Ta sjunul koʼontontik kakʼbetik matanal li Jeovae
Ta sjunul koʼontontik kakʼbetik matanal li Jeovae
«Scotol li cʼusiuc noʼox chapasique, pasic ta scotol avoʼntonic. Jaʼuc me chaʼabtejic yuʼun Cajvaltic chavaʼyic.» (COL. 3:23)
KʼELO MI XTAKʼ AVUʼUN:
¿Kʼuxi xuʼ xkichʼtik ta mukʼ Jeova li ta kʼusitik ta jpastik jujun kʼakʼale?
¿Kʼusitik matanal chkakʼtik sventa chkichʼtik ta mukʼ li Diose?
¿Kʼuxi xuʼ xkakʼbetik Jeova li kʼusitik oy kuʼuntike?
1-3. 1) Alo kaʼitik mi mu xa van persauk skʼan xkakʼbetik junuk matanal Jeova ta skoj ti cham ta jtel teʼ li Jesuse. 2) ¿Kʼusi skʼan jtsaktik ta venta kʼalal chkakʼbetik smoton li Jeovae?
LI TA baʼyel sigloe, li Jeovae laj yalbe slumal ti kʼalal laj yakʼ sba ta matanal pojelal li Jesuse, jaʼ te laj sbalil li Smantal Moisese (Col. 2:13, 14). Jaʼ yuʼun, mu xa persauk chakʼik chikʼbil matanaletik xchiʼuk sat kʼusitik x-ayan yuʼunik jech kʼuchaʼal nopem toʼox xaʼiik spasel jayibuk sien jabil li judioetike, yuʼun laj xaʼox sbalil. Li mantale xkoʼolaj kʼuchaʼal jun «jʼicʼvanej» o mosoil ti la sbeiltas batel ta stojolal Cristo li judioetike (Gál. 3:24).
2 Pe taje maʼuk skʼan xal ti mu xa tsotsuk skʼoplal chkiltik yakʼbel smoton Dios li yajtsʼaklomutik Cristoe. Li jtakbol Pedroe laj yal ti xuʼ to xkakʼtik yan matanaletik «ta sventa Jesucristo [...] ti lec chil Diose», li matanaletik ti chkakʼtik taje jaʼ xa ta sventa mantal (1 Ped. 2:5). Li jtakbol Pabloe chal ti skotol kʼusitik ta jpas ta jkuxlejaltik ti kakʼojtik xa ta stojolal Diose xuʼ xichʼ koʼoltasel ta «matanal» (Rom. 12:1).
3 Li yajtsʼaklomutik Cristoe chkakʼbe smoton Dios kʼalal chkakʼtik kʼusitik kuʼuntik o mu jalantik sventa li yabtele. Jaʼ yuʼun skʼan jnaʼtik mi lek van chil li matanal chkakʼbetike. Ta sventa li matanaletik taje skʼan jtsaktik ta venta xtok li kʼusi albat j-israeletik sventa kʼuyelan skʼan xakʼ li smotonike.
MATANALETIK JUJUN KʼAKʼAL
4. ¿Kʼusi xuʼ chkʼot ta pasel ta skoj li kʼusitik ta jpastik jujun kʼakʼale?
4 Li kʼusitik ta jpastik jujun kʼakʼale, bateltike mu toj kʼunuk chkaʼibetik smelolal kʼuxi snitojbe sba skʼoplal xchiʼuk li matanal chkakʼbetik Jeovae. Jech, li kʼusitik ta jpas ta jnatik, ta chanobvun, ta kabteltik, kʼalal chijbat ta manolajele o oy kʼusi yan ta jpastike xuʼ tsokes ti kʼuyelan oyutik ta stojolal li Diose. Mi kakʼoj xa jbatik ta stojolal li Jeovae o mi jaʼ to ta jpastik ta tsʼakale, tsots me skʼoplal skʼan jkʼeltik ti oyuk lek srasonal ti kʼu yuʼun ta xkakʼtik li jmotontike, yuʼun xuʼ tsokes o tslekubtasutik ta stojolal li Diose. Jaʼ yajtsʼaklomutik Cristo ta kʼakʼal akʼobal, jaʼ yuʼun skʼan jtsaktik ta venta li beiltaseletik ta Vivlia ta skotol li kʼusitik ta jpastike. Xi laj yal li Pabloe: «Scotol li cʼusiuc noʼox chapasique, pasic ta scotol avoʼntonic. Jaʼuc me chaʼabtejic yuʼun Cajvaltic chavaʼyic. Mu xanopic ti cristiano chaʼabtejic yuʼune» (kʼelo Colosenses 3:18-24).
