¿Mi xvul ta ajol?

¿Mi oy akʼeloj lek li revista Li Jkʼel osil ta toyole, ti mas achʼik to lokʼeme? Mi jeche, paso preva mi xtakʼ avuʼun li kʼusitik liʼe:

• ¿Kʼusi la skʼan laj yal Dios kʼalal «vuʼun avosilun chicʼot. Vuʼun avuʼunun chicʼot» xut li jvokʼ snitilulal jlevietike?

Li yan snitilultak Israele chʼakbat yosilik, pe li jlevietike muʼyuk laj yichʼik. Pe jaʼ «avuʼunun chicʼot» x-utatik yuʼun li Jeovae (Núm. 18:20). Akʼo mi muʼyuk laj yichʼ vokʼbel yosilik, la staik jun abtelal ti tsots skʼoplale. Ta melel, ta x-akʼbatik yuʼun Jeova li kʼusitik chtun yuʼunike. Li yajtsʼaklomtak Cristo ti chtunik sventa li Ajvalilal yuʼun Dios eke, xuʼ spat yoʼontonik ti ch-akʼbatik li kʼusitik chtun yuʼunike (15/9, pajina 7, 8, 13).

• ¿Buchʼu skʼan xchanubtas sventa Dios li ololetike?

Jech kʼuchaʼal chal li Vivliae, li totil meʼiletike jaʼ li buchʼu skʼan jech spasike (Pro. 1:8; Efe. 6:4). Lek vinajem ti kʼalal jech chichʼ pasele ep ta stabeik sbalil li ololetike (1/10, pajina 6, 7).

• ¿Kʼuxi xuʼ xavichʼ ta mukʼ anup achiʼil kʼalal chachiʼin abaik ta loʼile?

Kʼalal chaloʼilajik xchiʼuk anup achiʼilike «aʼyo lec avaʼyic li cʼusi chaʼalbatique. Mu xacʼopojic ta anil; mu xaʼilinic ta anil» (Sant. 1:19). Li buchʼu lek chaʼi li kʼusi chichʼ albele maʼuk noʼox ti chchikintae, moʼoj, yuʼun chkʼot ta yoʼonton xtok. Akʼo mi atuk oyoxuk, mu me toj kʼuxuk xkʼot ta oʼontonal li kʼusitik chavalanbe abaike o ti chopol chavaʼiike, akʼo mi tskʼan avoʼontonik ti jech chapasike. Kʼalal chichʼ sbaik ta mukʼ li malalil xchiʼuk ajnilale xkuxet noʼox yoʼontonik ta snaik (Rut 1:9) (1/10, pajina 11, 12).

• ¿Mi chopol van chaʼi Jeova kʼalal oy kʼusi chopol ta jpastike?

Li Salmo 78: 40 xchiʼuk 41 chakʼ ta ilel kʼuyelan laj yaʼi sba Jeova kʼalal chopol la spas sbaik li voʼneal j-israeletike. Li jtsʼibajom yuʼun Salmoe xi chale: «Toj ep ta velta la stoy sbaic ta stojol te ta xocol banamil». Xi to chal xtoke: «La saʼbeic scʼacʼal yoʼnton yan velta noxtoc». Jaʼ yuʼun chaʼa, mu me jaʼuk jpastik li kʼusi tsyayijesbe yoʼonton li Diose, jaʼ jpastik batel li kʼusi lek sventa xmuyubaj-o yoʼonton kuʼuntike (1/10, pajina 27).

• ¿Kʼusi tskoltautik sventa jnaʼtik mi lek o mi muʼyuk lek li jun chʼayob oʼontonale?

Sventa jnaʼtik mi muʼyuk xchopolal xchiʼuk mi lek chil Jeova li kʼusi ta jchʼay-o koʼontontike skʼan jakʼbe jbatik: ¿Kʼusi smakoj li chʼayob oʼontonale? ¿Kʼusi ora ta xichʼ pasel? ¿Buchʼu ta jchiʼin? (15/10, pajina 9-12).

• ¿Kʼu yuʼun laj yal Pablo ti mas lek ti chʼabal snup xchiʼilike?

Kʼalal la stakbe batel karta jcorintoetik li Pabloe, laj yalbe kʼusitik xuʼ staik ta mantal kʼalal chʼabal to snup xchiʼilike (1 Cor. 7:8). Ta kapitulo 13 kʼalal ta 20 yuʼun Hechose, chal ti ixanav xchiʼuk misioneroetik, la slikes cholmantal xchiʼuk la slikes tsobajeletik ta yantik lum. La snup vokoliletik ti muʼyuk bu jech jnuptanojtike (2 Cor. 11:23-27, 32, 33). Ti oyuk yajnil xchiʼuk xnichʼnabtake muʼyuk bu ipas yuʼun li kʼusitik taje (15/10, pajina 13-15).

• ¿Kʼuxi tskoltautik sventa mu jkʼeltik pornografia li kʼusi chal Proverbios 7:6-23?

Li ta versikuloetik taje chalbe skʼoplal jun chex kerem ti chanav batel ta jun kaye ti snaʼoj ti te nakal li jmulavil antse. Li avie skʼan xkakʼtik persa mu jkʼeltik lokʼoletik xchiʼuk videoetik ti chakʼ jnoptik kʼusitik chopolike. Tsots skʼoplal skʼan jkʼanbetik koltael Jeova kʼalal mu to xlik jtatik ta kʼelel li kʼusitik taje (15/11, pajina 9, 10).

• ¿Kʼusi xuʼ jchantik li ta lokʼolkʼop laj yal Jesús ta sventa li jtsʼunolajele?

Li ta slokʼolkʼop Jesuse, laj yal ti kʼalal chbat yoʼonton jun krixchano ta sventa li cʼusitic oy ta banamile xuʼ netʼbil chkom yuʼun li Skʼop Dios ti te xaʼox ta yoʼontone xchiʼuk ti mu xa xakʼ sate (Mat. 13:22). Sventa mu xijpʼaj li ta petsʼ taje, muyubajkutik noʼox ta sventa li kʼusitik oy kuʼuntike xchiʼuk ti xijkuxi jech kʼuchaʼal jelavel noʼox chijelavutik liʼ ta balumile (15/11, pajina 19).