Sujom jpastik li abtelal yakʼoj Jeovae
Sujom jpastik li abtelal yakʼoj Jeovae
«Cholo o me batel li scʼop Diose. Acʼo persa.» (2 TIM. 4:2)
¿MI X-ALBE AVUʼUN SMELOLAL?
¿Kʼu yuʼun sujom la xcholik mantal li yajtsʼaklomtak Cristo ta baʼyel sigloe?
¿Kʼusi xuʼ jpastik sventa teuk-o ta joltik ti skʼan sujomutike?
¿Kʼu yuʼun toj sujom xa skʼan xkalbetik skʼoplal li Ajvalilal yuʼun Diose?
1, 2. ¿Kʼusitik sjakʼobiltak ch-ayan yuʼun li mantal: «Acʼo persa» xcholel mantal, xie?
LI KRIXCHANOETIK ti jaʼ yabtelik tspojik kuxlejale ta anil noʼox tspas li yabtelike. Jech kʼuchaʼal liʼe, li jtupʼ kʼokʼetik o bomberoetike sujom xa chbatik ta anil kʼalal chichʼik takel ta ikʼele, yuʼun snaʼojik ti oy buchʼu xuʼ xchame.
2 Li yajrextikoutik Jeovae oy ta koʼontontik skoltael krixchanoetik sventa xkolik. Jaʼ yuʼun, chkakʼtik venta ti skʼan sujom jpastik li kabteltik ta xcholel lekil aʼyej ta sventa li Ajvalilal yuʼun Diose. Melel noʼox ti maʼuk ti solel sujom xa tajek ta jpastik batele. Vaʼun chaʼa, ¿kʼusi la skʼan laj yal jtakbol Pablo kʼalal xi laj yale: «Cholo o me batel li scʼop Diose. Acʼo persa», ti xie? (2 Tim. 4:2.) ¿Kʼusi skʼan xal ti sujom xa ta jcholtik mantale? ¿Kʼu yuʼun skʼan sujom xa jpastik li kabteltik ta cholmantale?
¿KʼU YUʼUN SKʼAN SUJOM JPASTIK LI CHOLMANTALE?
3. ¿Kʼusi lek xuʼ xkʼot ta pasel mi la xchʼamik o mi muʼyuk li lekil aʼyej ta sventa li Ajvalilal yuʼun Diose?
3 Kʼalal ta jnoptik kʼusi chkʼot ta pasel yuʼun li cholmantal ta jpastike, xuʼ van chkaʼitik ti toj tsots xa skʼoplal skʼan xkalbetik lekil aʼyejetik li jchiʼiltaktike (Rom. 10:13, 14). Li Skʼop Diose xi chale: «Cʼalal me jech chcalbe ec li jpasmulile: Ta jbel scʼoplal chacham, me xcute, pero me chlic scomtsan li cʼusi chopol tspase [...] ta jbel scʼoplal ta xcuxi; muʼyuc ta xcham. Muʼyuc xa bu ta jtʼabbe o ta coʼnton li smule» (Eze. 33:14-16). Yuʼun li ta Vivliae xi chalbe li buchʼutik chcholik lekil aʼyeje: «Me jech chapase, chacol li voʼote xchiʼuc li bochʼotic ta xaʼibot acʼope» (1 Tim. 4:16; Eze. 3:17-21).
4. Ta skoj ti albil xa onoʼox skʼoplal ti ch-ayan jvalopatinej mantale, ¿kʼu yuʼun sujom la xcholik mantal li ta baʼyel sigloe?
