Jpatbetik «yoʼnton li bochʼotic chat yoʼntonique»

«Vocʼbil licom ta sventa yabtel [li Diose,] tacbilun tal ta spatbel yoʼnton li bochʼotic chat yoʼntonique.» (ISA. 61:1, 2)

1. Li Jesuse, ¿kʼuxi la skolta li buchʼutik chil svokolike, xchiʼuk kʼu yuʼun jech la spas?

 XI LAJ yal li Jesuse: «Li jveʼele jaʼ ti ta jpasbe cʼusi tscʼan li Bochʼo la stacun tale, xchiʼuc ti acʼo jvuʼesbe li yabtele» (Juan 4:34). Kʼalal la spas li abtel akʼbil yuʼun Diose, laj onoʼox yakʼ ta ilel ta skotol ora li stalelaltak Stote, jaʼ mas to te ivinaj kʼalal laj skʼan li krixchanoetike (1 Juan 4:7-10). Jtos li kʼuyelan chakʼ ta ilel kʼanelal li Jeovae, jaʼo kʼalal tspat koʼontontike. Jech oxal li jtakbol Pabloe laj yal ti Jeovae jaʼ jun «Dios ti chispatbutic coʼntontique» (2 Cor. 1:3). Li Cristoe jaʼ jech laj yakʼ ta ilel li kʼanelal eke. Jech onoʼox yaloj ta jun albilkʼop li Isaiase (kʼelo Isaías 61:1, 2). Kʼalal i-ay svulaʼan snail tsobobbail ta Nazaret li Jesuse, la skʼel li albilkʼop taje xchiʼuk laj yal ti yakal chkʼot ta pasel ta stojolale (Luc. 4:16-21). Yuʼun yakal onoʼox chkʼot un. Li kʼu sjalil la xchol mantale laj yakʼbe yipal spatbel yoʼonton li buchʼutik chat yoʼontonike.

2, 3. ¿Kʼu yuʼun skʼan jpatbetik yoʼonton krixchanoetik jech kʼuchaʼal la spas li Jesuse?

² Ta skoj ti yajtsʼaklomutik Cristoe, skʼan jpatbetik yoʼonton li buchʼutik oy svokolike (1 Cor. 11:1). Xi li Pabloe: «Tsatsubtasbo aba avoʼntonic; coltao abaic ta jujuntal» (1 Tes. 5:11). Li krixchanoetik ti oy ta yoʼontonik mantale, skʼan jpatbetik yoʼontonik ta skoj  ti chat yoʼontonike xchiʼuk ti oy kʼusi kʼux chaʼiike. ¿Kʼu yuʼun? Yuʼun li avi kʼalal jaʼo «tsots vocol[e]» chkontrainatik yuʼun krixchanoetike ti jaʼ xa noʼox skʼanoj sba stukike, ti xvinaj ta skʼopojelik xchiʼuk li kʼusitik tspasike (2 Tim. 3:1).

³ Kʼuchaʼal chal li ta albilkʼope, li ta slajebal kʼakʼale ch-epaj krixchanoetik ti «jaʼ noʼox tspasic cʼusi tscʼan stuquic. Ta xbat yoʼntonic yuʼun taqʼuin. Tstoy sbaic. Stuc noʼox xaʼay sbaic. Yan xichʼ xalic. Mu xchʼunbeic smantal stot smeʼic. Mu cʼusi snaʼ stojic ta vocol. Muʼyuc ta yoʼntonic yichʼel ta mucʼ Dios. Muʼyuc slequil yoʼntonic, muʼyuc xcʼuxul yoʼntonic, ta saʼbeic smul yantic, muʼyuc spajeb chaʼyic li cʼusi tscʼan yoʼntonique, solel mu xqʼuexovic o, simaronijemic o ta jyalel, jaʼ tscontrainic o li cʼusitic leque. Ta xʼacʼvanic ta cʼabal; sujoj noʼox sbaic o. Toj mucʼ chacʼ sbaic. Jaʼ batem ta yoʼntonic o li cʼusi tscʼan stuquique; mu jaʼuc tsaʼic li Diose». Li kʼusitik taje jujun kʼakʼal ch-epaj batel mas, jech kʼuchaʼal chal liʼe: «Li bochʼotic toj chopolique xchiʼuc li jloʼlavanejetique, yoʼto echʼem ta soquic o batel» (2 Tim. 3:2-4, 13).

