Kʼusitik kʼot ta pasel ta voʼne

Snaʼobil kʼusitik kʼot ta pasel ta voʼne

LI YAJTUNELUTIK Jeovae toj jal xa tajek tunemutik talel ta stojolal li Diose, taje maʼuk noʼox chvinaj ta vunetik, moʼoj, oy ta jtatik ta lokʼoletik, ta kartaetik, ta sloʼil ermanoetik xchiʼuk ta yan kʼusitik laj yichʼ tunesel sventa chichʼ ichʼel ta mukʼ li Diose, ti laj yichʼ tunesel ta cholmantal xchiʼuk ti kʼu xa sjalil jpasojbetik tal yabtel Diose. Pe, ¿kʼusi sbalil ta jtabetik skʼejel skotol li kʼusitik taje xchiʼuk ti xlik jchanbetik skʼoplal li kʼuyelan jpasojbetik tal yabtel Diose? Li ta skʼakʼalil Vivliae, li joliletik ta jujun yutsʼ yalal j-israeletike ta xakʼbeik yojtikin xnichʼnabik li smantaltak xchiʼuk li kʼusitik lek spasoj Jeova sventa xlik «[spat] yoʼntonic ta stojol ti Dios» eke (Sal. 78:1-7, Ch).

Saʼel li kʼusitik voʼne xa kʼotem ta pasele, leʼ xa onoʼox toj tunel tal sventa li kʼusi snopoj tspas Jeovae. Jech kʼuchaʼal kʼalal ta xaʼox spajesik xchaʼvaʼanel chʼulna ta Jerusalén li yajkontratak slumal Diose, laj yichʼ saʼel li kʼusitik voʼne xaʼox kʼotem ta pasel li ta lum Ecbatana ta yosilal Media balumile. Kʼalal laj yichʼ saʼele laj yichʼ tael jun vun ti bu chal mantal ajvalil Ciro ti akʼo yichʼ chaʼpasel li chʼulnae (Esd. 6:1-4, 12). Jech oxal, li chʼulnae tsuts yuʼunik jech kʼuchaʼal tskʼan onoʼox Diose. Li jtsʼibajom yuʼun Evanjelio Lucas eke la sabe skʼoplal kʼusitik ti kʼotemik xaʼox ta pasel li ta skʼakʼalile, yuʼun oy ta yoʼonton snaʼel «lec scotol cʼu xʼelan ilic tal ta sliqueb» (Luc. 1:1-4).

 Li avie, li Jtsop Jbeiltasvaneje toj tsots skʼoplal chaʼiik li kʼusitik kʼotem ta pasel ti kʼu xa sjalil chijtun talel ta stojolal Diose. Jun ti buchʼu chtun li ta Jtsop Jbeiltasvaneje, laj yalbe skʼoplal ti kʼu yuʼun skʼan kʼejel, tsʼibael ta vun xchiʼuk ti skʼan xichʼ akʼel ta ojtikinel li kʼusitik kʼotemik ta pasel ta voʼnee, xi laj yale: «Sventa jnaʼtik buchʼuotike skʼan jnaʼtik bu li jlik talel». Jech oxal, li ta smeʼ nail abtelal ti te oy ta Brooklyn (Nueva York) lik jun achʼ departamento ti jaʼ sbi Kʼusitik Kʼejbil sventa Stsʼibael vunetik, ti jaʼ oy ta skʼob li Komite sventa Stsʼibael vunetike.

XKOʼOLAJ TA EPAL LOKʼOLETIK XCHIʼUK TA SNAʼOBIL KUTSʼ KALALTIK

Ta skoj ti mu xa stakʼ sut talel li jujun kʼakʼal chjelave, ¿mi mu jechuk ti oy ta koʼontontik lajuk jkʼejtik li kʼusitik tsvules ta jol kutsʼ kalaltike? Jaʼ yuʼun, li ta departamento ti jaʼ sbi Kʼusitik Kʼejbil sventa Stsʼibael vunetike yakal chichʼ akʼel persa chichʼ tsobel lokʼoletik ti xuʼ jkoʼoltastik ta slokʼol kutsʼ kalaltike. Li ta departamento taje oy yan kʼusitik kʼejbil xtok, jech kʼuchaʼal li baʼyel vunetik lokʼe xchiʼuk labal sba sloʼil ermanoetik, pe maʼuk noʼox taje yuʼun oy jlom kʼupil sba snaʼobiltak ermanoetik ta voʼne. Skotol li kʼusitik taje chakʼ kojtikintik kʼusi kʼot ta pasel ta voʼne, chakʼ jpat koʼontontik sventa li kʼusitik chkʼot ta spasel ta mas tsʼakal li ta kutsʼ kalaltik ta mantale.

Li achʼ jvokʼ mantal ti jaʼ sbi «Kʼusitik kʼot ta pasel ta voʼne» xie chlik lokʼuk li ta revista sventa chichʼ chanel ta tsobobbaile. Ta jtijkutik avoʼonton sventa xakʼel. Taje chanib velta ta jabil chlokʼ. Li xtal revistae nopbil chichʼ lokʼesel jun mantal ti lek tajek skoloral chtale, tstakʼ li sjakʼobiltak liʼe: ¿Kʼusi jaʼ toʼox li auroramovile? ¿Buchʼutik toʼox ta stunesik? ¿Bakʼin laj yichʼ tunesel xchiʼuk kʼusi tun-o?

