Li chʼul espiritue ibeiltasvan ta baʼyel siglo xchiʼuk li avie

«Scotol leʼe jun noʼox li bochʼo tspase. Jun noʼox li Chʼul Espíritu chacʼ ta naʼele.» (1 COR. 12:11)

1. ¿Kʼusitik ta jchantik li ta xchanobil liʼe?

 LI TA Pentecostés ta sjabilal 33 oy kʼusi toj labal sba ikʼot ta pasel (Hech. 2:1-4). Taje jaʼo laj yichʼik chʼul espiritu li yajtuneltak Diose. Jaʼ te ijel ti kʼuyelan chil sbaik xchiʼuk Dios li yajtuneltake. Li ta xchanobil laj xa jkʼeltik ti kʼalal chʼabal toʼox li yajtsʼaklomtak Cristoe, li xchʼul espiritu Jeovae jeltos la xchanubtas li tukʼil yajtuneltak yoʼ spas yuʼunik li tsatsal abtelaletike. Pe ijel ti kʼuyelan ch-abtej chʼul espiritu li ta baʼyel sigloe. ¿Kʼuxi ti jech taje? ¿Kʼu yelan xuʼ jtabetik sbalil avi li yip ch-abtej Diose? Jkʼeltik.

«Cʼotcun ta smosov ti Cajvale»

2. ¿Kʼu yelan yiloj xa onoʼox María li kʼusitik labal sba chkʼot ta pasel yuʼun li chʼul espiritue?

² Kʼalal i-akʼbatik chʼul espiritu ti albilik xa onoʼox li tukʼil yajtuneltak Dios kʼalal te tsobolik ta xchaʼkojal jolna ta Jerusalene, te oy li María eke (Hech. 1:13, 14). Kʼalal ikʼot xaʼox ta pasel taje, yiloj xaʼox kʼusitik labal sba chkʼot ta  pasel yuʼun li juʼelal taje. Mas xaʼox ta 30 jabil yechʼel, kʼalal tojol tseb toʼox li Mariae, la xchiʼin yol ta skoj «Chʼul Espíritu», li Jeovae laj yakʼbe ta yalajeb li xkuxlejal Xnichʼone (Mat. 1:20).

3, 4. ¿Kʼu yelan stalelal laj yakʼ ta ilel María, xchiʼuk kʼuxi xuʼ jchanbetik?

³ ¿Kʼu yuʼun jech la sta smoton li Mariae? Kʼalal i-albat xaʼox yuʼun anjel ti kʼusi ch-akʼbat spas yuʼun li Jeovae, li Mariae xi la stakʼe: «Cʼotcun ta smosov ti Cajvale. Acʼo spas ta jtojol ti Dios jech cʼu chaʼal laj avale» (Luc. 1:38, Ch). Ta skoj ti jech la stakʼe, laj yakʼ ta ilel li slekil yoʼonton ta stojolal Diose, jech oxal, la xchʼam ta sjunul yoʼonton li kʼusi i-akʼbat spase. Muʼyuk la snop li kʼusi chal slakʼnatak kʼalal mi mukʼ xaʼox li xchʼute, mi jaʼuk li kʼusi tsnop o kʼusi chal li vinik ti skʼoplal xaʼox chikʼe. Jaʼ noʼox laj yal ti jaʼ mosoil yuʼun Diose, taje jech laj yakʼ ta ilel ti lek spatoj yoʼonton ta stojolal Jeovae.

⁴ Li voʼotik eke, oy ta jtatik matanaletik o kʼusitik tsots chkaʼitik ta yabtel Dios ti xuʼ jvul-o koʼontontike. Xuʼ xijakʼbe jbatik mi jech la jnuptantike: «¿Mi solel jpatoj koʼonton ta stojolal Jeova ti tskoltaun sventa jech chkʼot ta pasel kʼuchaʼal tskʼane? ¿Mi chkakʼ ta ilel ti oy ta koʼonton spasel li kʼusi tskʼanbune?». Ta melel, li Jeovae chakʼbutik xchʼul espiritu mi ta jpat koʼontontik ta stojolale xchiʼuk mi ta jtatik ta ojtikinel ti jaʼ Mukʼul Jpasmantal kuʼuntike (Hech. 5:32).

