Pato avoʼonton li ta Dios ti tspat oʼontonale

«Acʼo ichʼatuc ta mucʼ li Diose, jaʼ li Stot Cajvaltic Jesucristoe, jaʼ li Totil ti ep chcʼuxubinvane, jaʼ li Dios ti chispatbutic coʼntontique.» (2 COR. 1:3)

1. ¿Kʼusi ta jkʼantik ta sjunlej jkuxlejaltik?

 KʼALAL chijvokʼe, jaʼ noʼox ta jkʼantik ti akʼo oy buchʼu xiskʼelutike o ti tspatbutik koʼontontike. Kʼalal ch-okʼ jun neneʼe jaʼ chakʼ jnaʼtik ti tskʼan jpatbel yoʼontone, xuʼ van tsots ch-okʼ sventa jpetik o tskʼan ti akʼo xkakʼbetik yuni chuʼe. Akʼo mi mukʼotik xaʼox ta to jkʼantik patbel koʼontontik, mas to mi chkil jvokoltike.

2. ¿Kʼusi spatobil koʼontontik chakʼbutik Vivlia mi ta jpat koʼontontik ta stojolal Jeovae?

² Ep ta veltae, jaʼ tspatbutik koʼontontik li kutsʼ kalaltik xchiʼuk li kamigotaktike. Pe bakʼintike solel toj tsots tajek li jvokoltike, jaʼ yuʼun mu xa xuʼ yuʼunik tskoltautik sventa xchʼayesbutik li kʼusi kʼux chkaʼitike. Li buchʼu xuʼ tspatbutik koʼontontik kʼalal jaʼo tsots chkil jvokoltike, jaʼ li Diose. Xi tspatbutik koʼontontik li Skʼope: «Li Mucʼul Diose nopol oy ta stojol li bochʼo tscʼanic vocole [...] chaʼibe li scʼopic cʼalal xvocoletique, jech ta scolta» (Sal. 145:18, 19). Chalbutik xtok: «Li Mucʼul Diose jaʼ te oy o sat ta stojol li bochʼo tucʼ yoʼntonique; lec tstucʼulanbe scʼop ti cʼalal chcʼopanate» (Sal. 34:15). Mi ta jkʼantik akʼo skoltautik xchiʼuk mi ta jkʼantik akʼo spat koʼontontike, skʼan jpat koʼontontik ta stojolal. Jech laj yal David ta jun salmo: «Li Mucʼul Diose tspoj li bochʼo abul sba ta utsʼintaele; scolta ti cʼalal oy at-oʼnton chaʼyique. Mucʼul Dios, li bochʼotic xayotquinicote jaʼ noʼox spatoj yoʼntonic ta atojol; me jutuc muʼyuc chacomtsan li bochʼotic chasaʼicote» (Sal. 9:9, 10).

3. ¿Kʼuxi laj yakʼ iluk Jesús ti ep skʼanoj yajtuneltak li Jeovae?

³ Li Jeovae oy ta yoʼonton tajek li yajtuneltake. Xi laj yal li Jesuse: «Xanaʼic ti lajuneb cobre noʼox stojol ta voʼcot li bicʼtal mutetique. Pero me jcotuc mu xchʼay ta yoʼnton li Diose. Li voʼoxuque cʼalal ta stsotsil ajolic atabil cʼu yepal. Jaʼ yuʼun mu me xaxiʼic. Yuʼun voʼoxuc echʼem tsots acʼoplalic jech chac cʼu chaʼal li bicʼtal mutetique» (Luc. 12:6, 7). Xi laj yalbe j-israeletik xtok li Jeovae: «Laj cal ti jʼechʼel la jcʼanot oe, jaʼ yuʼun yoquel to jech jcʼanojot o» (Jer. 31:3).

4. ¿Kʼu yuʼun xuʼ jpat koʼontontik ta sventa li kʼusi yaloj tspas Jeovae?

⁴ Kʼalal jaʼo tsots chkil jvokoltike, chakʼ xkuxetel koʼontontik mi ta jpat koʼontontik ta stojolal Jeova xchiʼuk ta sventa li kʼusi yaloj tspase. Skʼan jech jtalelaltik kʼuchaʼal la spas li Josuee, ti xi laj yale: «Icʼot ta pasel scotol li cʼusi yalojboxuc Mucʼul Dios cuʼuntique. Me jbeluc muʼyuc cʼusi ti muc spase» (Jos. 23:14). Akʼo mi toj tsots tajek chkil jvokoltik, xuʼ me jpat koʼontontik ti «Diose mu snaʼ sjel yoʼnton» xchiʼuk mi tukʼotik-o ta stojolale mi jsetʼuk chiktautik (kʼelo 1 Corintios 10:13).