5, 6. ¿Kʼusi tskoltautik sventa jnaʼtik kʼuyelan skʼan jlap jkʼuʼ jpokʼtik xchiʼuk kʼuyelan skʼan jpas jtalelaltik?
5 Li kʼusitik ta jpastik jujun kʼakʼal sventa jtuktik noʼoxe, maʼuk te tsakal skʼoplal li spasbel yabtel Diose. Manchuk mi jech, li jtakbol Pabloe xi laj yale: «Pasic ta scotol avoʼntonic. Jaʼuc me chaʼabtejic yuʼun Cajvaltic». Taje skʼan stij koʼontontik sventa jnopbetik skʼoplal skotol li kʼusitik ta jpastike. Skʼan xi jakʼbe jbatike: «¿Mi lek xvinaj li jtalelale xchiʼuk li kʼuyelan jnaʼ jlap jkʼuʼ jpokʼe? ¿O mi ta van xikʼexav chkal ti jaʼ yajrextikoun Jeova ta skoj ti kʼusitik ta jpas jujun kʼakʼale xchiʼuk ta skoj ti kʼuyelan xvinaj li jpat jxokone?». ¡Kʼux ta alel mi jech taje! Li yajtunelutik Jeovae skʼan mi jaʼuk oyuk ta koʼontontik jsokesbetik skʼoplal li sbi Jeovae (Isa. 43:10; 2 Cor. 6:3, 4, 9).
6 Jnopbetik skʼoplal jaytosuk kʼusitik ta jkuxlejaltik ti bu xuʼ chkakʼtik iluk ti oy ta koʼontontik spasel kʼuchaʼal yabtel Jeova chkaʼitike. Kʼalal ta jchantik batele jvules ta joltik ti albat j-israeletik ti jaʼ skʼan xakʼik ta matanal li kʼusitik toj lekik yuʼunike (Éxo. 23:19).
KʼUXI SNITOJ SBA XCHIʼUK LI JKUXLEJALTIKE
7. ¿Kʼusi te smakoj ti chkakʼ jbatik ta stojolal li Diose?
7 Kʼalal laj kakʼ jkuxlejaltik ta stojolal Jeovae, muʼyuk la jalan jbatik. Jaʼ xkaltik, laj kalbetik ti jaʼ mas tsots skʼoplal chkiltik li stuke, manchuk mi oy kʼusi tsots ta jnuptik o mi oy kʼusi vokol chkaʼitik spasel (kʼelo Hebreos 10:7). Toj lek ti jech la jpastike. Kʼalal chkakʼtik persa ta jkʼeltik kʼusi tsnop Dios li ta jujuntal kʼusitik ta jpastike xchiʼuk ta jchʼunbetike, ta melel kakʼojtik venta ti lek kʼusi chkʼot ta pasele (Isa. 48:17, 18). Ta skoj ti ta jchanbetik stalelal li chʼul Jchanubtasvanej kuʼuntike, chʼul jteklumutik ek xchiʼuk xijmuyubaj noʼox (Lev. 11:44; 1 Tim. 1:11).
8. ¿Kʼu yuʼun skʼan jvules ta joltik ti chʼul laj yil Dios li matanaletik laj yakʼ j-israeletike?