4 Sventa xkaʼibetik smelolal kʼu yuʼun laj yalbe Pablo mantal li Timoteo ti skʼan sujom xa noʼox skʼan xchol mantale, baʼyel skʼan jkʼelbetik li stsʼak sloʼilal li versikulo ta slikebal li mantal liʼe. Xi chale: «Cholo o me batel li scʼop Diose. Acʼo persa, acʼo me yorail lec chaʼyic, o me yorail muʼyuc lec chaʼyic. Aqʼuilanbo snaʼic, alilanbo yaʼyic, tijbo yoʼntonic. Ta smucʼuluc me avoʼnton xachanubtas. Yuʼun ta to sta scʼacʼalil ti mu scʼan xchʼunic li lequil chanubtasele, ch-echʼ yoʼntonic ta yaʼyel. Yuʼun jaʼ lec chaʼyic li cʼusi tscʼan stuquique, jech ta stsobic ep jchanubtasvanej yuʼunic sventa ta xchanubtasatic o li cʼusi lec chaʼyique. Jaʼ ta svaʼlupatinic comel li cʼusi melele» (2 Tim. 4:2-4). Li Jesuse laj yalbe skʼoplal ti ch-ayan jvalopatinej mantaletike (Mat. 13:24, 25, 38). Ta skoj ti sujom xa noʼoxe, toj tsots skʼoplal ti ta anil xa onoʼox chchol batel mantal Timoteo li ta yut tsobobbaile, sventa mu xlajik ta loʼlael ta jecheʼ chanubtaseletik ti lek xa yileluk li yajtsʼaklomtak Cristoe. Yuʼun oy epal krixchanoetik ti xiʼel xlajike. ¿Kʼusi xuʼ xkaltik ta sventa li avie?
5, 6. ¿Kʼusitik chanubtaseletik nopem xaʼiik xchʼunel li krixchanoetik ta jcholbetik mantale?
5 Li avi kʼakʼale, solel epajem xa xchiʼuk pukem xa tajek li buchʼutik svalopatinojik komel li mantale (2 Tes. 2:3, 8). ¿Kʼusi chanubtaseletik tskʼan chaʼiik li krixchanoetike? Jech kʼuchaʼal liʼe, ta epal lumetik, jech xa tajek chchanubtasvanik jech kʼuchaʼal jun relijion ti buchʼu xchʼunoj ti kʼunkʼun kʼataj talel li kuxlejaletike (evolución). Akʼo mi jaʼ tstunesik li kʼusitik xchʼunoj li sientifikoetike, taje jutuk xa mu jaʼ jun relijion ti chʼabal sdiosike. Taje jelel xa me kʼusi tsnopik ta stojolal li Diose xchiʼuk ta stojolal li krixchanoetike. Yan ti kʼusi chchanubtasvanik xtoke jaʼ ti muʼyuk la oyutik ta yoʼonton li Diose, jaʼ yuʼun mu la persauk xkakʼ ta koʼontontik ek. ¿Kʼu yuʼun ta smiyonal noʼox krixchanoetik chchʼamik li chanubtaseletik taje ti jaʼ chnikavik-o ta mantale? Yuʼun xi chalik xkaltike: «Xuʼ xapas ti kʼusi skʼan avoʼontone, yuʼun muʼyuk buchʼu chchapanot». Taje jaʼ li kʼusi tskʼan chaʼiike (kʼelo Salmo 10:4).
6 Pe oy to yan chanubtaseletik ti lek chaʼiik li krixchanoetike. Junantik krixchanoetik ti chbatik ta xchʼulnaike lek tajek chaʼiik ti xi ch-albatik yuʼun li jchanubtasvanej yuʼunike: «Mu ventauk li kʼusitik chapase, li Diose skʼanojot». Li paleetik xchiʼuk li pastoretike jaʼ noʼox chalbeik li kʼusi tskʼan chaʼiik li krixchanoetike, jech kʼuchaʼal li kʼusitik tspasik ta chʼulnae, li mixae, li kʼinetike xchiʼuk li lokʼoletike, jaʼ la chkoltaatik sventa ch-akʼbatik bendision yuʼun Dios. ¡Pe mu xakʼik venta ti toj xibal sba oy xkuxlejalik li buchʼutik te tikʼilik li ta relijionetik taje! (Sal. 115:4-8.) Akʼo mi jech, xuʼ jkoltatik sventa xjulavik ta mantal xchiʼuk ti xaʼibeik smelolal li melel aʼyej yichʼoj talel li Vivliae, taje jaʼ sventa tstabeik sbalil li kʼusi chichʼ talel li Ajvalilal yuʼun Diose.
¿KʼUSI SKʼAN XAL TI SUJOM XA TA JCHOLTIK MANTALE?
7. ¿Kʼuxi xuʼ xkakʼtik ta ilel ti sujomutik ta xcholel mantale?