Ikoltaat yuʼun chʼul espiritu li Pedroe

5. ¿Kʼu yelan i-abtej ta xkuxlejal Pedro li chʼul espiritu kʼalal skʼan toʼox li Pentecostés ta sjabilal 33?

⁵ Jech kʼuchaʼal María ti laj xaʼox yil kʼuyelan ch-abtej li chʼul espiritue, li jtakbol Pedroe laj xaʼox yil ta xkuxlejal ek kʼalal skʼan toʼox xkʼot li Pentecostés ta sjabilal 33. Li Jesuse laj yakʼbe sjuʼel Pedro xchiʼuk yan jtakboletik sventa tslokʼesbeik pukujetik ta yoʼonton li krixchanoetike (Mar. 3:14-16). Li ta Vivliae muʼyuk ep chalbe skʼoplal, pe chakʼ ta ilel ti Pedroe la stunes li juʼelale. Li sjuʼel Diose ivinaj xtok kʼalal takat ta ikʼel ta stojolal Jesús li Pedroe, li jtakbol taje ixanav batel ta ba nab ta Galilea (kʼelo Mateo 14:25-29). Ta melel, ta skoj ti koltabil yuʼun xchʼul espiritu Dios li Pedroe xuʼ spas skʼelobiltak juʼelal. Pe li yip Jeova taje jutuk xaʼox skʼan xjel kʼuyelan ch-abtej ta stojolal Pedro xchiʼuk li yan yajtsʼaklomtak Cristoe.

6. ¿Kʼusitik la spas Pedro koliyal xchʼul espiritu Dios ta Pentecostés xchiʼuk ta tsʼakale?

⁶ Kʼalal jaʼo li kʼin Pentecostese, li chʼul espiritue i-abtej ta stojolal Pedro xchiʼuk yan yajtsʼaklomtak Cristo sventa akʼo xlik kʼopojikuk ta skʼop li buchʼutik ikʼot svulaʼanik Jerusalene. Ta skoj taje, li jtakbole lik skʼopon li epal krixchanoetik te tsobolike (Hech. 2:14-36). Li jtakbol taje ti mu toʼox snop baʼyel li kʼusi chale xchiʼuk ti mu toʼox xiʼe, tsatsubtasbat yoʼonton sventa xchol batel mantal akʼo mi la snuptan kontrainel xchiʼuk nutsel (Hech. 4:18-20, 31). Jech xtok, ikoltaat yuʼun chʼul espiritu sventa xaʼibe smelolal kʼusitik ti mu toʼox xojtikine (Hech. 5:8, 9). I-akʼbat sjuʼel xtok sventa xchaʼkuxes jun anima (Hech. 9:40).

7. Kʼalal i-akʼbat chʼul espiritu li Pedroe, ¿kʼusitik chanubtaseletik yuʼun Jesús laj yaʼibe lek smelolal?

⁷ Kʼalal mu toʼox xkʼot yorail li Pentecostese, li Pedroe ep xaʼox laj yaʼibe smelolal li kʼusitik laj yakʼ ta chanel Jesuse (Mat. 16:16, 17; Juan 6:68). Manchuk mi jech, oy to kʼusitik mu xaʼibe lek smelolal, jech kʼuchaʼal ti muʼyuk xa sbekʼtal stakopal ichaʼkuxi ta yoxibal kʼakʼal li Cristoe xchiʼuk ti ta vinajel tspas talel mantale (Juan 20:6-10; Hech. 1:6). Jech xtok, mu toʼox xaʼibe smelol kʼuxi ti oy jlom krixchanoetik chkʼatajik ta kuxlejaletik ti mu xvinajik ta kʼelele xchiʼuk ti ch-ajvalilajik li ta Ajvalilal yuʼun Diose. ¿Bakʼin laj yaʼibe smelolal taje? Jaʼo kʼalal i-akʼbat chʼul espiritue xchiʼuk ti laj yichʼ tʼujel sventa xuʼ chbat ta vinajele.

