Ajvalil paleetik ti tskolta krixchanoetike
Ajvalil paleetik ti tskolta krixchanoetike
«Li voʼoxuque stsʼunubaloxuc xa li bochʼo tʼujbil yuʼun Diose, batsʼi pale xa cʼotemoxuc ta stojol Dios [o «pale ti ch-ajvalilajike», NM], chʼul mucʼta lum xa cʼotemoxuc, yuʼuninojoxuc xa li Diose.» (1 PED. 2:9)
¿MI X-ALBE AVUʼUN SMELOLAL?
¿Bakʼin laj yichʼ alel ti ch-ayan paleetik ti ch-ajvalilajike?
Li achʼ tratoe, ¿kʼuxi ch-ayan yuʼun paleetik ti ch-ajvalilajike?
¿Kʼusi bendisionetik chichʼik talel ta Balumil li paleetik ti ch-ajvalilajike?
1. ¿Kʼu yuʼun Snaʼobil slajel Cristo sbi xtok li «veʼlil ta bat kʼakʼal yuʼun Kajvaltike»?
LI TA akʼobal 14 yuʼun nisán ta sjabilal 33 ta jkʼakʼaliltike, li Jesucristo xchiʼuk lajchaʼvoʼ yajtakboltake slajeb xa velta la spasik li kʼin Koltael yuʼun judioetike. Kʼalal laj xaʼox stak lokʼel li j-akʼvanej ta kʼabal ti jaʼ li Judas Iscariotee, li Jesuse la slikes jun achʼ kʼin ti «veʼlil ta bat kʼakʼal yuʼun Kajvaltik» la sbiin ta tsʼakale (1 Cor. 11:20, NM). Ta skoj ti chib to velta laj yal Jesús «jech me xapasilanic o sventa chanaʼilanicun» ti xie, li kʼusi la slikes ti jaʼ sventa snaʼobil-o slajele, laj yichʼ ojtikinel kʼuchaʼal Snaʼobil slajel Cristo (1 Cor. 11:24, 25). Ta skoj ti chchʼunbeik smantal Jesús li yajrextikotak Jeovae, jujun jabil tstsob sbaik ta sjunul balumil sventa li Snaʼobil slajel Cristoe. Li ta 2012, jech kʼuchaʼal chal li ta skalendario voʼne judioetike li 14 yuʼun nisane chkʼot ta jueves 5 yuʼun avril kʼalal mi chʼayem xaʼox batel Kʼakʼale.
2. ¿Kʼusi laj yal Jesús ta sventa li pan xchiʼuk yaʼlel tsʼusube?
2 Li jtakbol Lucase ta chib noʼox versikulo chal li kʼusitik laj yal xchiʼuk la spas Jesús ti vaʼ bat kʼakʼal taje: «La stsac [...] jun pan; la stojbe ta vocol Dios. La svocʼ li pane; laj yacʼbe li yajchancʼoptaque. Jech laj yalbe: “Liʼi jaʼ jbecʼtal, yuʼun ta xcacʼ jba ta milel ta acojic. Jech me xapasilanic, yuʼun jech chanaʼilanicun o” xut. Cʼalal ilaj yoʼntonic ta veʼele, la stsac noxtoc li vasoe. Jaʼ coʼol la pas jech chac cʼu chac cʼu chaʼal la spas ta sventa li pane, jech laj yalbe li yajchancʼoptaque: “Li yaʼlel tsʼusub [o «kopa», NM] liʼi [...], jaʼ sventa li cʼusi achʼ chapanbile, yuʼun ta xcacʼ ta malel ta acojic”» (Luc. 22:19, 20). ¿Kʼusi laj yaʼibeik smelolal jtakboletik ta sventa taje?
3. ¿Kʼusi laj yaʼibeik smelolal jtakboletik ta sventa li pan xchiʼuk li yaʼlel tsʼusube?
