Vikʼiluk jsatik kʼuchaʼal li yajtakboltak Jesuse
Vikʼiluk jsatik kʼuchaʼal li yajtakboltak Jesuse
«Coʼol me viqʼuiluc jsatic.» (MAT. 26:38)
¿KʼUSI XUʼ JCHANTIK TA SVENTA...
... ti vikʼiluk jsatik yoʼ jnaʼtik bu ta jcholtik mantale?
... ti oyuk ta «[koʼontontik] scʼoponel li Diose»?
... ti skʼan lek tsʼakal jcholtik batel lekil aʼyej, akʼo mi oy vokoliletike?
1-3. ¿Kʼusi chopol la spasik li jtakboletik kʼalal slajeb xaʼox akʼobal kuxul Jesús liʼ ta Balumile xchiʼuk kʼuxi jnaʼtik ti oy kʼusi la xchanike?
NOPO avaʼi li kʼusi kʼot ta pasel kʼalal slajeb xaʼox akʼobal kuxul li Jesuse. Li stuke bat ti bu lek onoʼox xaʼi chkʼote, jaʼ li ta nichimaltik Getsemaní ta slokʼeb Kʼakʼal Jerusalene. Li yajtakboltak ti tukʼ yakʼoj sbaike te xchiʼinojik batel. Li Jesuse ep kʼusi oy ta snopben xchiʼuk ta yoʼonton, vaʼun tskʼan stuk oy sventa tspas orasion (Mat. 26:36; Juan 18:1, 2).
2 Kʼalal kʼotik ta nichimaltike, li oxvoʼ jtakboletike, jaʼ xkaltik li Pedro, Santiago xchiʼuk Juane batik xchiʼuk Jesús ti bu mas nakʼnakʼe. Kʼalal skʼan toʼox xbat spas orasione xi laj yalanbe komele: «Comanic liʼi; coʼol me viqʼuiluc jsatic». Kʼalal sutale ochem tajek svayelik la sta li yajtakboltake, jaʼ yuʼun xi la xchaʼalanbee: «Jaʼ lec julovanic». ¡Pe li stukike chib to velta och svayelik! Ta mas tsʼakal li ta akʼobal taje skotol li jtakboletike muʼyuk xa vikʼil satik ta mantal. Jaʼ yuʼun, laj yiktaik li Jesuse xchiʼuk jatavik batel (Mat. 26:38, 41, 56).
3 Ta melel, li jtakboletike laj yat yoʼontonik ta skoj li kʼusi la spasike. Pe oy kʼusi la xchanik ta skoj taje. Li kʼusi yakʼoj ta naʼel Dios ta slivroal Hechose, chakʼ ta ilel ti jtakboletike lek vikʼil satik ta mantal, jaʼ yuʼun kʼotik ta jun slekil kʼelobil. Vaʼun, ep ermanoetik tijbat yoʼontonik ta xchanel taje. Li avi eke, mas to me tsots skʼoplal ti vikʼiluk jsatike (Mat. 24:42). Li ta xchanobil liʼe ta jchantik oxtos kʼuxi xuʼ lek vikʼil jsatik ta mantal. Taje ta jtatik ta slivroal Hechos.
VIKʼIL SAT LA SMALAIK BEILTASEL SVENTA BU CHCHOLIK MANTAL
4, 5. ¿Kʼuxi beiltasatik yuʼun chʼul espiritu li Pablo xchiʼuk xchiʼiltake?
4 Li kʼusi baʼyel la spas li jtakboletike jaʼ ti vikʼil satik la smalaik li beiltasel sventa bu chcholik mantale. Jun veltae, li Jesuse la stunes chʼul espiritu ti akʼbil yuʼun Jeova sventa tsbeiltas li jtakbol Pablo xchiʼuk xchiʼiltak sventa jun xanbal ti muʼyuk kʼusi xkoʼolaj-oe (Hech. 2:33). Jkʼeltik li kʼusi kʼot ta pasele (kʼelo Hechos 16:6-10).