8 Li matanal chichʼik toʼox batel li j-israeletike, jaʼ chʼul matanal laj yil li Jeovae (Lev. 6:25, Ch; 7:1). Li jpʼel kʼop ta hebreo ti jelubtasbil kʼuchaʼal chʼul xie jaʼ skʼoplal skotol li kʼusi chʼakbil noʼox sventa Diose. Jaʼ yuʼun, mi ta jkʼantik lek chil li matanal chkakʼbetike, skʼan mi jsetʼuk kapal skʼoplal li ta kʼusitik sventa balumile. Li kʼusi tspʼaj li Jtotike, skʼan jpʼajtik ek (kʼelo 1 Juan 2:15-17). Taje jaʼ skʼan xal ti mu jpastik kʼusitik ti xuʼ ch-ikʼub jkʼoplaltik ta stojolal Diose o mu jchiʼintik li buchʼutik xuʼ tsokes jkʼoplaltik ta stojolale (Isa. 2:4; Apo. 18:4). Skʼan mu jchʼay jsatik xtok ta kʼusitik chopol ta ilel o ta mulivajel xchiʼuk mu xkakʼ ta jnopbentik kʼusitik sventa mulivajel (Col. 3:5, 6).
9. ¿Kʼu yuʼun toj tsots skʼoplal ti jpastik li kʼusitik lekike o ta jkoltatik li yantike?
9 Li Pabloe te laj yalbe skʼoplal kʼalal xi la stijbe yoʼonton li yermanotake: «Mu me xchʼay ta avoʼntonic spasel li cʼusitic leque, xchiʼuc ti tscʼan chacoltavanique. Yuʼun jaʼ li matanal toj lec chil Diose» (Heb. 13:16). Li matanaletik chchʼam li Jeovae jaʼ li kʼusitik lekik ta jpastik o kʼalal ta jkoltatik li yantike. Jech taje, ta skoj ti oy ta koʼontontik li yantike chkakʼtik iluk ti jaʼutik melel yajtsʼaklom Cristoe (Juan 13:34, 35; Col. 1:10).
JAʼ MATANAL LI YICHʼEL TA MUKʼ DIOSE
10, 11. ¿Kʼu yelan chil Jeova li spasbel yabtel xchiʼuk ti kʼuyelan chkichʼtik ta mukʼe, xchiʼuk kʼusi tstij koʼontontik ta spasel taje?
10 Jtos ti kʼuxi xuʼ jpastik kʼusitik leke jaʼ ti chlokʼ ta ketik li kʼusi jmalaojtik chkʼot ta tsʼakale. ¿Mi ta van xkaltik li kʼusi jchʼunojtik ta skotol ora mi jaʼo xuʼ chkiltike? Li Pabloe laj yal ti tsots skʼoplal skʼan «jaʼuc smoton Dios [...] ti chlocʼ ta quetic ti jaʼ Cajvaltique» (Heb. 10:23; 13:15; Ose. 14:2). Jaʼ yuʼun, jtunel kuʼuntik mi ta jnopbetik skʼoplal kʼu sjalil ta jcholtik li lekil aʼyeje o ti kʼuxi xuʼ jlekubtastik li xcholel mantale. Li ta Tsobajel sventa Tunelale oy jayibuk parte ch-echʼ ti xuʼ skoltautik ta spasel taje. Pe skʼan jvules ta joltik li cholmantal ta naetik xchiʼuk ta buyuk noʼoxe «[jaʼ] smoton Dios», yuʼun jaʼ jech chkichʼtik ta mukʼ. Jaʼ yuʼun li matanal taje skʼan me muʼyukuk xchopolil. Manchuk mi jelel tajek jkuxlejaltik ta jujuntal li yajtsʼaklomutik Cristoe, li senyail ti xuʼ chakʼ ta ilel mi kʼupil tajek chkaʼitik li kʼusitik sventa Diose, jaʼ li kʼu sjalil ta jcholtik mantale.