4. ¿Kʼusitik yakal chkʼot ta stojolal li balumile?

⁴ Li kʼusitik taje muʼyuk labal chkaʼitik, yuʼun li Vivlia xi chale: «Oyic ta scʼob pucuj scotol li yan cristianoetic liʼ ta banamile» (1 Juan 5:19). Kʼalal chal «cristianoetic liʼ ta banamil[...]», xie, te tsakal skʼoplal li politikaetike, li relijione, li kʼusitik ta sventa pʼolmale xchiʼuk skotol li kʼusitik tstunesik sventa tspukbe skʼoplal li kʼusitik tsnopike. Jaʼ yuʼun biiltasbil ta «banquilal jpasmantal liʼ ta banamil[...]» li Satanase xchiʼuk ti jaʼ «li yajval banamile» (Juan 14:30; 2 Cor. 4:4). ¿Kʼu yuʼun ti yantik xa tsok batel li Balumil liʼe? Jaʼ ta skoj ti ilinem li Diabloe, yuʼun snaʼoj ti mu xa jaluk ch-abteje (Apo. 12:12). Li Jeovae poʼot xa chakʼbe slajeb li Satanase xchiʼuk li xchopol balumile, jaʼ me jech tstakʼbe li kʼusi xchibal kʼoptaoj Satanás ta sventa ti kʼuyelan ch-ajvalilaj li Diose. ¡Xijmuyubaj yuʼun taje! (Gén., kap. 3; Job, kap. 2.)

Ta jcholtik lekil aʼyej ta spʼejel Balumil

5. Li ta slajebal kʼakʼale, ¿kʼuxi yakal chkʼot ta pasel li albilkʼop ta sventa li cholmantale?

⁵ Li ta jkuxlejaltik avie yakal chkiltik kʼuxi chkʼot ta pasel li albilkʼop laj yal Cristo liʼe: «Persa baʼyuc ta xichʼ cholel ta sbejel banamil li Lequil Aʼyej ta jventae; jaʼ to ta xtal li slajebal cʼacʼale» (Mat. 24:14). Li kabteltik ta spʼejel Balumile jujun kʼakʼal ch-epaj batel. Li avie oy xa mas ta 7,500,000 jcholmantaletik ti tstsob sbaik ta 107,000 tsobobbailetike. Li jcholmantaletik taje, chalik batel ta spʼejel balumil li Ajvalilal yuʼun Diose, jaʼ onoʼox li Ajvalilal laj yal xchiʼuk ti ichanubtasvan li Jesuse (Mat. 4:17). Li Ajvalilal taje, ta spatbe yoʼonton li krixchanoetik ti chil svokolike. Jun skʼelobil ti jech yakal chkʼot ta pasel taje jaʼ ti echʼ chib jabile laj yichʼik voʼ 570,601 krixchanoetik ti ikʼotik ta yajrextikotak Jeovae.

6. ¿Kʼusi chanop ta sventa ti yakal xa chchʼi batel li abtelal ta cholmantale?

⁶ Li yajrextikotak Jeova avie, yakal ta jelubtastik ta yan kʼopetik xchiʼuk ta jlokʼestik vunetik  ti lokʼemik ta Vivliae, taje oy xa mas ta 500 kʼopetik. ¡Muʼyuk jech kʼotem-o ta pasel! Jaʼ noʼox kʼalal ta jkʼeltik ti kʼuyelan yakal ch-abtej-o li jvokʼ s-organisasion Jeova ta Balumile xchiʼuk ti jujun kʼakʼal chchʼi batele, toj echʼ noʼox labal sba chkiltik. Ti muʼyukuk chkoltavan li chʼul espiritue muʼyuk ikʼot ta pasel jechuk taje, yuʼun jaʼ oy ta skʼob balumil li Satanase. Koliyal li xcholel lekil aʼyej ta spʼejel balumile, epal krixchanoetik yakal chchʼamik li aʼyej ta sventa li Ajvalilal yuʼun Diose xchiʼuk tstaik spatobil yoʼontonik ti yakal xa ta jtatik li yajtunelutik Diose.

