Li kʼusitik tsjakʼ jkʼelvunetike

¿Kʼusi skʼan xal li yaʼyejal abtelal ta jujun jabil chlokʼ ta Anuarioe?

Li ta Anuarioe mas chkʼot ta oʼontonal skʼelel li yaʼyejal kabteltik ta spʼejel balumile. Xijmuyubaj noʼox jkotoltik kʼalal ta jkʼeltike, yuʼun chal kʼuyelan yakal chkʼot ta pasel ta sjunul Balumil li cholmantal xchiʼuk li chanubtasel chakʼik steklumal Jeovae. Sventa mas to jtabetik sbalile skʼan xkaʼibetik smelolal kʼusi skʼan xal li jujuchol kʼusitik te talemike. Jkʼeltik jun-chibuk skʼelobil.

Año de servicio. Li ta jujun Anuario chlokʼe jaʼ chalbe skʼoplal yaʼyejal li abtelal laj yichʼ pasel ta slumal Jeova li echʼ jabile. Li jabil taje chlik ta jujun septiembre xchiʼuk tstsuts ta jujun agosto, jech kʼuchaʼal liʼe: li ta Anuario 2011 jaʼ chalbe skʼoplal li abtelal laj yichʼ pasel ta 1 yuʼun septiembre ta 2009 kʼalal ta 31 yuʼun agosto ta 2010.

Máximo y promedio de publicadores. Kʼalal «publicadores» xie, jaʼ skʼoplal jcholmantaletik ti laj yalbeik skʼoplal lekil aʼyej ta sventa Ajvalilal yuʼun Dios, xuʼ van yichʼojik xa voʼ o muʼyuk. ¿Kʼusi skʼan xal li «máximo de publicadores» xie? Taje jaʼ skʼoplal kʼalal mas ep laj yakʼ s-informeik ta jun u li jcholmantaletike. Li ta jchol liʼe xuʼ van chib to velta tsakbil skʼoplal jun jcholmantal ta skoj ti maʼuk xa yorail laj yakʼ li s-informee. Jech xtok, li jcholmantal ti muʼyuk laj yakʼ li s-informee muʼyuk xa tsakbil ta venta li u taje. Taje chakʼ ta ilel ti jujun u skʼan xkakʼtik ta yorail noʼox li j-informetike. ¿Kʼuxi chichʼ lokʼesel li «promedio de publicadorese»? Chichʼ chapel skotol li informeetik ta jun jabile xchiʼuk chichʼ chʼakel ta lajcheb.

Total de horas. Li ta Anuario 2011 chal ti 1,600 miyon oraetik la jcholtik mantal li ta 1 yuʼun septiembre ta 2009 kʼalal ta 31 yuʼun agosto ta 2010. ¿Mi te xa tsakbil ta venta skotol li kʼusitik ta jpastik sventa chkichʼtik ta mukʼ li Jeovae? Moʼoj, yuʼun muʼyuk te tsakbil ta venta li kʼusi ta jpastik jujun xemana jech kʼuchaʼal svulaʼanel li ermanoetike, li tsobajeletike, li xchanel Vivlia ta jtuktike xchiʼuk li snopbel skʼoplale.

Gastos. Li ta abtelal laj yichʼ pasel ta 1 yuʼun septiembre ta 2009 kʼalal ta 31 yuʼun agosto ta 2010, li yajrextikotak Jeovae ilaj yuʼunik mas ta 155 miyon ta dólar sventa li kʼusitik chtun yuʼunik li prekursor espesialetike, li misioneroetike xchiʼuk li jkʼelvanejetik ta sirkuito xchiʼuk distritoe. Ti kʼuyepal taje muʼyuk tsakbil ta venta ti kʼuyepal ilaj ta sventa li spasel vunetike, mi jaʼuk tsakbil ta venta ti kʼuyepal ilaj yuʼunik li mas ta 20 mil buchʼutik chtunik ta Betel ta spʼejel Balumile.

Participantes de la Conmemoración. Liʼe jaʼ skʼoplal li yajrextikotak Jeova yichʼojik xa voʼ ti la sveʼik pan xchiʼuk laj yuchʼik yalel tsʼusub li ta Snaʼobil slajel Cristoe. Ti kʼuyepal chichʼ alel tee, ¿mi jaʼ van skʼan xal ti jech yepalik liʼ to oyik ta Balumil ti buchʼutik tʼujbil chbatik ta vinajele? Xuʼ van mu jechuk. Skʼan jtsaktik ta venta ti oy jlom krixchanoetik ti ta skoj li kʼusi xchanojik tal ta srelijionike o ti ip ta sjolike xuʼ xlik xchʼunik ti ikʼbilik sventa chbatik ta vinajele. Ta melel, mi jaʼuk stakʼ naʼel kʼuyepal to liʼ oyik ta Balumile, pe mu persauk skʼan jnaʼtik. Li Jtsop Jbeiltasvaneje muʼyuk stsakoj ta vun sbiik li buchʼutik tsveʼik pan xchiʼuk chuchʼik yalel tsʼusub li ta Snaʼobil slajel Cristoe xchiʼuk mu kʼu xutik sventa tsta sbaik ta kʼoponel. a

Li kʼusi lek xuʼ jchʼuntike jaʼ ti jlom «yajtuneltac Dios» ti tʼujbil chbatik ta vinajele liʼ to oyik ta Balumil kʼalal mi lik li tsots vokole (Apo. 7:1-3). Yoʼ to mu xtal taje, li buchʼutik tʼujbil chbatik ta vinajele yakal-o chbeiltasvanik li ta cholmantal xchiʼuk li ta chanubtasel chichʼ pasel ta spʼejel Balumile, ti jaʼ jun abtelal te chalbe skʼoplal li yaʼyejal kabteltik ta spʼejel Balumile.

[Tsʼib ta yok vun]