11 Li yajtsʼaklomutik Cristoe jujun xemana ta jchʼakbetik yorail sventa chkichʼtik ta mukʼ Jeova manchuk mi jtuktik o mi tsobolutik. Jech yalojbutik stuk. Li avie mu xa persauk ta jkuxtik jujun sabado jech kʼuchaʼal persa kʼanbil toʼoxe o ti chijbat ta jteklum Jerusalén sventa ta jpastik li kʼinetik ta jujun jabile, manchuk mi jech, li kʼusitik tspasik toʼox li j-israeletik ta voʼnee chakʼ ta ilel kʼusi ti skʼan jpastik eke. Jech, li Dios avi eke, smalaoj ti xkiktatik jutuk li kʼusitik ta jpastik jujun kʼakʼal sventa ta jchanbetik li Skʼope, ti jkʼopontike xchiʼuk ti xijbat ta tsobajele. Jech xtok, li joliletik ta utsʼ alalile skʼan spasilanik li yichʼel ta mukʼ Jeova ta yutsʼ yalalike (1 Tes. 5:17; Heb. 10:24, 25). Sta-o ti xi jakʼbe jbatike: «¿Mi xuʼ van mas jlekubtas ti kʼuyelan ta jpasbe yabtel Diose?».
12. 1) Li xchikʼel pom ta xchikʼobil smoton Dios ta voʼnee, ¿kʼusi xuʼ jkoʼoltastik-o li avie? 2) ¿Kʼuxi xuʼ xkoʼolaj ta pom li j-orasiontik jech kʼuchaʼal chal li Vivliae?
12 Xi la skʼejinta Jeova li ajvalil Davide: «Acʼo muyuc cʼalal ta atojol li jcʼope, muetuc noʼox jech chac cʼu chaʼal cʼalal chichʼ chiqʼuel pom[e]» (Sal. 141:2). Xi jakʼbe jbatik sventa taje: «¿Mi nopoltik noʼox ta jkʼopon li Diose? ¿Mi lek ti kʼuyelan ta jkʼopone?». Li ta slivroal Apocalipsise chakʼ ta ilel ti Jeovae tskoʼoltas ta smuil pom kʼalal chaʼibe «scʼopic [...] li bochʼotic vocʼbilic yuʼun Diose» (Apo. 5:8). Li ta voʼnee, li Jeovae laj yalbe j-israeletik ti lekuk meltsanbil li pom ta xchikʼik jujun kʼakʼale, laj yal stuk kʼuxi ta pasel. Mi mu jechuk chichʼ pasel ti kʼuyelan tskʼane, muʼyuk ta xchʼam (Éxo. 30:34-37; Lev. 10:1, 2). Taje chakʼ ta ilel ti sventa xaʼi li j-orasiontike, skʼan lek smelolal jkʼopontik xchiʼuk vinajuk ta jkʼopojeltik ti chkichʼtik ta mukʼe.
CHKAKʼTIK XCHIʼUK CHKICHʼTIK
13, 14. 1) ¿Kʼu yelan la skoltaik Pablo li Epafrodito xchiʼuk li ermanoetik ta Filipose, xchiʼuk kʼusi la snop Pablo ta sventa li matanal taje? 2) ¿Kʼuxi xuʼ jchanbetik Epafrodito xchiʼuk li ermanoetik ta Filipose?
13 Yan matanal ti xuʼ xkakʼbetik li Jeovae, jaʼ li matanal takʼin chkakʼtik sventa li abtelal ta spʼejel Balumile, mu ventauk mi ep o mi jutuk (Mar. 12:41-44). Li ta baʼyel sigloe, li ermanoetik ta Filipose la stakik batel ta Roma li Epafroditoe, yuʼun bat skolta Pablo sventa li kʼusitik chtun yuʼune. Kʼalal jech la spasike, xuʼ jnoptik ti te van kʼuyepal la stakbeik batele. Maʼuk toʼox sba velta ti jech chakʼik ta ilel slekil yoʼontonik ta stojolale. Taje jech la spasik sventa mu xat yoʼonton ta takʼin li jtakbole, ti jaʼ mas xakʼ ta yoʼonton li cholmantale. ¿Kʼusi la snop Pablo ta sventa li matanal taje? Xkoʼolaj laj yil kʼuchaʼal «jun milbil matanal [...] ti oy lec smuile» xchiʼuk ti «toj lec chil li Diose» (kʼelo Filipenses 4:15-19). Kʼuchaʼal chkiltike, la stoj ta vokol li koltael akʼbate xchiʼuk lek laj yil li Jeova eke.
