Li kʼusitik tsjakʼ jkʼelvunetike

¿Mi stakʼ naʼel lek kʼusi ora laj yichʼ jokʼanel ta jtel teʼ li Jesuse?

Li sjakʼobil taje jaʼ ta skoj ti tskontrain sba yileluk li kʼusi la stsʼiba Marcos xchiʼuk Juan ti akʼbat snaʼik yuʼun Dios ta sventa li slajel Jesuse. Li Marcose xi chale: «Ta baluneb ora ta sob la sjocʼanic ta cruz [o «jtel teʼ», NM] li Jesuse» (Mar. 15:25). Pe li Juane chal ti «poʼot xaʼox van oʼlol cʼacʼal» kʼalal laj yakʼ ta stojolal Judioetik Jesús li Pilatoe, ti jaʼ sventa tsjokʼanik ta jtel teʼe (Juan 19:14-16). Li buchʼu chalbeik skʼoplal Vivliae tskʼan chchapbeik smelolal ti tskontrain sba yileluk li chib Evanjelioetik taje, pe jaʼuk li Vivliae muʼyuk onoʼox mas chalbe skʼoplal taje. Akʼo mi jech, li kʼusi xuʼ tskoltautik ta yaʼibel smelolal taje, jaʼ ti kʼuyelan chchapik li ora ta skʼakʼalil Jesuse.

Li judioetik ta baʼyel sigloe ta lajcheb ora chchʼakik li sakilal osile, jaʼo chlik xchapik kʼalal chlokʼ li Kʼakʼale xchiʼuk jaʼo chlaj xchapik mi chchʼay xaʼox batele (Juan 11:9). Ta melel, li ta jun jabile jelel yorail kʼuyelan chlokʼ li Kʼakʼale xchiʼuk ti chchʼay batele, jech ek li sjalikil jujun kʼakʼale chjel. Jech xtok, sventa tsnaʼik jayib orae jaʼ tskʼelik li bu xa oy li Kʼakʼale. Jaʼ yuʼun, kʼalal chalbe skʼoplal orae muʼyuk chal jayib ora lek. Kʼalal chalbe skʼoplal ti oy kʼusitik ikʼot ta pasel li ta Tsʼibetik ta Griego Kʼop ti chalbe skʼoplal Cristoe, ikʼot ta pasel kʼalal nopol xaʼox oxib ora mal kʼakʼal, ta lajcheb ora o ta baluneb ora (Mat. 20:3, 5; Hech. 10:3, 9, 30).

Kʼalal chalbeik skʼoplal li skʼakʼalil kʼalal icham li Jesuse, li jtsʼibajom yuʼun Evanjelioetike jmoj chalbeik yorail li yantik kʼusitik ikʼot ta pasele. Jech kʼuchaʼal liʼe, ta xchanvoʼalik chalik ti sakubem xaʼox kʼalal la stsob sbaik li paleetik xchiʼuk moletik sventa ibat yakʼik li Jesús ta stojolal li ajvalil ta Roma, ti jaʼ li Pilatoe (Mat. 27:1; Mar. 15:1; Luc. 22:66; Juan 18:28). Jech noxtok, li Mateo, Marcos xchiʼuk Lucase chalik ti kʼalal poʼot xaʼox oʼlol kʼakʼale, kʼalal jaʼo te jokʼol ta jtel teʼ li Jesuse, ikʼub osil li ta jteklum taje, jaʼ to isakub ta «oʼlol syalel cʼacʼal» (Mat. 27:45, 46; Mar. 15:33, 34; Luc. 23:44).

Li kʼusi skʼan jnaʼtik xtok kʼalal chkalbetik skʼoplal ti kʼusi ora laj yichʼ milel li Jesuse, jaʼ ti kʼalal oy buchʼu tsmilik li ta voʼnee xkoʼolaj xa xkaltik ti tsmilik kʼalal chichʼ tsitsele. Yuʼun kʼalal tstsitsike toj echʼ xa noʼox tsots, yuʼun bakʼintike ta xchamik-o. Ta stojolal li Jesuse jech van toj tsots laj ta tsitsel, yuʼun kʼalal ta xkuch xaʼox batel li jtel teʼe muʼyuk xa ikuch yuʼun, jaʼ yuʼun laj yakʼbeik xkuch batel jun vinik (Luc. 23:26; Juan 19:17). Mi jaʼ xa onoʼox te chlik skʼoplal smilel kʼalal chichʼ tsitsel xchiʼuk ti tsmalaik to kʼuk sjalil sventa xichʼ jokʼanel ta jtel teʼ li Jesuse, li jayvoʼ jtsʼibajometike xuʼ jelajtik li yorail la stsʼibaike yuʼun jelel li kʼusi yakal chalbeik skʼoplal ta sventa li jayib ora la smilik li Jesuse.

Kʼalal la stsʼiba S-evanjelio li jtakbol Juane, jal xaʼox jelavem ti la stsʼibaik li yan Evanjelioetike, jaʼ yuʼun xuʼ jnoptik ti la skʼel li kʼusi stsʼibaojik xaʼoxe. Melel onoʼox ti mu xkoʼolaj li yorail laj yal xchiʼuk li kʼusi laj yal Marcose, pe taje xuʼ xkakʼtik venta ti mu jaʼuk noʼox la xchanbe li kʼusi laj yal Marcos li Juane. Manchuk mi muʼyuk chchapbe mas smelolal li kʼusi jelel taje, xuʼ jpat koʼontontik ta stojolal, yuʼun jaʼ laj yakʼ ta naʼel Dios xchibal li Evanjelioetik taje.