Jelovelutik noʼox liʼ ta balumil ti toj chopole
Jelovelutik noʼox liʼ ta balumil ti toj chopole
«Scotolic leʼe [...] jech jamal laj yalic ti jelovel noʼox chjelovic liʼ ta banamile, ti muc jaʼuc mero slumalic oe.» (HEB. 11:13)
1. Jech kʼuchaʼal laj yal Jesuse, ¿kʼu yelan skʼan chilik kʼusitik ta sventa balumil li yajtsʼaklomtake?
XI LAJ yal ta stojolal yajtsʼaklomtak li Jesuse: «Yan ti stuquique liʼ ta xcomic ta banamil», pe xi to la sjambe smelolale: «Muʼyuquic xa ta sventa banamil, jech chac cʼu chaʼal vuʼun ti muʼyucun ta sventa banamile» (Juan 17:11, 14). Kʼalal jech laj yal taje, laj yakʼ ta ilel kʼusi tskʼan tspasik li yajtsʼaklomtak ta sventa «banamile», li Satanase jaʼ dios ta sventa li kʼusitik oy ta balumile (2 Cor. 4:4). Ta melel onoʼox ti liʼ nakajtik ta balumil ti noj ta kʼusitik chopole, pe muʼyuk bu tstikʼ sbaik ta spasel li kʼusitike. Taje jaʼ skʼan xal «ti jxanubaletic noʼoxe, ti jelovel noʼox chjelovic liʼ ta banamile» (1 Ped. 2:11).
Li stukike «jelovel noʼox [i]jelovic liʼ ta banamile»
2, 3. ¿Kʼuxi «ti jelovel noʼox chjelovic liʼ ta banamile, ti muc jaʼuc mero slumalic o[...]» li Enoc, Noé, Abraham xchiʼuk li Sarae?
2 Ta voʼne xa onoʼox li yajtuneltak Jeovae, jelelik onoʼox kʼuchaʼal li chopol krixchanoetik ti bu nakajtike. Kʼalal skʼan toʼox xtal li Nojelal ta voʼe, li tukʼil yajtuneltak Dios kʼuchaʼal Enoc xchiʼuk Noee, «lec laj yil sbaic xchiʼuc li Diose» (Gén. 5:22-24; 6:9). Xchaʼvoʼalik tsots yoʼonton laj yalik ti tstoj smul skotol li buchʼutik ven chopolik ti ventainbilik yuʼun Satanase (kʼelo 2 Pedro 2:5 xchiʼuk Judas 14, 15). Akʼo mi koʼol inakiik xchiʼuk chopol krixchanoetik, lek laj yil sbaik xchiʼuk li Jeovae. Jaʼ yuʼun ta jkʼeltik ti «lec [ilat] yuʼun Dios[...]» li Enoque. Xchiʼuk ti «jaʼ noʼox stuc oy ta yoʼnton tspas cʼusi tscʼan Dios ta scotol cristianoetic» li Noé eke (Heb. 11:5; Gén. 6:9).
3 Li Abraham xchiʼuk Sarae la xchʼunbeik smantal li Diose, yuʼun laj yiktaik li kʼusitik kʼupil sba yuʼunik li ta jteklum Ur, ta yosilal Caldeae, inakiik kʼuchaʼal jyanlum xchiʼuk jxanvil krixchanoetik (Gén. 11:27, 28; 12:1). Xi laj yal Pablo ta sventa taje: «Ta sventa xchʼunojel yoʼnton li Abrahame, jech la xchʼun ti cʼalal iʼicʼat yuʼun Dios sventa acʼo batuc ta banamil yoʼ bu ch-acʼbat yuʼunin ta tsʼacale. Jech ilocʼ batel, acʼo me mu snaʼ bu chbat. Ta sventa xchʼunojel yoʼnton noxtoc li Abrahame, jech cʼalal inaqui ta yosil bu iʼacʼbate, carpana noʼox la snain jech chac cʼu chaʼal yanlum. Jaʼ jech inaqui xchiʼuc li Isaac, li Jacob ti scʼoplal jaʼ coʼol chichʼic xchiʼuc li cʼusi albil onoʼox ch-acʼbatique» (Heb. 11:8, 9). Xi to laj yal li jtakbole: «Scotolic leʼe [li tukʼil yajtuneltak Diose] oy xchʼunojel yoʼntonic cʼalal to ichamic. Muʼyuc to yichʼoj cʼalal ichamic li cʼusi albilic onoʼox yuʼun Dios ch-acʼbatique. Pero yilojic xa batel ta nom laj yaʼyic, xcoʼlaj xa xchiʼuc staoj laj yaʼyic. Jech jamal laj yalic ti jelovel noʼox chjelovic liʼ ta banamile, ti muc jaʼuc mero slumalic oe» (Heb. 11:13).
