«Viqʼuiluc me asatic» ¡Mas xa toj tsots skʼoplal li avie!

JUN veltae, xi la sjakʼbeik Jesús li yajtsʼaklomtake: «[¿]Kʼusi senyail ti liʼ xa oyote xchiʼuk li slajebal kʼusitik chkʼotanuk ta pasele?» (Mat. 24:3, NM). Kʼuchaʼal chakʼ iluk ta kapitulo 24 yuʼun Mateo, ta kapitulo 13 yuʼun Marcos xchiʼuk ta kapitulo 21 yuʼun Lucas, li Jesuse laj yal lek li kʼusitik chtale, lek la xvinaj xchiʼuk mu la kʼusi xkoʼolaj-o. Laje, xi la stojobtasane: «Viqʼuiluc me asatic» (Mat. 24:42).

Mi lek xvinaj li senyailtake, ¿kʼu yuʼun jech pʼijubtasvan? Jkʼeltik chibuk srasonal. Baʼyel, snaʼoj ti oy kʼusi xuʼ xchʼay-o koʼontontike, ti jaʼ mu xavikʼiluk-o jsatik ta sventa li kʼusitik albil chkʼot ta pasele. Taje xuʼ tsokesutik ta mantal xchiʼuk mu xa vikʼiluk-o jsatik. Xchibal, mi mu jechuk chvinaj senyailak ti bu nakalutike xuʼ mu xa tsotsuk skʼoplal chkiltik li skʼoteb ta pasel li kʼusitik laj yal Jesuse. Vaʼun xuʼ jnoptik ti chjalij to «li tsots vocole», li slajeb albilkʼop laj yal Jesuse, jaʼ yuʼun muʼyuk tsots skʼoplal chkiltik ti skʼan vikʼiluk li jsatike (Mat. 24:21).

«Muc xchʼunic»

Kʼalal loʼilaj xchiʼuk yajtsʼaklomtak li Jesuse, laj yalbe skʼoplal li buchʼutik ikuxiik kʼalal jutuk xaʼox skʼan xtal li Nojelal ta voʼe, ti jutuk mu skotolikuk «muc xchʼunic» li pʼijubtasel laj yichʼik akʼbele. «Muc xchʼunic» akʼo mi laj yilik ti laj yichʼ meltsanel li arkae, li kʼusitik chopol chkʼot ta pasel ta skʼakʼalilike xchiʼuk ti la xchol mantal Noee (Mat. 24:37-39). Li krixchanoetik avie jech stalelalik ek ta sventa kʼusuk noʼox pʼijubtasel ti chichʼ akʼele. Jech kʼuchaʼal liʼe, jun jtsʼotkaroe snaʼoj lek kʼusi skʼan xal kʼalal chil jun senyail ta be sventa tskʼunibtasbe li yok skaroe. Akʼo mi jech, ep buchʼutik mu stsakik ta venta li senyailtak taje. Jaʼ yuʼun, li j-abteletike persa chakʼik topeetik sventa tskʼunibtasbeik yok skaroik li krixchanoetike. Jech ek, jlom yajtsʼaklomtak Cristoe, akʼo mi chilik senyailtak sventa li slajeb kʼakʼale, jaʼ chchʼay-o yoʼontonik li kʼusitik oy liʼ ta balumile, jaʼ yuʼun mu xa spasbeik yabtel li Jeovae. Jaʼ jech ikʼot ta pasel ta stojolal jun chex tseb ti te nakal ta África occidental, ti jaʼ sbi Arielle.

Li tseb taje, lek xaʼi xtajin ta jun tajimol ti jaʼ sbi balonmano, ti jaʼ noʼox chtajinik tsebetike xchiʼuk tskʼel skotol velta kʼalal chlokʼ ta televisione. Jun veltae, laj yaʼi ti tspasik jun ekipo yoʼ bu chchanunaje. Taje lek tajek laj yaʼi, jaʼ yuʼun muʼyuk la stsak ta venta ti xuʼ sokesat-o ta mantale, vaʼun la stikʼ sba ta portera li ta ekipoe. ¿Kʼusi ikʼot ta pasel? Xi chal stuke: «Li slekomtak jchiʼiltak ta tajimole tsikʼolajik xchiʼuk tslajesik droga. Akʼo mi jtsʼikoj ti tslabanikun ta skoj ti jelelune, kaloj voʼone muʼyuk kʼusi chopol chkʼot ta jtojolal. Pe jaʼ to laj kakʼ ventae, li kʼusi mas la sokesun ta mantale jaʼ li tajimole. Echʼ xa noʼox la stikʼ sba ta koʼonton, yuʼun akʼo mi teun ta tsobajel, jaʼ ta jnopilan-o. Te oyun yilel li ta Salon sventa Tsobobbaile, pe li jnopbene te oy ta tajinebal. Jech xtok, li jel ta jyalel. Maʼuk xa noʼox ta jkʼan chitajin, ta jkʼan ta jpas kanal, jaʼ yuʼun ta jchanilan  tajek sventa mas to lek xitajin, muʼyuk xa ta jkux mi jutuk. Mu xa jnaʼ kʼusi ta jpas. Jech xtok, ichʼay jlom kamigotak.

