Jkoltatik krixchanoetik sventa xvikʼ satik

«Yuʼun chavilic li cʼusi chcʼotan xa ta pasele. Jaʼ xa yorail ta jvicʼ lec jsatic.» (ROM. 13:11)

¿MI XUʼ XAVALBE SMELOLAL?

¿Kʼu yuʼun toj tsots skʼoplal skʼan vikʼiluk jsatik ta mantal li yajtsʼaklomutik Cristoe?

¿Kʼu yuʼun tsots skʼoplal skʼan xchikintaik xchiʼuk ti skʼelik lek kʼusi chtun yuʼunik krixchanoetik li yajtsʼaklomtak Cristoe?

¿Kʼu yuʼun toj tsots skʼoplal ti ta slekiluk koʼontontik jcholtik li mantale?

1, 2. ¿Kʼu yuʼun chkaltik ti skʼan xjulavik li krixchanoetike?

SKOTOL jabiletik, ta smilal xa noʼox krixchanoetik chchamik ta skoj ti chnikavik o chvayik kʼalal jaʼo tstsʼot skaroike. Jlom krixchanoetik xtoke tslokʼesat ta yabtelik ta skoj ti mu sob xlikike o ta skoj ti chvayik li bu ch-abtejike. Pe li nikavel ta mantale xuʼ me toj ep kʼusitik chopol xkʼot ta pasel yuʼun. Taje jaʼ chalbe skʼoplal Vivlia ti kʼalal xi chale: «Xcuxet noʼox yoʼnton li bochʼo viqʼuil sate» (Apo. 16:14-16).

² Avi ti mas xa nopol oy li smukʼta kʼakʼalil Jeovae, li krixchanoetike vayemik ta mantal. Yuʼun oy jlom jnitvanejetik ta relijion chalik ti chvayik la li buchʼutik te ta stsobobbailike. ¿Kʼusi skʼan xal li vayel ta mantale? ¿Kʼu yuʼun toj tsots skʼoplal skʼan mu xvayik ta mantal li melel yajtsʼaklomtak Cristoe? ¿Kʼuxi xuʼ jkoltatik li buchʼutik vayalik ta mantale?

¿KʼUSI SKʼAN XAL LI VAYEL TA MANTALE?

3. ¿Kʼu yelan stalelalik li buchʼutik vayemik ta mantale?

³ Li krixchanoetik ti vayemik ta melele mu kʼusi stakʼ spasik. Pe li buchʼutik chvayik ta mantale oy kʼusitik xuʼ spasik, jaʼ noʼoxe muʼyuk kʼusi tspasik ta sventa li mantale. Yuʼun sujom tajek li xkuxlejalike, xuʼ van chat yoʼontonik ta sventa li kʼusitik chtun yuʼunik jujun kʼakʼale o jaʼ mas batem ta yoʼontonik saʼel li chʼayob oʼontonaletike, ti tskʼanik ojtikinele o saʼel skʼulejalike. Ta skoj ti muʼyuk xa yorail yuʼunike, jaʼ muʼyuk xa mas ta yoʼontonik saʼel li kʼusitik chtun yuʼunik ta mantale. Pe li buchʼutik julavemik lek ta mantale snaʼojik ti ta «slajebtic xa batel [kʼakʼal]» kuxulike xchiʼuk jaʼ chakʼ ta yoʼontonik spasel li kʼusi tskʼan Diose (2 Ped. 3:3, 4; Luc. 21:34-36).

4. ¿Kʼu yuʼun toj tsots skʼoplal li mantal ti xi chale: «Mu me xijvayutic jech chac cʼu chaʼal li yantique»?

⁴ Kʼelo 1 Tesalonicenses 5:4-8. Li kʼusi laj yal Pablo liʼe jaʼ laj yalbe li yan yajtsʼaklomtak Cristo sventa mu xvayik  «jech chac cʼu chaʼal li yantique». ¿Kʼusi skʼan xal taje? Jtos ti kʼuxi xuʼ vayal xijkomutike jaʼ ti mu tsotsuk skʼoplal chkaʼitik li mantaletik sventa jtalelaltik yakʼoj Jeovae. Yan xtok ti kʼuxi xuʼ vayal xijkome, jaʼ ti mu jtsaktik ta venta ti poʼot xa tslajes Jeova li buchʼutik mu xchʼunik mantale. Jech oxal, skʼan me jkʼel jbatik sventa mu jchanbetik li xchopol talelalik li buchʼutik muʼyuk chichʼik ta mukʼ Diose.