8. ¿Kʼusitik chanubtasel xuʼ xojtikinik li buchʼutik tʼujbil chbatik ta vinajel xchiʼuk li yan chijetike?

⁸ Li yajtsʼaklomtak Cristo eke mas to laj yaʼibeik smelolal chanubtaseletik yuʼun Dios kʼalal i-akʼbatik chʼul espiritue. Ta sjuʼel Dios la stsʼibaik li Tsʼibetik ta Griego Kʼop ti chalbe  skʼoplal Cristo ti chal kʼusitik labal sba li kʼusitik tskʼan tspas Jeovae (Efe. 3:8-11, 18). Li buchʼutik tʼujbil chbatik ta vinajel xchiʼuk li yan chijetike toj echʼ xa noʼox sbalil ta jtabetik li chanubtaseletik taje (Juan 10:16). ¿Mi chkakʼtik ta ilel ti oy sbalil chkiltik li chanubtasel ta jtatik yuʼun li chʼul espiritu ta Skʼop Diose xchiʼuk ti tskoltautik ta yaʼibel smelolale?

Li Pabloe «ventainbil yoʼnton yuʼun li Chʼul Espiritue»

9. ¿Kʼusi ipas yuʼun Pablo koliyal li chʼul espiritue?

⁹ Kʼalal i-echʼ xaʼox jun jabil li kʼin Pentecostese, li Saulo, ti Pablo laj yichʼ ojtikinel ta tsʼakale, laj yichʼ chʼul espiritu ek. Ep ta tos kʼuyelan i-abtej ta stojolal, li junantike ta to jtabetik sbalil li avi eke. Jech kʼuchaʼal liʼe, tijbat yoʼonton stsʼibael chanlajuneb livroetik yuʼun Vivlia. Jech kʼuchaʼal li Pedroe, li Pablo eke ikoltaat ta chʼul espiritu sventa xaʼibe smelolal xchiʼuk ti lek jamal stsʼiba ta sventa li kuxlejal ta vinajel ti mu snaʼ xcham xlaje. Jech xtok, i-akʼbat sjuʼel sventa xpoxta jchameletik, tslokʼesbe pukujetik ta yoʼonton li krixchanoetike xchiʼuk sventa chchaʼkuxes animaetik. Pe tijbat yoʼonton yuʼun chʼul espiritu sventa spas jun abtelal ti mas to tsots skʼoplale. Sventa li abtelal taje, li Diose yakal-o chkoltavan sventa chichʼ pasel li avie, akʼo mi maʼuk xa ta skʼelobil juʼelal.

10. ¿Kʼuxi ikoltaat Pablo yuʼun chʼul espiritu sventa xjambat ye?

¹⁰ Kʼalal te toʼox ta Chipre li Pabloe ventainbil yoʼonton yuʼun chʼul espiritu xchiʼuk jamal laj yalbe smul jun j-akʼ-chamel. Li ajvalil ta Chipree la stsʼetanbe lek xchikinal li kʼusitik laj yale. «Ichʼay yoʼnton yuʼun li chanubtasel ta sventa [Jeovae]», vaʼun la xchʼam li kʼusitik melele (Hech. 13:8-12). Li jtakbole lek xvinaj ti xaʼibe smelolal ti sventa xichʼ cholel li mantale tsots skʼoplal ti jaʼuk xbeiltasvan li chʼul espiritue (Mat. 10:20). Jech oxal, laj yalbe yajtsʼaklomtak Cristo ta Éfeso ti akʼo pasbatuk orasion ta stojolal sventa akʼo xjambat yee (Efe. 6:18-20).

11. ¿Kʼuxi laj yichʼ beiltasel yuʼun xchʼul espiritu Dios li Pabloe?