Laj yichʼik pʼijubtasel li j-israeletike
4. ¿Kʼusi pʼijubtasel laj yichʼ j-israeletik kʼalal skʼan toʼox x-ochik li ta yosilike?
4 Ta mas tsʼakale, li snitilulaltak Abrahame i-epajik xchiʼuk ikʼotik ta jun jteklum, taje la sbiin Israel, ti oy xa yuʼunik mantaletik xchiʼuk yosilike (Gén. 48:4; Deu. 6:1). Pe skʼan me mu xchʼay ta sjolik ti melel Yajval osile, jaʼ li Jeovae (Lev. 25:23). Xkaltike, jaʼik jlokʼ osiletik, jaʼ yuʼun persa skʼan xchʼunik li kʼusi ch-albatike. Xchiʼuk xtok, skʼan svules ta sjolik «ti muc ta vajuc noʼox ta xcuxi li cristianoe», jech-o xal skʼan skʼel sbaik sventa mu xchʼay ta sjolik Jeova ta skoj ti ep kʼusitik oy yuʼunike (Deu. 8:1-3). Kʼalal skʼan toʼox x-ochik li ta yosilike, xi pʼijubtasatike: «Li Mucʼul Dios cuʼuntique ta to xacʼ ochanic ta banamil ti bu yalojbe onoʼox ta jamal jmoltotic Abraham, Isaac, xchiʼuc Jacob ta voʼone ti chacʼbee. Jaʼ li jun banamil ti oy lec mucʼtic lumetic toj cʼupilic sba, ti muc voʼocoxuc laj apasique. Li naetique puru lequic li sbel nojemic oe, pero muc voʼocoxuc laj anojesic. Oy lec joqʼuetic ti muc voʼocoxuc laj ajoqʼuique. Oy ep tsʼusubetic xchiʼuc oliva teʼetic ti muc voʼocoxuc laj atsʼunique. Pero voʼoxuc chcʼot aveʼic, chcʼot avuchʼic, jech lec chnoj achʼutic yuʼun. Cʼalal me icʼot ta pasel jech chac cʼu chaʼal laj calboxuque, mu me xchʼay ta avoʼntonic li Mucʼul Dios[e]» (Deu. 6:10-12).
5. ¿Kʼu yuʼun laj yikta Israel li Jeovae, xchiʼuk kʼusi achʼ jteklumal la stʼuj?