7 Li jun doktor ti lek snaʼ xjatvane, skʼan xakʼ ta yoʼonton li kʼusi tspase, yuʼun snaʼoj ti xuʼ xcham li buchʼu yakal tsjate. Ta sventa li cholmantal ta jpastik eke, skʼan me xkakʼ ta koʼontontik spasel li kabteltike, jnoptik kʼusi xuʼ jloʼiltabetik, sjakʼobiltak o kʼusi mantalil xkʼot ta yoʼonton li krixchanoetike. Yan kʼusi ti xuʼ jpastik xtoke, jaʼ ti xbat jvulaʼantik ti kʼusi ora tskʼanik o kʼalal jaʼo mas xokolik li krixchanoetike (Rom. 1:15, 16; 1 Tim. 4:16).
8. ¿Kʼusi smakojbe skʼoplal kʼalal oy kʼusi sujom ta jpastike?
8 Mi sujomutik xa tajeke, jaʼ me te chkakʼtik ta ilel li kʼusi mas tsots skʼoplal chkaʼitik spasel ta jkuxlejaltike (kʼelo Génesis 19:15). Jech kʼuchaʼal liʼe, nopo noʼox ti laj avichʼ akʼbel junuk vun ti chal kʼusitik li achamele, vaʼun tstakot ta ikʼel li adoktore xchiʼuk xi chalbote: «Kʼelavil, li achamele toj tsots xa. Te xa noʼox van junuk u sventa xakʼel kʼusi xuʼ xapas ta sventa li achamele». Melel onoʼox ti mu aniluk xa chalokʼ batel jech kʼuchaʼal tspas li buchʼu tstupʼ kʼokʼe. Moʼoj, yuʼun chachikinta baʼyel kʼusi chalbot li adoktore, vaʼun chabat ta ana xchiʼuk chanop lek kʼusi ti mas tsots skʼoplal skʼan xapase.
9. ¿Kʼu yuʼun xuʼ xkaltik ti sujom la xchol mantal kʼalal ay ta Éfeso li Pabloe?
9 Ti kʼuyelan sujom la xcholmantal li Pabloe, te chvinaj kʼalal la stsʼibabe batel moletik ta Éfeso ta sventa li cholmantal la spas ta Asia balumile (kʼelo Hechos 20:18-21). Yaʼeluke, ti kʼalal jaʼo kʼote ay svulaʼan noʼox ta anil li krixchanoetik ta snaike sventa xbat yalbe li lekil aʼyeje. Jech xtok, chib jabil «te bat stsob sbaic ta jun chanuvuntic yuʼun jun vinic, Tirano sbi. Jujun cʼacʼal te ichanubtasvan» (Hech. 19:1, 8-10). Lek xvinaj ti solel sujom ta spasel li kʼusi tskʼan spas jujun kʼakʼale. Taje maʼuk skʼan xal ti ta jlubtsan jbatik tajek ta skoj ti sujomutik ta spasele. Pe li cholmantale skʼan me tsots skʼoplal xkakʼtik li ta jkuxlejaltike.
10. ¿Kʼu yuʼun xuʼ xijmuyubaj ti leʼ xa onoʼox ta sien jabil sujom la spas tal yabtelik li yajtsʼaklomtak Cristoe?
10 Kʼalal jutuk xaʼox skʼan 1914, li jtsop Jchanolajeletik ta Vivliae la slikesik jun kampanya sventa cholmantal, taje jaʼ skʼan xal ti sujom xa la spasik li cholmantale. Akʼo mi uni jutebik toʼox, laj yaʼibeik smelolal ti toj tsots xa skʼoplal skʼan spasik li abtelal taje, vaʼun lik yalbeik skʼoplal li Ajvalilal yuʼun Dios ta sjunul yoʼontonike. La slokʼesik mantaletik ta periodikoetik xchiʼuk la slokʼesik mantaletik ta jun pelikula ti yichʼoj fotoetike xchiʼuk ti chbakʼ li krixchanoetik te chlokʼe, taje jaʼ sbi «Foto-Drama de la Creación». Taje jech laj spukbeik batel lekil aʼyej ta smiyonal noʼox krixchanoetik. Ti muʼyukuk laj yakʼ ta yoʼontonik li yabtelike, ¿jayibutik van laj kaʼitik jechuk li lekil aʼyej ta sventa li Ajvalilal yuʼun Diose? (Kʼelo Salmo 119:60.)