Jpatbetik yoʼonton li kermanotike

7. 1) Li yajtsʼaklom Cristoe, ¿kʼu yuʼun tskʼan mu smala ti ta anil xa tslajes Jeova li kʼusitik chakʼ vokolile? 2) ¿Kʼuxi jnaʼojtik ti xuʼ chkuch batel kuʼuntik li nutsel xchiʼuk li vokoliletike?

⁷ Li avie, jkotoltik ta jnuptik vokoliletik, yuʼun li balumile nojem ta choplejal xchiʼuk oy kʼusitik kʼux chkaʼitik. Yoʼ to mu xakʼbe slajeb kʼusitik chopol li Diose, ta onoʼox xkil jvokoltik xchiʼuk ta jtatik at-oʼonton. Jech xtok skʼan xkuch kuʼuntik li nutsel ti albil onoʼox skʼoplal ta Vivliae. Mi jech ta jpastike chkakʼtik ta ilel ti tukʼ oyutik ta stojolal li Jeovae xchiʼuk jaʼ jech ta jpakbetik skʼoplal li mukʼul jpas mantal yuʼun ta sjunul vinajel balumile (2 Tim. 3:12). Koliyal ti chkoltavan xchiʼuk tspat koʼontontik li Jeovae, xuʼ xkakʼtik ta ilel jtalelaltik jech kʼuchaʼal li tʼujbil yajtsʼaklomtak Cristo ta voʼneal Tesalónica, «ti oy lec smucʼul [yoʼontonik], ti oy lec xchʼunojel [yoʼontonik], ti lec tstsʼic [yuʼunik] scotol li vocol xchiʼuc contrainele» (kʼelo 2 Tesalonicenses 1:3-5).

8. ¿Kʼusitik skʼelobil chakʼ ta ilel ti tspatbe onoʼox yoʼonton yajtuneltak li Jeovae?

⁸ Li Jeovae chakʼbe yipal yajtuneltak kʼalal jaʼo chtun yuʼunike. Jkʼelbetik skʼoplal li Eliase. Kʼalal i-albat ti chmilat yuʼun li meʼ ajvalil Jezabele, ixiʼ ta jyalel, vaʼun jatav batel xchiʼuk laj yal ti jaʼ lek mi ichame. Li Diose muʼyuk chopol laj yil li kʼusi la spase, la spatbe yoʼonton xchiʼuk laj yakʼbe yipal yoʼonton sventa chal batel li albilkʼopetike (1 Rey. 19:1-21). Ta melel, li Jeovae ta onoʼox spatbe yoʼonton li steklumale, jaʼ jech ivinaj ta stojolal li yajtuneltak ta baʼyel sigloe. Xi ta jchantik ta Vivliae: «Li jujutsob jchʼunolajeletic ta scotol Judea banamil, ta Galilea banamil, xchiʼuc ta Samaria banamile. Jun xa yoʼntonic laj yichʼic ta mucʼ li Cajvaltique. Iʼacʼbat stsatsal yoʼntonic yuʼun li Chʼul Espiritue, jech iʼepajic o» (Hech. 9:31). Jaʼ jun muyubajel chkaʼitik kʼalal jnaʼojtik ti chakʼbutik stsatsal koʼontontik li chʼul espiritue, jech kʼuchaʼal la spas ta stojolal yajtuneltak ta voʼnee.

9. ¿Kʼu yuʼun xuʼ xkaltik ti tspat koʼontontik kʼalal ta jchanbetik stalelal li Cristoe?

⁹ Li kʼusi tspat koʼontontik xtok li yajtunelutik Diose, jaʼ li xchanbel stalel Jesuse xchiʼuk ti jech jpastik batel eke. Xi laj yal stuke: «Laʼic ta jtojol acotolic, voʼoxuc ti lubenoxuc yuʼun li tsatsal abtele, xchiʼuc li alal icatsile, vuʼun ta xcacʼ acux avoʼntonic. Jaʼ cuchic li icatsil cuʼune, jaʼ chanic cʼu xʼelan coʼnton yuʼun toj lec coʼnton, biqʼuit cacʼoj jba. Me jech chapasique, jech cux xi avoʼntonic. Yuʼun li abtel cuʼune, muʼyuc tsots ta pasel, li icatsil cuʼune, muʼyuc ol ta cuchel» (Mat. 11:28-30). Kʼuchaʼal laj xa jchantike, lek la xkʼuxubin xchiʼuk la spatbe yoʼonton krixchanoetik li Cristoe. Kʼalal ta jchanbetik li stalelale xchiʼuk ti chkakʼtik persa ta yakʼel ta jkuxlejaltike xkuxet tajek chkom li koʼontontike, jaʼ jech tspajes li vokoliletik ta jkuxlejaltike.