5. ¿Kʼu yelanik li buchʼutik chvayik ta mantale?

⁵ Jlom krixchanoetike tsnopik ti muʼyuk Dios sventa chchapanatik ta skoj li smulike (Sal. 53:1). Li yantik xtoke chalik ti muʼyuk la ta yoʼonton krixchanoetik li Diose, jaʼ yuʼun muʼyuk la srasonal ti oyuk ta koʼontontike. Jlome tsnopik ti jaʼ noʼox la venta mi oyutik ta junuk relijione, xuʼ xijkʼot ta yamigo li Diose. ¿Kʼuxi xuʼ jkoltatik li krixchanoetik sventa svikʼ satik li ta mantale?

SKʼAN ME JULAVEMUKUTIK

6. ¿Kʼu yuʼun toj tsots skʼoplal ti vikʼiluk sat ta mantal li jun yajtsʼaklom Cristoe?

⁶ Sventa jtijtik ta mantal li yantike, skʼan me julavemukutik ek. ¿Kʼusi skʼan xal taje? Li Skʼop Diose chal ti oy kʼusi xkoʼolaj-o li vayel ta alele xchiʼuk li «yabtelal li icʼ osile», jech kʼuchaʼal li chʼayob oʼontonal ti mu noʼox xichʼ smelolik ta spasele, yakubel, li chiʼinejbail ta vayele, ti muʼyuk xkʼexlalike, utbail xchiʼuk li itʼix oʼontonale (kʼelo Romanos 13:11-14). Mu me kʼunuk ta yiktael taje. Toj tsots me skʼoplal ti vikʼiluk-o jsatike. Kʼalal mu toj tsotsuk skʼoplal chil li jun krixchano ti skʼan mu xvay kʼalal tstsʼot skaroe, xuʼ me xcham-o. ¡Toj echʼ noʼox tsots skʼoplal skʼan xil jun yajtsʼaklom Cristo ti mi vay ta mantale, yuʼun xuʼ xcham-o!

7. ¿Kʼusi van xuʼ xkʼot ta jtojolaltik mi laj kakʼtik akʼo xchibajesutik li krixchanoetik bu ta jcholtik mantale?

⁷ Jech kʼuchaʼal liʼe, li jun yajtsʼaklom Cristoe xuʼ chlik snop ti skotolik xa spʼajojik lekil aʼyej li krixchanoetik bu chchol mantale (Pro. 6:10, 11). Xuʼ van xi tsnope: «Mi mu junuk buchʼu chchʼam li lekil aʼyeje, ¿kʼu yuʼun jecheʼ noʼox ta jlajes kipal sventa ta jkoltaik?». Melel onoʼox ti ep buchʼutik vayemik ta mantale, pe xuʼ xjel li xkuxlejalike xchiʼuk li stalelalike. Yuʼun oy buchʼutik ti chjulavike xchiʼuk chchʼamik li kʼusi chal Vivliae. Xuʼ me jkoltatik mi julavemutik ta mantal eke, jech kʼuchaʼal mi ta jsabetik yan smelolal kʼuxi xuʼ chkʼot ta yoʼonton kuʼuntik li aʼyej ta sventa Ajvalilal yuʼun Diose. Sventa julavemukutik noʼox ta mantale, skʼan me jvules ta joltik ti kʼu yuʼun toj tsots skʼoplal li cholmantal ta jpastike.

¿KʼU YUʼUN TOJ TSOTS SKʼOPLAL LI CHOLMANTAL TA JPASTIKE?

8. ¿Kʼu yuʼun toj tsots skʼoplal li cholmantal ta jpastike?

⁸ Skʼan me teuk ta joltik ti oy sbalil chil Jeova li abtelal ta jpastike, akʼo mi mu xchikintabutik li krixchanoetike. Yuʼun toj tsots skʼoplal sventa xkʼot ta pasel li kʼusi tskʼan yoʼonton Jeovae. Ta melel, li Diose jutuk xa me skʼan xchapan li buchʼutik mu xchʼamik li lekil aʼyeje. Jaʼ me jech chichʼik chapanel ti kʼuyelan la xchʼamik li cholmantal la jpastike (2 Tes. 1:8, 9). Muʼyuk me lek ti ta jnoptik ti mu xa persauk jcholtik mantal ta skoj ti «[ch]chaʼcuxiic li bochʼotic lequique xchiʼuc li bochʼotic chopolique» (Hech. 24:15). Li Skʼop Diose chal ti buchʼutik chichʼik chapanel kʼuchaʼal tentsune «ta xbatic ta tojob mulil sbatel osil», jaʼ xkaltik, ta xichʼik lajesel. Li cholmantal ta jpastike jaʼ skʼelobil ti chkʼuxubinvan li Diose, yuʼun jaʼ sventa tsjel xkuxlejalik xchiʼuk sventa staik-o «cuxlejal sbatel osil» (Mat. 25:32, 41, 46; Rom. 10:13-15). Ti muʼyukuk ta jcholtik mantale, ¿kʼuxi xuʼ xaʼiik li lekil aʼyej sventa staik-o xkuxlejalik li krixchanoetike?