5 Li Pablo, Silas xchiʼuk Timoteoe jaʼ to yakal chlokʼik batel ta Listra jun lum ta sural Galacia. Kʼalal echʼ xaʼox jayibuk kʼakʼale te kʼotik ta sbelel Roma. Li be taje, jaʼ sbelel smaleb Kʼakʼal li ta lumetik yuʼun Asia ti ep jnaklejetik tee. La stamik batel li be taje, yuʼun tskʼan ox tsvulaʼanik lumetik ti te nakal epal krixchanoetik ti skʼan xchikintaik li aʼyej sventa Cristoe. Pe oy kʼusi pajesatik. Li versikulo 6 xi chale: «Ibatic ta scotol Frigia banamil xchiʼuc ta Galacia banamil, yuʼun ipajesatic yuʼun Chʼul Espíritu ti mu to me xbat xcholic scʼop Dios ta Asia banamile». Mu jnaʼtik kʼu yuʼun, pe muʼyuk x-akʼbat xcholik mantal yuʼun chʼul espiritu li ta yosilal Asiae. Kʼuchaʼal chkiltike, li Jesuse la stunes chʼul espiritu sventa stak batel ta yan lumetik li Pablo xchiʼuk li xchiʼiltake.
6, 7. 1) ¿Kʼusi kʼot ta stojolalik li Pablo xchiʼuk xchiʼiltak li ta stsʼel Bitinia balumile? 2) ¿Kʼusi la spasik li yajtsʼaklomtak Cristoe xchiʼuk kʼusi kʼot ta pasel?
6 ¿Bu batik li jxanviletik ti xmuyubajik noʼoxe? Li versikulo 7 xi chal batele: «Cʼalal icʼotic ta stsʼaquil Misia banamile, ta ox xbatic ta Bitinia banamil. Pero ipajesatic yuʼun li Chʼul Espiritue». Ta skoj ti muʼyuk la xcholik mantal ta yosilal Asiae, la stamik batel li be ta norte sventa chcholik li aʼyejetik li ta lum Bitiniae. Pe kʼalal nopol xaʼox skʼan xkʼotik li ta lum taje, yan velta li Jesuse la stunes chʼul espiritu sventa chpajesatik. ¡Li Pablo xchiʼuk li xchiʼiltake xuʼ van labal sba laj yilik li kʼusi yakal chkʼot ta pasele! Snaʼojik li kʼusi skʼan xcholike xchiʼuk ti kʼuyelan xuʼ spasike, pe mu snaʼik ti bu xuʼ chcholik mantale. Xkaltik noʼoxe, koʼol kʼuchaʼal la stijbeik stiʼ sna li Asia balumile xchiʼuk li Bitinia balumile, pe muʼyuk bu jambatik. Ta skoj taje, ¿mi chchibaj van yoʼontonik xchiʼuk mi chikta sbaik van li ta cholmantale? ¡Moʼoj!
7 Vaʼun chaʼa, ¿kʼusi la spasik? Li versikulo 8 xi chale: «Ijelovic ta Misia banamil, te icʼotic ta lum Troas». Vaʼun li jxanviletike la skʼelik li smaleb Kʼakʼale xchiʼuk xanavik batel 563 kilometro, te echʼik batel ta epal lumetik, vaʼun kʼotik ta tiʼnab ta Troas, jaʼ li yochebal lum Macedoniae. ¡Li ta yoxibal veltae jaʼ to ochik! Yuʼun li Pablo xchiʼuk xchiʼiltake lek xa jamal kʼot staik li stiʼ lum taje. Li ta versikulo 9 xi chal li kʼusi kʼot ta pasele: «Ta acʼubaltic iʼacʼbat yil ta xchʼulel jun macedonia vinic. Laj yil te vaʼal ta xcʼopanat: “Batic ta Macedonia banamil, bat coltauncutic”». Vaʼun, li jtakbol Pabloe la snaʼ ti bu skʼan xchol mantale. Jaʼ yuʼun ta anil la stsakik batel varko sventa chbatik ta Macedonia.