¹¹ Akʼo mi ikoltaat yuʼun chʼul espiritu sventa xjambat ye o xkʼopoj ta jlom lumetik li Pabloe, li ta yantike i-albat ti jaʼ lek mu xkʼopoje. Jech xtok, ibeiltasat kʼalal ibat ta misioneroale (Hech. 13:2; kʼelo Hechos 16:6-10). Sventa tsbeiltas-o batel cholmantal li avi eke, li Jeovae yakal tstunes xchʼul espiritu. Kʼuchaʼal li Pabloe, ta sjunul koʼontontik xchiʼuk ta muyubajel ta xkakʼbetik batel yipal ta xcholel li Skʼop Dios eke. Ta melel, akʼo mi mu jechuk toj labal sba tsbeiltasutik chʼul espiritu jech kʼuchaʼal la spas ta stojolal li Pabloe, xuʼ jchʼuntik ta melel ti tsbeiltasutik sventa xijkʼot ta stojolal li buchʼutik tskʼan chojtikinik mantale (Juan 6:44).

«Ep ta chop li cʼusi [...] ta pasele»

12-14. Albo skʼoplal mi koʼol kʼuyelan ch-abtej chʼul espiritu ta skotolal li yajtuneltak Diose.

¹² Ta melel, li buchʼutik kakʼoj xa jkuxlejaltik ta stojolal Diose, ta jta spatobil koʼontontik kʼalal ta jvules ta joltik kʼuxi laj yakʼbe bendision Jeova li yajtsʼaklomtak Cristo ti laj yichʼik tʼujel sventa chbatik ta vinajel ta baʼyel sigloe. Jkʼeltik kʼusi la stsʼibabe batel Pablo li jcorintoetik ta sventa li jeltos abtelaletik stakʼ pasel ta skoj li chʼul espiritue: «Ep ta chop li matanale, pero  jun noʼox li Chʼul Espíritu chijyacʼbutique. Ep ta chop li abtele, pero jun noʼox li Yajvale. Ep ta chop li cʼusi tsotsic ta pasele, pero jun noʼox li Dios ti chacʼ ta pasel scotole» (1 Cor. 12:4-6, 11). Li kʼusi laj yal Pabloe jaʼ ti jelel kʼuyelan ch-abtej ta jujun yajtunel Dios li chʼul espiritue, jaʼ noʼox tstsak ta venta li kʼusi oy ta yoʼonton tskʼan chkʼot ta pasele. Ta melel, tskolta li juteb chijetik yuʼun Cristoe xchiʼuk li yan chijetike (Luc. 12:32; Juan 10:16). Manchuk mi jech, mu koʼoluk ch-abtej ta stojolal li buchʼutik ta tsobobbaile.

¹³ Jech kʼuchaʼal liʼe, li moletike vaʼanbilik yuʼun chʼul espiritu (Hech. 20:28). Pe akʼo mi jech, mu jechuk staoj yabtelik skotolik li buchʼutik tʼujbil chbatik ta vinajele. Taje jaʼ chakʼ ta ilel ti chʼul espiritue jelel kʼuyelan ch-abtej ta stojolal li ermanoetik ta tsobobbaile.

¹⁴ Li Jeovae chakʼbe «Espíritu sventa chacʼ cʼotan[u]c ta Xnichʼon» li buchʼutik chbatik ta vinajele, jaʼ xkaltik chakʼbe snaʼik ti jaʼ xnichʼnabtake. Sventa taje tstunes xchʼul espiritu. Li espiritu taje jaʼ itun sventa la xchaʼkuxes li jun noʼox Xnichʼone xchiʼuk ti laj yakʼbe xkuxlejal sbatel osil ta vinajele (kʼelo Romanos 8:11, 15). Jech xtok, jaʼ la stunes sventa la spas li kʼusitik oy ta vinajelbalumile (Gén. 1:1-3). Xchiʼuk xtok, li juʼelal taje la skolta Bezaleel ta spasel li chʼulna pasbil ta nukule, li Sansone i-akʼbat yip ti mu jechuk kʼuchaʼal yuʼun krixchanoetike xchiʼuk li Pedro eke la skolta sventa chanav ta ba voʼ. Pe oy kʼusi skʼan jtsaktik ta venta: li chʼul espiritue naka noʼox la sbeiltas jlom krixchanoetik, pe jech xtok, itun sventa chichʼ tʼujel jlom krixchanoetik. Ta sventa taje, li buchʼu xuʼ chal mi tʼujbil jun krixchanoe jaʼ stuk li Jeovae, li chʼul espiritue jaʼ noʼox tstunes li Jeovae.