3 Ta skoj ti judío stsʼunbalik li jtakboletike xojtikinik lek kʼuyelan chakʼbeik Dios milbil matanaletik ta chʼulna ta Jerusalén li paleetike. Li chikʼbil matanaletik taje, jaʼ sventa lek ch-ilatik yuʼun li Jeovae xchiʼuk bakʼintike jaʼ sventa xchʼaybat-o smulik (Lev. 1:4; 22:17-29). Li jtakboletike laj van yaʼibeik smelolal ti kʼalal laj yal Jesús ti chakʼ sbekʼtal stakopal xchiʼuk xchʼichʼel ta stojolalike, jaʼ la skʼan laj yal ti chakʼ ta matanal li stukʼil kuxlejale. Li sbalil li matanal taje toj echʼ noʼox ep jaʼ mu sta sbalil li milbil matanaletike.
4. ¿Kʼusi la skʼan laj yal Jesús kʼalal xi laj yale: «Li yaʼlel tsʼusub [o «kopa», NM] liʼi [...], jaʼ sventa li cʼusi achʼ chapanbile»?
4 ¿Kʼusi la skʼan laj yal Jesús kʼalal xi laj yale: «Li yaʼlel tsʼusub [o «kopa», NM] liʼi [...], jaʼ sventa li cʼusi achʼ chapanbile»? Li jtakboletike xojtikinik xa onoʼox li albil kʼop ta sventa li kʼusi achʼ trato ti te chal ta Jeremías 31:31-33 (kʼelo). Li kʼusi laj yal Jesuse jaʼ ti chlik xaʼox skʼoplal yuʼun li achʼ trato taje ti jaʼ chlaj skʼoplal li trato la spas Jeova xchiʼuk j-israeletik ta stojolal Moisese. ¿Kʼuxi snitojbe sba skʼoplalik li chib trato taje?
5. Li voʼneal Israele, ¿kʼusi xuʼ staik ta skoj li trato la spas Jeova xchiʼukike?
5 Ta melel, ti kʼusi tun-o li chib tratoetik taje snitojbe sba skʼoplalik. Kʼalal la spas trato Jeova xchiʼuk j-israeletike, xi laj yalbee: «Me chachʼunic scotol li cʼusi caloje, xchiʼuc me chavichʼic ta mucʼ li cʼusi chapanbil cuʼune, voʼoxuc noʼox atuquic lec chaquiloxuc ta scotol li yantic lumetique yuʼun jaʼ cuʼun scotol li banamile. Voʼoxuc [«ajvalilal», NM] pale cʼotemoxuc cuʼun, xchiʼuc voʼoxuc jun lum ti vocʼbiloxuc o ta jtojole» (Éxo. 19:5, 6). ¿Kʼuxi van laj yaʼibeik smelolal j-israeletik taje?
LAJ YICHʼ ALEL TI CH-AYAN PALE TI CH-AJVALILAJIKE
6. ¿Kʼusi kʼot ta pasel yuʼun li trato la spas Jeova xchiʼuk j-israeletike?
6 Li j-israeletike xaʼibeik lek smelolal li kʼusi skʼan xal li jpʼel kʼop trato xie, yuʼun li Jeovae jech xa onoʼox spasoj xchiʼuk Noé xchiʼuk Abraham (Gén. 6:18; 9:8-17; 15:18; 17:1-9). Ta sventa li trato la spas Jeova xchiʼuk Abrahame laj onoʼox yal ti ta smomnichʼnab li yajtunel taje «chichʼ bendición scotol li mucʼtic lumetic liʼ ta banamile» (Gén. 22:18). Li trato la spas Jeova xchiʼuk li j-israeletike jaʼ koltavan sventa xkʼot ta pasel li kʼusi albil taje. Ta skoj li trato taje li jteklum Israele jaʼ xa noʼox stuk lek ilbil yuʼun Jeova ta skotol li yantik lumetike. ¿Kʼusi sventa? Jaʼ sventa chkʼotik ta ajvalilal pale yuʼun Jeova.
7. ¿Kʼusi skʼan xal kʼalal «voʼoxuc [«ajvalilal», NM] pale» xie?
