¿Kʼuxi xuʼ jkʼupintik xchiʼuk jtabetik sbalil kʼalal chijchanunaje?

¿Mi ta jkʼan ta jkʼupintik mas xchiʼuk ti jtabetik mas sbalil li xchanel Vivlia ti kʼu sjalil jchʼakojbetik yoraile? Oy oxtos tojobtaseletik ti mu tsotsuk ta pasel ti xuʼ tskoltautike.

1 ORASION. Li baʼyele jaʼ ti skʼan jkʼopontik li Diose (Sal. 42:8). Li xchanel Vivliae jaʼ te smakoj li yichʼel ta mukʼ Diose. Jaʼ yuʼun, skʼan jkʼanbetik xchʼul espiritu Jeova xchiʼuk sventa lekuk chapal li jnopbentike (Luc. 11:13). Barbara ti ep xa jabiletik tunem ta misionerae, xi chale: «Persa onoʼox ta jpas orasion kʼalal chlik jchan Vivliae. Vaʼun chkaʼi ti tskoltaun li Jeovae xchiʼuk ti lek chil li kʼusi ta jpase». Li orasione chkoltavan sventa chchapan joltik xchiʼuk koʼontontik yoʼ xkaʼibetik smelolal li epal veʼliletik ta mantal chkichʼtik akʼbele.

2 SNOPEL LEK. Ta skoj ti chʼabal lek yoraile, junantike ta aniltik noʼox tskʼelik li Skʼop Diose, vaʼun jaʼ jech muʼyuk tstabeik sbalil. Carlos ti mas xa ta 50 jabil chtun ta stojolal Jeovae yakʼoj venta ti toj tsots skʼoplal ti skʼan jchʼakbetik yorail snopel lek kʼalal ta jkʼeltik li Skʼop Diose, xi chale: «Li avie mu xa epuk pajina ta jkʼel li Vivliae, jaʼ xa noʼox ta jkʼel chaʼkʼol ta kʼakʼal. Taje jaʼ chakʼ ti akʼo xkaʼibe lek smelolale xchiʼuk ti oy kʼusitik ta jchan ti tsotsik skʼoplale» (Sal. 77:12). Mi ta jchʼakbetik yorail sventa ta jnopilantike, jaʼ jech chkojtikintik lek xchiʼuk chkaʼibetik smelolal li kʼusi tskʼan yoʼonton Diose (Col. 1:9-11).

3 YAKʼEL TA JKUXLEJALTIK. Kʼalal chkiltik ti chtun kuʼuntik junuk kʼusie, lek ta jtabetik sbalil, jaʼ jech chkʼot ta pasel ek li xchʼakbel yorail xchanel Vivliae. Jaʼ jech chal jun ermano ti kerem toe, ti Gabriel sbie: «Kʼalal ta jchan li Vivliae mas lek chapalun chkaʼi ta stsalel kʼusuk vokolal xchiʼuk sventa ta jkolta li yantike. Pe jnaʼoj lek ti skʼan xkakʼ persa yakʼel ta jkuxlejal li kʼusitik ta jchan batele» (Deu. 11:18; Jos. 1:8). Ta melel, toj ep ti bu xuʼ jchantik kʼusitik lek sventa mantal xchiʼuk ti skʼan xkakʼ ta jkuxlejaltike (Pro. 2:1-5).

JVULES TA JOLTIK. ¡Jaʼ jun matanal ti xuʼ jchantik mas ta sventa li yojtikinel Diose, ti jaʼ te ta jta jpʼijiltike! (Rom. 11:33.) ¿Kʼusi tskoltautik sventa jtabetik sbalil li xchanel Vivliae? Baʼyele, skʼan xichʼ pasel orasion sventa xakʼbutik xchʼul espiritu li Jeovae xchiʼuk sventa lekuk chapal li jnopbentike; ta tsʼakale pajkutik jujulikel sventa jnopilantik lek xchiʼuk ta slajebe, kakʼtik persa ta yakʼel ta jkuxlejaltik li kʼusi la jchantike. Li tojobtaseletik ti mu tsotsuk ta pasel taje, jaʼ chakʼ ti kʼupiluk sba xchiʼuk ti oyuk sbalil kʼalal chijchanunaje.