5 Maʼuk jun pʼijubtasel ti muʼyuk srasonale. Ta mas tsʼakale, li ta skʼakʼalil Nehemiase, li jtsop jlevietike, laj yalik kʼusi ikʼot ta pasel ti toj kʼexlal sbae, taje jaʼo ikʼot ta pasel kʼalal laj yuʼuninik Albil Balumil li j-israeletike. Kʼalal lek xaʼox snaik, sveʼelik xchiʼuk ep xaʼox yaʼlel stsʼusubike, lik «veʼic uchʼubajic ti bu xa cʼalal xal ti yoʼntonique, ti jubic ta jʼechʼel[e]». Ti kʼusi noʼox la spasike, la stoy sbaik ta stojolal Dios xchiʼuk la smilik li j-alkʼopetik ti la stak batel Dios sventa chtukʼibtasatike. Ta skoj taje, li Jeovae laj yakʼ ochikuk ta skʼob yajkontratak li steklumale (kʼelo Nehemías 9:25-27, Ch; Ose. 13:6-9). Ta jayib siglo ta mas tsʼakale, kʼalal jaʼo oy ta skʼob Roma li jteklume, li judioetike muʼyuk laj yakʼ xchʼunel yoʼontonik ta stojolal li Mesías ti albil onoʼox skʼoplale, pe maʼuk noʼox taje, yuʼun la smilik xtok. Li Jeovae laj yikta li jteklume, vaʼun la stʼuj achʼ jteklum: li Israel sventa Diose (Mat. 21:43; Hech. 7:51, 52; Gál. 6:16).
«Muʼyucoxuc xa ta sventa banamil»
6, 7. 1) ¿Kʼuxi xuʼ chkalbetik smelolal li kʼusi laj yal Jesús ta sventa ti kʼuyelan skʼan xilik balumil li yajtsʼaklomtake? 2) ¿Kʼu yuʼun muʼyuk bu laj skap sbaik ta slumal Satanás li melel yajtsʼaklomtak Cristoe?
6 Jech kʼuchaʼal laj kiltik ta slikebale, li Jesuse jaʼ li Jolil ta tsobobbaile, laj yal ti yajchankʼoptake chʼakalik liʼ ta balumile, jaʼ xkaltik ta sventa li chopol balumil ti jaʼ oy ta skʼob li Satanase. Kʼalal jutuk xaʼox skʼan xcham li Jesuse, xi laj yalbe li yajtsʼaklomtake: «Ti coʼoluc to chapas achiʼuquic li cristianoetic ti oyic ta sventa banamile, lec chaʼyic ti jechuque, yuʼun jaʼ jech tscʼanic. Pero li voʼoxuque muʼyucoxuc xa ta sventa banamil, yuʼun laj xa jtʼujoxuc loqʼuel, jaʼ yuʼun bajbil chacʼotic» (Juan 15:19).
7 Ta skoj ti i-epaj xaʼox li relijionetik ti xchʼunojik Cristoe, li yajtuneltak Diose muʼyuk la skap sbaik ta spasel li kʼusitik nopem xaʼiik spasel li krixchanoetike. Buyuk noʼox nakalik, skʼan me jelelikuk kʼuchaʼal li slumal Satanase. Kʼalal lokʼ xaʼox 30 jabil xchamel li Jesuse, li jtakbol Pedroe xi laj yalbe yajtsʼaklom Cristo ti nakajtik ta yosilaltak Romae: «Voʼoxuc ti lec jcʼanojoxuque, ta jcʼanboxuc vocol ta atojolic voʼoxuc ti jaʼ jechoxuc jech chac cʼu chaʼal yanlum, ti jxanubaletic noʼoxe, ti jelovel noʼox chjelovic liʼ ta banamile. Mu me xachʼunic li cʼusi tscʼan abecʼtalique» (1 Ped. 1:1; 2:11, 12).
8. Jech kʼuchaʼal laj yal jun j-al-loʼile, ¿kʼusi la spasik li baʼyel yajtsʼaklomtak Cristo ta sventa li kʼusitik oy ta balumile?
8 Li yajtsʼaklomtak Cristoe ikuxiik «jech chac cʼu chaʼal yanlum, ti jxanubaletic noʼoxe, ti jelovel noʼox chjelovic liʼ ta banamil[...]» li ta skʼakʼalil jromaetike. Li jun j-al-loʼile laj yal ti laj la yichʼik nutsel xchiʼuk ti toj nopolik noʼoxe. Laj yal xtok ti sabatik la smulik ta skoj ti muʼyuk tstikʼ sbaik ta spasel li kʼusitik tspasik ta sventa jecheʼ relijione. Laj yichʼik albel skʼoplalik ti «skontrainojik la li jeltos stsʼunbal krixchanoetike», yuʼun muʼyuk tstikʼ sbaik ta spasel li kʼusitik chchʼay-o yoʼontonik li krixchanoetike xchiʼuk li kʼinetik ti noj ta mulivajel xchiʼuk li jecheʼ yichʼel ta mukʼ yan diosetike.