7 Li j-israeletike oy toʼox ajvalil yuʼunik xchiʼuk paleetik, pe jaʼ noʼox Melquisedec, jun vinik ta voʼne, tun ta ajvalil xchiʼuk ta paleal ti lek ilat yuʼun li Jeovae (Gén. 14:18). Li Jeovae xi laj yalbe li steklumale: «Voʼoxuc [«ajvalilal», NM] pale» chakʼotik kuʼun. Jech kʼuchaʼal laj yichʼ alel ta tsʼakal li ta tsʼibetik laj yakʼ ta naʼel Diose, taje jaʼ skʼan xal ti ch-ayan ajvaliletik ti chtunik kʼuchaʼal paleal xtoke, jaʼ xkaltik, «ta pale [«ti ch-ajvalilajike», NM]» (1 Ped. 2:9).
8. ¿Kʼusi abtelal tspasik toʼox li buchʼutik laj yichʼik vaʼanel ta paleale?
8 Li yabtel jun ajvalile jaʼ ti tspas mantale. Pe ¿kʼusi yabtel li palee? Ta Hebreos 5:1 xi chalbe smelolale: «Scotol li bochʼotic iʼochic ta banquilal pale ti itʼujatic loqʼuel ta stojol jchiʼiltactique, jaʼ yabtel chcʼopojic ta stojol Dios yuʼun ti jchiʼiltactique. Jaʼ ta xaqʼuic ta stojol Dios li matanaletique xchiʼuc li milbil matanaletic sventa smulique». Jech oxal chaʼa, li jun pale vaʼanbil yuʼun Jeovae, jaʼ jkʼopojel kʼotem ta stojolal Dios yuʼun li jmulavil krixchanoetike xchiʼuk jaʼ tskʼanbe vokol Dios ta stojolik kʼalal chakʼ li matanal kʼuchaʼal albile. Ta yan xtoke, chkʼopojik ta stojol Dios kʼalal chchanubtasik li jteklum ta sventa Diose (Lev. 10:8-11; Mal. 2:7). Li kʼusi tskʼanik li buchʼutik laj yichʼik vaʼanel ta paleal kʼalal chtunike, jaʼ ti lekuk xil sbaik xchiʼuk Dios li krixchanoetike.
9. 1) ¿Kʼusi skʼan spasik li j-israeletik sventa xuʼ xkʼotik li ta ajvalilal pale yuʼun Jeovae? 2) ¿Kʼu yuʼun la svaʼan paleetik ta jteklum Israel li Jeovae? 3) Li j-israeletike, ¿kʼu yuʼun muʼyuk xkʼotik ta ajvalilal pale jech kʼuchaʼal albil xaʼox li ta trato la spas Jeova xchiʼuk j-israeletike?
9 Jech taje, ta skoj li trato la spas Jeova xchiʼuk j-israeletike jaʼ sventa x-ayan yuʼunik paleetik ti ch-ajvalilajik sventa tstabeik sbalil li «yantic lumetique». Pe li kʼusi kʼupil sba albatik taje, jaʼ noʼox me xuʼ staik mi la xchʼunik li mantal liʼe: «Me chachʼunic scotol li cʼusi caloje, xchiʼuc me chavichʼic ta mucʼ li cʼusi chapanbil cuʼune». ¿Mi xchʼun van yuʼunik skotol smantaltak Jeova li j-israeletike? Xchʼun, pe mu tukʼuk pas yuʼunik (Rom. 3:19, 20). Jaʼ yuʼun, li Jeovae la svaʼan paleetik li ta jteklum Israele, ti mu xuʼ x-ochik ta ajvalile. Taje jaʼ sventa chakʼik milbil matanaletik ta stojol Dios ta skoj li smulik ti mu yolbajuk tspasik li j-israeletike (Lev. 4:1–6:7). Li muliletik taje, te me tsakal skʼoplal li smul paleetik eke (Heb. 5:1-3; 8:3). Li Jeovae la xchʼam li matanaletik taje, pe mu xchʼay-o ta jyalel smulik li buchʼutik chakʼike, yuʼun chmalubik xchiʼuk chchamik. Jech, ta skoj li trato la spas Jeova xchiʼuk j-israeletike, li paleetike mu spas yuʼunik ti batsʼi lek xil-o sbaik xchiʼuk Dios manchuk mi tukʼil j-israeletik. Xi laj yal li jtakbol Pabloe: «[Li] xchʼichʼel ti tot vacaxetique, ti tentsunetique, jʼechʼel mu xuʼ yuʼun ta stubel ti mulile» (Heb. 10:1-4). Ta skoj ti muʼyuk xichʼik ta mukʼ li Mantaletik laj yichʼ akʼbel Moisese la stoj smul li j-israeletike (Gál. 3:10). Ta skoj taje, li j-israeletike muʼyuk xkʼotik ta ajvalilal pale jech kʼuchaʼal albil xaʼox li ta trato la spas Jeova xchiʼuk j-israeletike.
