«¿Kʼuxi chkut ta jchol mantal li voʼone?»

Ta spʼejel Balumile epal ermanoetik tukʼ yoʼonton chcholik mantal manchuk mi tsots chil svokolik ta jtosuk chamel. Liʼe jaʼ jech kʼotem ta stojol Dalia, ti te nakal ta Vilnae, ta kapital yuʼun Lituania.

Li Daliae te van 35 sjabilal. Kʼalal vokʼe ip xa onoʼox ta ataque cerebral, jaʼ yuʼun ch-alub sbekʼtal stakopal xchiʼuk mu xlokʼ lek chkʼopoj. Ta skoj taje, li buchʼu noʼox xaʼi li kʼuyelan chkʼopoje jaʼ li yutsʼ yalaltake. Te nakal xchiʼuk smeʼ ti Galina sbie, ti jaʼ chkʼelate. Manchuk mi ep svokol xchiʼuk ep tsvul yoʼonton, xmuyubaj noʼox. ¿Kʼuxi chut?

Li smeʼe xi chale: «Ta 1999, la svulaʼanunkutik li jprima Apolonija ti jaʼ yajrextiko Jeovae. Laj kakʼkutik venta ti xojtikin lek li Vivliae. Li Daliae ep kʼusi la sjakʼbe xchiʼuk ta anil noʼox la xchʼam jun chanubtasel ta Vivlia. Bakʼintike chichoti xchiʼukik sventa chketʼesbe skʼop li jtsebe. Kʼalal laj kil ti chkoltaat li kʼusi yakal chchan batele la jkʼan jun chanubtasel ta Vivlia ek».

Kʼalal lik yaʼibe batel smelolal kʼusi chchanubtasvan li Vivliae, oy jun sjakʼobil ti mas tsvul-o yoʼonton li Daliae, jaʼ yuʼun xi la sjakʼbe li Apolonijae: «Ta skoj ti ipune, ¿kʼuxi chkut ta jchol mantal li voʼone?» (Mat. 28:19, 20). Vaʼun xi patbat yoʼontone: «Mu xaxiʼ, Jeova tskoltaot». Jech onoʼox kʼot ta pasel un.

¿Kʼu yelan chchol mantal? Jtose jaʼ ti ta karta tspase. Sventa spas yuʼun taje chalbe jayibuk ermanaetik sventa xakʼ ta tsʼibael ti kʼuyelan tskʼan chchol mantale. Xchiʼuk chchol mantal ta selular kʼalal tstsʼiba batel mensajee. Kʼalal kʼepele, junantik ermanoetik chikʼik batel ta cholmantal ta parke xchiʼuk ta kayeetik.

Li Dalia xchiʼuk smeʼe lik chʼiikuk ta mantal, jaʼ yuʼun laj yichʼik voʼ ta noviembre ta 2004. Kʼalal echʼ jayibuk jabile, batik xchiʼuk jtsop ermanoetik ti bu oy jun grupo ti polaco skʼopik, te ta Vilna lum, ta septiembre ta 2008 ti bu chchtun ep jcholmantaletike. Li kermanatike xi chale: «Oy bateltik ti kʼalal chkil ti ch-echʼ xa batel jun ue ta jvul koʼonton ti muʼyuk to lokʼemun ta cholmantale. Pe ta jkʼopon Jeova vaʼun jaʼ to chkile oy onoʼox buchʼu chikʼun batel ta cholmantal». Xi chal ta jaypʼeluk noʼox kʼope: «Li jchamele alubem yuʼun li jbekʼtale, pe li jnopbene muʼyuk, ximuyubaj tajek ti chkalbe krixchanoetik ta sventa li Jeovae».