«Li avie ep kʼusitik mu stakʼ jpas, ¡pe mu sbateluk osil jech!»

Tsloʼilta Sara Van Der Monde

Li krixchanoetike xi onoʼox chalbeikune: «Sara toj alakʼ sba ti kʼuyelan chatseʼine. ¿Kʼu yuʼun ti xamuyubaj noʼoxe?». Vaʼune chkalbeik ti oy jun spatobil koʼonton ti mu kʼusi xkoʼolaj-oe. Xi chkale: «Li avie ep kʼusitik mu stakʼ jpas, ¡pe mu sbateluk osil jech!».

LIVOKʼ ta 1974 ta París (Francia). Toj vokol li-ayan, ta mas jelavele, li doktore laj yalbe kutsʼ kalal ti muʼyuk bu lek ch-abtej li jchinabe. Ta skoj taje mu stakʼ jbakʼes lek li jbekʼtal jtakopale, mu xlokʼ lek xikʼopoj, jaʼ yuʼun li krixchanoetike mu xaʼiik lek li kʼusi chkale. Jech xtok, la jta tupʼ-ikʼ, xchiʼuk ta anil noʼox xuʼ jkuchin chameletik.

Kʼalal chib toʼox jabilale, ibat naklukunkutik ta slumal Australia ta Melbourne. Chib jabil ta tsʼakal, li jtote laj yiktaunkutik xchiʼuk li jmeʼe. Li kʼusi ikʼot ta pasel ta skoj taje, laj kaʼi ta sba velta ti mas nopol oyun ta stojolal li Diose. Li jmeʼe jaʼ yajrextiko Jeova xchiʼuk chikʼun batel ta tsobajeletik, ti jaʼ te la jchan ti skʼanojun li Diose xchiʼuk ti oyun ta yoʼontone. Ti jech skʼanojun li Jeovae xchiʼuk ti skʼanojun li jmeʼe, jaʼ la skoltaun sventa lek noʼox chkaʼi jba, akʼo mi jelel xa tajek li jkuxlejalkutike.

Li jmeʼe la xchanubtasun ta skʼoponel ta orasion li Jeovae. Li avie, mas kʼun chkaʼi spasel li orasione, jaʼ mas tsots chkaʼi kʼalal chikʼopoje. Yuʼun kʼalal ta jpas orasione lek jamal ta jnopben li kʼusi chkale, manchuk mi mu xlokʼ lek ta alel kuʼun. Tspatbun koʼonton tajek kʼalal jnaʼoj ti chaʼi skotol kʼusi chkalbe li Jeovae, akʼo mi ta koʼonton noʼox o mi mu xlokʼ kuʼun lek kʼalal chikʼopoje (Sal. 65:2).

Kʼalal la jta mas vokoliletike

Kʼalal voʼob xaʼox jabilale, tsatsajem xaʼox li jchamel ti muʼyuk xa bu lek ch-abtej li jchinabe, yuʼun persa xa skʼan jtunes jun takʼin sventa chixanav-o. Kʼalal chixanave, solel xitamlajet noʼox. Vaʼun kʼalal buluchib xaʼox jabilale mu xaʼox xixanav. Ta mas jelavele, persa xa skʼan skoltaun jun makina sventa xilik ta jtem xchiʼuk chi xchotanun ta jsiya ti oy syantail ti ta motor ch-abteje. Li jsiyae yichʼoj tal skontrolal.

Bakʼintike solel chkat tajek koʼonton. Vaʼun chvul ta jol li kʼusi nopem xkaʼi chkalkutik ta kutsʼ kalale: «Mu xavul-o avoʼonton li kʼusi mu spas avuʼune. Jaʼ noʼox paso li kʼusi spas avuʼune». Taje jaʼ skoltaojun sventa xuʼ ximuy ta kaʼ, chixanav ta varko, ta kanova, ta jpas jkarpana ta osiltik xchiʼuk xuʼ jtsʼot jkaro ta jun karetera ti bu muʼyuk mas karoetike. Chkakʼ ta ilel ti jkʼanoj li kʼusitik stakʼ jpase, ta jbon kuadroetik, chitsʼisomaj, chiluchomaj, ta jpas smak temetik xchiʼuk kʼusitik ta cerámica.

