¿Mi xvul ta ajol?

¿Mi oy akʼeloj lek li revista Li Jkʼel osil ta toyole, ti mas achʼik to lokʼeme? Mi jeche, paso preva mi xtakʼ avuʼun li kʼusitik liʼe:

• ¿Kʼusitik oxtos xuʼ jpastik sventa mu jchanbetik li krixchanoetik ti mu jamaluk snaʼ xkʼopojike?

Jaʼik li liʼe: 1) skʼan jxiʼtatik li Diose (1 Ped. 3:12); 2) akʼo jchanubtastik ta Vivlia li jol koʼontontike, xchiʼuk 3) skʼan junuk noʼox koʼontontik yuʼun li kʼusi oy kuʼuntike (15/4, paj. 6, 7).

• ¿Mi jaʼ van skʼan xal ti mu xa stakʼ xijtseʼin o ti mu xa stakʼ junuk koʼontontik xchiʼuk yantik ta skoj ti mu tajimoluk chkiltik li spasbel yabtel Diose?

Lek ta chanbel stalelal li Jesuse. Jnaʼojtik ti lek i-echʼ yuʼun kʼakʼal xchiʼuk yamigotak kʼalal koʼol veʼike, yuʼun li stuke muʼyuk tsots tajek stalelal o ti jpʼel xa xale. Yuʼun kʼalal to ta ololetik jun yoʼontonik ta stojolal li Jesuse (15/4, paj. 10).

• ¿Kʼusi smelolal li oliva teʼ chal ta kapitulo 11 yuʼun Romanose?

Li oliva teʼ ti babakʼop noʼoxe jaʼ te tsakal skʼoplal li xchaʼvokʼal snitilulal Abrahame, li Israel yuʼun Diose. Li yibel olivae, jaʼ skʼoplal li Jeovae, li yoke jaʼ li Jesuse. Jutuk mu skotolikuk li judioetike muʼyuk la xchʼamik li Jesuse. Jech oxal, sventa stsʼaki li xchaʼvokʼal snitilulal Abrahame, li Jeovae la stsʼak ta jun oliva teʼ li yajtsʼaklomtak Cristo ti maʼuk batsʼi judioetike (15/5, paj. 22-25).

• ¿Mi xuʼ van xkʼotik ta jpojvanej li stukʼil nichʼnabtak Cristoe?

Muʼyuk. Melel onoʼox ti tukʼil krixchano i-echʼ li Jesuse, jaʼ yuʼun xuʼ van epal miyon tukʼ xnichʼnabtak ti jechuke, pe muʼyuk xkʼotik ta jpojvanejetik. Kʼuchaʼal chkiltike li xkuxlejal Jesuse jaʼ li jun kuxlejal jech kʼuchaʼal li baʼyel kuxlejale, ta skoj taje jaʼ noʼox xuʼ xpojvan (1 Tim. 2:6) (15/6, paj. 13).

• ¿Kʼusi lekil aʼyejetik oy sventa li buchʼutik povreetike?

Li Diose la svaʼan ta Ajvalil li Xnichʼone. Li Jesuse jaʼ jun lekil Ajvalil, oy jayibuk srasonal ti xuʼ jech xkaltike, yuʼun jaʼ noʼox sta-o xkʼot ta Ajvalil yuʼun li krixchanoetike, chkʼuxubin li povreetike, xchiʼuk xuʼ tslajes li kʼusi chakʼ povreale, jech xtok xuʼ xakʼbe slajeb li kʼusi tskʼan stuk li krixchanoetike (1/7, paj. 7).

• ¿Kʼusi xuʼ spasik li totil meʼiletik mi chil svokolik ta skoj ti jaʼ to chil sba yolike?

Tsots skʼoplal ti xakʼbe sbaik ta ilel ti skʼanoj sbaike. Li malalile skʼan me spas persa ti akʼo junuk yoʼonton xaʼi sba yuʼun yajnil kʼalal chopol chaʼi sba li yajnile. Jech xtok, skʼan sloʼiltaik ti kʼuyelan chaʼi sbaike xchiʼuk li kʼusitik chtun yuʼunike (1/7, paj. 10, 11).

• ¿Kʼusitik muʼyuk lek la spasik kʼalal la xchapanik li Jesuse?

Li nail chapanobbaile muʼyuk la sabe skʼoplal mi melel li kʼusi chichʼ alel ta stojolal Jesuse. La saʼik buchʼutik xuʼ sjutbeik smul. Ta akʼobaltik la xchapanik. Li chapanele kʼajomal noʼox jun kʼakʼal ijalij (1/7, paj. 20).

• ¿Kʼusi la skʼan laj yal Jesús kʼalal «voʼot chlocʼ ta ave atuc» xie? (Mat. 26:63, 64.)

Yaʼeluke, nopem onoʼox xaʼi tstunesik li judioetik li jpʼel kʼop taje, jaʼ sventa chalik ti jaʼ jech ta melel li kʼusi chjakʼbatike. Kʼalal li mero bankilal pale Caifás laj yalbe Jesús ti akʼo xal ta jamal ti mi jaʼ li Cristo Xnichʼon Diose, li Jesuse xi la stakʼe: «Voʼot chlocʼ ta ave atuc» xi. Li kʼuyelan la stakʼe jaʼ jech chakʼ ta aʼyel ti yuʼun jech ta melele (1/7, paj. 31).

• ¿Kʼuxi xuʼ xkakʼtik ta ilel ti ta jtsaktik ta venta li pʼijubtasel chij-akʼbat ta Hechos 20:29, 30 sventa li «jloʼlavanej jchanubtasvanejeti[ke]»?

Jaʼo kʼalal muʼyuk ta jkʼopontik xchiʼuk mu xkakʼtik ochuk ta jnatike (Rom. 16:17; 2 Juan 9-11). Muʼyuk ta jkʼeltik li vunetik tspasike, mi jaʼuk li kʼusitik tslokʼesik ta television o ta Internete (15/7, paj. 15, 16).