10. ¿Kʼusi tun-o li trato la spas Jeova xchiʼuk li j-israeletike?
10 Vaʼun chaʼa, ¿mi jecheʼ van li kʼusi yaloj Jeova ti chakʼ kʼotuk ta «[«ajvalilal», NM] pale» li j-israeletike? Moʼoj. Mi ta sjunul yoʼonton chakʼik persa ta xchʼunel li mantale xuʼ spas yuʼunik jechuke, pe li ta trato la spas Jeova xchiʼuk j-israeletike mu stakʼ spasik jech taje. ¿Kʼu yuʼun? (Kʼelo Gálatas 3:19-25.) Li buchʼutik la xchʼunik lek li Mantal yakʼoj Moisese chabiatik ta sventa mu xichʼik ta mukʼ jecheʼ diosetik, jaʼ jech laj yakʼik venta xtok ti jmulavil krixchano li judioetike xchiʼuk laj yaʼibeik smelolal ti skʼan xakʼik milbil matanal ti masuk to leke, ti jaʼ xkom to li matanal chakʼ mero bankilal palee. Li mantal taje xkoʼolaj kʼuchaʼal jun «jʼicʼvanej» o mosoil ti la sbeiltas batel li judioetik ta stojolal Cristo o Mesías, ti «Tʼujbil» skʼan xale. Pe kʼalal mi vul ta lokʼel li Mesiase jaʼ ta sbeiltasatik batel ta achʼ trato ti yalojbe xa onoʼox skʼoplal li Jeremiase. Li buchʼutik chchʼamik Cristoe ch-albatik ti xuʼ ch-ochik li ta achʼ tratoe xchiʼuk ti chkʼotik ta ajvalilal pale yuʼun Jeovae. Kalbetik batel skʼoplal.
LI ACHʼ TRATOE CHAKʼ AYANUK PALEETIK TI CH-AJVALILAJIKE
11. Li Jesuse, ¿kʼuxi kʼot ta slikeb paleetik ti ch-ajvalilajike?
11 Li ta sjabilal 29 ta jkʼakʼaliltike, li Jesús ti likem ta Nazarete jaʼ kʼot ta Mesías. Kʼalal te van 30 xaʼox sjabilal yichʼoj li Jesuse laj yichʼ voʼ sventa chakʼ ta ilel ti oy ta yoʼonton tspas li kʼusi tskʼan yoʼonton Jeovae. Li Jeovae xi laj yal ta sventa li Jesuse: «Liʼi jaʼ Jnichʼon; lec jcʼanoj». Jech xtok, li Jeovae la stʼuj ta chʼul espiritu, maʼuk ta aseite (Mat. 3:13-17; Hech. 10:38). Kʼalal laj yichʼ tʼujel li Jesuse kʼot ta Mero Bankilal Pale xchiʼuk ta xkʼot ta Ajvalil ta tsʼakal ta stojolal li yajtsʼaklomtak Cristo ta Balumile (Heb. 1:8, 9; 5:5, 6). Li Jesuse jaʼ laj yakʼbe slikeb li batsʼi paleetik ti ch-ajvalilajike.
12. ¿Kʼusi kʼot ta pasel kʼalal laj yakʼ sba ta matanal li Jesuse?