8, 9. ¿Kʼusi xuʼ jchantik ta sventa li kʼusitik kʼot ta stojolal Pabloe?
8 ¿Kʼusi chchanubtasutik li loʼil taje? Chkiltik ti jaʼ to abtej xchʼul espiritu Dios kʼalal bat xaʼox ta yosilal Asia li Pabloe. Ta tsʼakal xtoke, jaʼ to beiltasvan Jesús kʼalal bat xaʼox ta Bitinia balumil li Pabloe. Ta slajebe, kʼalal kʼotem xaʼox ta lum Troas li Pabloe, li Jesuse laj yalbe ti akʼo xbat ta Macedonia balumile. Li avie, li Jolil yuʼun tsobobbaile xuʼ van jech tspasbutik ek (Col. 1:18). Jech kʼuchaʼal liʼe, xuʼ van oy ta koʼontontik chijtunutik ta prekursor o ta jkʼan chijbatutik ti bu chtun tajek jcholmantaletike. Pe li Jesuse, xuʼ van jaʼ to tstunes li chʼul espiritu sventa sbeiltasutik kʼalal jlikesojtik xaʼox spasel li kʼusi oy ta koʼontontik staele. ¿Kʼu yuʼun? Kalbetik junuk skoʼoltasobil. Li jtsʼot karoe jaʼ to xuʼ tstsʼot batel ta batsʼi kʼob o ta tsʼet kʼob kʼalal mi chanav xaʼox li karoe. Jech ek, li Jesuse xuʼ tsbeiltasutik, pe jaʼ noʼox mi yakal xa chijxanavutike, jaʼ xkaltik, mi yakal chkakʼbetik yipal spasbel mas li yabtel Jeovae.
9 Pe, ¿mi chkiltik ti chʼabal kʼusi lek chkʼot ta pasel ta kabteltik une? ¿Mi yuʼun van muʼyuk tsbeiltasutik li espiritue? Yikʼaluk van moʼoj. Jvules ta joltik li Pabloe, jaʼ jech kʼot ta stojolal ek. Akʼo mi jech, li stuke muʼyuk laj yikta sba, vaʼun oy kʼusi lek kʼot ta pasel ta sventa li yabtele. Jaʼ jech chkʼot ta pasel li avi eke. Mi mu xkikta jbatik eke, xuʼ van xkichʼtik jambel jun «tiʼna, [vaʼun] lec xuʼ ep [chij-abtej]» (1 Cor. 16:9).
OY TA «[Y]OʼNTONIC TA SCʼOPONEL LI DIOSE»
10. ¿Kʼuxi xuʼ jnaʼtik ti tsots skʼoplal li orasion sventa lek vikʼiluk-o jsatike?
10 Jkʼeltik batel li xchibal chanubtasel sventa lek vikʼiluk jsatike: li kermanotaktik ta baʼyel sigloe te ta yoʼontonik ta skʼoponel li Diose (1 Ped. 4:7). Sventa mu xijvayutik ta mantale jaʼ tsots skʼoplal ti mu xkikta jbatik ta skʼoponel li Jeovae. Jvules ta joltik kʼusi albatik oxvoʼ jtakboletik kʼalal poʼot xaʼox xichʼ chukel batel Jesús ta Getsemanie: «Jaʼ lec julovanic, [kʼoponik-o] Dios» (Mat. 26:41).
11, 12. ¿Kʼutik yelan laj yilbajin Pedro xchiʼuk yantik jtakboletik li Herodese, xchiʼuk kʼu yuʼun jech la spas?