Jech kʼuchaʼal li lokʼoletik sventa snaʼobil jun utsʼ alalile, li kʼusitik oy ta departamento ti jaʼ sbi Kʼusitik Kʼejbil sventa Stsʼibael vunetike chakʼbutik ta ilel xchʼunel yoʼonton xchiʼuk ti ep tajek sbalil li voʼneal yajtuneltak Diose. Chakʼ ta ilel xtok kʼusi muyubajik-o xchiʼuk ti kʼusi vokol laj yaʼiik ta spasbel yabtel li Jtotik ta vinajele. Chal xtok kʼuxi la sbeiltas xchiʼuk la skolta steklumal li Diose (Deu. 33:27). Lek jpatoj koʼontonkutik ti chakʼ tal sbendison Jeova ta stojolal li kʼusitik chichʼ pasel sventa jnaʼtik kʼusitik kʼot ta pasel ta voʼnee, yuʼun taje mas tspasutik ta jun jkotoltik xchiʼuk tstsatsubtasutik ta spasbel yabtel li Jeovae.

[Rekuadro ta pajina 31]

Yan kʼusitik

Kʼalal jaʼo chichʼ pasel vunetik, DVD o yan kʼusitik chlokʼ ta Skʼop Diose, li jtsʼibajometike, li jlokʼtavanejetik o jbonlokʼoletike o yantike tstunesik li kʼusitik voʼne xa tunesbile. Jaʼ yuʼun, li ta departamento ti jaʼ sbi Kʼusitik Kʼejbil sventa Stsʼibael vunetike jaʼ oy ta sba tstsob xchiʼuk chchabi sventa mu sok li kʼusitik tstakik batel li yan Beteletike, li tsobobbailetike, li krixchanoetik xchiʼuk yan ofisinaetik ti maʼuk yuʼun li steklumal Jeovae. Jkʼeltik junchibuk li kʼusi tspasike:

Kʼuxi tstsobik, kʼuxi tsnabeik mas skʼoplal. Jujun kʼakʼal ta xepajesik li kʼusitik ta stsobike. Ep buchʼutik ta slekil yoʼonton chakʼik ta moton, xchiʼuk jlom utsʼ alaliletik ti oy xa sjaylajunebal jabil tukʼik ta stojolal Jeovae chakʼik ta chʼom. Kʼalal tsnabeik mas skʼoplal xchiʼuk tskoʼoltasik li kʼusitik taje, mas ta jnabetik skʼoplal kʼuyelan echʼ xkuxlejal li yajtuneltak Jeovae.

Kʼu yuʼun tsabeik yavil. Oy xa mas ta mil li kʼusitik tsobbile, li jlome mas xa ta 100 jabil kʼejbil. Ta skoj ti ep ta tos, ti jelel smukʼul xchiʼuk kʼuyelane, skʼan lek sabel yavil sventa ta anil noʼox chichʼ tael mi yichʼ tunesel ta tsʼakale.

Kʼuxi chichʼ achʼubtasel xchiʼuk chichʼ kʼelel yoʼ mu sok. Li livroetik xchiʼuk kʼusitik tsoke ta xchaʼachʼubtasik xchiʼuk tstunesik kʼusitik achʼ chlokʼanuk sventa lek noʼox oy. Li vunetik, lokʼoletik, jaytuchʼ periodikoetik, pelikulaetik xchiʼuk kʼusitik pasbil gravare chichʼ tikʼel ta komputadora. Jech taje mu xa persauk chichʼ tsakilanel li kʼusitike.

Butik chichʼ kʼejel xchiʼuk kʼuxi tstaik ta saʼel. Lek noʼox smelolal bu chichʼ kʼejel sventa mu xchʼay, mu sok ta kʼakʼal xchiʼuk ta sikil na li kʼusitik taje. Li avie yakal chichʼ sabel lek yavil ta xchinabil komputadora (base de datos) ti jaʼ chtun sventa anil tstaik ta saʼel xchiʼuk mu xlaj skʼoplal li kʼusitik laj yichʼ tunesel o kʼot ta pasel ta voʼnee.

[Lokʼol ta pajina 32]

1) Smukʼta lokʼol «Foto-Drama de la Creación». 2) Svunaltak ti bu tskʼanilanik revistaetike. 3) Jun karo ti oy svosinail ta sbae. 4) Spat jun revista Watch Tower (Li Jkʼel osil ta toyole) 15 yuʼun avril ta 1912. 5) Svunal sventa chbat ta chukel J. F. Rutherford. 6) Smikrofonoal WBBR. 7) Fonógrafo (stijobil son ti xkoʼolaj kʼuchaʼal jun tokadiskoe). 8) Portafolio sventa livroetik. 9) S-apunte jun ermano. 10) Karta sventa J. F. Rutherford.