿Mi tsots skʼoplal chaʼi ti skʼan xbat ta tsobajeletike? (Sal. 122:1.) ¿Mi lek xaʼi chakʼ sloʼil li ta Xchanel Li Jkʼel osil ta toyole, li ta Xchanel Vivlia ta Tsobobbail xchiʼuk li ta Chanob vun sventa Kabteltik yuʼun Diose? (Heb. 10:24, 25.)

¿Mi chakʼ persa muʼyuk chchiʼinan li buchʼutik chopolik ta xchanobvun o ta yantik bu sventa lekuk sak stalelale? (Pro. 13:20.) ¿Kʼusitik sonal, pelikulaetik, videojuegoetik xchiʼuk kʼusitik chlokʼ ta Internet o ta television tskʼupin skʼelel? ¿Mi chakʼ ta ilel ta skʼopojel xchiʼuk ta stalelal ti chchʼun li mantaletik ta Vivliae?

¿Mi xojtikin lek li Vivliae? ¿Mi x-al yuʼun ta skʼop stuk li kʼusi chchan li ta Akʼobal sventa Yichʼel ta Mukʼ Jeova ta Kutsʼ Kalaltike? ¿Mi x-albe yuʼun smelolal li kʼusitik chchanubtasvan Vivliae? (Pro. 2:6-9.) ¿Mi lek xaʼi skʼelel li sKʼop Diose xchiʼuk xchan li vunetik chakʼ li j-abtel ti tukʼ yoʼontone? (Mat. 24:45.) ¿Mi tskʼan akʼo xavalbeik smelolal junuk teksto o chanubtaseletik ta Vivlia?

Li sjakʼobiltak taje chtun avuʼunik sventa xanaʼik mi yakal xa chchʼiik ta mantal. Mi laj xa akʼelike, xuʼ van chavakʼik venta ti maʼuk to yorail  chichʼ voʼe, ti skʼan to spas ta kuxlejal baʼyel jun chibuk ti kʼusitik laj xa kalbetik skʼoplale. O xuʼ van chapal xa chavil li jun kerem o tseb sventa chichʼ voʼe, yuʼun yakʼoj xa sba ta stojolal Jeova xchiʼuk chakʼ ta ilel ta xkuxlejal ti jaʼ jun yajtsʼaklom Cristoe.

Xuʼ tsmuyubta Jeova li kerem tsebetike

Ep yajtuneltak Diose tukʼ itunik kʼalal chexik toʼoxe o kʼalal bikʼitik toʼoxe. Jnoptik ta stojolal José, Samuel, Josías xchiʼuk li Jesuse (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). O xuʼ jnoptik xtok ta stojolal li chanvoʼ stsebetak Felipee, ti chalik toʼox albil kʼopetike xchiʼuk ti xuʼ van lek laj yichʼik chanubtasel ta mantal kʼalal kʼoxik toʼoxe (Hech. 21:8, 9).

Xi laj yal jun ermano ta Greciae: «Laj kichʼ voʼ kʼalal lajcheb toʼox jabilale, xchiʼuk muʼyuk ta jsutes koʼonton ti jech la jpase. Oy xa ta 24 jabil laj kichʼ voʼ xchiʼuk oy xa ta 23 jabil ti ochemun ta prekursore. Li skʼanel Jeovae jaʼ la skoltaun sventa stsal komel kuʼun li vokoliletik tsnuptanik li kerem tsebetike. Melel onoʼox ti kʼalal lajcheb toʼox jabilale mu toʼox jnabe lek skʼoplal Vivlia kʼuchaʼal avie, pe jnaʼoj lek ti jkʼanoj li Jeovae xchiʼuk ti ta jkʼan chitun ta stojolal ta sbatel osile. Jaʼ jun muyubajel chkaʼi ti tskoltaun ta spasbel batel li yabtele».

Kʼusuk sjabilalik, skotol li buchʼutik chakʼik ta ilel ta xkuxlejalik ti jaʼik yajtsʼaklomtak Cristoe skʼan xichʼ voʼ. Xi la stsʼiba li Pabloe: «Ta coʼntontic tscʼan ta jchʼuntic ti jech xuʼ tucʼ coʼntontic chijyilutic Diose. Xchiʼuc tscʼan chlocʼ ta quetic ta jamal ti jech xuʼ chijcolutique» (Rom. 10:10). Totil meʼiletik, kʼalal mi laj yichʼ voʼ li avalab anichʼnabike, skotol li avutsʼ avalale oy kʼusi lek ta sta. Jaʼ yuʼun, ¡mu me kʼusi smak avoʼontonik xchiʼuk mu me xavakʼik kʼusi smak ek li avalab anichʼnabik ta skʼupinel li muyubajel taje!

