«¿Mi xuʼ xalokʼtaunkutik?»

Kʼalal tsuts xaʼox xchibal kʼakʼal li Mukʼta Tsobajel ta oxib kʼakʼale, li Josué ti chtun ta Betel ta Mexicoe batik ta xanbal ta slumal Querétaro xchiʼuk yan xchiʼiltak ti jaʼik yajrextikotak Jeovae. Li Javier xchiʼuk Marue, jaʼ jun nupultsʼakal ti likemik ta Colombia ti yakal svulaʼanik Mexicoe, vaʼun laj yalbeik Josué mi xuʼ xlokʼtaatik. Ta skoj ti slapoj lek skʼuʼ spokʼik xchiʼuk yichʼojik tarjeta de solapa li Josué xchiʼuk yamigotake, li nupultsʼakale la sjakʼik mi ayik ta junuk kʼin ti bu tsuts chanune o mi ayik ta jun tsobajel ti tsots skʼoplale. Li Josuee laj yalbe ti ayik ta jun mukʼta tsobajel yuʼun yajrextikotak Jeovae xchiʼuk laj yalbe ti xuʼ xbatik ek li ta domingoe.

Li nupultsʼakale la snopik ti xuʼ van chopol chaʼi sbaike, yuʼun muʼyuk yichʼoj talel lek skʼuʼ spokʼik. Akʼo mi jech, li Josuee laj yalbe li sbie xchiʼuk laj yakʼbe li snumeroal telefono ta Betele.

Chanib u ta mas tsʼakale, li Josuee oy kʼusi toj labal sba laj yaʼi, yuʼun kʼoponat yuʼun Javier xchiʼuk li Marue, vaʼun albat ti ayik li ta mukʼta tsobajele xchiʼuk ti tskʼanik la vulaʼanel yuʼun yajrextikotak Jeovae, ti vaʼ kʼakʼale te xaʼox nakalik ta México. Vaʼun ta ora noʼox lik yichʼik chanubtasel ta Vivlia xchiʼuk lik batikuk ta tsobajeletik. Lajuneb u ta mas tsʼakale ochik ta jcholmantal. Ta jelavele, bat nakiikuk ta Toronto (Canadá), te chʼiik mas ta mantal xchiʼuk laj yichʼik voʼ.

Ta jelavele, takbat tal jlik karta yuʼun Javier li Josuee, li ta karta taje, te chalbe smelolal kʼu yuʼun la xchʼam li melele. Xi la stsʼibae: «Kʼalal muʼyuk toʼox ayemunkutik ta mukʼta tsobajele, li voʼon xchiʼuk kajnile laj xa onoʼox kalkutik ti ta jkʼankutik li beiltasel ta mantale. Ta skoj ti alapoj lek akʼuʼ apokʼike la jnopkutik ti toj tsots skʼoplal li tsobajel ti bu la ayike. Solel toj lek tajek laj kilkutik stalelal li buchʼutik te oyik ta mukʼta tsobajele xchiʼuk ta slekil yoʼonton la skoltaunkutik ta saʼel jchotlebkutik xchiʼuk saʼel ta Vivlia li tekstoetike. Chʼabal buchʼu chopol laj yil ti jaʼ jlapoj li jkʼuʼ jpokʼkutik sventa chipaxyajkutik-oe».

Li Josuee laj yil ti ta melel jech chkʼot ta pasel li kʼusi laj yal pʼijil ajvalil Salomone: «Ovolajan noʼox ta sob xchiʼuc ta mal cʼacʼal, yuʼun mu xanaʼ bu junucal lec chbat, me jaʼ ti baʼyuc laj atsʼune o me jaʼ ti bu tsʼacal laj atsʼune, o me xchibal lec chbat» (Ecl. 11:6). ¿Mi xuʼ jech xapas ek, ti chatakan ta ikʼel yantik sventa xbatik li ta mukʼta tsobajel chtale o li ta Mantal sventa Skotol Krixchanoetike? Mu me xchʼay ta joltik ti xuʼ stunesutik Jeova sventa jtatik li buchʼutik takin yoʼontonik ta mantale, jech kʼuchaʼal li Javier xchiʼuk Marue (Isa. 55:1).

[Lokʼol ta pajina 32]

Ta tsʼetkʼob kʼalal ta batsʼikʼob: Alejandro Voeguelin, Maru Pineda, Alejandro Pineda, Javier Pineda xchiʼuk Josué Ramírez, Betel ta México.