»Li kʼusi vikʼ-o jsate jaʼo kʼalal chitajinkutik jun veltae. Kʼalal stikʼ ox gol li yan ekipoe, xvul ta jol ti la jkʼanbe Dios ti akʼo skoltaun ta smakele. Jaʼ te laj kakʼ venta ti muʼyuk xaʼox lekun ta mantale. ¿Kʼusi la jpas sventa lek xilun yan velta li Diose?

»Vul ta jol li DVD Los jóvenes preguntan... ¿Qué haré con mi vida? a Kiloj xa onoʼox li video taje, pe la jkʼel yan velta xchiʼuk mas xa tsots skʼoplal laj kil. Li buchʼu chichʼ albel skʼoplal li ta pelikula ti Andy sbie, laj kil ti xkoʼolaj xchiʼuk li kʼusi jnuptanoje. Laj kakʼ ta jkuxlejal ti kʼuyelan tojobtasat yuʼun li mol ta tsobobbaile: la jnop lek li kʼusi chal Filipenses 3:8. Te laj kakʼ-o venta ti mu lekuk li kʼusi yakalun spasele xchiʼuk la jnop ti chkikta li ekipoe.

»La sjel tajek jkuxlejal taje. Mu xa masuk oy ta koʼonton li tsalbaile xchiʼuk mu xa sujomun ta jpas li kʼusitike. Mas xa ximuyubaj xchiʼuk mas xa nopol chkaʼi jba ta stojolal li ermanoetike. Mas xa oy smelolal laj kil li abtelaletik ta sventa mantale. Ta skoj ti mas xa ta jtsʼetan jchikin li ta tsobajeletike, mas xa ta jkʼupin. Jech xtok, mas to la jchan kʼuyelan xuʼ lek jcholmantal. Yuʼun li avie, chi-abtej xa ta prekursora auksiliar ta skotol uetik.»

Jech kʼuchaʼal li Arielle, mi oy kʼusi tsmakutik sventa mu xkakʼtik venta li senyailtak laj yal Jesuse, oy me kʼusitik skʼan jpastik. Xuʼ jkʼeltik li Índice de las publicaciones Watch Tower, yuʼun xkoʼolaj kʼuchaʼal jun mapa ti ch-ikʼvan batel yoʼ bu oy ep tajek meʼtakʼine. Te ta jtatik lekil tojobtaseletik xchiʼuk sloʼil ermanoetik ti snuptanojik preva jech kʼuchaʼal voʼotike. Jech xtok, toj tsots skʼoplal ti xijbat ta skotol tsobajeletik, ti jchapan jbatik lek xchiʼuk ti jtsʼibatik li kʼusitik te chkaʼitike. Jlome mas mu xchʼay yoʼonton chaʼiik kʼalal chchotiik ta baʼyel chotlebaletike. Yan kʼusi xuʼ jpastike, jaʼ ti xkakʼ noʼox jloʼiltik kʼalal chlik sjakʼik ta slikebal noʼox li kʼusi ta jchantike. Sventa lekuk oyutik ta mantale skʼan jkʼeltik xchiʼuk xkaʼitik notisiaetik xtok, vaʼun jnoptik kʼuxi yakal chkʼot ta pasel li senyailtak «slajebal cʼacʼale» (2 Tim. 3:1-5; 2 Ped. 3:3, 4; Apo. 6:1-8).

«Tscʼan ti lec chapaloxuque»

Li senyailtak slajeb kʼakʼale chkʼot ta pasel ta «sbejel banamil» (Mat. 24:7, 14). Akʼo mi ta smilal noʼox krixchanoetik chil svokolik ta skoj chameletik, viʼnal, nikel xchiʼuk yantik ta sventa li kʼusitik albil ta Vivlia ti chkʼot onoʼox ta pasele, oy buchʼutik xtok ti lek noʼox li bu nakalike xchiʼuk ti muʼyuk chil svokolike. Mi jaʼ jech taje, skʼan me mu jnoptik ti jal to skʼan xtal li tsots vokolile.