[Tsʼibetik ta yok vun]

[Lokʼol ta pajina 5]

Ti kʼuyelan skʼan xkiltik li ichʼvoʼe

[Lokʼol ta pajina 5]

Jlom totil meʼiletike chalik ti ep la sbalil li ichʼvoʼe, pe xuʼ la oy kʼusi xibal sba xkʼot ta pasel xtok, jech la kʼuchaʼal chkʼot ta pasel kʼalal chichʼ kʼanel junuk lisensia sventa stsʼotel karoe. Pe ¿mi melel onoʼox ti oy kʼusi xibal sba chkʼot ta pasel yuʼun li ichʼvoʼ xchiʼuk ti chijtun ta stojolal Diose? Li Vivliae jamal chal ti maʼuk jeche. Xi chal Proverbios 10:22: «Li bendición yuʼun Mucʼul Diose jaʼ jcʼulejaltic chcʼot; mu jta jvocoltic yuʼun». Xchiʼuk li Pabloe xi la stsʼibabe batel li kerem Timoteoe: «Ta melel jaʼ jcʼulejaltic cʼotem ti jchʼunojtique, ti jun coʼntontic yuʼun ti cʼu yepal cʼusitic oy cuʼuntique» (1 Tim. 6:6).

Taje maʼuk skʼan xal ti kʼun ti chijtunutik ta stojolal Jeovae. Jnoptik ta stojolal li j-alkʼop Jeremiase. Toj ep laj yil svokol kʼalal la xchol mantale. Pe ¿kʼuyelan laj yaʼi sba kʼalal laj yichʼ ta mukʼ Diose? Tskʼupin tajek, yuʼun xi laj yale: «Li acʼope; jaʼ mero spatubil coʼnton, xcuxetel coʼnton icʼot. Avuʼunun o, voʼot li Mucʼul Diosot ti chapas ta mantal scotol te ta vinajele» (Jer. 15:16). Jech kʼuchaʼal laj yal li Jeremiase, li melel relijione jaʼ chakʼ xkuxetel oʼontonal. Pe li sbalumil Satanase jaʼ noʼox chakʼ at-oʼonton. Totil meʼiletik, li kʼusi oy ta abaike jaʼ ti xachanubtas li avalab anichʼnabik bu beal skʼan stamik batele (Jer. 1:19).

[Lokʼol ta pajina 3]

Oy buchʼutik chakʼik ta ilel ti jaʼik xa yajtsʼaklomtak Cristo kʼalal kʼoxik toe

[Lokʼol ta pajina 3]

Chchapan sbaik xchiʼuk chakʼ sloʼilik ta tsobajeletik

[Lokʼol ta pajina 4]

Chchʼunbe smantal stot smeʼik

[Lokʼol ta pajina 4]

Chcholik mantal

[Lokʼol ta pajina 4]

Tskʼoponik Jeova

 [Lokʼol ta pajina 6]

¿Mi jaʼ lek akʼo to smala sventa chichʼ voʼ li jkerem o jtsebe?

Jlom totil meʼiletike tsnopik ti jaʼ lek ti mu to xichʼik voʼ li yalab xnichʼnabik akʼo mi spas xa yuʼunik li kʼusitik chichʼ kʼanele. ¿Kʼusitik srasonal yuʼunik un?

«Mi laj yichʼ voʼ li jkereme, chixiʼ mi tsots la spas smul ti xuʼ jaʼ xlokʼ-o ta tsobobbaile.» Pe ¿mi jaʼ xa van muʼyuk chichʼ-o chapanel mi jaʼ to chichʼ voʼ ta jelavel ta skoj li stalelale? Xi chalbe jujun kerem tsebetik li Salomone: «Naʼic me ti tsta yorail ta xchapanoxuc Dios ta sventa scotol li cʼusitic chapasique» (Ecl. 11:9). Kʼalal «jujunutic chcʼot caltic ta stojol Dios ti cʼu xʼelan la jpastique», xi li Pabloe, muʼyuk la stsak ta mukʼ li jabilaletike (Rom. 14:12).