5. ¿Kʼusi tskoltautik yoʼ jpatbetik yoʼonton li yantike?

⁵ Li Pablo laj yal ti Jeovae jaʼ jun «Dios ti chispatbutic coʼntontique». Li jpʼel kʼop chispatbutik koʼontontik, xie jaʼ smelolal: «Ti xkuxet o siket yoʼonton chkom li jun krixchano ta skoj svokol, kʼusi kʼux chaʼi o kʼusi chopol ikʼot ta stojolal». Jaʼ me li kʼusi chakʼbutik li Jtotik ta vinajele (kʼelo 2 Corintios 1:3, 4). Li Jtotik ta vinajele muʼyuk kʼusi xchiʼuk muʼyuk buchʼu xuʼ chmakat, jaʼ yuʼun tspas li kʼusitik sventa tspatbe yoʼonton li buchʼu chkʼanate. Koliyal li spatobil koʼontontik chakʼbutike, li voʼotik eke xuʼ jpatbetik yoʼonton li kermanotaktik ti «cʼusiuc noʼox vocolal» staojike. Jech, xuʼ «jpatbetic  yoʼnton ec li bochʼotic oy cʼusiuc noʼox vocolal chaʼyique, yuʼun stsatsubtasojbutic xa coʼntontic ec li Diose». Li kʼusi laj yalbe jcorintoetik li Pabloe, ¡toj echʼ noʼox lek chakʼ kaʼitik ti Jeovae xuʼ tspatbe yoʼonton li buchʼutik chil svokolike!

Li kʼusitik chakʼ vokoliletike

6. ¿Kʼusitik xuʼ chakʼ jvokoltik?

⁶ Ep tajek ti bu ta jkʼantik patbel koʼontontike. Li vokolil ti toj tsots tajeke, jaʼo kʼalal chcham kutsʼ kalaltike, mas to mi cham jnup jchiʼiltik o junuk kalab jnichʼnabtike. Pe tsots chkaʼitik xtok kʼalal voʼotik chkil jvokoltik ta skoj li chopol kʼoptael ta jtatik akʼo mi mu to xojtikinutik xchiʼuk ta skoj ti yan-o jlumaltike, jech kʼuchaʼal kʼalal chkil jvokoltik ta skoj chamel, malubel, povreal, kʼopetik chlik ta nupunel o jaʼ li kʼusitik chopol oy ta balumile.

7. 1) ¿Kʼusi chtun kuʼuntik kʼalal tsots jvokoltike? 2) ¿Kʼusi xuʼ spas Jeova mi «juteb xa tsacal [chaʼi]» chkom li oʼontonale?

⁷ Kʼalal tsots chkil jvokoltike, jaʼo mas ta jkʼantik patbel koʼontontik. Jkʼeltik kʼuxi xuʼ jtatik koltael sventa xkuch batel kuʼuntik kʼalal chkil jvokoltik ta koʼontontik, jnopbentik, kʼusi oy ta koʼontontik, sventa mu xij-ipaj xchiʼuk sventa lekuk oyutik li ta mantale. Jaʼ baʼyel kalbetik skʼoplal li koʼontontike. Li Vivliae oy chal ti xuʼ «juteb xa tsacal [chaʼi]» chkom li oʼontonale (Sal. 51:17, Ch). Pe chal xtok ti Jeovae tskolta li yajtuneltake, yuʼun ta «xpoxta li bochʼotic oy svocol yoʼntonique; ta xpixbe lec li xtuchʼemalique» (Sal. 147:3). Akʼo mi mu solel tsots li jvokoltike, ta me spat koʼontontik mi ta sjunul koʼontontik ta jpastik li orasione xchiʼuk mi ta jchʼuntik li mantaletik yakʼojbutike (kʼelo 1 Juan 3:19-22 xchiʼuk 5:14, 15).

8. ¿Kʼuxi tskoltautik Jeova sventa lekuk noʼox oy li jnopbentike?

