«Solel mu xchʼay ta joltik li tsobajel liʼe»
«Solel mu xchʼay ta joltik li tsobajel liʼe»
«KʼALAL mi tsuts li tsobajele, xi chkaltike: “Ta melel, solel mu xchʼay ta joltik li tsobajel liʼe, ti jech chichʼ pasel jujun jabile”.» Li kʼusi laj yal Stephen Lett ti jaʼ jun li ta Jtsop Jbeiltasvanej yuʼun li yajRextikotak Jeovae la stijbe mas yoʼonton li buchʼutik te tsobajtike. Li tsobajel taje i-echʼ ta 2 yuʼun oktuvre ta 2010 ta Salon sventa Mukʼta Tsobajeletik ta Jersey City (Nueva Jersey, Estados Unidos). Jech onoʼox tspasilan jujun jabil li Watch Tower Bible and Tract Society of Pennsylvania, li avie jaʼ xa li numero 126. ¿Kʼusitik mas tsots skʼoplal ikʼot ta pasel?
Li ta slikebale, li ermano Lette laj yalbe skʼoplal li skareta Jeova ti te chal ta slivroal Ezequiele. Liʼe jaʼ jun mukʼta kareta ti kʼupil sba ta vinajel ti jaʼ svinajeb li s-organisasion Diose, ti jaʼ oy ta sba chakʼ xanavuke. Li jvokʼ ti mu xvinaje, ti jaʼ te skʼoplalik li anjeletike, toj echʼ xa noʼox anil chanav kʼuchaʼal jun chauk. Jech kʼuchaʼal laj yakʼ ta ilel li ta mantale, toj anil chanav jech kʼuchaʼal snopben li Jeovae. Li jvokʼ ta balumile, lek chanav batel ek, jech kʼuchaʼal vinajem talel ta skoj li kʼusitik lek kʼotemik ta pasele.
Jun skʼelobil ti laj yichʼ alele jaʼ ti laj yichʼ nopel ti jun xa noʼox Betel chkom ta sba skʼelel yabtel li jlom Beteletike. Koliyal ti jech ikʼot ta pasel taje, li avie epal ermanoetik ti chtunik toʼox ta Betele, xuʼ xa stunes skʼakʼalik o yipik sventa chcholik mantal. Li ermano Lette laj yalbe li buchʼutik te tsobajtik ti akʼo skʼanbeik Jeova ti tukʼuk-o x-abtejik xchiʼuk pʼijikuk spas yabtelik li j-abtel ti tukʼ yoʼonton ti lek pʼije xchiʼuk li Jtsop Jbeiltasvaneje, ti jaʼ li jolile (Mat. 24:45-47).
Yaʼyejal kʼusitik kʼotemik ta pasel xchiʼuk sjakʼbel sloʼil ermanoetik
Li Tab Honsberger ti jaʼ komite sventa Betel ta Haitie, laj yal aʼyej ta sventa li kʼusi ikʼot ta pasel yuʼun li nikel i-echʼ ta 12 yuʼun enero ta 2010, ti chamik 300,000 krixchanoetike. Li ermano xtoke laj yal ti jnitvanejetik ta relijione laj la yalbe krixchanoetik ti nikel taje jaʼ la skastigo Dios sventa li chopol krixchanoetike, ti jaʼ noʼox la la xchabi komel li buchʼutik lekike. Ti jechuk li kʼusi laj yalike, ¿kʼu yuʼun van ta smilal noʼox chopol krixchanoetik jatavik lokʼel kʼalal ilom ta nikel li chukinabe? Epal j-haití krixchanoetik ti oy ta yoʼontonik xchanel li Vivliae la sta spatobil yoʼontonik kʼalal la snabeik lek srasonal kʼu yuʼun ti oy epal nikel, nojelal ta voʼ o yan kʼusitik li avi kʼakʼale. Li buchʼu laj yetʼes mantale laj yal li kʼusi laj yal jun ermano ti cham yajnil ta skoj li nikele: «Jujun kʼakʼal chi-okʼ. Mu to jnaʼ kʼu sjalil chkaʼibe batel li xkʼuxule, pe tspatbun koʼonton ti chkʼanvan li steklumal Jeovae. Jnaʼoj lek ti oy spatobil koʼontone, jaʼ yuʼun chkalbe batel li yan krixchanoetike».
