Tsots yoʼonton la xcholik Skʼop Dios

Li melel jchʼunolajeletike chakʼik ta ilel stsatsal yoʼontonik xchiʼuk muʼyuk bu xiʼik kʼalal la staik kontrainele, li kʼusi chkaltik taje xuʼ te jtabetik sprevailtak li ta vunetik, “Testimonio cabal” del Reino de Dios xchiʼuk Los testigos de Jehová, proclamadores del Reino de Dios. Jech kʼuchaʼal li jchʼunolajeletik ta baʼyel sigloe, li voʼotik eke ta jkʼanbetik xchʼul espiritu Jeova xchiʼuk koltael sventa oyuk stsatsal koʼontontik ta xcholbel li Skʼope (Hech. 4:23-31).

Jun ermanoe chalbe skʼoplal kʼuyelan li cholmantal ta Baʼyel Mukʼta Paskʼop ta spʼejel Balumile, xi la stsʼibae: «Li yajtuneltak Diose xmuyubajik noʼox xchiʼuk ta sjunul yoʼontonik la spukik li livro The Finished Mystery (Li kʼusi muʼyuk nabil ti lajem xae), jaʼ li svukubal volumen li livro Estudios de las Escrituras sbie. Li vune laj yichʼ pukel ti mu onoʼox bu jech kʼotem ta pasele. Li tratado Kingdom News (Aʼyejetik sventa Ajvalilal yuʼun Dios) numero 1, laj yichʼ pukel ta 1918. Ta tsʼakale lokʼ li tratado Kingdom News numero 2, ti jaʼ chalbe smelolal kʼu yuʼun mu xakʼ li ajvaliletik chichʼ pukel li vun The Finished Mystery. Ta mas tsʼakal xtoke lokʼ li tratado Kingdom News numero 3. Li buchʼutik tʼujbil chbatik ta vinajel ti tukʼ yakʼoj sbaike, ep tajek la spukik, pe sventa spasik taje skʼan lek xchʼunel yoʼontonik xchiʼuk stsatsal yoʼontonik».

Li avie, li achʼ jcholmantaletik sventa li Ajvalilal yuʼun Diose, ta xichʼik chanubtasel sventa li yabtel tspasike, pe mu jechuk toʼox taje. Jun ermanoe xi la svules ta sjol li kʼuyelan la xchol mantal ta sba velta ta sjabilal 1922, jaʼ jun ermano ti likem tal ta Poloniae, pe te xa nakal ta Estados Unidos, vaʼun xi la stsʼibae: «Mu jnaʼ kʼuxi ta akʼel li vunetike xchiʼuk mu jnaʼ lek xikʼopoj ta inglés, bat vaʼikun ta stsʼel s-ofisina jun doktor, jaʼ yuʼun la jtij li tiʼnae. Vaʼun jun enfermera tal sjam li tiʼnae. Ta melel, li kʼusi kʼot ta pasele mu xchʼay ta jol, akʼo mi oy ta koʼonton tajek spasel, pe chixiʼ xtok. Kʼalal la jam li jportafolioe, skotol li vunetike pʼaj yalel, vaʼun busul kʼot skotol ta yok li enfermerae. Mu jnaʼ kʼusi laj kalbe, pe la stsak komel jlik vun. Kʼalal lilokʼ batele, tsatsub tajek koʼonton xchiʼuk laj kaʼi ti laj yakʼbun sbendision li Jeovae. Li vaʼ kʼakʼal taje ep tajek laj kakʼ komel foyetoetik li ta kaye ti bu oy ep jpʼolmajeletike».

Xi chal jun ermanae: «Li ta sjabilal 1933, epal ermanoetik la stunesik karoetik ti yichʼoj smikrofonoal sventa spukbeik skʼoplal li Ajvalilal yuʼun Diose». Jun veltae, li ermana xchiʼuk jun nupultsʼakal ti jaʼik yajrextikotak Jeovae, bat xcholik mantal ta jun vits ta jteklum California (Estados Unidos). Li ermanae xi la svules ta sjole: «Li ermanoe muy xchiʼuk skaro li ta vitse, pe li voʼonkutike likomkutik li ta jteklume. Kʼalal laj yichʼ aʼiel li aʼyejetik ti pasbil gravare, xkoʼolaj yaʼeluk kʼuchaʼal ta vinajel chtal. Li krixchanoetik ta jteklume la saʼik tajek li ermanoe, pe muʼyuk bu la staik. Kʼalal laj xaʼox yichʼ aʼiel li kʼusi yichʼoj pasel gravare, li voʼonkutike libatkutik ta snaʼik li krixchanoetike, vaʼun la jcholbekutik mantal. Laj to jtunes xtok chaʼkot karo ti yichʼoj smikrofonoal li ta cholmantale, pe stakʼ xkalboxuk ta melel ti mu skʼan xchikintaik aʼyejetik li krixchanoetike. Akʼo mi jech, laj onoʼox xchikintaik yuʼun solel toj tsots yechʼomal li kʼusi pasbil gravare. Li kʼuyelan  chichʼ toʼox pasel li cholmantale skʼan oyuk lek stsatsal koʼontontik, pe laj yichʼ tabel sbalil, yuʼun li sbi Jeovae laj yichʼ ichʼel ta mukʼ. Ti kʼuyelan la jcholkutik mantale xvinaj onoʼox ti jaʼ jech tskʼan li Jeovae xchiʼuk xtok li kʼusi ora lek chile».