⁸ Li jnopbentik eke ta x-akʼat ta preva xchiʼuk chil yan tsatsal vokoliletik. Ta jkʼan patbel koʼontontik xchiʼuk tsatsubtasel, yuʼun mi ta kipal noʼox jtuktike mu xuʼ kuʼuntik stsalel li vokoliletik ta jtatike. Xi laj yal li jtsʼibajom yuʼun salmoe: «Cʼalal ilubtsaj xa jol ta scoj ti toj ep chloʼilaj coʼntone, voʼot laj amuqʼuibtasbun coʼnton; laj avacʼbun xcuxetel coʼnton» (Sal. 94:19). Xi la stsʼiba xtok li Pabloe: «Mu me cʼusi xloʼilaj avoʼntonic yuʼun. Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol. Jech chaspasboxuc o ta jun avoʼntonic li Diose. Li jun oʼntonal chacʼ Diose echʼem to xjelov jech chac cʼu chaʼal ta jnop ta jcʼantic li vuʼutique, jaʼ chaxchabiboxuc avoʼntonic xchiʼuc cʼusitic chanopic ta sventa ti avichʼojic ta mucʼ li Cristo Jesuse» (Fili. 4:6, 7). Jech, li skʼelel Vivlia xchiʼuk li snopbel skʼoplale, jaʼ tskoltautik sventa mu jvul-o koʼontontik (2 Tim. 3:15-17).

9. ¿Kʼuxi xuʼ jtsaltik li kʼusi muʼyuk lekik ta koʼontontike?

⁹ Kʼalal chibajem koʼonton chkaʼitike, xibal sba xlik jpastik li kʼusi muʼyuk lekik ta koʼontontike. Xuʼ van jnoptik ti mu spas kuʼuntik junuk mantal o junuk abtelal ti akʼbilutik ta tsobobbaile. Mi jech chkaʼi jbatike, ta spatbutik koʼontontik ek xchiʼuk tskoltautik li Jeovae. Jkʼeltik kʼusi laj yalbe Josué li Moisese, ti jaʼ laj yakʼbe komel ta sba sventa tsbeiltas j-israeletik sventa tstsalik komel li tsatsal lumetike, xi laj yalbe mantal li jteklume: «Cʼalal chatsac xa abaic ta pleito achiʼuquique, mu me xaxiʼic. Oyuc me lec stsatsal avoʼntonic; me jutuc mu me xaniquic. Naʼic me ti te oy ta atojolic li Mucʼul Dios cuʼuntique; me jutuc muʼyuc chascomtsanoxuc atuquic» (Deu. 31:6). Koliyal ti koltaat yuʼun Jeova li Josuee ikuch yuʼun yikʼel ochel ta Albil Balumil li tʼujbil jteklume xchiʼuk tsal yuʼunik li yajkontratake. Baʼyel xa noʼox koltabil li Moisese, jaʼo kʼalal la xchʼak ta oʼlol Tsajal Nab li Diose (Éxo. 14:13, 14, 29-31).

10. ¿Kʼusi tskoltautik mi iputik ta skoj li kʼusitik ta jvul-o koʼontontike?

¹⁰ Li kʼusitik ta jvul-o koʼontontike xuʼ me xij-ipaj yuʼun. Melel onoʼox ti tstabe sbalil jbekʼtal jtakopaltik kʼalal lek ta jmakʼlin jbatik, ta jkuxtik, ta jpastik ejersisio xchiʼuk mi ta jkʼelilantik ti kʼuyelan jbekʼtal jtakopaltik sventa sakukutike. Jech xtok, kʼalal ta jnopilantik kʼusi chal Vivlia ta sventa li kuxlejal ta jelavele, xuʼ skoltautik sventa lekuk noʼox oy li jbekʼtal jtakopaltike.  Jaʼ yuʼun, kʼalal chkil jvokoltike skʼan jvules ta joltik li vokolil la snuptan Pabloe, xchiʼuk li kʼusi la stsʼiba komele: «Acʼo me oy ep ta chop vocol chcaʼicutic ta jujujot, pero mu teuc tsalbil chicomcutic o. Acʼo me ep chloʼilaj coʼntoncutic, pero mu teuc chiyalubtasuncutic o. Acʼo me ep chquichʼcutic utsʼintael, pero muʼyuc comtsanbiluncutic. Acʼo me jipbiluncutic, pero mu teuc chilajcutic o» (2 Cor. 4:8, 9).

11. ¿Kʼusi tskoltautik sventa mu xij-ipaj ta mantal?