Li Mark Sanderson ti te chtun avi ta Betel ta Brooklyn, laj yal kʼusi kʼotem ta pasel li ta Filipinase, ti te toʼox chtun ta komite sventa Betel li ta lum taje. ¡Solel xmuyubaj laj yal ti ta lum taje oy xa ta 32 ta velta epajem ti kʼuyepal oy jcholmantaletik, xchiʼuk ti buchʼutik chchanik Vivliae jaʼ mas epik kʼuchaʼal li buchʼutik chcholik mantale! Laj yalbe skʼoplal li kʼusi ikʼot ta stojolal Miguele, ti laj ta milel smome. Li ermano taje laj yakʼ tajek persa sventa xichʼ chapanel li jmilvaneje xchiʼuk ti xichʼ tikʼel ta chukele. Jun veltae ibat ta cholmantal ta chukinab, vaʼun te la sta li jmilvaneje. Manchuk mi chopol laj yaʼi sba jutuk, laj yakʼ ta ilel slekil yoʼonton xchiʼuk laj yalbe ti chchanubtas ta Vivliae. Li jmilvanej taje la xchʼam li chanubtasele, ta skoj taje lik skʼan li Jeovae, jaʼ yuʼun laj yichʼvoʼ. Li avie yamigo xa sbaik xchiʼuk li Miguele, ti jaʼ chkoltavan sventa xlokʼ noʼox ta chukel li vinik taje.Li yan mantale, jaʼ la sjelubtas li Mark Noumair, ti jaʼ jchanubtasvanej li ta Departamento sventa Chanobvunetik sventa Dios, la sjakʼbe sloʼil oxib nupultsʼakaletik: Alex xchiʼuk Sarah Reinmueller, David xchiʼuk Krista Schafer, xchiʼuk Robert xchiʼuk Ketra Ciranko. Li ermano Reinmueller, ti jaʼ yajkoltaobba li Komite sventa Vunetike, laj yal ti kʼalal voʼlajuneb toʼox sjabilale jaʼ to mas tsots skʼoplal lik yil ta xkuxlejal li Skʼop Diose. Yakal toʼox ta xtun kʼuchaʼal prekursor ta Canadá xchiʼuk bakʼintike stuk chchol mantal. Kʼalal laj yichʼ jakʼbel buchʼu ermanoal te ta Betel ti lek laj yilbe stalelal xchiʼuk ikoltaat-o sventa xchʼi ta mantale, li ermanoe laj yalbe skʼoplal oxvoʼ tukʼil viniketik xchiʼuk laj yal kʼuxi ikoltaat sventa xchʼi ta mantal. Li yajnil ti Sara sbie, laj yalbe skʼoplal kʼuyelan lek laj yil sbaik xchiʼuk jun ermana ti laj yichʼ tikʼel ta chukel ta Chinae. Li ermana taje epal jabil i-och ta chukel ta skoj xchʼunel yoʼonton. Li Sarae laj yal ti kʼusi la xchanbe li ermana taje jaʼ ti tspat lek yoʼonton ta stojolal Jeova li ta orasione.
Li David Schafer, yajkoltaobba Komite sventa Chanubtasele, jaʼ laj yalbe skʼoplal li xchʼunel yoʼonton smeʼe xchiʼuk laj yal ti kʼalal kerem toʼoxe oy la jayvoʼ jtuchʼsiʼetik ikoltaat sventa spas yuʼun li prekursor auksiliare. Li yajnil ti Krista sbie, la svules ta sjol ti ikoltaat yuʼun betelitaetik ti mol meʼelik xae. Ta jujuntal li ermanoetik taje «lec xtojob[ik] ta sventainel li cʼusi muʼyuc tsots [skʼoplal]» jech kʼuchaʼal laj yal Jesús ti akʼo xichʼ pasele (Luc. 16:10).
