Li kʼusitik tsjakʼ jkʼelvunetike

¿Mi jnaʼojtik ta melel jayib albilkʼopetik kʼotem ta stojolal Jesucristo ti te chal ta Tsʼibetik ta Hebreo Kʼope?

Kʼalal ta jchantik lek li Tsʼibetik ta Hebreo Kʼope ta jtatik epal albilkʼopetik ti ikʼot ta pasel ta stojolal li Jesucristoe. Li albilkʼopetik taje laj yalbe skʼoplal bu ilik tal li Mesiase, ti kʼusi ora chvinaj ti jaʼ Mesiase, li kʼusi tspase, ti kʼuyelan ch-ilat yuʼun li krixchanoetike xchiʼuk li yabtel tspas sventa li kʼusi tskʼan tspas Jeovae. Ta skotol li albilkʼop taje xuʼ te xkojtikintik ti jaʼ ta melel Mesías li Jesuse. Pe skʼan me xijpʼijub kʼalal chkaltik kʼuyepal albilkʼopetik oy ta Vivlia ti ikʼot ta pasel ta stojolal li Jesuse.

Li krixchanoetike mu koʼoluk tsnopik kʼusitik albilkʼopal chkʼot ta pasel ta stojolal li Jesuse. Li ta livro Comentario bíblico histórico yuʼun Alfred Edersheim chal ti voʼneal stsʼib jrabinoetike laj yalik ti 456 Tsʼibetik ta Hebreo Kʼope ikʼot la ta pasel ta stojolal Jesús, manchuk mi muʼyuk te chal Mesías. Pe kʼalal ta jkʼelbetik lek skʼoplal li 456 tekstoetik sventa li albilkʼopetike, xuʼ van xijnaʼet mi te tsakal skʼoplal li Cristoe. Jech kʼuchaʼal liʼe, li Edersheim chal ti jaʼ la skʼoplal Mesías yaloj judioetik li kʼusi chal Génesis 8:11. Chalik la ti «jlik yanal oliva teʼ skatsʼoj tal [ta arka] li jkot tsumute laj la yichʼ tsakel tal ta svitsal Mesías». Li vinik taje chalbe skʼoplal xtok kʼuyelan chaʼibeik smelolal Éxodo 12:42 li judioetike. Xi chal li kʼusi tsnopike: «Ta skoj ti ilokʼ ta taki xokol balumil li Moisese, ta xlokʼ talel ta Roma li Mesías eke». Ta melel, jutuk mu skotoluk li pʼijil viniketik xchiʼuk li yan jkʼelvunetike chalik ti albilkʼopetik taje, muʼyuk bu mas chalbe skʼoplal li Jesuse.

Jech xtok, ti jaʼuk noʼox ta jtsaktik ta mukʼ li albilkʼopetik ikʼot ta pasel ta stojolal Jesucristoe, mu onoʼox jnaʼtik lek kʼuyepal li albilkʼopetik taje. Kalbetik skʼoplal li kʼusi chal kapitulo 53 ta slivroal Isaías. Xi chalbe skʼoplal Mesías li versikulo 2 kʼalal ta 7: «Maʼuc toj cʼupil sba [...]. Solel naʼlebil, bajbil yuʼun li cristianoetique [...]. Jaʼ la xcuch scotol li jchameltique [...]. Ep iyayij sbecʼtal [...] ta scoj jtoyobbailtic [...]. Icʼbil ibat ta milel jech chac cʼu chaʼal jcot chʼium chij». Ta skotolal taje, ¿mi jaʼ noʼox van jun albilkʼop o epal albilkʼopetik?

Jnopbetik skʼoplal xtok kʼusi chal Isaías 11:1: «Li jbej chumanteʼ jaʼ li Isaie, ta xlocʼ jun sqʼuelum; ta xlic locʼuc tal jbej sqʼuelum ta mero yibel». Li versikulo 10 koʼoltik li kʼusi chal eke. Vaʼun chaʼa, ¿mi jun noʼox li albilkʼop taje o mi chib? Li kʼusi chkʼot ta nopel kuʼuntik ta sventa li kʼusitik chal ta kapitulo 53 xchiʼuk 11 ta slivroal Isaiase, xuʼ chjel ti kʼuyepal albilkʼopetik ta sventa Mesiase.

Ta skoj taje, mu stakʼ xkaltik lek kʼuyepal albilkʼopetik oy ta sventa Mesías li ta Tsʼibetik ta Hebreo Kʼope. Li s-organisasion Jeovae ep xa ta velta yalojbe skʼoplal albilkʼopetik xchiʼuk ti kʼutik yelan kʼotem ta pasele. a Li albilkʼopetik taje, xuʼ jtabetik sbalil kʼalal ta jchan Jvivlia jtuktik o xchiʼuk li kutsʼ kalaltike o jaʼo kʼalal ta jcholtik mantale. Pe li kʼusi mas tsots skʼoplal sventa li albilkʼopetike jaʼ ti tstsatsubtas xchʼunel koʼontontike, yuʼun jaʼ te chkakʼtik venta ti Jesuse jaʼ li Cristoe, li Mesiase. Jaʼ mu masuk tsots skʼoplal kʼuyepal li albilkʼopetike.

[Tsʼib ta yok vun]