¹¹ Jech xtok, li vokoliletik ta jnuptantike, xuʼ sokes ti kʼu kelantik ta mantale. Kʼalal jech chkʼot ta pasele, li Jtotik ta vinajele xuʼ chtal spojutik. Xi tspatbutik koʼontontik li Skʼop Diose: «Voʼote, Mucʼul Dios, chavico li bochʼo chyalic ta lume; chatoy liquel li bochʼotic jecheʼ xa nijajtique» (Sal. 145:14). ¿Kʼusi tskoltautik sventa mu xij-ipaj ta mantal? Jaʼo mi bat jkʼantik koltael ta stojolal li moletik ta tsobobbaile (Sant. 5:14, 15). Yan kʼusi tskoltautik sventa mu xkʼunib li xchʼunel koʼontontike, jaʼ ti mu jchʼay ta jsatik li spatobil koʼontontik ta sventa li kuxlejal sbatel osile (Juan 17:3).

Ti buchʼutik la spatbe yoʼonton li Diose

12. ¿Kʼuxi la spatbe yoʼonton Abraham li Jeovae?

¹² Li jtsʼibajom yuʼun salmo 119, xi laj yalbe li Jeovae: «Naʼo me cʼusi avalojbun, vuʼun li avajtunelune, yuʼun jaʼ sventa la jpat o coʼnton avuʼun. Jaʼ chismuqʼuibtasbun coʼnton cʼalal oy ep jvocol, jaʼ ta sventa cʼusi avalojbun ti chcux banamil chcaʼye» (Sal. 119:49, 50). Li avie, oy xa kuʼuntik li Skʼop Diose, ti te tsʼibabil kʼuxi la spatbe yoʼonton li yajtuneltake. Jun skʼelobile, jaʼ li Abrahame. Laj van yat tajek yoʼonton kʼalal laj yaʼi ti chichʼ lajesel li Sodoma xchiʼuk Gomorrae. Jaʼ yuʼun xi la sjakʼbe li Jeovae: «¿Me te capal chavules li bochʼo lequic xchiʼuc li bochʼotic oy smulique?». Li Diose la spatbe yoʼonton kʼalal laj yalbe ti chakʼbe perton Sodoma mi oy la sta 50 tukʼil krixchanoetik tee. Pe li tukʼil Abrahame la to sjakʼbe voʼob velta Jeovae kʼusi ta spas mi kʼajomal noʼox oy 45, 40, 30, 20, 10 tukʼil krixchanoetike. Li Diose lek laj xchikinta li kʼusi albate xchiʼuk laj yalbe ti mi la sta ti vaʼ yepale muʼyuk chakʼbe kastigo li Sodomae. Akʼo mi muʼyuk itsʼaki ti lajuneb tukʼil krixchanoetike, pe muʼyuk laj yakʼbe slajeb li Lot xchiʼuk li stsebetake (Gén. 18:22-32; 19:15, 16, 26).

13. ¿Kʼuxi laj yakʼ ta ilel Ana ti la spat yoʼonton ta stojolal Jeovae?

¹³ Jnoptik xtok ta stojolal li Anae, li yajnil Elcanae. Akʼo mi oy tajek ta yoʼonton chil junuk yol, chat yoʼonton ta skoj ti mu snaʼ x-alaje. Li stuke la skʼopon Jeova ta sventa ti kʼuyelan chaʼi sbae, vaʼun xi albat yuʼun li bankilal pale Elie: «Li Dios yuʼun Israele acʼo yacʼbot ti cʼusi laj acʼanbee». Laj yichʼ patbel yoʼonton, jaʼ yuʼun «muʼyuc xa laj yat yoʼnton» (1 Sam. 1:8, 17, 18).  La spat yoʼonton ta stojolal Jeova, jaʼ yuʼun laj yakʼbe komel ta skʼob skotol. Akʼo mi mu toʼox snaʼ kʼuxi chkʼot ta pasel skotol taje, xkuxet noʼox yoʼonton. Ta jelavele, laj yil ti takʼbat s-orasion yuʼun li Jeovae, yuʼun la xchiʼin yol, Samuel laj yakʼbe sbi kʼalal ivokʼe (1 Sam. 1:20).

14. ¿Kʼu yuʼun la skʼan patbel yoʼonton li Davide, xchiʼuk buchʼu la skʼanbe?