Mu jtunestik skotol li kʼusitik oy ta balumile
9. ¿Kʼuxi chkakʼtik ta ilel ti muʼyuk jkontrainojtik li jeltos stsʼunbal krixchanoetike?
9 ¿Kʼu yelan skʼan xkiltik «li cʼusitic chopol liʼ ta banamile»? (Gál. 1:4.) Skʼan jech jpastik jech kʼuchaʼal li baʼyel yajtsʼaklomtak Cristoe. Jech oxal, bakʼintike muʼyuk bu lek jkʼoplaltik yuʼunik li krixchanoetike xchiʼuk chispʼajutik. Pe ta melel, muʼyuk jkontrainojtik li jeltos stsʼunbal krixchanoetike. Li kʼusi yakal ta jpastik ta skoj li kʼanelale jaʼ ti chkakʼtik persa chijbatutik ta naetik sventa xbat kalbetik krixchanoetik «li Lequil Aʼyej» ta sventa li Ajvalilal yuʼun Diose (Mat. 22:39; 24:14). Ta jpastik li abtel taje, yuʼun jnaʼojtik ti poʼot xa tslajes skotol jpasmulil ajvaliletik li Ajvalilal yuʼun Jeova ti yakʼojbe xa ta skʼob li Cristoe. Vaʼun chtal jun achʼ tukʼil balumil (Dan. 2:44; 2 Ped. 3:13).
10, 11. 1) ¿Kʼuxi ti oy noʼox spajeb ta jtunestik li kʼusitik oy ta balumile? 2) ¿Kʼuxi chakʼik ta ilel ti lek vikʼil satik li yajtsʼaklomtak Cristo kʼalal muʼyuk tstunesik skotol li kʼusitik oy ta balumile?
10 Li balumil liʼe poʼot xa chlaj. ¡Nopol xa tajek! Ta skoj taje, li yajtunelutik Jeovae jnaʼojtik ti maʼuk xa yorail ta jsaʼtik li kʼusitik oy ta balumile. Oy lek ta joltik li kʼusi laj yal Pablo liʼe: «Quermanotac, ta sventa ti mu xa jaluc liʼ oyutic ta banamile, jech chacalboxuc [...], li bochʼo chmanulaje, acʼo muʼyucuc cʼusi tsta chaʼay. Li bochʼo oy ep cʼusitic oy yuʼun liʼ ta banamile, acʼo muʼyucuc cʼusi oy yuʼun chaʼay. Yuʼun li cʼusitic oy liʼ ta banamile chjelov noʼox» (1 Cor. 7:29-31). ¿Kʼuxi ta jtunestik li kʼusitik oy ta balumil avie? Jaʼo kʼalal ta jtunestik jlomuk li kʼusitik chakʼe. Jech kʼuchaʼal kʼalal ta jtunestik li kʼusitik achʼ chlokʼanuk tal sventa chkakʼtik-o ta ojtikinel ta spʼejel balumil li kʼusi chal Vivlia ta epal kʼopetike. Ta jtunestik xtok jlomuk li kʼusitik oy ta balumil sventa ta jtaʼ-o jveʼeltik xchiʼuk li kʼusitik chtun kuʼuntik ta jkuxlejaltike. Ta melel, muʼyuk ta jtunestik skotol li kʼusitik oy ta balumile, yuʼun maʼuk chbat ta koʼontontik li kʼulejale xchiʼuk li kʼusitik chakʼe (kʼelo 1 Timoteo 6:9, 10).