12 Ta skoj ti jaʼ Mero Bankilal Pale li Jesuse, ¿kʼusi matanal xuʼ xakʼ sventa xtupʼbat-o smulik li jchʼunolajeletike? Jech kʼuchaʼal laj yal stuk ti skʼan xichʼ pasel li Snaʼobil slajele, jaʼ laj yakʼ ta matanal li stukʼil kuxlejale (kʼelo Hebreos 9:11, 12). Kʼalal laj yichʼ voʼ ta sjabilal 29 ta jkʼakʼaliltik li Jesuse, ti jaʼo akʼbat yabtel kʼuchaʼal Mero Bankilal Palee, laj yil ep prevaetik xchiʼuk jaʼ to te paj xchapanel kʼalal chame (Heb. 4:15; 5:7-10). Kʼalal chaʼkuxi li Cristoe, muy batel ta vinajel xchiʼuk laj yakʼ ta stojol Jeova li sbalil matanal laj yakʼe (Heb. 9:24). Kʼalal te xaʼox ta vinajel li Jesuse jaʼ te lik kʼopojuk ta stojol Dios ta sventa li buchʼutik chakʼ xchʼunel yoʼontonik ta sventa li matanal laj yakʼ li Jesuse. Jech xtok, jaʼ koltaatik sventa chtunik ta stojolal Dios sventa jech xkuxiik (Heb. 7:25). Pe tun xtok sventa oyuk sbalil li achʼ tratoe (Heb. 8:6; 9:15).
13. ¿Kʼusi xuʼ staik ox li buchʼutik ochik ta achʼ tratoe?
13 Li buchʼutik laj yichʼik takel ta ikʼel sventa x-ochik li ta achʼ tratoe laj yichʼik tʼujel ta chʼul espiritu (2 Cor. 1:21). Jaʼ baʼyel laj yichʼik takel ta ikʼel li tukʼil judioetike, jaʼ tsʼakal to li jyanlum krixchanoetike (Efe. 3:5, 6). ¿Kʼusi xuʼ staik ta skoj taje? Jaʼ ti chichʼ-o tupʼbel smulike. Xi onoʼox yaloj li Jeovae: «Jʼechʼel ta jchʼaybe o ta coʼnton li xchopolilique; muʼyuc xa ta jtʼabbe o ta coʼnton li smulique» (Jer. 31:34). Kʼalal chʼaybil xaʼox lek li smulike xuʼ xaʼox xkʼotik ta «[«ajvalilal», NM] pale» yuʼun Jeova. Li Pedroe xi laj yalbe li buchʼutik tʼujbilik chbatik ta vinajele: «Li voʼoxuque stsʼunubaloxuc xa li bochʼo tʼujbil yuʼun Diose, batsʼi pale xa cʼotemoxuc ta stojol Dios [o «pale ti ch-ajvalilajike», NM], chʼul mucʼta lum xa cʼotemoxuc, yuʼuninojoxuc xa li Diose. Yuʼun jech acʼo apucbeic batel li cʼusitic toj lec la spas Diose, ti laj yicʼoxuc loqʼuel ta icʼal osile, ti laj yacʼoxuc ta sac osil ti toj jun yutsile» (1 Ped. 2:9). Li vaʼ kʼakʼal taje, li Pedroe jaʼ laj yalbe skʼoplal li Mantaletik laj yakʼbe Jeova li j-israeletike, xchiʼuk jaʼ la xchaʼalbe li yajtsʼaklomtak Cristo kʼalal ochik ta achʼ tratoe (Éxo. 19:5, 6).
AJVALILETIK XCHIʼUK PALEETIK TI TSKOLTAIK LI KRIXCHANOETIKE
14. ¿Bu chtunik li pale ti ch-ajvalilajike?