¹⁴ Yan ti buchʼu laj yichʼ patbel yoʼonton yuʼun Jeovae, jaʼ li tukʼil Davide. Li Jeovae «jaʼ ta [s]qʼuelbe cʼu xʼelan yut yoʼnton» li Davide, snaʼoj ti melel li kʼusi oy ta yoʼontone xchiʼuk ti ichʼbil ta mukʼe, ta skoj taje la stʼuj kʼuchaʼal ajvalil ta Israel ta jelavel (1 Sam. 16:7; 2 Sam. 5:10). Kʼalal ajvalil xaʼoxe, imulivaj xchiʼuk Betsabé (Bat-seba), tskʼan ox tsnakʼ li smule, jaʼ yuʼun laj yakʼ ta milel smalal li Betsabee. Kʼalal laj yakʼ venta ti toj chopol li kʼusi la spase, xi la skʼanbe vokol li Jeovae: «Tuʼpbun jmul ta sventa ti toj ep cʼuxúbinel avuʼune. Pocbun o loqʼuel ta jʼechʼel li jchopolile; chʼaybun li jmule. Ta jnaʼ ti la jtoy jba ta atojole; mu xchʼay o ta coʼnton li jmule» (Sal. 51:1-3). Li Davide la sutes yoʼonton ta melel, jaʼ yuʼun akʼat ta perton yuʼun li Diose. Akʼo mi jech, toj ep laj yil svokol ta skoj li kʼusitik la spase (2 Sam. 12:9-12). Li stuke la sta spatobil yoʼonton ta stojolal li Stot ta vinajele.

15. ¿Kʼuyelan koltaat Jesús kʼalal jutuk xaʼox skʼan xichʼ milele?

¹⁵ Ti kʼu sjalil ikuxi liʼ ta Balumil li Jesuse, laj yil tsatsal vokoliletik ti akʼat ta preva li xchʼunel yoʼontone, taje jaʼ laj yakʼ kʼotuk ta pasel li Jeovae. Pe li tukʼil vinik taje, la spat-o yoʼonton ta stojolal li Stote xchiʼuk la spakbe skʼoplal li mukʼul pas mantal yuʼun Diose. Kʼalal jutuk xaʼox skʼan xichʼ akʼel ta kʼabal xchiʼuk xichʼ milele, xi la spas orasione: «Mu me xcʼot ta pasel cʼusi tscʼan coʼnton jtuc. Jaʼ acʼo cʼotuc ta pasel li cʼusi tscʼan avoʼntone». Vaʼun laj stakbe talel jun yaj-anjel sventa chakʼbe yip (Luc. 22:42, 43). Jaʼ jech la yakʼbe koltael li Jeovae xchiʼuk sventa tskolta kʼalal jaʼo chtun yuʼune.

16. ¿Kʼuxi tskoltautik Jeova mi xibal sba xijchamutik ta skoj li xchʼunel koʼontontike?

¹⁶ Li voʼotik eke, xuʼ me skoltautik Jeovae sventa tukʼ-o chkakʼ jbatik ta stojolal, akʼo mi xibal sba oy jkuxlejaltik ta skoj li xchʼunel koʼontontike. Jech xtok, li stuke tspat koʼontontik ta sventa li chaʼkuxesele. Li lajelale, jaʼ li «slajeb scontra [...] ti ta stubbe scʼoplal ta jʼechʼel[e]» (1 Cor. 15:26, Ch). ¡Ta jkʼantik xa ti akʼo kʼotuk ta pasel taje! Li tukʼil yajtuneltak Jeova ti chamemik xae, xchiʼuk li yan krixchanoetike, te oy-o ta sjol xchiʼuk mu xchʼay skʼoplal chaʼi. Li stuke ta xchaʼkuxesan (Juan 5:28, 29; Hech. 24:15). Mi ta jpat koʼontontik ta sventa li chaʼkuxesele, jaʼ chakʼ spatobil koʼontontik, mas to mi chkichʼtik nutsele.

17. ¿Kʼusi koltael chakʼbutik Jeova ta sventa li buchʼutik chamem kuʼuntike?

¹⁷ Li Jeovae tspat koʼontontik, yuʼun li buchʼutik chamem kuʼuntik ti te chkux yoʼontonik ta yavil animaetike chal ti chkʼot yorail ti chchaʼkuxiik liʼ ta Balumile, taje muʼyuk xa me vokoliletik jech kʼuchaʼal li avie. Chal xtok, ti «epal cristianoetic» ti jaʼik li yajtuneltake, kuxul chkomik mi laj li chopol balumile, jech taje jaʼ chchʼamik li buchʼutik chchaʼkuxiik li ta achʼ balumile xchiʼuk jaʼ chchanubtasik ta smantal Dios (Apo. 7:9, 10). ¡Jaʼ jun mukʼta matanal!

