Jmojuk xijmuyubaj xchiʼuk li yantike

LI AVIE mu xa masuk xijmuyubaj xchiʼuk ti junuk koʼonton kuxulutike. Ep buchʼutik vokol chaʼi xchapbel yantik li kʼusitik lek kʼotem ta xkuxlejalike. Li avie, ep krixchanoetik ti mu skʼan xchapbeik yantik li kʼusi oy ta yoʼontonike, jaʼ yuʼun chchʼak sbaik. Taje mas to jech chkʼot ta pasel li ta mukʼta lumetike.

Xi chal Alberto Oliverio, ti jaʼ jchanubtasvanej sventa Psicobiología: «Stalel xa onoʼox ti stuk chaʼi sbaik li krixchanoetike», xchiʼuk «mas to kʼalal oyik ta jun lum ti ep jnaklejetike, yuʼun chchʼak sbaik ta stojolal li yantike, jaʼ yuʼun stuk xa chaʼi sbaik. Ta skoj taje, ep ta velta mu xa sventaikuk li kʼusi oy ta xkuxlejal li xchiʼilik ta abtel ta ofisinae, li slakʼnaike, li buchʼu tspas kovrar ta tiendae o jaʼ li ta mukʼtik tiendaetike». Ta skoj ti jech chchʼak sbaike, jaʼ xa ch-ipajik-o ta at-oʼonton.

Toj lek ta aʼiel, pe li yajtsʼaklomtak Cristoe toj jelel li kʼuyelan stalelalik chakʼik ta ilele. Li jtakbol Pabloe xi chalbutike: «Cuxetuc o me avoʼntonic» (1 Tes. 5:16). Jaʼ yuʼun oy ep srasonal kuʼuntik sventa xijmuyubaj xchiʼuk li yantike. Yuʼun chkichʼtik ta mukʼ li Jeovae, li Dios ti Toj Toyol Skʼoplale, chkaʼibetik smelolal li melel aʼyej ti tsʼibabil ta Vivliae, ta jpat koʼontontik ti ta jtatik koltaele xchiʼuk ti xuʼ chijkuxi sbatel osile, jech xtok, xijmuyubaj ti xuʼ jkoltatik yan  krixchanoetik sventa tstaik li bendisionetik eke (Sal. 106:4, 5; Jer. 15:16; Rom. 12:12).

Ti jech xijmuyubaj noʼox xchiʼuk li yantike jaʼ chkichʼtik-o ojtikinel ti jaʼutik melel yajtsʼaklom Cristoe. Jaʼ yuʼun mu labaluk chkaʼitik ti xi laj yalbe ermanoetik ta Filipos li Pabloe: «Xcuxet noʼox coʼnton. Me jech chcʼot ta pasele, tscʼan xcuxet noʼox avoʼntonic ec li voʼoxuque. Jaʼ noʼox jech ec li voʼoxuque, cuxetuc me avoʼntonic me jech chcʼot ta pasele, junuc me avoʼntonic. Coʼol cuxetuc noʼox coʼntontic» (Fili. 2:17, 18). Li Pabloe ta jaypʼel noʼox kʼop laj yal chib velta ti skʼan xkuxet xchiʼuk ti junuk noʼox koʼontontik xchiʼuk li kermanotaktike.

Ta melel, sventa xuʼ xijmuyubaj xchiʼuk li kermanotaktike skʼan jkʼel jbatik sventa mu jchʼak jbatik ta stojolalik. Xi chalbutik li Pabloe: «Cuxetuc me avoʼntonic o ta stojol li Cajvaltique» (Fili. 3:1). ¿Kʼuxi xuʼ jpastik ta stojolal li kermanotaktik taje?

Muyubajkutik xchiʼuk li kermanotaktike

Kʼalal la stsʼibabe batel karta li ermanoetik ta Filipos li Pabloe, yikʼaluk van te tikʼil ta chukel ta Roma ta skoj ti chchol li lekil aʼyeje (Fili. 1:7; 4:22). Akʼo mi tikʼil ta chukel, xmuyubaj noʼox li ta cholmantale. Yuʼun xmuyubaj-o ti chtun ta stojolal Jeova ti bu kʼalal xuʼ yuʼune, ti laj yakʼ xkuxlejal ti xkoʼolaj kʼuchaʼal jun matanal ti chichʼ akʼbel Diose (Fili. 2:17). Li kʼuyelan stalelal laj yakʼ ta ilel li Pabloe chakʼ kiltik ti xuʼ xijmuyubaj akʼo mi tsots li jvokoltike, yuʼun akʼo mi tikʼil ta chukel, xi laj yale: «Ximuyubaj noʼox ta xcaʼi» (Fili. 1:18, Ch).

