Kʼusitik kʼot ta pasel ta voʼne

«Toj chʼayal to kom yoʼonton kuʼunik li krixchanoetike»

Kʼalal kʼot ta Louisville (Kentucky, Estados Unidos), li Charlotte White ti chchol mantal ta tsʼakal orae, solel skotol krixchanoetik chkʼelat ta skoj ti xjochoj batel jun maleta ti oy syantaile.

TA SJABILAL 1908, li ermana Whitee solel kʼelbil ta epal krixchanoetik xchiʼuk li kʼusi achʼ yichʼoj batele. Xi chal li ermanae: «Ep kʼusitik laj yalik ta sventa li auroramóvil kichʼoj batele xchiʼuk toj chʼayal to kom yoʼonton kuʼunik li krixchanoetike».

Li Jchanolajeletik ta Vivliae, ti jech toʼox ojtikinbilik li yajrextikotak Jeovae, laj yaʼibeik smelolal ti skʼan xalik batel li meleletik ti xchanojik xaʼox ta skoj ti baxbolik ta xchanel li Vivliae. Ep buchʼutik laj yojtikinik kʼusi chal li Vivliae, pe jaʼ koliyal skotol li livroetik ti jaʼ sbi La Aurora del Milenio (ta tsʼakale la sbiin Estudios de las Escrituras). Li buchʼutik oy ta yoʼontonik xchiʼuk ti xuʼ yuʼun laj yilike, ep butik batik, ta jteklumetik, ta bikʼit jteklumetik o ta parajeetik, sventa chakʼik li livroetik ti jaʼ jech toʼox ojtikinbil kʼuchaʼal «koltael sventa li Jchanolajeletik ta Vivliae» xchiʼuk sventa chakʼbeik li buchʼutik oy ta yoʼontonik skʼelele.

Li ta 1908 li ermana White xchiʼuk li yantik jcholmantaletik ti xmuyubaj chtunik ta stojolal li Ajvalilal yuʼun Diose, la spukik livroetik ti yichʼoj talel vakib volumenetike, li spat livroetik taje pasbil ta manta, li stojole jaʼ 1,65 dolar. Li stukike muʼyuk chakʼbeik komel ta anil livroetik li krixchanoetike, baʼyel tstsakbeik sbi, vaʼun tsutik ta tsʼakal sventa chiktabeik komel jaʼ to mi la stojik uni jutebuke, jutuk mu skotoluk veltae jaʼo chbatik kʼalal mi laj xaʼox yichʼ stojolike. Jun vinik ti chkontrainvane laj yal ti kʼu yuʼun toj jutuk matanal takʼin chakʼik li krixchanoetik ta sventa li livroetike.

Li ermana Malinda Keefer chvul ta sjol ti maʼuk noʼox laj yichʼ kʼanbel chib sien livroetike, moʼoj, yuʼun kʼanbat  oxib sien ta jun noʼox xemana. Ta skoj ti ep buchʼutik oy ta yoʼontonik li livroetike, oy kʼusi tsots kʼot ta pasel, yuʼun li jun noʼox volumen ti jaʼ xa li svakibale yichʼoj talel 740 pajina. Li revista The Watch Tower laj yakʼ venta ek ti 18 kilogramo yalal ta 50 livroe xchiʼuk ti skʼan «tsots chakʼ yipik» ta xchʼakele, mas to li ermanaetike.

Sventa x-akʼ yuʼunik li livroetik taje li ermano James Cole la spasbe steʼeltak ta takʼin xchiʼuk laj yakʼbe chib syantail. Li steʼel ta takʼin taje xuʼ chichʼ tsinel ochel ta torniyoetik li ta maletae. Taje laj yichʼ pasel sventa mu xa xichʼ kuchel kajaetik ti noj ta livroetike, xi laj yal stuk ti buchʼu la smeltsan taje: «¡Mu xa bu ta jkʼas jpat!». Li kʼusi achʼ laj yichʼ lokʼesele, te laj yakʼ ta ilel ta mukʼta tsobajel yuʼun li Jchanolajeletik ta Vivlia ta 1908, ti te echʼ ta Cincinnati (Ohio, Estados Unidos), li buchʼutik te tsobajtike toj echʼ xa noʼox lek laj yilik. Li ta storniyoaltak ta syantailtake te tsʼibabil ta inglés auroramóvil (Dawn-Mobile), yuʼun li ta maleta taje jaʼ noʼox te chichʼik batel li svolumenaltak La Aurora del Milenio. Ta skoj ti laj yichʼ chanel stunesel jutuke, mas xa kʼun ta ichʼel batel li livroetike, yuʼun ta jun xa noʼox kʼabal xuʼ xichʼ jochel batel. Ti kʼu staylej stakʼ pasel li maletae jaʼ ti kʼu snatil tskʼan li jcholmantale xchiʼuk li syantailtake xuʼ xanav ta bikʼtal beetik o ta teraseria. Mi laj xaʼox li cholmantale, li syantailtake xuʼ xichʼ puxel muyel ta jot xokon li maletae, jaʼo xa kʼalal tsutik batel ta snaike, mi ta karo chbatik o mi ta yakanik.

Li ermanaetik ti tspasbeik yabtel Dios ta tsʼakal orae, xuʼ ta moton tskʼanik li auroramóvile. Pe li jcholmantaletike tstojik 2,50 dolar. Li ermana Keefere, ti te chvinaj ta lokʼol liʼe, la xchan lek yichʼel batel ta jun noʼox skʼob li auroramóvile, yuʼun li ta jun skʼob xtoke chichʼ batel jun svolsa ti te tstikʼ batel yan livroetike. Li ermanae ep la sta krixchanoetik ti oy ta yoʼontonik mantal ta jun jteklum ti bu tspasik akʼale, persa oxib o chanib velta chanav ta jun kʼakʼal sventa chbat yikta komel li livroetike, sventa taje ch-echʼ xtuchʼ jun ukʼum ta jun bakʼo.

Ta slajebtik xa echʼel sjabilal 1980, jun piloto sventa avion lik spas li maletaetik ti oy syantailtak ti buyuk noʼox chichʼ tunesel li avie, ti oy xkiltik ta syaleb avionetik o bu ta jtsaktik karoetik xchiʼuk li ta skayealtak mukʼtik lumetike. Pe leʼtik xa ta sien jabile, li Jchanolajeletik ta Vivlia ti xmuyubaj noʼox chtunik ta stojolal Diose, labal xa onoʼox sba ch-ilatik yuʼun krixchanoetik kʼalal buyuk noʼox chichʼik batel li auroramóvil sventa tspukik batel li kʼusi melel ta Vivlia ti ep sbaliltake.

[Tsʼib ta mukʼtik sletraile ta pajina 32]

Kʼalal jaʼo chbat yakʼ livroetik li ermana Keefere nopoltik noʼox ti oxib o chanib velta chanav ti ch-echʼ xtuchʼ jun ukʼum ta jun bakʼoe

[Tsʼib ta mukʼtik sletraile ta pajina 32]

Jaʼ la skoltaunkutik sventa xkichʼkutik batel li livroetike