«Jaʼ anacʼubbail cʼotem» ta sbatel osil

18, 19. Li Jeovae, ¿kʼuxi spatojbe yoʼonton yajtuneltak kʼalal chichʼik nutsele?

¹⁸ Li j-alkʼop Moisese la stsʼibabe jun spatobil yoʼonton ta jun son li jteklum Israele, ti xi laj yale: «Li Dios ti cuxul o sbatel osile jaʼ anacʼubbail cʼotem. Li svuʼel ti mu snaʼ xlaj oe jaʼ chascoltaot» (Deu. 33:27). Li j-alkʼop Samuele xi laj yal jayibuk jabil ta mas tsʼakale: «Mu me xanamajic ta stojol li Mucʼul Diose; jaʼ lec ichʼic ta mucʼ ta scotol avoʼntonic. [...] Yuʼun li Mucʼul  Diose muʼyuc chascomtsanoxuc o sventa acʼo ichʼatuc ta muc» (1 Sam. 12:20-22). Jech kʼuchaʼal chkiltike, mi tukʼ-o oyutik ta stojolal li melel Diose xchiʼuk mi ta xkichʼtik ta mukʼe, muʼyuk chiktautik. Ta skoltautik mi ta jkʼantike.

¹⁹ Li avi kʼakʼale toj tsots tajek ta ichʼel batel li kuxlejale, jaʼ yuʼun li Jeovae muʼyuk yiktaoj-o sba ta spatbel yoʼonton li steklumale. Li ta jkʼakʼaliltike, epal kermanotik yichʼojik nutsel xchiʼuk yichʼojik chukel ta skoj li kʼusi xchʼunojike. Skotol li ermanoetik taje laj yakʼik ta ilel ti chkoltaatik yuʼun Dios kʼalal tsots chil svokolike. Jech kʼuchaʼal liʼe, jun kermanotik ta voʼneal Unión Soviética laj yichʼ tikʼel ta chukel 23 jabil ta skoj ti tukʼ laj yakʼ sba ta stojolal li Jeovae, pe akʼo mi jech, laj onoʼox yichʼ veʼlil ta mantal sventa ch-akʼbat yip xchiʼuk chpatbat yoʼonton. Xi ta xale: «Skotol li vaʼ jabiletik taje, la jchan ti skʼan jpat koʼonton ta stojolal Jeovae, vaʼun laj yakʼbun stsatsal koʼonton» (kʼelo 1 Pedro 5:6, 7).

20. ¿Kʼuxi xuʼ jnaʼtik ti muʼyuk chiktautik li Jeovae?

²⁰ Mu to jnaʼtik kʼusitik yan preva xuʼ jnuptantike. Pe kʼusuk li vokolile, skʼan jvules ta joltik li spatobil koʼontontik laj yal li jtsʼibajom yuʼun salmo liʼe: «Mucʼul Dios, muʼyuc chacomtsan li ateclumale» (Sal. 94:14). Pe maʼuk noʼox voʼotik chkichʼtik li spatobil oʼontonale. Kʼuchaʼal ta jchantik li ta xchanobil chtale, chkakʼtik venta ti xuʼ jpatbetik yoʼonton li buchʼutik chil svokolik ta balumil ti noj ta choplejale.

¿Kʼusi ta jtakʼtik?

• ¿Kʼusitik ta jta-o jvokoltik?

• ¿Kʼuxi tspatbe yoʼonton yajtuneltak li Jeovae?

• ¿Kʼusi tspat koʼontontik kʼalal xibal sba oy li jkuxlejaltike?

[Sjakʼobiltak sventa xchanobil]

[Rekuadro ta pajina 25]

Kʼusi Xuʼ Jpastik Sventa...

▪ mu xkat koʼontontik Sal. 147:3; 1 Juan 3:19-22; 5:14, 15

▪ mu sok li jnopbentike Sal. 94:19; Fili. 4:6, 7

▪ mu sok li kʼusi muʼyuk lekik ta koʼontontike Éxo. 14:13, 14; Deu. 31:6

▪ mu xij-ipaj 2 Cor. 4:8, 9

▪ lekuk oyutik ta mantal Sal. 145:14; Sant. 5:14, 15