9. ¿Kʼuxi xuʼ koʼol jtabetik sbalil kʼalal ta jcholtik li lekil aʼyeje?

⁹ Ta me jtabetik sbalil kʼalal ta jcholtik li lekil aʼyej eke (kʼelo 1 Timoteo 4:16). ¿Mi  laj xa kakʼtik venta ti tstsatsubtas xchʼunel koʼontontik xchiʼuk ti mas ta jkʼantik Dios kʼalal chkalbetik skʼoplal Jeova xchiʼuk li Ajvalilal yuʼune? ¿Mi mu jechuk ti tskoltautik xchʼiesel talelaletik kʼuchaʼal jun yajtsʼaklom Cristoe? ¿Mi mu masuk xijmuyubaj kʼalal chijlokʼilan ta cholmantal sventa chkakʼtik ta ilel ti chkichʼtik ta mukʼ li Diose? Epal yajtsʼaklomtak Cristoe xmuyubajik noʼox kʼalal yilojik kʼuxi chkoltaatik yuʼun chʼul espiritu sventa tsjel xkuxlejalik li buchʼutik xchanubtasojik ta mantale.

KAKʼTIK VENTA KʼUSI CHTUN YUʼUNIK

10, 11. 1) ¿Kʼuxi laj yakʼik ta ilel Jesús xchiʼuk Pablo ti lek laj yakʼik venta kʼusi chtun yuʼun li krixchanoetike? 2) ¿Kʼusitik skʼan xkakʼtik venta kʼalal ta jcholtik mantal sventa mas xlekub ti kʼuyelan ta jpastike?

¹⁰ Sventa xkʼot ta yoʼonton kuʼuntik lekil aʼyej li krixchanoetike, xuʼ me ep ta tos kʼusi xuʼ jpastik. Jaʼ yuʼun, li jcholmantaletike skʼan me xakʼik lek venta kʼusi chtun yuʼun li krixchanoetike. Jech laj yakʼbutik komel ta ilel li Jesuse. Ta skoj ti tukʼil krixchano echʼe, laj yakʼ venta ti kap jun fariseoe, laj yil xtok ti la sutes yoʼonton jun jmulavil antse xchiʼuk ti ta sjunul yoʼonton laj yakʼ kʼusi oy yuʼun li jun meʼon antse (Luc. 7:37-50; 21:1-4). Taje jaʼ koltaat sventa xakʼbe ta jujuntal li kʼusi chtun yuʼun li krixchanoetike. Li yajtuneltak Dios avi eke, mu me persauk tukʼil krixchanoetik sventa xakʼik venta kʼusi chtun yuʼun li buchʼutik chcholbeik mantale. Ti buchʼu jech la spase, jaʼ li jtakbol Pabloe, yuʼun li stuke jelajtik kʼuxi la xcholbe mantal skotol krixchanoetik sventa xkʼot ta yoʼontonik (Hech. 17:22, 23, 34; 1 Cor. 9:19-23).

¹¹ Mi jech ta jpastik kʼuchaʼal la spas Jesús xchiʼuk li Pabloe, xuʼ van xkakʼtik venta kʼuxi xuʼ xkʼot ta yoʼonton kuʼuntik li buchʼutik ta jcholbetik mantale. Jech kʼuchaʼal liʼe, kʼalal oy buchʼu ta jchiʼintik ta loʼile, jkʼeltik lek bu likem talel, kʼusi oy ta yoʼonton o kʼuyelan xkuxlejal li yutsʼ yalale. Xuʼ van jkʼeltik li kʼusi yakal tspase, vaʼun jaʼ jlikestik-o jloʼiltik.