11 Li yajtunel Dios ti lek vikʼil sate, muʼyuk ta stunes skotol li kʼusitik oy ta balumile, jech kʼuchaʼal ta sventa li chanun ta universidade. Epal krixchanoetik chal ti jaʼ sventa tstaik-o lek ojtikinel xchiʼuk ti ep kʼusitik x-ayan yuʼunike. Pe li voʼotike jelavel noʼox chijelavotik liʼ ta balumile xchiʼuk yan-o li kʼusi jkʼelojtik batele. Yuʼun li voʼotike «mu me bochʼo mucʼ spas sba [kuʼuntik]» (Rom. 12:16; Jer. 45:5). Li voʼotike jaʼ yajtsʼaklomutik Cristo, jaʼ yuʼun jtsakojtik ta venta li pʼijubtasel liʼe: «Bijanic me, qʼuelo me abaic ta sventa li xpichʼetel avoʼntonique. Yuʼun li xcuxlejal jun cristianoe maʼuc te tsta o me batsʼi ep cʼusi oy yuʼune» (Luc. 12:15). Mi jaʼ yajtsʼaklomot Cristo ti kerem tsebotoe, jaʼ lek nopo batel kʼusi chakʼan chata ta sventa mantal. Ta xkalbotkutik ti akʼo noʼox xasabe smelolal li kʼusitik mas tsots skʼoplal chtun avuʼune. Li kʼusi mas tsots skʼoplal skʼan xapase, jaʼ ti xachapan aba sventa xatun ta stojolal Jeova «ta scotol avoʼnton [...]; xchiʼuc ta scotol achʼulel, ta scotol atsatsal, xchiʼuc ta scotol ajol» (Luc. 10:27). Mi jech chapase xuʼ oy «[a]cʼulejal [ta] stojol ti Diose» (Luc. 12:21, Jaʼ ti Achʼ Testamentoe, ta skʼop Huixtán; kʼelo Mateo 6:19-21).
Mu jvul koʼontontik ta sventa kʼusitik oy ta balumil
12, 13. ¿Kʼuxi jelel chvinajik-o yajtsʼaklomtak Cristo ta stojolal yan krixchanoetik kʼalal ta xchʼunik li tojobtasel chal ta Mateo 6:31-33?
12 Ti kʼuyelan chilik ta sventa li saʼel kʼulejal li yajtuneltak Jeovae toj jelel tajek jech kʼuchaʼal chilik li yan krixchanoetike, yuʼun li stukike jaʼ stsakojik ta venta li kʼusi laj yalbe yajtsʼaklomtak Jesús liʼe: «Mu me xloʼilaj avoʼntonic chaʼe. Mu me jechuc xavalic: “¿Cʼusi ta jveʼtic? ¿Cʼusi ta xcuchʼtic? ¿Bu ta jta jcʼuʼtic?”, mu me xachiic. Li bochʼotic mu xotquinic Diose jaʼ jech ta xloʼilaj yoʼntonic ta saʼilanel. Pero li Jtotic te oy ta vinajele snaʼoj ti chtun avuʼunic scotol jech chac leʼe. Jaʼ yuʼun tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane, jech chayacʼboxuc scotol li cʼusitic ta xtun avuʼunique» (Mat. 6:31-33). Ep buchʼutik kilojtik ti chakʼ kʼusitik chtun kuʼuntik li Jtotik ta vinajele.