10, 11. ¿Buchʼutik xuʼ spat oʼontonal li ta tsobobbaile?

¹⁰ Yan ti bu xuʼ jtatik spatobil koʼontontike, jaʼ li ta stojolal kermanotaktike. Li buchʼu xuʼ mas chkoltavanike, jaʼ li moletik ta tsobobbaile, yuʼun xuʼ skoltaik li buchʼutik tsots chil svokolike. Xiʼ la stsʼiba li Santiagoe: «Me oy bochʼo ip chaʼay avuʼunique, acʼo yicʼ tal li jcholcʼopetique, acʼo cʼopanbatuc Dios ta stojol». ¿Kʼusitik van chkʼot ta pasel un? Yuʼun «me oy xchʼunojel yoʼnton ta scʼopan Diose, ta xcol li jchamele, yuʼun jaʼ ta stsatsubtasat yuʼun li Cajvaltique. Me oy smul li bochʼo icole, ta spasbat perdón noxtoc» (Sant. 5:14, 15). Melel onoʼox ti xuʼ jpatbe jba koʼontontik li ta tsobobbaile.

 ¹¹ Oy antsetik ti jaʼ chalbe svokol li yan ermanaetike. Li ermanaetik ti lek xa chanemik xchiʼuk ti yijik xa ta mantale xuʼ me xalbeik lekil tojobtaseletik li buchʼutik mas tsebik toe, yuʼun xuʼ van oy xa jech snuptanojik ek. Mi chkʼuxubinvanik xchiʼuk mi chakʼik ta ilel slekil talelalike, jech me ep sbalilik-o (kʼelo Tito 2:3-5). Li moletik ta tsobobbail xchiʼuk li yan yajtsʼaklomtak Cristo eke tsots me skʼoplal ti «[s]tsatsubtasbeic [...] yoʼnton li bochʼotic muʼyuc stsatsal yoʼntoni[k]» (1 Tes. 5:14, 15). Mu me xchʼay ta joltik ti Diose «chispatbutic coʼntontic ta sventa scotol jvocoltic» sventa «jech xuʼ ta jpatbetic yoʼnton ec li bochʼotic oy cʼusiuc noʼox vocolal chaʼyique» (2 Cor. 1:4).

12. ¿Kʼu yuʼun skʼan xijbat li ta tsobajeletike?

¹² Li ta tsobajeletike jaʼ noʼox me xuʼ te jta spatobil koʼontontik. Yuʼun kʼalal chichʼ albel smelolal li Vivliae tstsatsubtasutik. Li Judas xchiʼuk Silase «la spatbeic yoʼnton li jchʼunolajeletique; itsatsub comel lec yoʼnton yuʼunic ta sventa ti ep la xchiʼinic ta loʼile» (Hech. 15:32). Jech xtok, li kʼusi skʼan jpastike, jaʼ ti skʼan chijloʼilajutik sventa jpatbe jba koʼontontik kʼalal skʼan toʼox xlik li tsobajel xchiʼuk mi laje. Jech-o xal, kʼalal mi oy jvokoltike mu me xijnamaj ta stojolal li kermanotaktike, yuʼun mi jech ta jpastike muʼyuk me chchʼay li jvokoltike (Pro. 18:1). Jaʼ lek jchʼuntik li mantal laj yal Pablo liʼe: «Acʼo jnoptic cʼu xʼelan tscʼan chcalbe jbatic, yuʼun jech coʼol acʼo cʼuxubinvancutic xchiʼuc coʼol acʼo jpastic cʼusitic lec. Mu me xijpaj ti ta jtsobilan jbatic ta yaʼyel scʼop Diose. Mu me jchantic jech chac cʼu chaʼal ti oy jayibuc nopen xa xaʼyic jeche. Tscʼan acʼo jtsatsubtasbe jba coʼntontic, acʼo cacʼtic persa, yuʼun poʼot xa chchaʼtal li Cajvaltique» (Heb. 10:24, 25).