11 Kʼalal albatik taje, jaʼo te oy li Pedroe, vaʼun kʼalal echʼ xaʼox jayibuk jabile laj yakʼ venta li sbalil kʼalal ta sjunul oʼontonal chichʼ pasel orasione (kʼelo Hechos 12:1-6). Jech kʼuchaʼal chakʼ iluk li baʼyel versikuloetike, li ajvalil Herodese lik yilbajin li yajtsʼaklomtak Cristo yoʼ lek x-ilat-o yuʼun li judioetike. Li Herodes xtoke, snaʼoj ti jaʼ jun tukʼil jtakbol xchiʼuk jaʼ yamigo Jesús li Santiagoe, vaʼun la smil «ta espada» (versikulo 2). Li ermanoetike, ¡toj kʼux laj yaʼiik kʼalal laj ta milel li jtakbole yuʼun skʼanojik tajek!
12 ¿Kʼusi to van la spas li Herodese? Jchantik batel kʼusi chal li versikulo 3: «Cʼalal laj yil Herodes ti toj lec laj yaʼyic li yantic judioetique, jech la stsac noxtoc li Pedroe». Pe li Pedro xchiʼuk yan jtakboletike muʼyuk pajtsanatik-o yuʼun li chukele (Hech. 5:17-20). Ta skoj ti snaʼoj li kʼusi xuʼ chkʼot ta pasel li manya ajvalile, laj yakʼ «chantsob soldadoetic. Chanib soldado yicʼoj sbaic ta jujutsob, yuʼun acʼo xchabiic li Pedroe. La snop Herodes ti ta sloqʼues ta stojol scotol jteclum cʼalal me ilaj cʼop qʼuine» (versikulo 4). ¡Nopo noʼox avaʼi! Li Herodese ta chaʼvoʼ soltaro la xchuk ta kadena li Pedroe, xchiʼuk vaklajunvoʼ mayoletik tsjelilan sbaik sventa chchabiik ta kʼakʼal akʼobal yoʼ mu xjatav. Li kʼusi ox tskʼan mi laj xaʼox kʼin koltael li Herodese, jaʼ ti tsvaʼan ta stojolal epal krixchanoetik li Pedroe, vaʼun chal ti tsmile yoʼ xkʼot kʼuchaʼal jun matanal sventa li epal krixchanoetike. Ta skoj li tsatsal vokoliletik yakal tsnuptane, ¿kʼusi van xuʼ spasik li xchiʼiltak ta chʼunolajele?
13, 14. 1) ¿Kʼusi la spas tsobobbail kʼalal laj yichʼ chukel li Pedroe? 2) Kʼalal ta jkʼeltik li kʼusi la spasik li xchiʼiltak Pedroe, ¿kʼusi ta jchantik?
13 Li versikulo 5 chalbutik ti snaʼojik lek kʼusi skʼan spasik li ermanoetike: «Laj yichʼ chabiel ta chuquinab li Pedroe. Pero li jchʼunolajeletique muʼyuc bu la xquechanic o scʼopanbel Dios ta stojol». Kʼuchaʼal chkiltike, ta sjunul yoʼontonik la spasik orasion sventa li yermanoike. Kʼalal laj ta milel li Santiagoe muʼyuk chibajik-o xchiʼuk muʼyuk la snopik ti chʼabal sbalil li s-orasionike. Moʼoj, snaʼojik ti oy sbalil chilbe s-orasion yajtuneltak li Jeovae xchiʼuk ti tstakʼ kʼalal mi jaʼ jech ta jkʼantik kʼuchaʼal tskʼan yoʼontone (Heb. 13:18, 19; Sant. 5:16).