Sventa xichʼ cholel mantal li ta sjabilal 1930 xchiʼuk ta slikebal 1940, laj yichʼ tunesel fonógrafo (stijobil son ti xkoʼolaj kʼuchaʼal jun tokadiskoe), xchiʼuk mantaletik ta Vivlia ti pasbilik gravare. Xi laj yal jun ermanae: «Jun tsebe tstunes fonógrafo sventa chchol mantal ta naetik. Kʼalal kʼot ta jpʼej nae la stij li diskoe, li vinik ti jaʼ yajval nae solel ilin tajek, vaʼun la slik ta tekʼel li fonógrafo li ta tiʼnae, pe mi junuk disko vokʼ. Li kʼusi yakal chkʼot ta pasel taje te skʼeloj oxvoʼ viniketik ti yakal chveʼik ta skaroike, vaʼun li viniketike laj yalbeik li ermana ti akʼo stij li disko sventa xchikintaike xchiʼuk xtok kʼanbat komel vunetik. Ti jech kʼot ta pasel taje, toj-o skotol li kʼusi chopol pasbate». Sventa xkuch kuʼuntik li prevaetik taje, skʼan lek stsatsal koʼontontik.

Xi to laj yal xtok li ermanae: «Jnaʼoj to li ta sjabilal 1940, lik jtuneskutik revistaetik li ta cholmantal ta kayeetike. Pe baʼyele, li xanavkutik ta kayeetik sventa xkalbekutik smelolal. Li ermanoetike lek tukʼ xcholet chanavik ta vanketaetik xchiʼuk yichʼojik batel vunetik ti xi chale: “Li relijione jaʼ jun petsʼ xchiʼuk jun jloʼlavanej” xchiʼuk, “Tunkutik ta stojolal Dios xchiʼuk ta stojolal Cristo ti jaʼ Ajvalile”. Kʼalal chanavik batele tspukbeik xtok tratadoetik ta matanal li krixchanoetike. Sventa laj yichʼ pasel li cholmantal taje skʼan lek stsatsal oʼontonal, pe li sbalile jaʼ ti la snabeik sbi Jeova xchiʼuk li steklumale».

Yan ermanae, xi laj yal xtoke: «Kʼalal chichʼ akʼel li revistaetik ta kayeetik ta jujun jteklume toj vokol tajek. Li vaʼ kʼakʼal taje, solel kontrainbilik li yajrextikotak Jeovae [...]. Jaʼ yuʼun sventa teuk vaʼalutik ta jun eskina jtsakojtik li revista xchiʼuk ti tsots xkalilantik li kʼusi albilutik chkaltike, ta melel skʼan oyuk stsatsal koʼontontik. Akʼo mi jech, jutuk mu skotoluk sabado jech ta jpaskutik. Bakʼintik li krixchanoetike lek ch-ilvanik, bakʼintike ch-ilinik, vaʼun te tsjoy sbaik ta jtojolalkutik. Ta skoj taje, junantik velta ta jel kavilkutik ta stojolalik li buchʼutik ch-ilinike».

Akʼo mi laj yil svokolik li yajrextikotak Jeova li ta Xchibal Mukʼta Paskʼop ta spʼejel Balumile, ta stsatsal yoʼontonik onoʼox la xcholik li mantale. Li ta 1 yuʼun disiembre ta sjabilal 1940 kʼalal ta 12 yuʼun enero ta 1941, li yajrextikotak Jeovae la spasik jun kampanya sventa cholmantal ti jaʼ toʼox sbi yorail cholmantal ti skʼan oyuk stsatsal oʼontonale. Li vaʼ kʼakʼal taje skʼan lek «stsatsal oʼontonal» sventa li cholmantale. Li kampanya taje jalij 43 kʼakʼal xchiʼuk te van 50 mil jcholmantaletik la spukik jutuk mu vaxakib miyon foyetoetik li ta Estados Unidose.

Epal ermanoetik ti ep xa sjabilalike, xvul to ta sjolik ti kʼuyelan laj yakʼ ta ilel stsatsal yoʼontonik kʼalal la snuptanik vokoliletike. Junantik ermanoetike chalik ti vaʼ jabiletik echʼe te vinaj li tsatsal oʼontonal kʼalal xi laj yichʼ alilanele: «Jcholtik mantal ta sjunul koʼontontik kʼalal to ta slajebal». Yoʼ to mu sta skʼakʼalil ta xichʼ lajesel skotol li kʼusitik chopol liʼ ta Balumile, ta to jchantik mas kʼuxi xuʼ yan chichʼ pukel batel mas li aʼyejetik yuʼun Diose. Koliyal li koltael chakʼbutik Diose, xuʼ oy lek xchʼunel koʼontontik xchiʼuk stsatsal koʼontontik kʼalal ta jcholbetik batel li Skʼope.

[Tsʼib ta mukʼtik sletraile ta pajina 9]

Oy sbalil li stsatsal oʼontonal kʼalal ta jcholtik mantale