Li Robert Ciranko, ti jaʼ yajkoltaobba Komite sventa Stsʼibael vunetike, jaʼ laj yalbe skʼoplal li xchibal smukʼtotak xchiʼuk xchibal syayatak ti tʼujbil chbatik ta vinajel ti te likemik ta Hungriae. Li kʼusi ikoltaat-o kʼalal bikʼit toʼoxe jaʼ ti i-ay ta mukʼta tsobajeletik ta sjabilal 1950, ti jaʼ
te laj yakʼ venta ti jaʼ mas bikʼit li stsobobbaile. Li yajnil ti Ketra sbie, laj yal ti la xchan sventa tukʼ xakʼ sba kʼalal itun ta prekursora ta jun tsobobbail ti yiloj svokolik ta skoj li buchʼutik svalopatinojik mantale xchiʼuk ta skoj yan vokoliletik. Pe ikuch yuʼun, ta mas tsʼakale i-och ta prekursora espesial xchiʼuk laj yichʼ takel batel ta jun tsobobbail ti bu lek patbat yoʼontone, yuʼun li ermanoetike lek ojtikinbilik ti lek jmoj tsobol ch-abtejike.Ta tsʼakale i-echʼ yalbe yaʼyejal Etiopía ermano Manfred Tonak. Li ta jteklum taje, ti te xa onoʼox chichʼ albel skʼoplal ta Vivliae, oy mas ta balunmil jcholmantaletik. Jutuk mu skotolikuk te nakalik ta Adís Abeba, skapital Etiopía xchiʼuk ta jteklumetik ti te noʼox nopole. Lek xvinaj ti skʼan koltael li jteklumetik ti nomike. Jech oxal, laj yichʼ takel ta ikʼel yajrextikotak Jeova ti te likemik ta Etiopiae, pe ti nakalik xa ta yan lum sventa akʼo xbat koltavanikuke. Ta skoj taje ep buchʼutik te chbat nakliikuk kʼuk sjalil. Li ermanoetik taje staojik epal krixchanoetik ti tskʼan chchanik li Skʼop Diose xchiʼuk spatojbeik yoʼonton li ermanoetik ti te noʼox nakalike.
Jech xtok lek ta albel skʼoplal li mantaletik i-echʼ sventa li yajrextikotak Jeova ta Rusiae xchiʼuk ti kʼuyelan yakal chchapan skʼopike. Li ermano Aulis Bergdahl, ti chtun ta Komite sventa Betel ta Rusiae, laj yal kʼuyelan laj yil svokolik li ermanoetike, mas to li ta Moscue. Philip Brumley, ti chtun ta Departamento sventa Asuntos Legales ta betel ta Estados Unidos i-echʼ yal sloʼil. Laj yal kʼusitik ikʼot ta pasel kʼalal laj xaʼox skʼelbe skʼoplal Tribunal Europeo de Derechos Humanos baluneb kʼusitik albil ta stojolal li ermanoetike. Li snail chapanobbail taje laj yal ti chʼabal sprevailtak li mulil albile xchiʼuk laj yakʼ ta ilel jayibuk ti mu meleluke. Akʼo mi skʼan to jkʼeltik li kʼusitik chkʼot ta pasel ta skoj li kʼusi chapanbil xae, li ermano Brumley laj yal ti xuʼ lek chkoltavan sventa li chapanel chichʼik ta yantik balumil li yajrextikotak Jeovae.