14 Kʼalal ta jchantik batel li kʼusi la spasik li xchiʼiltak Pedroe, ¿kʼusi ta jchantik? Sventa lekuk vikʼil jsatike skʼan jpastik orasion, pe maʼuk noʼox ta jtojolaltik, skʼan jpastik xtok ta stojolal li jchiʼiltaktik ta chʼunolajele (Efe. 6:18). ¿Mi oy xavojtikin ermanoetik ti yakal chil svokolike? Xuʼ van yakal chil svokolik ta nutsel, mu x-akʼbat spasik yabtel Dios yuʼun li ajvaliletike o ta skoj nojelal ta voʼ, nikel o yantik. Ta melel, oyuk me ta koʼontontik ta spasel orasion ta stojolalik. Xuʼ van jnaʼojbetik skʼoplal xtok ermanoetik ti mas kʼunik noʼox li svokolike, jech kʼuchaʼal svokolik ta yutsʼ yalalik, chibajem yoʼontonik o ta chameletik. ¿Kʼu yuʼun mu xatabe ta albel sbi junantik ermanoetik kʼalal chakʼopon li Jeovae, ti jaʼ li Buchʼu chaʼi li jkʼoptike? (Sal. 65:2.)
15, 16. 1) Li Pedroe, ¿kʼuxi lokʼesat ta chukel yuʼun jun yaj-anjel Jeova? (Kʼelo li lokʼole.) 2) ¿Kʼu yuʼun tstsatsubtasutik ti kʼuyelan koltaat yuʼun Jeova li Pedroe?
15 ¿Kʼusi kʼot ta stojolal li Pedroe? Li ta slajeb akʼobal tikʼil ta chukele och svayel kʼalal chabibil ta chaʼvoʼ mayoletike, vaʼun oy kʼusi labal sba kʼot ta pasel (kʼelo Hechos 12:7-11). Ta anil noʼox sak jaman kʼot xojobal ta xchukinab. Vaʼun te kʼot jun anjel, la stij ta anil li Pedroe, pe li mayoletike muʼyuk bu laj yilik. ¡Li kadena ti chukajtik-o skʼobe, te noʼox sol yalel ta skʼob! Li anjele la slokʼes ta chukel li jtakbole, akʼo mi te vaʼajtik ta stiʼ chukinab li mayoletike, vaʼun jelavik batel li ta tiʼna ti pasbil ta tsatsal takʼine. Li tiʼna taje «ijam stuc». Kʼalal teik xaʼox ta kayee, li anjele sak chʼay batel. ¡Kol lokʼel li Pedroe!
16 Ta melel, kʼalal ta jvules ta joltik ti xuʼ skolta yajtuneltak ta stsatsal juʼel li Jeovae, li xchʼunel koʼontontike ta stsatsub. Li avie, muʼyuk jmalaojtik tskoltautik ta skʼelobil juʼelal li Diose. Pe xuʼ jpat koʼontontik ti tstunes sjuʼel sventa tskolta li steklumale (2 Cró. 16:9). Sventa xkuch kuʼuntik kʼusuk noʼox vokolile, li Jeovae chakʼbutik li yip ch-abtej ti toj tsotse (2 Cor. 4:7; 2 Ped. 2:9). Li Jeovae jutuk xa skʼan stunes li skʼanbil Nichʼon sventa skolta lokʼel epal miyon krixchanoetik li ta lajelale, ti xkoʼolaj kʼuchaʼal jun mukʼta chukinabe (Juan 5:28, 29). Ta melel, li xchʼunel koʼontontik ta stojolal li kʼusitik yaloj tspas Jeovae tspat koʼontontik sventa xkuch kuʼuntik li vokoliletik ta jnuptantike.
LEK TSʼAKAL LA XCHOLIK LEKIL AʼYEJ AKʼO MI OY VOKOLILETIK
17. ¿Kʼuxi laj yakʼ ta ilel Pablo ti oy ta yoʼonton xcholel li lekil aʼyeje xchiʼuk ti te ta sjol ti nopol xa skʼakʼalil li Jeovae?