14 ¿Bu chtunik li buchʼutik ochemik ta achʼ tratoe? Liʼ chtunik ta Balumil kʼuchaʼal paleetike. Yuʼun li stukike vaʼanbilik yuʼun Jeova sventa chkʼopojik ta stojolal li krixchanoetike, taje jaʼo jech tspasik kʼalal chalik batel ti toj lek kʼusi spasoj li Jeovae xchiʼuk kʼalal chakʼik li veʼlil ta mantale (Mat. 24:45; 1 Ped. 2:4, 5). Kʼalal mi chamik xchiʼuk mi chaʼkuxiik xaʼoxe, koʼol chtunik xchiʼuk Cristo ta vinajel kʼuchaʼal ajvaliletik xchiʼuk paleetik (Luc. 22:29; 1 Ped. 1:3-5; Apo. 1:6). Taje jamal lek xvinaj, yuʼun li jtakbol Juane akʼbat yil yuʼun Dios ti oy jayibuk kuxlejaletik ti mu xvinajik ta kʼelel ti te nopol oyik ta xchotleb Jeova ta vinajele. Ta yeloval «li Chʼium Chije» ta «sqʼuejintaic jun achʼ qʼueoj, jech chal: “Ta achʼichʼal laj aman sventa chcʼotic ta yuʼuntac Dios li cristianoetic ta jujuchop stsʼunubal, ta jujuchop cʼop, ta jujun lum, xchiʼuc ta jujun banamile. Laj xa avacʼ ochicuc ta pasmantal; laj xa avacʼ ochicuc ta paleal ta stojol Dios, te xa tspasic mantal ta banamil”» (Apo. 5:8-10). Ta mas jelavele, xi akʼbat yil yuʼun Dios li Juane, xi laj yal ta sventa taje: «Jaʼ xa paleetic yuʼun Dios xchiʼuc Cristo cʼotemic. Jech coʼol tspasic mantal jmil (1,000) jabil xchiʼuquic li Cristoe» (Apo. 20:6). Kʼuchaʼal chkiltike, li krixchanoetik taje xchiʼuk li Cristoe, jaʼ skʼoplalik li pale ti ch-ajvalilajike ti tskoltaik li krixchanoetike.
15, 16. ¿Kʼusi bendisionetik chichʼik talel ta Balumil li paleetik ti ch-ajvalilajike?
15 ¿Kʼusi bendisionetik chichʼik talel liʼ ta Balumil li 144,000? Li ta Apocalipsis ta kapitulo 21 chalbe skʼoplal ti xkoʼolajik kʼuchaʼal jun lum ta vinajel li Achʼ Jerusalene, ti biiltasbil xtok kʼuchaʼal «yajnil li Chʼium Chij[e]» (Apo. 21:9). Li versikulo 2 kʼalal ta 4 xi chale: «Laj quil chyal tal ta vinajel li chʼul lume, jaʼ li achʼ Jerusalene. Te ilic tal ta stojol Dios ta vinajel. Lec chapal iyal tal jech chac cʼu chaʼal jun tseb ti lec smeltsanoj sba cʼalal yuʼun xa chnupine. Laj caʼay oy bochʼo tsots chcʼopoj tal ta mucʼta chotlebal, jech laj yal: “Qʼuelo avilic, liʼi jaʼ xa snaic xchiʼuc cristianoetic li Diose. Te ta xchiʼin o ta naclej. Jaʼ xa steclumal chcʼot o, jech ec li stuquique jaʼ Dios yuʼunic o. Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque”». ¡Toj echʼ xa noʼox kʼupil sba li bendisionetik taje! Kʼalal mi laj xaʼox skʼoplal li lajelale, ta me xchʼay skʼoplal li kʼusi chakʼ okʼele, li at-oʼontone, li kʼusi kʼux chkaʼitike. Li krixchanoetike muʼyuk xa smul ch-ilatik yuʼun Dios xchiʼuk lek xa chil sbaik xchiʼuk.