Kʼalal laj xaʼox yichʼ alel li lekil aʼyej taje, li ermano Lette laj yal xtok ti snail chapanobbaile laj yal ti ta skʼelbe smelolal li patan ti oy xa onoʼox sjabilal tskʼanbe yajrextikotak Jeova li ajvalilal ta Franciae. Jvules ta joltik ti snail chapanobbail taje lek tajek ichʼbil ta mukʼ xchiʼuk ti mu skotoluk ta xchʼam li kʼusi chichʼ albel ti akʼo xchapane. Li avie kʼotem ta skʼob xchapanel 39 kʼopetik ti snupojik li yajrextikotak Jeovae, taje 37 kuchem yuʼunik. Li ermanoe laj yal ti akʼo xichʼ-o pasel orasion ta sventa taje.
Li slajeb partee jaʼ la sjelubtas Richard Morlan, ti jaʼ jchanubtasvanej li ta Chanobvun sventa Moletik ta Tsobobbaile; lek tajek laj yalbe skʼoplal li chanobvun taje xchiʼuk laj yal ti xmuyubajik tajek li moletik ti i-ayik xae.
Yan jelubtasej mantaletik ta Jtsop Jbeiltasvanej
Guy Pierce ti chtun ta Jtsop Jbeiltasvaneje lek xa jun yoʼonton laj yalbe skʼoplal li teksto sventa jabil 2011 ti xie: Jsaʼ jnakʼobbailtik ta sbi Jeova (Sof. 3:12). Laj yalbe skʼoplal ti ep muyubajel xuʼ jtatik li avie, pe laj yal xtok ti tsots skʼoplal ta skoj ti poʼot xa xtal li skʼakʼalil Jeovae. Li krixchanoetike tsaʼ snakʼobbailik ta jecheʼ relijion, politika, ta skʼulejalik xchiʼuk ta yan kʼusitik ti naka noʼox chloʼlavane. Skʼan jkʼopontik ta sbi Jeova sventa jta jpojobbailtik, sventa taje skʼan xkojtikintik stuk li Jeovae, xkichʼtik ta mukʼ, jpat koʼontontik ta stojolal xchiʼuk akʼo jkʼantik ta sjunul koʼontontik.
David Splane laj yalbe skʼoplal li mantal ti jaʼ sbi: «¿Mi ochemotik xa li ta kux oʼonton xchiʼuk Diose?». Laj yalbe skʼoplal ti manchuk mi jaʼ skʼakʼalil kux oʼonton oy li Jeovae, mu jaʼuk skʼan xal ti chkux yoʼonton o ti mu kʼusi tspase. Ti kʼu sjalil smakoj taje, li Jeovae «ta to xʼabtej» sventa li kʼusi tskʼan tspas sventa Balumile, xchiʼuk jech tspas li Xnichʼon eke (Juan 5:17). ¿Kʼuxi chij-och li ta kuxob oʼonton xchiʼuk Diose? Jaʼ kʼalal chkiktatik spasel li kʼusitik chopole xchiʼuk ti chkiktatik snopel ti tukʼutik ta skoj li kʼusitik ta jpastike. Skʼan xkakʼtik ta ilel ti oy xchʼunel koʼontontike, ti oyuk ta jol koʼontontik li kʼusi tskʼan tspas li Diose xchiʼuk ti skʼan xkakʼtik persa xijkoltavan ti bu kʼalal xuʼ kuʼuntik sventa xkʼot ta pasel taje. Bateltike xuʼ van vokol ta pasel, pe xuʼ xkuch kuʼuntik koliyal li tojobtasel xchiʼuk beiltasel chakʼ s-organisasion Jeovae. Kʼalal laj stsutses sparte li ermanoe laj yal ti akʼo kakʼtik persa sventa xij-och li ta kuxob oʼonton xchiʼuk Diose.