Ta skoj ti tsots tajek li jchamele, oy krixchanoetik chalik ti mu la xuʼ kuʼun xitun ta  stojolal Jeova, jech kʼuchaʼal tspas jun pʼijil mukʼta krixchanoe. Kʼalal vaxaklajuneb xaʼox jabilale, li jmaestrae laj yalbun ti akʼo xilokʼ li ta jnae, xchiʼuk ti xkikta li srelijion jmeʼe. Laj yalbun xtok ti tskoltaun ta saʼel bu xuʼ xikome. Pe laj kalbe ti muʼyuk chkikta li kʼusi jchʼunoje xchiʼuk laj kalbe ti jaʼ to chilokʼ batel ta jna, mi lek xaʼox chapalun sventa chinaki jtuke.

Kʼalal li loʼilaj xchiʼuk li jmaestrae, mu xa noʼox jaluk i-echʼ, vaʼun laj kichʼ voʼ kʼuchaʼal jun yajrextiko Jeova. Chib jabil ta mas tsʼakal, libat ta naklej ta jun kʼox apartamento ti bu lek noʼox chkaʼi jbae, yuʼun ta jkʼupin ti jtuk noʼox oyune.

Muʼyuk jmalaoj ti chkichʼ kʼoponele

Li ta jkuxlejale kiloj epal vokoliletik ti spasoj ta preva li xchʼunel koʼontone. Jun velta solel labal to laj kaʼi kʼalal la sjakʼbun jun jchiʼil ta chanun mi ta la jkʼan chkikʼe, li stuke oy kʼusitik mu spas yuʼun ek. Ta slikebale toj lek xa noʼox laj kaʼi jba. Jech kʼu chaʼal tskʼanik xchiʼil ta xkuxlejalik li tsebetike, li voʼone oy ta koʼonton ti oyuk jchiʼil ta jkuxlejal eke. Pe xuʼ mu xkaltik ti xuʼ xmuyubajik chib krixchano ta snupunelik ta skoj ti ip xchaʼvoʼalike. Jech xtok, li stuke yan-o srelijion, jelel kʼusi jchʼunojkutik, jelel kʼusi ta jkʼan ta jpaskutik xchiʼuk jelel tajek li kʼusi ta jkʼan ta jtakutike. Jaʼ yuʼun, ¿kʼuxi xa noʼox xuʼ chimuyubajkutik li ta jkuxlejalkutike? Li voʼone jpʼel onoʼox ta koʼonton ta jchʼunbe smantal Dios ti jaʼ noʼox chinupun xchiʼuk jun ermano ti koʼol kʼusi jchʼunojkutike (1 Cor. 7:39). Jech oxal, ta smelolal noʼox laj kalbe ti mu stakʼ xinupun xchiʼuke.

Li avie, jnaʼoj ti lek li kʼusi ikʼot ta nopel kuʼune. Jnaʼoj lek xtok ti chimuyubaj mi tal li achʼ balumil yaloj chakʼ Diose (Sal. 145:16; 2 Ped. 3:13). Pe yoʼ to mu xtale, jpʼel-o ta koʼonton ti tukʼ chkakʼ-o jba ta stojolal Jeova xchiʼuk ti ximuyubaj noʼox akʼo mi ep li jvokoltake.

Oy ta koʼonton tajek ti kʼotuk xa skʼakʼal ti kʼusi ora xuʼ xipʼit lokʼel ta jxila ti oy syantaile xchiʼuk ti xi-anilaj jech kʼuchaʼal li ikʼe. Vaʼun xuʼ xi chkale: «Mu toʼox xuʼ kʼusitik stakʼ jpas, pe li avie lek xa oyun ta sbatel osil».