Li kʼusitik tsjakʼ jkʼelvunetike

¿Mi xuʼ xlokʼ-o ta tsobobbail jun yajtsʼaklom Cristo mi tskʼel pornografiae?

▪ Xuʼ xlokʼ-o. Taje jaʼ senyail ti toj tsots skʼoplal ti mu stakʼ jkʼeltik jsetʼuk li pornografiae, akʼo mi jaʼ noʼox li kʼusitik tsʼibabile o li lokʼoletik ta revistaetike xchiʼuk li pelikulaetike, ta video o li ta Internete.

Buyuk xa noʼox xuʼ jtatik ta kʼelel li pornografiae. Ta skoj li Internete buchʼuuk xa noʼox xuʼ xil li kʼusi toj chopol taje, akʼo mi ep xa sjabilalik o mi muʼyuk to. Junantike akʼo mi muʼyuk snopoj ta skʼelik, te chjam tal stuk. Pe oy buchʼutik yolbaj tskʼelik li pornografiae, akʼo mi ta revistaetik noʼox. Oy junantike jaʼo ta skʼelik kʼalal stuk oy ta snaike o li ta yabtelike. Pe toj tsots me skʼoplal skʼan jkʼel jbatik li yajtsʼaklomutik Cristoe. ¿Kʼu yuʼun?

Jtose jaʼ ta skoj li kʼusi laj yal Jesús liʼe: «Li bochʼo jaʼ noʼox ta xpichʼ-oʼnta antse, imulivaj xa o xchiʼuc ta yoʼnton» (Mat. 5:28). Pe taje maʼuk chakʼ ta aʼyel ti chopol kʼalal chchiʼin sbaik ta vayel li buchʼutik nupunemike, moʼoj, yuʼun jaʼ sventa junuk noʼox yoʼonton xchaʼvoʼalik (Pro. 5:15-19; 1 Cor. 7:2-5). Pe li skʼelel pornografiae tstikʼ ta jnopbentik li kʼusitik chopole, yuʼun muʼyuk smelolal li kʼuyelan chchiʼin sbaik ta vayel te chvinaje. Taje jaʼ li kʼusi mu stakʼ laj yal Jesuse. Jamal xkaltike, li buchʼu tskʼel pornografia ta Internet o ta vunetike, jaʼ me muʼyuk chichʼ ta mukʼ li smantal Dios liʼe: «Tscʼan jʼechʼel chamenoxuc o ta sventa li cʼusi sventa noʼox banamile: jaʼ li mulivajele, li cʼusitic toj chopolique, li cʼusi tscʼan abecʼtalique, li cʼusitic chopol oy ta avoʼntonique, xchiʼuc li xpichʼetel avoʼntonique, yuʼun xcoʼlaj xchiʼuc oy slocʼobal jdiostic chcʼot me jech coʼntontique» (Col. 3:5).

 Pe mi oy jun yajtsʼaklom Cristo skʼeloj junuk o chibuk velta pornografiae, ¿kʼu van yelan oy? Toj xiʼel li bu stamoj batele, xkaltik noʼoxe jechtik oy kʼuchaʼal Asafe, ti xi laj yale: «Pero li vuʼune jutuc xa mu liyal ta lum; jutuc xa mu ijaxbuj li cacane». Mi oy xakʼelilan ta vunetik kʼuyelan chchiʼin sbaik ta vayel jun vinik xchiʼuk antse o slokʼol viniketik o antsetik ti tʼanajtike muʼyuk me jun avoʼonton ta stojolal Dios xchiʼuk chopol chaʼi sba li ajol avoʼontone. Jech chavaʼi aba kʼuchaʼal Asaf ti xi laj yale: «Yuʼun jujun cʼacʼal puru nucul chquichʼ; puru vocol chquichʼ ta jujun sob» (Sal. 73:2, 14).

Li jun yajtsʼaklom Cristo ti pʼajem xa li ta mulil taje, toj tsots me skʼoplal ti svikʼ sate xchiʼuk ti skʼan koltael ta mantale. Li Vivliae chal ti xuʼ jtatik ta tsobobbail li koltael taje: «Me oy bochʼo ichʼay ta bee, voʼoxuc ti ventainbil avoʼntonic yuʼun Chʼul Espiritue, bat coltaic ta smucʼul avoʼntonic» (Gál. 6:1). Xuʼ van jun o chaʼvoʼ moletik xkoltavanik, koʼol ta spasik orasion. Xchiʼuk spatoj yoʼontonik ta stojolal Jeova ti chpoxta li buchʼu ip ta mantale xchiʼuk «ta spasbat perdón» yuʼun li smule (Sant. 5:13-15). Li buchʼutik skʼanojik koltael sventa xkom yuʼunik skʼelel li pornografiae, jech ta xaʼi sbaik kʼuchaʼal Asaf, ti xi laj yale: «Pero li vuʼune chinopaj ta atojol, yuʼun jaʼ toj lec chcaʼay» (Sal. 73:28).