17 Jkʼeltik batel li yoxibal chanubtasel sventa lekuk vikʼil jsatike: li jtakboletike lek tsʼakal la xcholik lekil aʼyej akʼo mi oy vokoliletik. Sventa lekuk vikʼil jsatike, tsots skʼoplal ti ta sjunuluk koʼontontik jcholtik mantale xchiʼuk skʼan teuk ta joltik ti nopol xa li skʼakʼalil Jeovae. Li jtakbol Pabloe jaʼ jun slekil kʼelobil kuʼuntik, yuʼun ta sjunul yoʼonton abtej. Li stuke epal kilometro xanav xchiʼuk la slikes epal tsobobbailetik. Akʼo mi ep laj yil svokol, xmuyubaj noʼox ta sventa li kʼusitik melele xchiʼuk muʼyuk chʼay ta sjol ti nopol xa skʼakʼalil li Jeovae (2 Cor. 11:23-29).
18. ¿Kʼusi la spas Pablo sventa xchol-o mantal kʼalal te chabibil ta Romae?
18 Jkʼeltik li slajeb kʼusi chalbe skʼoplal Pablo ta skapituloal 28 ta slivroal Hechos. Kʼalal kʼot ta Roma li jtakbole, bat ta stojolal li ajvalil Nerone. Lek chabibil, xuʼ van chukbil ta kadena ta stojolal junuk mayol. Pe chʼabal kadena xuʼ xpajesat li lekil jcholmantale, yuʼun persa tsabe smelolal kʼuxi xuʼ chal li lekil aʼyeje (kʼelo Hechos 28:17, 23, 24). Kʼalal echʼ xaʼox oxib kʼakʼale, li Pabloe la stakan ta ikʼel judioetik ti mas tsots yabtelike sventa chcholbe mantal. Ta tsʼakale, la stʼuj jun kʼakʼal sventa tsjambe mas smelolal li aʼyejetike. Xi chal li versikulo 23: «[Li judioetik ta Romae] la saʼbeic scʼacʼalil cʼusi ora ta xtalic [ta stojolal]. Cʼalal la sta scʼacʼalile, ep italic yoʼ bu nacal li Pabloe. Li Pabloe lic yalbe yaʼyic cʼu xʼelan chventainvan li Diose. La sjambe lec smelol; laj yacʼbe lec yilic scʼoplal li Jesús ti butic tsʼibabil comel yuʼun li Moisese xchiʼuc li yantic yajʼalcʼoptac Diose. Sob la sjapuic, te oyic o cʼalal to ta mal cʼacʼal».
19, 20. 1) ¿Kʼu yuʼun toj lek xtojob ta cholmantal li Pabloe? 2) ¿Kʼu yelan laj yaʼi sba Pablo kʼalal muʼyuk la xchʼam skotolik li lekil aʼyeje?
19 ¿Kʼu yuʼun toj lek xtojob li Pabloe? Li ta versikulo 23 te chkiltik ep srasonaltak. 1) Jaʼ oy ta yoʼonton li Ajvalilal yuʼun Diose xchiʼuk ta stojolal li Jesucristoe. 2) Li kʼusi chakʼbe yil krixchanoetike chkʼot ta yoʼontonik. 3) Tslokʼes ta Vivlia li kʼuyelan snaʼ xrasonaje. 4) Maʼuk noʼox tsaʼ li kʼusi tskʼan stuke, yuʼun kʼalal la xchol mantale ta «sob la [sjapu] [...] cʼalal to ta mal cʼacʼal». Akʼo mi oy lek sprevail li kʼusitik laj yale, mu skotolikuk lek laj yaʼiik. Xi chal li versikulo 24: «Oy jayibuc la xchʼunic cʼusi laj yal li Pabloe, pero oy yantic mu xchʼunic». Ta skoj taje, lik yutilan sbaik, vaʼun lokʼik batel.