13 «Ta melel jaʼ jcʼulejaltic cʼotem ti jchʼunojtique, ti jun coʼntontic yuʼun ti cʼu yepal cʼusitic oy cuʼuntique.» (1 Tim. 6:6.) Li talelal taje mu jechuk chakʼik ta ilel jutuk mu skotoluk krixchanoetik li avie. Jech kʼuchaʼal liʼe, oy ep nupultsʼakaletik ti kerem tsebik toe, oy ta yoʼontonik ti oyuk yuʼunik skotol mi nupunik xaʼoxe: ti oyuk xa lek kʼusitik ta snaike, skaroik xchiʼuk selularik o yantik kʼusitik. Pe li yajtsʼaklomtak Cristo ti kuxulik jech kʼuchaʼal jelavel noʼox chjelavik liʼ ta balumile chakʼbeik noʼox spajeb li kʼusi tskʼan yoʼontonike, yuʼun jun noʼox yoʼontonik ta sventa li kʼu yepal oy yuʼunike. Ep yajtsʼaklomtak Cristo stsʼikoj sbaik ta skʼupinel jlomuk lujoetik o yantik kʼusitik ta skoj ti jaʼ chchʼakbeik mas skʼakʼalil xchiʼuk yipik sventa chcholik batel li Ajvalilal yuʼun Diose. Yantike chtunik kʼuchaʼal prekursoretik, chtunik ta Betel, jkʼelvanejetik ta sirkuito xchiʼuk distrito o misioneroetik. ¡Toj ep sbalil chkiltik ti tstsʼik sbaik sventa chtunik ta stojolal Jeova li kermanotaktik taje!
14. ¿Kʼusi xuʼ jchantik li ta lokʼolkʼop laj yal Jesús ta sventa li jtsʼunolajele?
14 Li ta lokʼolkʼop laj yal Jesús ta sventa li jtsʼunolajele, laj yal «ti jaʼ noʼox batem yoʼntonic yuʼun li cʼusitic oy liʼ ta banamile ti jaʼ loʼlabilic[-oe]», taje xuʼ netʼbil chkom yuʼun li Skʼop Dios ti te xaʼox ta yoʼonton li jun krixchanoe xchiʼuk ti mu xa xakʼ sate (Mat. 13:22). ¿Kʼusi xuʼ tskoltautik sventa mu xijpʼaj li ta petsʼ taje? Jaʼ ti muyubajkutik noʼox ta sventa li kʼusitik oy kuʼuntike xchiʼuk ti xijkuxi jech kʼuchaʼal jelavel noʼox chijelavutik liʼ ta balumile. Li talelal taje tskoltautik sventa lekuk noʼox li jsatike, jaʼ xkaltik ti tukʼ o jun noʼox bu skʼeloj batele. Jech skʼan jpastik ta melel, jaʼ noʼox jkʼeltik batel li Ajvalilal yuʼun Diose xchiʼuk oyuk ta koʼontontik li yantike (Mat. 6:22).
«Li banamile [...] ta onoʼox xlaj»
15. Ta skoj li kʼusi laj yal jtakbol Juan ta sventa li balumil avie, ¿kʼu yelan skʼan xkakʼ ta ilel jtaleltik xchiʼuk li kʼusi ta jkʼan ta jpastike?
15 Jun srasonal ti toj tsots skʼoplal ti chkaltik ti jaʼutik «[j]yanlum, ti jxanubal[utik] noʼoxe, ti jelovel noʼox [chijelavutik] liʼ ta banamile», jaʼ ti chapbil xa skʼakʼalil sventa chlaj li balumile (1 Ped. 2:11; 2 Ped. 3:7). Ta skoj ti jnaʼojtik xa taje, jaʼ te chkakʼtik ta ilel li kʼusi ta jkʼan ta jkuxlejaltike, li kʼusi ta jpastike xchiʼuk li kʼusitik ta jnoptik ti tsotsik skʼoplale. Li jtakbol Juane la stojobtas yermanotak ti akʼo mu skʼanik li kʼusitik oy ta balumile xchiʼuk li kʼusitik chakʼe, yuʼun «li banamile xchiʼuc li cʼusi chacʼ batuc coʼntontic yuʼune, ta onoʼox xlaj; yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil» (1 Juan 2:15-17).
16. ¿Kʼuxi chkakʼtik ta ilel ti tʼujbilutik kʼuchaʼal jun jteklum ti jelele?