14 Li avi eke, toj lek chil Jeova li matanal takʼin chkakʼtik sventa li abtelal ta spʼejel Balumile. Mi jech ta jpastik taje chal ti chakʼ kʼusitik chtun kuʼuntik ta mantal xchiʼuk sventa jbekʼtal jtakopaltik mi jaʼ baʼyel chkakʼ ta jkuxlejaltik li abtelal sventa Ajvalilal yuʼune (Mat. 6:33; Luc. 6:38).
CHKAKʼTIK ILUK TI TA JTOJTIK TA VOKOLE
15. Li voʼote, ¿kʼusitik tstij avoʼonton sventa chatojbe ta vokol li Jeovae?
15 Mi jaʼuk xlaj jloʼiltatik ti kʼusitik xuʼ jtojbetik ta vokol li Jeovae. ¿Mi mu jechuk ti xuʼ jtojbetik ta vokol ti kuxulutik yuʼune? Chakʼbutik li kʼusitik chtun kuʼuntike, jech kʼuchaʼal li jveʼeltike, li jkʼuʼ jpokʼtike, li jnatike xchiʼuk li ikʼ chkichʼtike. Jech xtok, chakʼbutik melel chanubtasel sventa li xchʼunel koʼontontike xchiʼuk li spatobil koʼontontike. Ta melel, kʼalal ta jnoptik kʼuyelan li Jeovae xchiʼuk ti kʼusitik ta spas ta jventatike, jaʼ noʼox tstij koʼontontik sventa chkichʼtik ta mukʼ xchiʼuk xkakʼbetik matanaletik (kʼelo Apocalipsis 4:11).
16. ¿Kʼusi tstij koʼontontik ta spasel li pojelal laj yakʼ Cristoe?
16 Jech kʼuchaʼal laj kiltik li ta xchanobil echʼe, li pojelal laj yakʼ li Cristoe jaʼ jun matanal ti stuk xa noʼox jeche. Taje jaʼ senyail ti skʼanojutik tajek li Jeovae (1 Juan 4:10). ¿Kʼusi skʼan jpastik ta skoj ti skʼanojutik tajeke? Xi tstakʼ li Pabloe: «Li epal cʼuxubinel yuʼun Cristoe jaʼ chiyicʼutic sventa chacʼ jnaʼtic lec ti jun noʼox Bochʼo icham cuʼuntic ta jcotoltique [...]. Ta sventa ti icham ta jventatic jcotoltique, jech muc xa cuxuluc ta sventa stuc li bochʼotic cuxulique. Jaʼ xa cuxulic ta stojol li Cristo ti icham, ti ichaʼcuxi ta sventaique» (2 Cor. 5:14, 15). Li jtakbole jaʼ la skʼan laj yal ti mi ta jkʼuxubintik li yutsil slekil yoʼonton Diose, skʼan jtunes jkuxlejaltik sventa chkichʼtik ta mukʼ li stuke xchiʼuk li Xnichʼone. ¿Kʼuxi chkakʼtik iluk ti ta jtojbetik ta vokol kʼusitik spasoj Dios xchiʼuk li Xnichʼone? Jaʼ kʼalal ta jchʼuntik mantale xchiʼuk kʼalal ta sjunul koʼontontik ta jcholtik mantale xchiʼuk kʼalal ta jpastik ta yajtsʼaklom Cristo li krixchanoetike (1 Tim. 2:3, 4; 1 Juan 5:3).