15. Albo smelolal mi jech-o sbatel osil chichʼik tʼujel yuʼun chʼul espiritu sventa chbatik ta vinajel li krixchanoetike.

¹⁵ Kʼuchaʼal chkiltike, leʼ xa noʼox ta jayibuk smilal jabile li Jeovae oy xa onoʼox tukʼil yajtuneltak ta Balumil xchiʼuk ti stunes yip sventa jelajtik kʼuyelan tskoltaane. Li ta Pentecostés ta sjabilal 33 jaʼ to te ilik yichʼik akʼbel chʼul espiritu li vinik antsetik sventa chbatik ta vinajele, pe taje chkʼot yorail ti mu xa jechuk chichʼ pasele. Manchuk mi jech, li Diose chakʼbe-o yip ch-abtej yajtuneltak sventa xuʼ spasik sbatel osil li kʼusi tskʼan yoʼontone.

16. ¿Kʼusi yakal lek chkʼot ta pasel yuʼunik yajtsʼaklomtak Cristo ta skoj li chʼul espiritue?

¹⁶ ¿Kʼusi yakal lek chkʼot ta pasel yuʼunik li yajtuneltak Dios ta sventa ti koltabilik yuʼun li yip ch-abteje? Ta Apocalipsis 22:17 xi tstakʼe: «Li Chʼul Espíritu xchiʼuc li yajnil Chʼium Chije jech chalic: “Laʼ me ta ora”, xiic. Li bochʼotic chaʼyic li cʼop liʼ tsʼibabile jech acʼo yalic ec: “Laʼ me ta ora”, acʼo xiicuc. Li bochʼotic taquin yoʼntonique acʼo talicuc ta stojol li Jesuse. Li bochʼo tscʼane smoton ch-acʼbat li voʼ sventa cuxlejale». Ta skoj li chʼul espiritue, li yajtsʼaklomtak Cristoe tstak ta ikʼel «li bochʼotic taquin yoʼntoni[k]» sventa chuchʼik li voʼ sventa kuxlejal chakʼ Jeovae. Li buchʼutik tʼujbil chbatik ta vinajele jaʼ jbabeik li ta cholmantale, li yan chijetike chkoltavanik ek. Li chaʼvokʼ taje beiltasbilik ta chʼul espiritu. Buyuk noʼox spatoj yoʼonton ta xkuxiik, yakʼoj sbaik ta stojolal Dios xchiʼuk yichʼojik xa voʼ «ta sventa li [Totile] xchiʼuc ta [sventa li Nichʼonile] xchiʼuc ta sventa li Chʼul Espiritue» (Mat. 28:19). Skotolik chakʼ sbaik ta beiltasel ta chʼul espiritu xchiʼuk ch-abtej ta stojolalik (Gál. 5:22, 23). Li chaʼvokʼ yajtsʼaklomtak Cristo taje chakʼ sbaik ta koltael sventa xchʼunik batel li tsatsal mantaletik yoʼ sakuk li xkuxlejalike (2 Cor. 7:1; Apo. 7:9, 14).

Mu xkiktatik skʼanel chʼul espiritu

17. ¿Kʼuxi chkakʼtik iluk ti kichʼojtik chʼul espiritue?