12. Kʼalal ta jcholtik mantale, ¿kʼusi skʼan jvules ta joltik ta sventa li kʼusi ta jloʼiltatike?

¹² Mi ta jkʼan lek julavemutik ta cholmantale, skʼan me mu xchʼay koʼontontik. Kʼalal yakalutik ta cholmantale xuʼ van xijloʼilaj xchiʼuk li jchiʼiltike, yuʼun xuʼ jpatbe jba koʼontontik. Pe skʼan me jnaʼtik ti chijlokʼ ta cholmantale, jaʼ sventa chbat jchiʼintik ta loʼil li jlakʼnatike (Ecl. 3:1, 7). Jaʼ yuʼun chaʼa, skʼan jkʼeltik lek ti mu me chopoluk xvinaj li kabteltik ta cholmantal kʼalal chijloʼilaj batel kʼalal skʼan to xijkʼot ta jujupʼej nae. Kʼalal jaʼ chkalbetik skʼoplal li kʼusitik oy ta koʼontontik sventa xkʼot ta yoʼonton li krixchanoetike, jaʼ me tskoltautik sventa teuk ta joltik li kabteltike. Li telefonoe jtunel me sventa jpastik li kabteltik ta cholmantale, pe skʼan me jkʼeltik sventa mu buchʼu skʼoponutik tal kʼalal yakal ta jcholbetik mantal li krixchanoetike.

OYUK TA KOʼONTONTIK LI KRIXCHANOETIKE

13, 14. 1) ¿Kʼuxi xuʼ chkakʼtik venta li kʼusi oy ta yoʼonton jun krixchanoe? 2) ¿Kʼusi xuʼ jpastik sventa xkʼot ta yoʼonton kuʼuntik mantal li krixchanoetike?

¹³ Li yajtsʼaklomtak Cristo ti julavemike chchikintaik lek li kʼusitik chal krixchanoetike. ¿Kʼusi xuʼ jakʼbetik jun krixchano ti bu ta jcholtik mantal sventa xalbutik li kʼusi tsvul-o yoʼontone? ¿Mi tsvul-o van yoʼonton ta sventa ti ch-epaj li relijionetike, ti oy majbail ti bu nakale o ta skoj ti mu xkʼot ta pasel kʼusi chalik li ajvaliletike? ¿Mi xuʼ van xkʼot ta yoʼonton kuʼuntik mantal kʼalal jaʼ chkalbetik skʼoplal ti labalik sba pasbil li kʼusitik kuxajtike o xkalbetik ti toj jtunelik li tojobtaseletik chakʼ Vivliae? Jutuk mu skotoluk li krixchanoetik ta spʼejel Balumile oy ta yoʼontonik li orasione, yuʼun oy ta yoʼontonik ek li buchʼutik mu xchʼunik mi oy Diose. Epal  krixchanoetik tsjakʼbe sbaik mi oy buchʼu chaʼi li j-orasiontike. Yantik xtoke tsjakʼik mi skotol orasion chaʼi o mi muʼyuke tskʼan snaʼik kʼusi xuʼ spasik sventa x-aʼibatik.

¹⁴ Sventa xijtojob ta slikesel jloʼiltik ta cholmantale, skʼan me jkʼeltik kʼuxi tspasik li buchʼutik lek xa xtojobike. Jkʼeltik lek kʼuxi tspasik sventa mu jechuk xvinaj ti jaʼ noʼox ta jkʼan ta jnaʼtik ti kʼuyelan xkuxlejalike. ¿Kʼuxi chkʼopojik xchiʼuk kʼuyelan xvinaj satik kʼalal chal kʼusi tsnop li yajval nae? (Pro. 15:13.)

TA SLEKILUK KOʼONTON JTIJTIK

15. ¿Kʼu yuʼun skʼan xkakʼ ta ilel slekil koʼontontik kʼalal ta jcholtik mantale?

¹⁵ ¿Mi lek van chkaʼitik ti xkichʼtik tijel kʼalal ochem tajek jvayeltike? Epal krixchanoetik chkap tajek sjolik kʼalal ta anil chichʼik tijele, jaʼ yuʼun skʼan ti ta kʼunkʼun xichʼik tijele. Jaʼ jech chkʼot ta pasel ek kʼalal ta jkʼan ta jtijtik ta mantal li krixchanoetike. Jech kʼuchaʼal liʼe, ti mi ch-ilin kʼalal chbat jvulaʼantike, ¿kʼusi xuʼ jpastik? Skʼan xkaʼibetik smelolal ti kʼuyelan chaʼi sbae, kalbetik koliyal ti jamal chalbutike, vaʼun jelavkutik batel ta yan na (Pro. 15:1; 17:14; 2 Tim. 2:24). Li slekil koʼontontike xuʼ van jaʼ xtijbat-o yoʼonton xaʼibe li yan jcholmantal mi ch-echʼ ta snae.