17, 18. ¿Kʼu yelan yepajesojik ta yakʼbel smoton Jeova epal ermanoetik? Alo junuk skʼelobil.
17 ¿Mi xuʼ van jlekubtastik mas li matanal chlokʼ ta ketike? Epal ermanoetike ta snopbeik skʼoplal li kʼusitik spasoj Jeova ta stojolalike, vaʼun chkʼot ta yoʼontonik skʼelel kʼuxi xuʼ mas xcholik mantal xchiʼuk spasel yan kʼusitik sventa li yabtel Diose. Jlome chakʼik venta ti xuʼ xtunik ta prekursor auksiliar jun o jayibuk u ta jabile. Jlome chlik tunikuk ta prekursor regular. Jlome chkoltavanik ta svaʼanel naetik ti bu chichʼ ichʼel ta mukʼ li Jeovae. ¿Mi mu jechuk ti toj lek ti jech tspasike? Li Diose toj lek chil ti jech chichʼ pasbel yabtel kʼalal oy lek srasonale, jaʼ xkaltik ti chlokʼ ta oʼontonal chichʼ tojbel ta vokol li kʼusitik spasoje.
18 Ep yajtsʼaklom Cristoe chakʼik persa chtunik ta stojolal Jeova ta skoj ti oy yil chaʼi sbaik ta stojolale. Kalbetik skʼoplal jun ermana ti Morena sbie. Ep kʼusitik tsjakʼbe sba, bat sabe stakʼobil ta Relijion Katolika, ti bu chʼi talele, xchiʼuk ta filosofía oriental, pe bu chata mu junuk yoʼonton kom. Ta skoj taje jaʼ lik xchan-o Vivlia xchiʼuk li yajrextikotak Jeovae. Li stuke la stojbe ta vokol Jeova ta sventa li kʼusitik la xchan ta Vivliae yuʼun mas xmuyubaj-o. Jaʼ yuʼun, la stunes yip li ta yabtel Jeovae. Kʼalal laj yichʼ voʼe, lik tunuk ta prekursor auksiliar jayibuk velta, kʼalal xuʼ yuʼun laj yile och ta prekursora regular. Li Morenae oy xa ta 30 jabil chtun ta tsʼakal ora.
19. ¿Kʼuxi xuʼ xkepajestik li matanal chkakʼbetik Jeovae?
19 Ep tukʼil yajtsʼaklomtak Cristo mu xuʼ yuʼunik li prekursorale. Akʼo mi jech, jkotoltik xuʼ xkakʼbetik matanal ti lek chil li Diose. June xuʼ xkakʼtik ta ilel ta jtalelaltik, sventa taje skʼan jtsaktik ta venta li tukʼil beiltaseletik ta Vivliae xchiʼuk mu jchʼay ta joltik ti ta skotol ora jaʼ yajrextikoutik Jeovae. Li xchibale jaʼ ta xchʼunel koʼontontik, yuʼun jaʼ jech chkakʼtik ta ilel ti jpatoj koʼontontik ti chkʼot ta pasel li kʼusitik tskʼan tspas Diose. Li ta yoxibale jaʼ li ta kʼusitik lek ta jpastike, mas to kʼalal chkaltik batel li lekil aʼyeje. Yuʼun li kʼusi oy ta koʼontontike jaʼ jech chlokʼ ta ketik. Ta skoj ti ta jkʼan ta jtojtik ta vokol skotol li kʼusitik kichʼojtike, ta skotol koʼontontik chkakʼbetik-o smoton ek li Jeovae.
[Sjakʼobiltak sventa xchanobil]
[Tsʼib ta mukʼtik sletraile ta pajina 25]
Li slekil yoʼonton Jeovae, ¿mi tstij koʼontontik ta slekubtasel li matanal chlokʼ ta ketike?
[Lokʼol ta pajina 23]
¿Mi ta skotol ora chkakʼtik ta ilel li xchʼunel koʼontontike?