Jnopbetik skʼoplal li «tsots viʼnal xchiʼuc chamel» laj yalbe skʼoplal Jesuse (Luc. 21:11). Li stuke laj yal ti «ta buticuc banamilal» chkʼot ta pasele, muʼyuk laj yal ti koʼol yorail chkʼot ta pasel ta spʼejel Balumile xchiʼuk ti koʼol xa stsatsale. Jaʼ yuʼun, mu jnoptik ti ta sjunul xa balumil jmoj yorail chkʼot ta pasel li kʼusitik albil skʼoplale. Li Jesuse laj yakʼ ta aʼyel xtok ti akʼo mi jaʼo yorail viʼnale, oy yajtsʼaklomtak ti mu noʼox x-echʼ yoʼontonik ta veʼel chaʼiike, xi laj yale: «Qʼuelo me aba atuquic. Mu me stsatsub avoʼntonic ta scoj li cʼusitic tscʼan abecʼtalique [o «ta skoj ti mu xpaj avoʼontonik ta veʼele», NM]» (Luc. 21:34). Jaʼ yuʼun, mu jmalatik ti chkʼot ta pasel ta jtojolaltik skotol li senyailtak taje. Jvules ta joltik  li kʼusi laj yal Jesús liʼe: «Cʼalal chavilic ta xcʼot ta pasel scotol li cʼusi calojboxuque, jech chanaʼic o ti poʼot xa chlic sventainoxuc li Diose» (Luc. 21:31). Akʼo mi mu jechuk chkʼot ta pasel skotol yoʼ bu nakalutik li senyailtak ti chal li albilkʼope, koliyal ti oy aʼyejetik ta television, ta radio o ta yantike, xuʼ xkil ta jsat jtuktik li kʼusitik chkʼot ta pasele.

Jech xtok, li Jeovae yakʼojbe xa yorail kʼusi ora chlik li tsatsal vokolile. Jaʼ yuʼun, mu kʼusi ta balumil xuʼ sjel «[ti] cʼusi ora chcʼot yoraile» (Mat. 24:36).

Li Jesuse xi laj yalbe li yajtsʼaklomtake: «Tscʼan ti lec chapaloxuque» (Mat. 24:44). Melel onoʼox, ti tsots skʼoplal skʼan jech jpastik-o taje. Maʼuk me skʼan xal ti kʼakʼal akʼobal xa skʼan jpasbetik yabtel li Jeovae. Ta skoj ti mu jnaʼtik lek kʼusi ora chtal li tsatsal vokolile, xuʼ van jaʼo chtal kʼalal chij-abtej ta osiltik o mi ta jnatik o ta yan bu (Mat. 24:40, 41). Vaʼun chaʼa, ¿kʼusi stakʼ jpastik sventa lek chapalutik?

Jkʼeltik kʼusi ikʼot ta stojolal Emmanuel xchiʼuk Victorine. Li nupultsʼakal taje nakal xchiʼuk vakvoʼ stsebetak ta yosilal África, ta skoj ti lek noʼox li kuxlejal ti bu oyike mu xil ta sat stukik li senyailtak albil chkʼot ta pasel sventa li slajebal kʼakʼale. Jaʼ yuʼun sventa lek chapalike chchanik jujun kʼakʼal mantaletik lokʼem ta Vivlia. Li Emmanuele chal kʼusi tspasik: «Ta slikebale toj tsots laj kaʼikutik xchʼakbel yorail ti ta jtsob jbakutike. Ta mas tsʼakale la jnopkutik ti jaʼ lek ta vakib ora ta sob ta jpaskutike, oʼlol noʼox ora ta jtsob jbakutik. Baʼyel ta jchankutik li teksto ta sventa jujun kʼakʼale, mi laje ta jchapan jbakutik ta jayibuk parafo li ta vunetik ti chichʼ chanel ta tsobobbail li ta xemanae». Melel onoʼox ti jaʼ koltabilik-o sventa lekuk vikʼil li satike, yuʼun li Emmanuele jaʼ jbabe yuʼun moletik li ta stsobobbaile, li Victorine eke ch-abtej ta prekursora auksiliar junantik u, xchiʼuk skoltaoj epal krixchanoetik sventa xchʼamik li mantale, xchiʼuk li stsebetake yakal xa chchʼiik ta mantal.

Xi chalbutik li Jesuse: «Qʼuelo me abaic, viqʼuiluc me asatic» (Mar. 13:33). Jaʼ yuʼun chaʼa, mu me xkakʼtik ti oy kʼusi xchʼay-o koʼontontike. Jech kʼuchaʼal la spas li Arielle, jchʼuntik li tojobtaseletik chakʼbutik li ta vunetike xchiʼuk li ta tsobajeletike. Jech kʼuchaʼal la spas li Emmanuel xchiʼuk li yutsʼ yalale, jaʼ lek jchʼakbetik yorail ek li kʼusitik ta sventa mantale, yuʼun jaʼ tskoltautik sventa chapalukutik xchiʼuk sventa vikʼiluk jsatik.

[Tsʼib ta yok vun]

[Lokʼol ta pajina 4]

Li Emmanuel xchiʼuk yutsʼ yalale lek vikʼil

satik yuʼun jujun kʼakʼal chchanik mantal