16, 17. ¿Kʼuxi xuʼ oyuk jpʼijiltik kʼalal ta jcholtik mantale?

¹⁶ Ta yan xtoke xuʼ van xtakʼ kuʼuntik ta slikebal noʼox li kʼusi xuʼ xpaj-o jloʼiltik yuʼun li krixchanoe. Oy buchʼutik xi chalike: «Moʼoj, kolaval oy xa jrelijion» o «Muʼyuk ta koʼonton», ti vaʼ yelan tstakʼike jaʼ noʼox sventa chtuchʼik ta be li jloʼiltike. Pe akʼo mi jech xuʼ van ta slekil koʼontontik jsabetik junuk sjakʼobil ti lek xaʼi li krixchanoe xchiʼuk ti x-ayan ta yoʼonton kuʼuntik li mantale (kʼelo Colosenses 4:6).

¹⁷ Mi oy buchʼu ta jtatik ta cholmantal ti chal muʼyuk xokole, bakʼintike jaʼ mas lek ti xijbate. Akʼo mi jech, bakʼintike xuʼ van oy kʼusi xkalbetik ta jaypʼeluk noʼox kʼop ti chkʼot ta yoʼontone. Oy junantik ermanoetike saʼ xa yuʼunik junuk teksto ti xuʼ xkʼot ta yoʼonton li yajval nae, vaʼun tskʼelbeik ta anil noʼox xchiʼuk chiktabeik junuk sjakʼobil, taje mu me sta jun minuto tspasik. Ta junantik xtoke, ta skoj ti lek xchapanoj sbaike kʼotem ta yoʼonton yuʼunik li krixchanoetike, vaʼun jaʼ jech chchiʼinik ta loʼil mas. ¿Kʼu yuʼun mu jechuk jpastik kʼalal sta-o chkiltike?

18. ¿Kʼusi xuʼ skoltautik sventa mas xijtojob li ta cholmantal ta buyuk noʼoxe?

¹⁸ Li kʼusitik ta jpas ta jkuxlejaltik jujun kʼakʼale ta onoʼox me jchiʼintik ta loʼil yan krixchanoetik. Xuʼ van xkʼot ta yoʼonton kuʼuntik li lekil aʼyejetik mi jchapanoj lek jbatik sventa jcholtik mantal ta buyuk noʼoxe. Epal ermanoetik chichʼik batel vunetik ta svolsaik o ta xvorxail skʼuʼik. Yikʼaluk van snopojik kʼusi tekstoal xuʼ stunesik kʼalal sta-o chilike. Jech xtok, xuʼ jkʼantik koltael ta stojolal jkʼelcholmantal xchiʼuk li prekursor regularetik ta jtsobobbailtike.

TA SLEKILUK KOʼONTON JTIJTIK LI KUTSʼ KALALTIKE

19. ¿Kʼu yuʼun skʼan mu xijlubtsaj ta xcholbel mantal li kutsʼ kalaltike?

 ¹⁹ Jkotoltik onoʼox oy ta koʼontontik ti xchʼamik lekil aʼyej li kutsʼ kalaltike (Jos. 2:13; Hech. 10:24, 48; 16:31, 32). Mi mu xaʼibutik ta sba veltae, xuʼ van jnoptik ti mu xa kʼusi skʼanik-oe. Akʼo mi kʼusuk jpastik o xkaltik, mu xa xjelik-o chkaʼitik. Pe li kʼusi melele jaʼ ti xuʼ ep kʼusitik xkʼot ta stojolalike xchiʼuk chjel li snopbenike. Xuʼ van mas xa jnaʼtik yalbel smelolal li kʼusi jnaʼtik ta sventa li melele, vaʼun xuʼ lek kʼusi chkʼot ta pasel kuʼuntik.

20. ¿Kʼu yuʼun tsots skʼoplal skʼan jsabetik smelolal ti kʼuxi xuʼ jcholbetik mantal li kutsʼ kalaltike?