20 ¿Mi chibaj van yoʼonton li jtakbol ta skoj ti ep buchʼutik muʼyuk la xchʼamik li lekil aʼyeje? Ta melel moʼoj. Xi chalbutik ta Hechos 28:30, 31: «Li Pabloe tsʼacal chib jabil te icom ta slocʼbil na. Laj yicʼ ochel ta sna scotol li yuloʼtac te icʼotique. Jamal la xchol cʼu xʼelan chventainvan li Diose, xchiʼuc ichanubtasvan lec ta sventa li Cajvaltic Jesucristoe. Lec ta satilal ichanubtasvan; muʼyuc bochʼo ipajesat ta xcholel». Li kʼusitik lek kʼot ta pasel taje, jaʼ jech chlaj li slivroal Hechose.
21. ¿Kʼusi ta jchantik ta sventa li kʼusi la spas Pablo kʼalal te chabibil o chukbil ta sna ta Romae?
21 ¿Kʼusi ta jchantik ta stojolal li Pabloe? Kʼalal te chabibil o chukbil ta sna ta Romae, mu stakʼ xchol mantal ta naetik. Akʼo mi jech, oy onoʼox ta yoʼonton tspas taje, jaʼ yuʼun la xcholbe mantal li buchʼutik chvulaʼanate. Li avie eke jaʼ jech yakal chkʼot ta pasel. Ep kermanotaktike tikʼilik ta chukel ta skoj li xchʼunel yoʼontonike, akʼo mi jech, xmuyubajik noʼox. Li yantike mu stakʼ xlokʼik ta cholmantal, te noʼox oy ta snaik o ta snailal mol meʼelik ta skoj ti yijik xae o ta skoj chameletik. Mi stakʼ chilike chcholbeik mantal li doktoretike, li jvulaʼaletike xchiʼuk yan krixchanoetik. Ta sjunul yoʼontonik tskʼan chcholbeik skʼoplal li Ajvalilal yuʼun Diose. ¡Toj ep sbalil chkiltik li kʼusitik lek tspasike!
22. 1) ¿Kʼusi xuʼ skoltautik sventa jtabetik mas sbalil li slivroal Hechose? (Kʼelo li rekuadro ta akʼole.) 2) ¿Kʼusi skʼan jpastik ta jujuntal yoʼ to ta jmalatik chichʼ lajesel li kʼusitik chopolik yakal chkʼotanuk ta pasele?
22 Ta melel, oy ep kʼusitik xuʼ jchantik ta sventa ti kʼuyelan lek vikʼil sat jtakboletik xchiʼuk li yantik jchʼunolajeletik ta baʼyel siglo ti te chal ta slivroal Hechose. Jaʼ yuʼun, yoʼ to ta jmalatik chichʼ lajesel li kʼusitik chopolik yakal chkʼotanuk ta pasele, jchanbetik-o batel li stsatsal yoʼontonik xchiʼuk ti ta sjunul yoʼontonik la xcholik mantal li jtakboletike. Li avi slajebal xa kʼakʼale, jaʼ jun mukʼta matanal ti lek tsʼakal chkalbetik batel skʼoplal li Ajvalilal yuʼun Diose (Hech. 28:23).
[Sjakʼobiltak sventa xchanobil]
[Rekuadro ta pajina 13]
«SKʼELEL LI SLIVROAL HECHOSE MU XA KOʼOLUK CHKIL KʼUCHAʼAL TOʼOXE»
Jun jkʼelvaneje xi laj yal kʼuyelan laj yaʼi sba kʼalal laj xaʼox skʼel li livro “Testimonio cabal” del Reino de Dios sbie: «Skʼelel li slivroal Hechose mu xa koʼoluk chkil kʼuchaʼal toʼoxe», xi. Oy xaʼox jayibuk velta skʼeloj li slivroal Hechose, pe kʼalal la skʼel li livro “Testimonio cabal” del Reino de Dios sbie, mas xa ep sbalil tstabe chaʼi mi la skʼel yan velta li slivroal Hechose.
[Lokʼol ta pajina 12]
Jun yaj-anjel Jeovae la slokʼes batel Pedro ta mukʼta tiʼna ti pasbil ta tsatsal takʼine