Akʼo mi jech, li jtakbol Pabloe laj yal ti oy junantik muʼyuk la sutes yoʼontonik ta sventa «ti cʼusi chopol ta spas[ike], ti staoj to yav ta xmulivaj[ike], xchiʼuc yan ti cʼusitic muʼyuc smelol ta spas[ike]» (2 Cor. 12:21, Ch). * Jech kʼuchaʼal chal li lexicógrafo Marvin R. Vincent ta sventa li jpʼel kʼop ta griego kʼusi chopol ta spasik, xie, «jaʼ chalbe skʼoplal li kʼusitik toj ibal xa noʼox sbae». Akʼo mi muʼyuk lek ta alel, pe oy junantik x-echʼ to xchoplejal li pornografiae, yuʼun maʼuk noʼox ti tʼanajtik xa xvinaj li krixchanoetik tee o ti chakʼ ta ilel kʼuyelan chmulivaj jun vinik xchiʼuk jun antse. Yuʼun oy junantike toj chopol xchiʼuk toj ibalik xa noʼox sba, yuʼun chakʼ ta ilel kʼuyelan chmulivaj jun vinik xchiʼuk xchiʼil noʼox sbaik ta vinikal, mulivajel ti maʼuk noʼox chaʼvoʼike, ta xchiʼinik chonbolometik, ta xilbajinik ololetik, ta xilbajinik jun ants o vinik ti ep yajvale, yilbajinel antsetik xchiʼuk ti tskʼupin ti kʼuyelan chakʼbe svokol li yantik ta sventa taje. Jech kʼuchaʼal laj yal Pabloe, oy junantik ti oy «ta icʼ osil li sjol yoʼntonique» muʼyuk la spajes li yoʼontonike «jaʼ la spasic o scotol li cʼusitic chopol ta pasele» (Efe. 4:18, 19).

Li jtakbol Pablo eke laj yalbe skʼoplal li «cʼusitic toj chopol» li ta Gálatas 5:19. Jun ti buchʼu chchanbe skʼoplal Dios (teólogo) ta Gran Bretaña, xi laj yale: «Liʼe jaʼ chalbe skʼoplal skotol li kʼusitik tskʼan oʼontonal ti mu staleluk xa noʼoxe». Ta melel, li jun yajtsʼaklom Cristoe snaʼoj lek ti toj chopol, ibal sba xchiʼuk muʼyuk xa noʼox smelolal li kʼusitik «mu staleluk xa noʼoxe». Li ta Gálatas 5:19-21 li jtakbole jamal lek laj yal ti «bochʼotic jech tspasic» li kʼusitik toj chopole «mu xuʼ chventainatic o yuʼun li Diose». Jaʼ yuʼun, ¿kʼusi van chkʼot ta stojolal jun yajtsʼaklom Cristo, ti oy xa kʼuk sjalil tskʼel pornografia xchiʼuk ti lek xvinaj ti toj chopol ti kʼuyelan chiʼin sbaik ta vayele? Mi muʼyuk la sutes yoʼonton xchiʼuk mi muʼyuk laj yikta spasel li kʼusi nopem xa xaʼie, ta me xichʼ lokʼesel ta tsobobbail sventa lekuk sak xchiʼuk ti lekuk oy li ermanoetik ta tsobobbaile (1 Cor. 5:5, 11).

Pe oy junantik ti buchʼutik jech toʼox tskʼelik li jeltos kʼusitik chvinaj ta pornografiae, skʼanojik koltael ta stojolal moletik ta tsobobbail xchiʼuk sjeloj ta jyalel li xkuxlejalike. Xi la spʼijubtas Jesús yajtsʼaklomtak Cristo li ta voʼneal Sardise: «Ichʼbeic yipal achiʼuquic ti cʼu to yepal comen avuʼunique, yuʼun ta xa me xcham scotol [...]. Vuleso me ta ajolic li cʼusi laj avaʼyic, xchiʼuc ti cʼu xʼelan lachanubtasatic ta sliquebe. Jaʼ me chʼunic o. Suteso me avoʼntonic. Me mu xaqʼuel abaique, ta xital ta atojolic [...]; mu xanaʼic cʼusi ora chital» (Apo. 3:2, 3). Ta melel xuʼ jsutes koʼontontik xchiʼuk xijatavutik lokʼel li «ta cʼocʼ» yuʼun pornografiae (Jud. 22, 23).

Pe akʼo mi jech, jaʼ me lek ti ta jujuntalutik jnoptik lek ti mu jtikʼ jbatik te taje. Jaʼ yuʼun chaʼa, ¡kakʼtik me persa ti nomuk oyutik ta sventa li pornografiae!

[Tsʼib ta yok vun]

[Tsʼib ta mukʼtik sletraile ta pajina 30]

Li jun yajtsʼaklom Cristo ti pʼajem xa li ta mulil taje, toj tsots me skʼoplal ti svikʼ sate xchiʼuk ti skʼan koltael ta mantale