¹⁷ Jaʼ yuʼun mu ventauk mi chijbat ta vinajel o mi liʼ chijkom ta Balumil ta sbatel osile, li Jeovae chakʼbutik li «svuʼel stu[ke]», ti jaʼ tskoltautik sventa tukʼ-o koʼontontik ta stojolal xchiʼuk sventa jta li jmotontike (2 Cor. 4:7). Bateltik li krixchanoetike, tslabanutik ta skoj ti mu xkiktatik xcholel li lekil aʼyej ta  sventa li Ajvalilal yuʼun Diose. Jvules ta joltik ti «[chchopolcʼoptavanik] ta scoj li Cristoe». Pe mi mu xkiktatik xcholel li mantale, jun koʼontontik xchiʼuk chkakʼtik ta ilel ti «Chʼul Espíritu yuʼun Dios ti toj echʼem slequilale te [xchiʼinojotik-o]» (1 Ped. 4:14).

18, 19. ¿Kʼuxi ta skoltautik li chʼul espiritue, xchiʼuk kʼusi jpʼel-o ta koʼontontik spasel?

¹⁸ Mi ta sjunul koʼontontik ta jkʼanbetik Jeova li xchʼul espiritue, ta me xakʼbutik, taje jaʼ me chakʼ spas kuʼuntik lek li kʼusi jnaʼtik xa onoʼox spasel xchiʼuk ti sventa ta sjunuluk koʼontontik xijtunutik ta stojolale. Xi onoʼox chal li Vivliae: «Jaʼ Dios laj yacʼ ta avoʼntonic ti chacʼan chapasic cʼusitic leque, xchiʼuc jaʼ chacʼ cʼotuc ta pasel avuʼunic li cʼusi tscʼane». Jaʼ yuʼun, tsots skʼoplal ti jchʼuntik-o li mantal liʼe: «[P]asbeic yabtelal li coltael ataojique, tsotsuc me scʼoplal chavaʼyic, xiʼanic me yuʼun li Diose». ¿Kʼuxi xuʼ spas kuʼuntik taje? Jaʼ ti xkakʼ jbatik ta stojolal li chʼul espiritu xchiʼuk kaltik-o batel «li Lequil Aʼyej sventa cuxlejale», mu me xkiktatik-o (Fili. 2:12, 13, 16).

¹⁹ Mi jpatoj lek koʼontontik ta stojolal li chʼul espiritue, ta sjunul me koʼontontik ta jpastik li abtelaletik ta steklumal Jeova ti jaʼ yakʼojbutike, mas me chkakʼbetik yipal spasel lek jujun kʼakʼal xchiʼuk jkʼanbetik koltael li Diose (Sant. 1:5). Li Jeovae ta xakʼbutik kʼusitik xuʼ skoltautik sventa xkaʼibetik lek li Skʼope, xkuch kuʼuntik li jvokoltike xchiʼuk ta jcholtik li lekil aʼyeje. Kʼalal ta jkʼanbetik chʼul espiritu li Diose, skʼan jvules ta joltik liʼe: «Chacalboxuc avaʼyic: Cʼanic, chaʼacʼbatic; saʼic, chataic; tijic, chajambatic» (Luc. 11:9, 13). Jaʼ jech, mu me xkiktatik skʼanbel Jeova ti akʼo sbeiltasutik-o xchʼul espiritu jech kʼuchaʼal spasoj xa onoʼox tale.

¿Mi xuʼ xavalbe smelolal?

• ¿Kʼusi stalelal María xuʼ jchanbetik sventa jtatik bendisionetik?

• ¿Kʼutik yelan ibeiltasat yuʼun xchʼul espiritu Dios li Pabloe?

• ¿Kʼuxi tsbeiltasutik chʼul espiritu li avie?

[Sjakʼobiltak sventa xchanobil]

[Lokʼol ta pajina 24]

Koliyal chʼul espiritu, li Pabloe itsal yuʼun pukujetik

[Lokʼol ta pajina 26]

Mi chijbat ta vinajel o mi liʼ chijkom ta Balumil, li Diose chakʼbutik xchʼul espiritu