16 Ta Apocalipsis 22: 1, 2 chalbe mas skʼoplal li bendisionetik chichʼ talel li paleetik ti ch-ajvalilajike: «Laj yacʼbun quil jun lequil ucʼum; jaʼ voʼ sventa cuxlejal. Te chlocʼ tal ta xchotleb li Diose xchiʼuc li Chʼium Chije. Li ucʼume stsʼaytsʼun jech chac cʼu chaʼal nen. Ta oʼlol li mucʼta xoral yuʼun lume [li Achʼ Jerusalene], xchiʼuc ta jujujot tiʼ ucʼume te chʼiem teʼetic sventa cuxlejal. Lajchab velta tsatin ta jun jabil, jujun velta tsatin ta jujun u. Li yanale jaʼ sventa chcolic ta chamel scotol li cristianoetic te oyique». Ta sventa li kʼusi laj yichʼ alele, «scotol li cristianoetic» ta Balumile poxtabil xa chkomik li ta mulil ti jaʼ xkuchojbeik Adane. Ta melel, laj xaʼox skʼoplal skotol ti jech toʼox oy ta baʼyuke.
TSTSʼAKUBTAS YABTELIK LI PALEETIK TI CH-AJVALILAJIKE
17. Li paleetik ti ch-ajvalilajike, ¿kʼusi chakʼ kʼotuk ta pasel mi echʼ xaʼox jmil jabile?
17 Kʼalal mi echʼ xaʼox jmil jabile, li paleetik ti ch-ajvalilajike koltavanik xaʼox sventa xpasik ta tukʼil krixchanoetik li buchʼutik liʼ ta Balumile. Ta skoj ti jaʼ Mero Bankilal Pale xchiʼuk Ajvalil li Cristoe chalbe Jeova ti lek xaʼox skotol li krixchanoetike (kʼelo 1 Corintios 15:22-26). Kʼalal mi jech kʼot ta pasel taje tsuts xaʼox me yabtelik li paleetik ti ch-ajvalilajike.
18. Li paleetik ti ch-ajvalilajike, ¿kʼuxi chtunesatik yuʼun Jeova mi tsuts xaʼox li yabtelike?
18 Mi laj xaʼox taje, ¿kʼu yelan tstunes Jeova li buchʼutik staoj smotonik ta xchiʼinel ta abtel li Cristoe? Ta Apocalipsis 22: 5 chal ti «tspasic o mantal sbatel osil[e]». ¿Buchʼu tsventainik? Li ta Vivliae muʼyuk chal. Ta skoj ti chkuxiik sbatel osil xchiʼuk ti mu sok sbekʼtal stakopalike xchiʼuk ti snaʼojik xa kʼuxi tskoltaik li jmulavil krixchanoetike jaʼ chkoltaatik sventa ch-ajvalilajik-o sventa xkʼot ta pasel li kʼusi tskʼan tspas Jeovae.
19. ¿Kʼusi skʼan teuk ta joltik kʼalal mi li jbat li ta Snaʼobil slajel Cristoe?
19 Kʼalal mi la jtsob jbatik li ta Snaʼobil slajel Cristo ta 5 yuʼun avril ta 2012, skʼan me teuk ta joltik li chanubtaseletik ta Vivlia taje. Li buchʼutik tʼujbil chbatik ta vinajel ti liʼ to oyik ta Balumile tslajesik pan xchiʼuk chuchʼik yaʼlel tsʼusub, ti jaʼ skʼan xal ti ochemik xa li ta achʼ tratoe. Li pan xchiʼuk li yaʼlel tsʼusub ti jaʼ senyail li pojelal laj yakʼ Cristoe, jaʼ me chvulesbat ta sjolik li labal sba matanal xuʼ staik xchiʼuk li kʼusi oy ta sbaik sventa xkʼot ta pasel li kʼusi tskʼan tspas Dios ta sbatel osile. Kʼalal mi li jbat li ta Snaʼobil slajel Cristoe oyuk ta koʼontontik jtojtik ta vokol li matanal yakʼojbutik Jeovae. Li matanal taje jaʼ ti la svaʼan paleetik ti ch-ajvalilajik sventa chakʼbeik bendision li krixchanoetike.
[Sjakʼobiltak sventa xchanobil]
[Lokʼol ta pajina 29]
Li paleetik ti ch-ajvalilajike chichʼik talel bendisionetik ta balumil ta sbatel osil