Mi kichʼojtik voʼ o mi muʼyuk, skotol li yajtunelutik Jeovae chkaltik ta stojol Dios ti kʼu x-elan la jpastike. Mu me xchʼay ta joltik ti jaʼ chchabi yajtuneltak li Jeovae xchiʼuk ti «mu xacʼ taluc ta [s]tojolic tsots preva ti me mu xa stsʼic [yuʼunik] chile» (1 Cor. 10:13). Jech, chkoltaatik mi chakʼik persa stsalel li prevaetike xchiʼuk mi pʼij chakʼ sbaike (1 Ped. 5:6-9). Xi la stsʼiba jun ermanae: «Li kerem tsebetik ti kʼoxik to chichʼik voʼe oy me mas srasonal yuʼunik sventa tspʼajik li kʼusitik chopole. Li jkerem ti laj yichʼ voʼ kʼalal voʼlajuneb toʼox sjabilale, chal ti jaʼ koltaat sventa mu spas li kʼusitik chopole. Xi laj yalbune: “Mi jaʼuk xtal ta jol ta jtoy jba ta stojolal li Jeovae”. Li ichʼvoʼe jaʼ tstij koʼontontik sventa tukʼ chkichʼ batel li jkuxlejaltike».

¿Mi lek atalelal avakʼojbe yil avalab anichʼnab xchiʼuk mi atikʼojbe ta yoʼonton ti akʼo xchʼunbeik smantal li Jeovae? Mi jaʼ jeche, xuʼ tukʼ-o chakʼ sba ta stojolal Jeova mi laj xaʼox yichʼ voʼe. Jech onoʼox chal Proverbios 20:7: «Li bochʼo tucʼ yoʼntone jaʼ tspas li cʼusi tuqʼue, jech toj lec chbat ta tsʼacal li xnichʼnabe».

«Oy ta koʼonton ti akʼo sta baʼyel kʼusitik yan li jkereme.» Jech kʼuchaʼal liʼe, li totil meʼiletike xuʼ van te xnoplajetik sventa akʼo xakʼbeik batel yipal mas chanun. Manchuk mi skʼan xchan x-abtejik li kerem tsebetik sventa tskʼel sba stukike, xibal me sba mi ta jsujtik sventa chakʼ ta yoʼontonik li chanune xchiʼuk li saʼel mas stakʼinike, ti jaʼ xa muʼyuk ta jtijbetik yoʼonton sventa chichʼik ta mukʼ li Diose. Jvules ta joltik ti oy kʼusitik mu xakʼ chʼiuk li sat tsʼunobal o li aʼyej sventa Ajvalilal jech kʼuchaʼal laj yal li Jesuse: «Li becʼ trigo icʼot ta chʼixtique, jaʼ senyail li bochʼotic chaʼyic scʼop Dios ti jaʼ noʼox batem yoʼntonic yuʼun li cʼusitic oy liʼ ta banamile ti jaʼ loʼlabilic yuʼun li scʼulejalique, jech te netʼbil chcʼot o li scʼop Dios yaʼyojique. Jech mu satin o» (Mat. 13:22). Mu ta naʼeteluk mi jaʼ baʼyel ta jsaʼtik li kʼusitik oy ta sba balumile xuʼ muʼyuk xa ta koʼontontik chijtun ta stojolal Dios.

Li totil meʼiletik ti mu xakʼ akʼo xichʼik voʼ yalab xnichʼnabik, manchuk mi muʼyuk srasonal ti tsmakbe yoʼontonike, xuʼ van oy kʼusi chopol chkʼot ta pasel. Jun mol ta tsobobbail ti lek chaneme, xi laj yale: «Mi mu xkakʼtik akʼo xichʼ voʼ jun kerem o tsebe xuʼ xpaj xchʼiel ta mantal xchiʼuk xchibaj yoʼonton». Xi laj yal jun viajante xtoke: «Jun kerem o tsebe xuʼ muʼyuk xa sbalil chaʼi sba ta stojolal Dios o mu spas yuʼun chil kʼuchaʼal tspas li yantike. Xuʼ van xbat saʼ ta balumil li kʼusi tskʼan yoʼontone».

[Lokʼol ta pajina 6]

¿Mi baʼyel van skʼan xbat ta universidad?