16 Li Jeovae xi laj yalbe li j-israeletike: «Voʼoxuc noʼox atuquic lec chaquiloxuc ta scotol li yantic lumetique», taje jaʼ noʼox me chkʼot ta pasel mi la xchʼunbeik li smantale (Éxo. 19:5). Kʼalal tukʼ toʼox yakʼoj sbaik li jteklume, jelelik jech kʼuchaʼal li yantik lumetik ti kʼuyelan chichʼik ta mukʼ Diose xchiʼuk li xkuxlejalike. Li avi eke, li Jeovae stʼujoj jun jteklum sventa chtun ta stojolal ti mu xkoʼolaj kʼuchaʼal li slumal Satanase. Li kʼusi jchanojtik xae, jaʼ «ti acʼo jcomtsantic cʼusi chopole xchiʼuc li scʼupinel cʼusitic sventa banamile, yuʼun jech lec xa cʼusitic ta jpastic batel; tucʼ cʼusitic chlic jpastic, xchiʼuc jaʼ xa noʼox chquichʼtic o batel ta mucʼ li Diose. Jech jun noʼox coʼntontic ta jmalabetic scʼacʼalil li cʼusi toj jun yutsile, jaʼ ti cʼalal tsut tal li Mucʼul Dios Jcoltavanej cuʼuntique, jaʼ li Cristo Jesuse. Jaʼ ti laj yacʼ sba ta milel ta jcojtic, yuʼun jech la spojutic loqʼuel ta sventa cʼusitic chopole, xchiʼuc ti la slecubtasutic sventa chijyuʼuninutique, xchiʼuc ti jutebuc coʼntontic acʼo jpastic cʼusi leque» (Tito 2:11-14). Li jteklum taje, te tsakal skʼoplal li tʼujbil yajtsʼaklomtak Cristo ti chbatik ta vinajele xchiʼuk li smiyonal noʼox «yantic [x]chijtac» Jesús ti chkoltavanike (Juan 10:16).
17. ¿Kʼuxi xuʼ jnaʼtik ti muʼyuk chchaʼnaʼik ti jelavel noʼox chjelavik liʼ ta balumil ti toj chopol li buchʼutik tʼujbil chbatik ta vinajel xchiʼuk li yan chijetike?
17 Li buchʼutik tʼujbil chbatik ta vinajele jun yoʼontonik smalaojik ch-ajvalilajik xchiʼuk Cristo (Apo. 5:10). Li yan chijetike, ta xkuxiik ta Balumil sbatel osil, ti maʼuk xa noʼox jelavel chjelavik liʼ ta balumil ti toj chopole, tskʼupin lek snaik, sveʼelik xchiʼuk ep kʼusitik tskʼupin chuchʼik (Sal. 37:10, 11; Isa. 25:6; 65:21, 22). Li jtsop krixchanoetik taje, jelel kʼuchaʼal li j-israeletike. Yuʼun muʼyuk chchʼay ta sjolik li bendisionetik chlik tal ta stojolal Jeovae, li «Dios yuʼun sbejel banamil[e]» (Isa. 54:5). Li buchʼutik tʼujbil chbatik ta vinajel xchiʼuk li yan chijetike, muʼyuk chchaʼnaʼik ti jelavel noʼox chjelavik liʼ ta balumil ti toj chopole.
¿Kʼusi ta jtakʼtik?
• ¿Kʼuxi ti jelavel noʼox ijelavik liʼ ta balumil li epal tukʼil yajtuneltak Dios ta voʼnee?
• ¿Kʼuxi laj yakʼ ta ilel stalelalik li baʼyel yajtsʼaklomtak Cristo ta sventa li balumile?
• ¿Bu to kʼalal xuʼ tstunesik kʼusitik oy ta balumil li melel yajtsʼaklomtak Cristoe?
• ¿Kʼu yuʼun muʼyuk ta jchaʼnaʼtik ti jelavel noʼox chijelavutik liʼ ta chopol balumile?
[Sjakʼobiltak sventa xchanobil]
[Lokʼol ta pajina 18]
Li baʼyel yajtsʼaklomtak Cristoe la spʼajik li chʼayob oʼontonal ti naka milbail xchiʼuk mulivajel chvinaje