Chakʼbutik spatobil koʼontontik li Vivliae

13, 14. ¿Kʼuxi tspat koʼontontik li Vivliae?

¹³ Akʼo mi jal xa kichʼojtik voʼ o mi jaʼ to yakal chkojtikintik batel li Jeovae xchiʼuk li kʼusi oy ta yoʼonton tspase, jkotoltik xuʼ jtatik spatobil koʼontontik li ta Vivliae. Xi laj yal li Pabloe: «Scotol li cʼusitic tsʼibabil comele jaʼ sventa jchanubtaseltic, yuʼun jech ch-ayin smucʼul coʼntontic, jech chpat coʼntontic, jech jun coʼntontic ta jmalatic li cʼusi ta jmalatique» (Rom. 15:4). Li Skʼop Diose tspatbutik koʼontontik li yajtsʼaklomutik Cristoe xchiʼuk chchanubtasutik sventa «jech chijbijub [...], jech lec chapalutic ta spasel scotol lequil abtel» (2 Tim. 3:16, 17). ¡Toj echʼ xa noʼox tspat koʼontontik kʼalal ta jnaʼtik li kʼusi oy ta yoʼonton tskʼan tspas Diose, xchiʼuk xtok oy spatobil koʼontontik ta sventa li kʼusitik chtal ta jelavele! Jaʼ yuʼun jtunestik lek li Skʼop Diose xchiʼuk li vunetik ti chalbe smelolale. Ta melel, ta jtatik ep spatobil koʼontontik xchiʼuk ta jtabetik yan sbaliltak.

¹⁴ Li Jesuse toj lek li kʼusi laj yakʼbutik komel ta ilele. Li stuke la stunes Vivlia sventa chchanubtas  xchiʼuk sventa spatbe yoʼonton li krixchanoetike. Kʼalal chaʼkuxiem xaʼoxe, laj yakʼ sba ta ilel ta stojolal chaʼvoʼ yajtsʼaklomtak, vaʼun «laj yalb[e] smelol [skotol li] scʼop Diose», li kʼusi laj yale ikʼot ta yoʼontonik (Luc. 24:32). Li jtakbol Pabloe lek tajek la xchanbe stalelal li Cristoe. Ep ta velta «te la stsac sbaic ta loʼil [o rasonajik] ta sventa scʼop Dios xchiʼuc li xchiʼiltaque». ¿Kʼu yelan laj yaʼiik? Li jnaklejetik ta Bereae «ta scotol yoʼntonic laj yaʼibeic scʼop li Pabloe. Scotol cʼacʼal la sqʼuelic li scʼop Diose» (Hech. 17:2, 10, 11). Ta melel, tsots skʼoplal skʼan ta jkʼeltik jujun kʼakʼal li Vivliae. Koliyal li Vivlia xchiʼuk li vunetik sventa yajtsʼaklomtak Cristoe, xuʼ te jta spatobil koʼontontik xchiʼuk sventa jmalatik li kʼusi chtal ta jelavele, akʼo mi toj tsots tajek li jvokoltike.

Yan kʼuxi xuʼ jpatik oʼontonal

15, 16. ¿Kʼutik yelan xuʼ jpatbetik yoʼonton xchiʼuk jkoltatik li kermanotaktike?

¹⁵ Ep ta tos kʼuxi xuʼ jpatbetik yoʼonton li kermanotaktike. Jech kʼuchaʼal liʼe, mi oy junuk kermanotik ti ip xchiʼuk mi malubem xae, xuʼ van chbat jmanbetik tal kʼusitik chtun yuʼun ta tienda. Jech xtok, oyuk ta koʼontontik li buchʼutik tskʼanik koltael sventa spasel jlomuk abtelaletik ta snaike (Fili. 2:4). Jech xtok, xuʼ xkalbetik kermanotaktik ti toj lek ti oy kʼanelal yuʼunike, ti pʼijike, ti tsots yoʼontonike, ti oy xchʼunel yoʼontonike o yan slekil talelalik ti chakʼik ta ilele.

