Achʼ revista ta inglés ti mas kʼun ta aʼyele

XIMUYUBAJ chakalbotkutik li revistaetik Li Jkʼel osil ta toyole ta xlokʼ ta inglés ti mas kʼun ta aʼyele. Ta xichʼ pasel preva junuk jabil. Li revista sventa chichʼ chanel ti kʼun ta aʼyel smelolale koʼol tajek yorail chlokʼ xchiʼuk li revista ta inglés ti chlokʼ onoʼoxe. Chichʼ onoʼox talel li kʼusitik chichʼ chanel jujun xemanae, mi x-och toe ta xichʼ tikʼel yan mantaletik. ¿Kʼu yuʼun jech chichʼ pasel? Sventa chichʼ koltael epal yajrextikotak Jeova ta yaʼibel smelolal li chanubtaseletik ta Vivliae.

Jech kʼuchaʼal li ta lumetik ta Fiyi, Ghana, Kenia, Liberia, Nigeria, Papúa Nueva Guinea xchiʼuk ta Islas Salomone chkʼopojik ta inglés. Li kʼop taje jaʼ tstunesik ta tsobajeletik xchiʼuk kʼalal chcholik mantal li kermanotaktike, manchuk mi yan-o kʼop chkʼopojik li ta snaike. Akʼo mi jech, li inglés ta xichʼ tunesel ta jvuntike mas tsots jutuk ta aʼyel, jaʼ mas kʼun ti kʼuyelan chkʼopojike. Jech xtok, oy ep yajtuneltak Jeova ti muʼyuk te nakalik ta slumalike, vaʼun chakʼik persa chkʼopojik ta inglés manchuk mi mu snaʼik lek. Xchiʼuk xtok, jlom kermanotaktike mu stakʼ xbatik ta jun tsobajel ti ch-echʼ ta skʼop stukike.

Jech kʼuchaʼal jnaʼojtik xa onoʼoxe, li xchanel jujun xemana Li Jkʼel osil ta toyole jaʼ te tsmakʼlinutik Dios ta mantal kʼalal ta sta yorail chijveʼutike. Taje jaʼ chkoltaatik sventa chaʼibeik mas smelolal li kermanotik ti chkʼopojik ta inglese. Jech-o xal li achʼ revistae mas kʼun ta aʼibel smelolal, akʼo mi koʼol kʼusi chal xchiʼuk li revista ta onoʼox jtunestike. Jelel xvinaj li pajina 1, pe koʼol li bu chichʼ talel li yuni bitake, li parafoetike, li sjakʼobiltake xchiʼuk li slokʼoltake. Jech taje, ta jujuntal xuʼ jtʼujtik bu junukal ta jkʼan ta jtunestik. Mi chakʼopoj ta inglese, ¿mi chakʼan chakʼelbe junuk skʼelobil ti kʼusi jelele? Li ta yok pajinae te chavilbe jun skʼelobil ti yichʼoj lokʼesel ta xchibal parafo li ta baʼyel kʼusi chichʼ chanel li ta revista liʼe.

Epal ermanoetik xi skʼanojbeik li Jeovae: «Acʼbun caʼibe lec smelol, acʼbun jchan lec li amantaltaque» (Sal. 119:73). Jnaʼojkutik lek ti jaʼ stakʼobil s-orasionik li achʼ revista liʼe. Jpatoj koʼontonkutik ti kerem tsebetik xchiʼuk li krixchanoetik ti mu snaʼik lek inglese xuʼ xa mas lek xchapan sbaik kʼalal chichʼ chanel jujun xemana Li Jkʼel osil ta toyole. ¡Kolaval ti chavakʼ ta ilel ti «[chakʼan] li bochʼo coʼol jchʼunoj[ku]tic» ta atojolale Jeova xchiʼuk ti chavakʼbunkutik ep jveʼelkutik ta mantal ta stojolal li «jʼabtel ti jun [«tukʼ», NM] yoʼnton [...], ti lec bije»! (1 Ped. 2:17; Mat. 24:45.)

Li Jtsop Jbeiltasvanej yuʼun li Yajrextikotak Jeovae