²⁰ Skʼan me jtsaktik ta venta kʼuyelan chaʼi sbaik li kutsʼ kalaltike (Rom. 2:4). Yuʼun skʼan jech ta slekil koʼontontik jkʼopontik kʼuchaʼal li krixchanoetik bu ta jcholtik mantale. Skʼan ta slekil koʼontontik xchiʼuk jtsaktik ta venta. Mu teuk xijvuljvun-o ta stojolalik, jaʼ mas lek kakʼbetik yilik ti toj ep skoltaojutik li kʼusi jchanojtike (Efe. 4:23, 24). Kakʼtik persa ti xilik ti jelem xa jkuxlejaltike xchiʼuk ti kʼusi xchanubtasojutik li Jeovae jaʼ sventa ta jtabetik sbalil (Isa. 48:17). Akʼo yilik ti chkakʼtik ta ilel ta jkuxlejaltik ti jaʼutik yajtsʼaklom Cristoe.

21, 22. Aloʼ junuk loʼil ti bu chal ti skʼan mu xijlubtsaj ta skoltael ta mantal li kutsʼ kalaltike.

²¹ Jun ermanae xi la stsʼibae: «Persa onoʼox ta jcholbe mantal li oxlajunvoʼ jchiʼiltak ta vokʼele, ta jtalelal xchiʼuk ta jkʼopojel. Skotol jabiletik ta jtsʼibabeik batel. Pe akʼo mi jech, mas ta 30 jabil jtuk yajrextikoun Jeova li ta kutsʼ kalale».

²² Xi to laj yal xtok li ermanae: «Jun veltae la jkʼopon batel ta telefono li jvixe, ti toj nom nakale. Laj yalbun ti la skʼanbe spastor ti akʼo xchanubtasat ta Vivliae, pe muʼyuk bu xchanubtasat. Kʼalal laj kalbe ti xuʼ jkoltae, xi la stakʼe: “Lek, jaʼ noʼoxe jamal me chakalbot ti muʼyuk chi-och ta yajrextiko Jeovae”. Kʼalal la jtakbe batel li livro ¿Kʼusi chchanubtasvan ta melel li Vivliae?, nopoltik noʼox la jkʼopon batel. Pe ta skoj ti muʼyuk skʼeloj-o li livroe ta tsʼakale laj kalbe ti akʼo sjame, vaʼun te van voʼlajunebuk minuto la jkʼelkutik xchiʼuk laj kalbekutik skʼoplal junantik tekstoetik ta Vivlia ti te tsakal tale. Kʼalal oy xaʼox jayibuk velta la jkʼopone, la skʼan chchan mas ta voʼlajuneb minuto. Ta tsʼakale jaʼ lik skʼoponun tal sventa jchankutik, bakʼintike sob tajek yuʼun muʼyuk toʼox likemun, bakʼintike chib to velta ta kʼakʼal. Kʼalal echʼ jun jabile laj yichʼ voʼ, vaʼun ta yan jabile och ta prekursora».

23. ¿Kʼu yuʼun skʼan mu xijlubtsaj sventa jtijtik li krixchanoetik ti chvayik ta mantale?

²³ Sventa jtijtik li krixchanoetik ti vayemik ta mantale, skʼan lek xijtojob xchiʼuk ti jech-o jpasilantike. Pe akʼo mi jech, oy to manxo krixchanoetik ti lek to chchʼamik li koltael chkakʼtike. Skotol uetik mas ta 20 mil krixchanoetik chichʼik voʼ kʼuchaʼal yajrextikotak Jeova. Skʼan me jtsaktik ta venta li mantal laj yalbe jun yajtsʼaklom Cristo ta baʼyel siglo li jtakbol Pabloe, ti xi laj yale: «Albeic Arquipo ti acʼo me sventain lec li yabtel iʼacʼbat yuʼun Cajvaltique, acʼo me cʼotuc ta pasel yuʼun» (Col. 4:17). Li ta yan xchanobil chtale tskoltautik sventa xkaʼibetik smelolal kʼusi skʼan xal ti ta anil xa noʼox skʼan jcholtik mantale.

[Sjakʼobiltak sventa xchanobil]

[Rekuadro ta pajina 13]

KʼUXI XUʼ JULAVEMUKUTIK NOʼOX

▪ Jaʼ pasbo li kʼusi tskʼan yoʼonton Diose

▪ Mu xapas li yabtel ikʼal osile

▪ Mu me xchʼay xavaʼi ti xuʼ xanikav ta mantale

▪ Lek me kʼusi xanop ta stojolal li krixchanoetik ti bu chacholmantale

▪ Sabo yan smelolaltak kʼuxi chacholmantal

▪ Vuleso me ta ajol ti toj tsots skʼoplal li cholmantal chapase