Li Pabloe ikoltavan sventa lik li tsobobbail ta Filipose xchiʼuk skʼanoj tajek li ermanoetik tee. Snaʼoj lek ti mi chalbe yermanotak ti xmuyubaj noʼox ti chtun ta stojolal Jeovae, chpatbat-o yoʼontonik. Jaʼ yuʼun xi laj stsʼibabe batele: «Quermanotac, li cʼusitic icʼot ta pasel ta jtojole, ta jcʼan chanaʼic ti jaʼ sventa lec chpuc batel li Lequil Aʼyeje. Scotol li yajsoldadotac mucʼta ajvalil liʼi, xchiʼuc scotol li yantique, snaʼojic xa ti jaʼ ta sventa Cristo liʼ chuculune» (Fili. 1:12, 13). Kʼalal la xchapbe yermanotak li sloʼil xkuxlejal Pabloe, patbat-o yoʼontonik. Jech muyubajik tajek xchiʼuk Pablo li ermanoetik ta Filipos eke. Melel onoʼox ti laj yakʼik persa ti mu xat yoʼontonik ta skoj ti kʼuyelan oy li Pabloe xchiʼuk laj yakʼik persa xchanbel li stalelale (Fili. 1:14; 3:17). Pe li kʼusi xuʼ spasike jaʼ ti spasik orasion ta stojolale xchiʼuk ti skoltaik batel ti bu kʼalal xuʼ yuʼunike (Fili. 1:19; 4:14-16).

¿Mi jech jtalelaltik kʼuchaʼal li Pabloe? ¿Mi jaʼ noʼox te ta koʼontontik li kʼusi lek ta jkuxlejaltik xchiʼuk ta cholmantale? Kʼalal jaʼo te jchiʼuktik li kermanotaktike, lek ti jchapbetik li kʼusi  xijmuyubaj-o ta skoj li kʼusitik ikʼot ta pasel ta cholmantale. Mu persauk jaʼ junuk loʼil ti solel toj labal xa sba tajeke. Xuʼ van jaʼ ti kʼuyelan lek laj yaʼi kuʼuntik yajval na ta skoj ti kʼuyelan la jlikes li jloʼiltike o ti lek li jrasonaj xchiʼuk li krixchanoetike. O xuʼ van lek tajek laj jloʼiltatik junuk versikulo ta Vivlia xchiʼuk li yajval nae. O jaʼ ti laj yojtikinutik ti jaʼ yajrextikoutik Jeovae, vaʼun xuʼ lek skʼoplal chkʼot li Jeovae. Kʼalal jech chkalbetike, jaʼ skʼan xal ti koʼol xijmuyubaj xchiʼuk li kermanotike.

Epal yajtuneltak Jeova tsots chakʼ yipik sventa xuʼ xlokʼik ta cholmantal. Taje jaʼik li prekursoretike, li jkʼelvanejetik ta sirkuito xchiʼuk distritoe, li buchʼutik ch-abtejik ta Betele, misioneroetik xchiʼuk li jtuneletik ti ch-abtejik ta yantik balumile, yuʼun li stukike ta sjunul yoʼonton chtunik ta tsʼakal ora xchiʼuk xmuyubaj noʼox tspas li yabtelike. ¿Mi xijmuyubaj van ek ta stojolal li kermanotaktik ti «[chkoltavanik] ta xcholel li ventainel yuʼun Diose»? (Col. 4:11.) Mi jaʼ jeche, ¿kʼu yuʼun mu xkakʼbetik ta ilel ti ta jtojbetik ta vokol li yabtelike? Kʼalal te oyutik xchiʼukik li ta tsobajeletik o ta mukʼta tsobajeletike, xuʼ me jpatbetik yoʼontonik. Mi jech ta jpastike, xuʼ jchanbetik ti kʼuyelan oy tajek ta yoʼontonik li yabtelike xchiʼuk jsabetik yorail sventa xkaʼibetik sloʼilik ti xuʼ spat koʼontontike, o xuʼ van xkikʼtik ta veʼel (Fili. 4:10).

