Li kʼusitik tsjakʼ jkʼelvunetike

¿Kʼusi xuʼ jpas mi oy kʼusi mu xkaʼi ta Vivlia o kʼalal ta jkʼan koltael mi oy jvokole?

Li ta Proverbios 2:1-5 ta Xchʼul Cʼop ti Jtotic Diose, ta skʼop Chamula, chalbutik ti akʼo jsaʼtik li kʼulejal ti nakʼal ta sventa li yojtikinobil xchiʼuk pʼijilale. Skʼan xkakʼbetik yipal ta stabel stakʼobiltak li kʼusi ta jkʼan ta jnaʼtik ta Vivliae, skʼan jech jpastik xtok ta sventa li jvokoltik jnuptanojtike. ¿Kʼuxi xuʼ spas avuʼun taje?

Li ta livro Benefíciese de la Escuela del Ministerio Teocrático ta pajina 33 kʼalal ta 38 li ta skapituloal bu chal «La investigación eficaz» xiʼe, te chal kʼuxi xuʼ jtunestik li abtejebal yakʼojbutik li «jʼabtel ti jun [«tukʼ», NM] yoʼnton [...], ti lec bije» (Mat. 24:45). Li ta pajina 36 chakʼ ta ilel kʼuxi xuʼ lek jtunestik li Índice de las publicaciones Watch Tower, ti te yichʼoj talel slistail li kʼusi ta jkʼan ta jnaʼtike xchiʼuk yan tekstoetik ta Vivlia. Koliyal taje xuʼ te jsabetik smelolal jpʼeluk kʼop xchiʼuk ta jujun versikulo. Vaʼun, xuʼ te ta jtatik revistaetik o livroetik ti xuʼ tstakʼ li kʼusi ta jkʼan ta jnaʼtike. Oyuk me smalael avuʼun kʼalal chasabe stakʼobil li kʼusi chakʼan chanaʼe o kʼalal chasaʼ junuk tojobtasel sventa li kʼusi anuptanoje. Vuleso ta ajol ti chakʼan chata «cʼulejal [ti] nacʼale», jaʼ yuʼun tsots skʼoplal skʼan xachʼakbe yorail xchiʼuk xavakʼbe yipal.

Melel onoʼox ti oy muʼyuk albil skʼoplal ta jvuntik skotol li smelolaltak li versikuloetike xchiʼuk li yantik kʼusitik ta jkʼan ta jnaʼtike. Xchiʼuk xtok, kʼalal chichʼ albel smelolal junuk tekstoe, xuʼ van muʼyuk chalbe smelolal ti kʼusi ta jkʼan ta jnaʼtike. Bakʼintik xtoke xuʼ van oy kʼusi chlik jakʼbe jbatik, yuʼun li Vivliae muʼyuk chalbe smelolal stekel li kʼusitik smakoje. Jaʼ yuʼun, mu me jmalatik ti tstakʼbutik skotol li kʼusi ta jkʼan ta jnaʼtike. Mi mu jtabetik stakʼobiltak li kʼusi ta jkʼan ta jnaʼtik li ta vunetik kuʼuntike, mu jnopbetik smelolal ta joltik kʼusi jaʼ li stakʼobile. Muʼyuk me kʼusi ta jtatik mi ta jsabetik smelolal li «cʼusiticuc noʼox loʼilale», yuʼun li loʼiletik taje maʼuk ch-epaj-o li xchʼunel koʼontontik ta stojolal Diose (1 Tim. 1:4; 2 Tim. 2:23; Tito 3:9). Maʼuk me oy ta sba chchanbe skʼoplal xchiʼuk tstakʼ skotol sjakʼobiltak sventa li kʼusitik muʼyuk to kʼelbil skʼoplal ta jvuntik li smeʼ nail abtelale xchiʼuk li Beteletike. Pe jnaʼojtik lek ti chakʼbutik epal mantaletik sventa lek xbat jkuxlejaltik li Vivliae. Ta melel, kʼalal oy kʼusi muʼyuk jamal chalbe smelolal jlomuk li Vivliae, jaʼ tskoltautik sventa jchʼiestik mas xchʼunel koʼontontik ta stojolal li Buchʼu laj yakʼe (kʼelo ta pajina 185 kʼalal ta 186 ta livro Acerquémonos a Jehová).

Mi laj xa avakʼbe yipal saʼel bu kʼalal xuʼ avuʼun li kʼusi chakʼan chanaʼe, pe mi muʼyuk laj ata ti bu chalbe smelolale, ¿kʼusi skʼan xapas? Xuʼ me xajakʼbe junuk mol ta atsobobbail o yan ermano ti yij ta mantale. Yuʼun li ermanoetik taje lek xojtikinik kʼusi chal li Vivliae xchiʼuk jal xa tunemik ta stojolal Dios. Mi chakʼan koltael ta sventa junuk avokol anuptanoje o jaʼ sventa li kʼusi chakʼan chapase, li moletike oy me ta yoʼontonik tskoltaoxuk, yuʼun li stukike lek xa yojtikinik xchiʼuk snaʼojik lek li avokole. Jech xtok, mu me xchʼay xavaʼi xaval ta a-orasion li kʼusi chavul-o avoʼontone. Jaʼ lek kʼano beiltasel ta chʼul espiritu, yuʼun «li Mucʼul Diose jaʼ chijyacʼbutic li jbijiltique [...] xchiʼuc li cʼusi tscʼan ta xcotquintic batele» (Pro. 2:6; Luc. 11:13).