Li slajeb mantale jaʼ sbi: «¿Kʼusi van xuʼ xkʼot ta jtojolaltik?». Taje jaʼ laj sjelubtas Anthony Morris. Jech kʼuchaʼal jun totil la svulesbe ta sjol li buchʼutik te oyik ti oy kʼusi skʼan jpastik ta anil xa noʼox li ta jkuxlejaltike. Jech xtok laj yal ti tsots skʼoplal ti oyuk tajek ta koʼontontik ti akʼo xkʼot ta pasel li albilkʼopetike, jech kʼuchaʼal ti kʼalal tsots xi chichʼ alele: «Jun coʼntontic, muʼyuc cʼusi xiʼbal sba» xchiʼuk ti chichʼ lajesbel skʼoplal li jecheʼ relijione (1 Tes. 5:2, 3; Apo. 17:15-17). Jech xtok, laj yal ti xibal sba ti xkaltik ti jaʼ xa slikebal Armagedón li kʼusitik chlokʼ ta notisia ti maʼuk chalbe skʼoplal albilkʼopetik ta sventa taje. Laj yal xtok ti skʼan jaʼ noʼox akʼo jun koʼontontik jmalatik jech kʼuchaʼal chal ta Miqueas 7:7. Jech xtok, la spatbe yoʼonton ti jmoj x-abtejik xchiʼuk li Jtsop Jbeiltasvaneje, jech kʼuchaʼal tspasik li soltaroetik ti jmoj tstsob sbaik kʼalal ch-ochik ta paskʼope. Xi la stsutses li sloʼile: «Oyuc me lec stsatsal avoʼntonic [...]; mu me xchibaj avoʼntonic» (Sal. 31:24).
Sventa stsutseb li tsobajele laj yichʼ alel kʼusitik chlik yichʼ pasel li ta steklumal Jeovae. Li ermano Geoffrey Jacksone laj yal ti oy noʼox kʼuk sjaliluk ta xichʼ pasel jlik revista Li Jkʼel osil ta toyole, ta xlokʼ ta inglés ti mas kʼun ta aʼyel sventa stabeik mas sbalil li buchʼutik mu xaʼiik lek inglese. Ta tsʼakal Stephen Lett laj yal ti Jtsop Jbeiltasvaneje laj yal mantal ti chlik xa yichʼik vulaʼanel li jkʼelvanejetik ta distrito xchiʼuk yajnilik ti te chtunik ta Estados Unidose. Laj yal xtok, ti Chanob vun sventa Xchanubtasel Jtuneletike jaʼ xa sbi, Chanobvun ta Vivlia sventa Ermanoetik ti Chʼabal Yajnilike. Laj yal xtok ti chlik Chanobvun ta Vivlia sventa Yajtsʼaklomtak Cristo ti Nupunemike, li chanobvun taje jaʼ sventa mas xa lek chapalik yoʼ skoltaik s-organisasion Jeova li buchʼutik nupunemike. Ta slajebal xae, li ermano Lette laj yal ti ta Pattersone chib velta ta jabil ch-echʼ Chanobvun sventa Jkʼelvanejetik xchiʼuk Yajnilik xchiʼuk chib velta ta jabil ch-echʼ Chanobvun sventa Buchʼutik Sbainojik Betel xchiʼuk Yajnilik. Ta tsʼakale, li buchʼutik ayemik xaʼox li ta chanobvun taje xuʼ to xbatik ta xchibal velta.
Ta slajebale jaʼ la spas orasion li John E. Barr, ti 97 xaʼox sjabilale xchiʼuk jaʼ li buchʼu mas xa ep sjabilal li ta Jtsop Jbeiltasvaneje. Ikʼot tajek ta oʼontonal ti kʼuyelan la spas li orasione. b Kʼalal ilokʼik ta Salon sventa Mukʼta Tsobajeletik li ermanoetike lek xchʼunojik ti mu xchʼay-o ta sjolik li jun tsobajel taje.
[Tsʼibetik ta yok vun]
a Kʼelo li Anuario de los testigos de Jehová 2011, pajina 62 xchiʼuk 63.
b Itsuts yabtel ta Balumil ta 4 yuʼun disiembre ta 2010 li ermano Barre.
[Lokʼol ta pajina 19]
Li buchʼutik i-ayike la skʼupinik kʼalal laj yichʼ jakʼbel sloʼilik li ermanoetike
[Lokʼol ta pajina 20]
Yakʼojbe bendision Jeova li cholmantal ta Etiopiae