¹⁶ Jtos ti kʼuyelan xuʼ jpatbetik yoʼontonik li ermanoetik ti malubemik xae, jaʼo kʼalal ta jvulaʼantik xchiʼuk kʼalal lek ta jchikintabetik sloʼilik ti kʼuyelan echʼem tal li xkuxlejalike xchiʼuk li kʼutik yelan akʼbilik bendision yuʼun Jeova ta skoj ti tunemik tal ta stojolale. Li kʼusi xuʼ xkʼot ta pasele, xuʼ van voʼotik ta jtatik spatobil koʼontontik. Kʼalal chbat jvulaʼantike xuʼ jkʼelbetik Vivlia o yan vunetik. Lek me mi jmoj jchantik xchiʼukik Li Jkʼel osil ta toyole o jaʼ li kʼusi chichʼ chanel chtal xemana li ta Xchanel Vivlia ta Tsobobbaile. Yan ti kʼusi xuʼ jpastike jaʼ ti xuʼ koʼol jkʼeltik junuk DVD ti lokʼem ta Vivliae o jchapbetik loʼiletik ti lokʼemik ta jvuntik ti tspat oʼontonale.

17, 18. Li tukʼil yajtunelutike, ¿kʼu yuʼun xuʼ jpat koʼontontik ti tskoltautik xchiʼuk ti tspat koʼontontik li Jeovae?

¹⁷ Mi laj kakʼtik venta ti oy buchʼu tskʼan patbel yoʼontone, xuʼ xkalbetik sbi kʼalal ta jpas j-orasiontike (Rom. 15:30; Col. 4:12). Mi oy ta koʼontontik ta skoltael li yantike o mi voʼotik yakal ta jtsaltik li vokoliletike, jechuk me xchʼunel koʼontontik xchiʼuk ta sjunuluk me koʼontontik jpastik jech kʼuchaʼal la spas li Davide, ti xi laj yal ta jun kʼejimole: «Acʼbo sventain Mucʼul Dios scotol li avocole; jaʼ chascoltaot, jaʼ chayicoot. Yuʼun li stuque mu xacʼ yaluc ta lum li bochʼo chchʼunbe smantale» (Sal. 55:22). Mi tukʼ oyutik ta stojolal li Diose, li stuke ta onoʼox me skoltautik xchiʼuk tspat koʼontontik.

¹⁸ Xi laj yalbe ta voʼne yajtuneltak li Jeovae: «Vuʼun jtuc ta xcacʼbot stsatsal avoʼnton» (Isa. 51:12). Li avi eke, tspatbutik koʼontontik xchiʼuk chakʼbutik bendision kʼalal chkakʼbetik yipal ta spatbel yoʼonton li buchʼutik chat yoʼontonike. Mi ta Balumil o ta vinajel jmalaoj chijkuxi, jkotoltik ta jta spatobil koʼontontik kʼalal ta jkʼeltik li kʼusi laj yalbe Pablo li buchʼutik koʼol chbat ta vinajel xchiʼuke: «Acʼo stsatsubtasboxuc avoʼntonic, acʼo scoltaoxuc stuc li Cajvaltic Jesucristoe xchiʼuc li Dios cuʼuntique. Jaʼ li Jtotic ti ep la scʼanutique, ti laj yacʼbutic spatubil coʼntontic sventa sbatel osile, xchiʼuc ti ta sventa slequil yoʼnton laj yacʼ ti jech jun coʼntontic ta jmalatic ti cʼusi yalojbutique, yuʼun jech jʼechʼel jun avoʼnton jaʼ chapasic o, jaʼ chavalic o li cʼusitic leque» (2 Tes. 2:16, 17).

¿Mi xvul ta ajol?

• ¿Bu to kʼalal epajem li kabteltik ta spatbel yoʼonton li buchʼutik chil svokolike?

• ¿Kʼuxitik xuʼ jpatbetik yoʼonton li yantike?

• ¿Kʼusitik tekstoal chakʼ iluk ti tspatbe yoʼonton yajtuneltak li Jeovae?

[Sjakʼobiltak sventa xchanobil]

[Lokʼol ta pajina 28]

¿Mi ta jpatbetik yoʼonton li buchʼutik chil svokolike?

[Lokʼol ta pajina 30]

Kʼusuk jabilaltik xuʼ jpatik oʼontonal