Muyubajkutik xchiʼuk li buchʼutik chil svokolike

Li Pabloe ikuch yuʼun li nutsel laj yichʼe xchiʼuk li yan svokoltake, taje jaʼ ikoltaat sventa tukʼ-o yoʼonton xtun ta stojolal li Jeovae (Col. 1:24; Sant. 1:2, 3). Jech xtok, xmuyubaj noʼox kʼalal snaʼoj ti xuʼ skolta yermanotak ta Filipos ta sventa ti tukʼ chakʼ sbae, yuʼun yikʼaluk snuptanik jech ek li yermanotake. Sventa koʼol xmuyubajike xi laj yalanbee: «Li voʼoxuque laqʼuelanbatic xa li coltael ta sventa Cristoe. Maʼuc noʼox tscʼan acʼo achʼunic li Cristoe, jaʼ tscʼan noxtoc ti acʼo avichʼic vocol ta sventae. Jech coʼol chavichʼic vocol jech chac cʼu chaʼal laj avilic laj quichʼ vocol li vuʼune, xchiʼuc jech chac cʼu chaʼal chavaʼyic chquichʼ o vocol liʼ ta orae» (Fili. 1:29, 30).

Li avi eke, oy ep yajtsʼaklomtak Cristo chil svokolik ta skoj ti chakʼik ta ojtikinel li lekil aʼyeje. Bakʼintike tsots tajek chil svokolik ta majel, jutuk mu skotolikuk xtoke tstaik sujel ta kʼusuk noʼox. Jech kʼuchaʼal liʼe, xuʼ chpakʼtaatik ti jaʼ jvalopatinej mantaletike, ti chkontrainatik yuʼun yutsʼ yalalike xchiʼuk ti chichʼik naʼleel yuʼun xchiʼilik ta chanun o ta abtele. Li Jesuse laj yal ti mu labaluk sba xkiltike xchiʼuk ti mu xijchibaj yuʼune, jaʼ lek muyubajkutik-o yuʼun. Xi laj yale: «Li voʼoxuque cuxetuc noʼox avoʼntonic me vuʼun ta jventa chachopolcʼoptaatic, chasoquesbat acʼoplalic, xchiʼuc me ch-epalcʼopojic ta atojolique. Cuxetuc noʼox avoʼntonic yuʼun. Yuʼun chcʼot ata ep amotonic te ta vinajel» (Mat. 5:11, 12).

Kʼalal chkichʼtik albel ti tsots chil svokolik li kermanotik ta yantik balumile, mu jvul koʼontontik, muyubajkutik ta skoj ti lek oyik ta mantale. Jkʼanbetik Jeova sventa tsotsuk li xchʼunel yoʼontonike xchiʼuk ti xkuch yuʼunike (Fili. 1:3, 4). Melel onoʼox ti mu epuk kʼusitik stakʼ jpastik ta stojolalike, pe xuʼ jkoltatik li kermanotaktik ti chil svokolik ta jtsobobbailtike. Lek ti mi oy ta koʼontontik skoltael li yantike. Jech xtok, xuʼ jkʼeltik kʼuxitik xuʼ xkutik sventa jmoj xijmuyubaj xchiʼukik, li kʼusi stakʼ jpastike jaʼ ti xkikʼtik bakʼintik li ta Akʼobal sventa Yichʼel ta Mukʼ Jeova ta Kutsʼ Kalaltike, o ti koʼol xijlokʼ ta cholmantale o ti jchʼay koʼontontik jlikeluke.

Melel onoʼox, oy me ep srasonal kuʼuntik ti jmoj xijmuyubaj xchiʼuk li kermanotaktike. Mu jchanbetik li kʼusitik nopem xaʼiik spasel li yan krixchanoetike, ti chchʼak sbaik ta stojolal li yantike. Jaʼ lek muyubajkutik xchiʼuk li kermanotaktike. Mi jech ta jpastike, maʼuk noʼox me ch-epaj li kʼanelal xchiʼuk ti jmoj oyutik li ta tsobobbaile, moʼoj, yuʼun ta jkʼupintik ti oy kermanotaktike (Fili. 2:1, 2). Mu me jchʼay ta joltik li mantal laj yal Pablo liʼe: «Jʼechʼel me cuxetuc o avoʼnton acotolic ta stojol li Cajvaltique. Chacalboxuc yan velta, cuxetuc o me avoʼntonic» (Fili. 4:4).

[Lokʼol ta pajina 6]

Slokʼol Balumil: ta slekil yoʼonton Replogle Globes