MU ME XCHʼAY XAVAʼI TI SKʼAN SUJOMOTE
11. ¿Kʼu yuʼun chchʼay ta sjolik jlom yajtsʼaklomtak Cristo ti skʼan sujom spas li yabtelike?
11 Li chʼayob oʼontonaletike xuʼ me xakʼ jnoptik ti muʼyuk tsots skʼoplal li cholmantale. Li sbalumil Satanase jaʼ chakʼ ti akʼo xbat ta koʼontontik li kʼusitik ta jkʼan jtuktike xchiʼuk li kʼusitik muʼyuk tsotsik skʼoplale (1 Ped. 5:8; 1 Juan 2:15-17). Jlom yajtsʼaklomtak Cristo ti yakʼoj toʼox ta yoʼontonik chtunik ta stojolal Jeovae chʼay ta yoʼontonik ti skʼan sujom spasik li abtelal akʼbatike. Jaʼ jech kʼot ta stojolal jun yajtsʼaklom Cristo ta baʼyel siglo ti Demas sbie. Akʼo mi jaʼ jun yajkoltaobba li Pabloe, jaʼ laj yakʼ chʼaybatuk yoʼonton li sbalumil Satanás ti nom oy ta stojolal Diose. Li Demase muʼyuk la skolta li jtakbol sventa tstsatsubtasbe yoʼonton kʼalal jaʼo tsots chil svokole, moʼoj, yuʼun solel laj yikta komel (File. 23, 24; 2 Tim. 4:10).
12. ¿Kʼusi kabteltik akʼbilutik li avie, xchiʼuk kʼusi ta jkʼupintik ta sbatel osil?
12 Sventa mu xchʼay ta joltik ti skʼan sujom jpas li kabteltik akʼbilutike, skotol yajtsʼaklomtak Cristo skʼan me skʼel sbaik sventa mu jaʼuk xbat ta yoʼontonik li kʼusitik oy liʼ ta balumile. Yuʼun skʼan me xkakʼbetik yipal sventa xkichʼtik li mero kuxlejale (1 Tim. 6:18, 19). Jech kʼuchaʼal jnaʼojtik xae, mi jaʼ xaʼox chventainvan li Ajvalilal yuʼun Diose ta me xijkuxi ta jun Paraiso ta sbatel osil ti ta jpastik kʼusitik labalik sbae. Pe li kabteltik akʼbilutik ta skoltael krixchanoetik sventa sta skolebalik kʼalal mi tal li Armagedone, muʼyuk xa me chichʼ pasel yan velta.
13. Ta skoj ti jaʼutik xa yajtsʼaklomutik Cristoe, ¿kʼuxi xuʼ julavemutik ta mantal?
13 Ta skoj ti oy epal krixchanoetik ti vayemik ta mantale, ¿kʼuxi xuʼ xkutik sventa sujomutik noʼox li voʼotike? Jvules ta joltik ti vayemutik toʼox ta mantal eke. Pe laj kichʼtik tijel. Vaʼun chaʼa, li yojtikinobil Cristoe sakjaman kʼot ta jtojolaltik, jech kʼuchaʼal laj yal li Pabloe. Li avie voʼotik xa oy ta jbatik ta yakʼbel sakilal osil li yantike (kʼelo Efesios 5:14). Kʼalal laj xaʼox yal taje, xi la stsʼiba li jtakbole: «Qʼuelo me abaic lec ta sventa li cʼusitic chapasique. Mu me jechucoxuc jech chac cʼu chaʼal li bochʼo bolique, jaʼuc jechoxuc jech chac cʼu chaʼal li bochʼo bijique. Tunesic lec li cʼacʼal chjelov avuʼunique, yuʼun yantic tsoc batel li banamile» (Efe. 5:15, 16). Jaʼ yuʼun, jtunestik lek li kʼakʼal chjelav kuʼuntik sventa jpastik li abtelaletik ta mantal ti chakʼ akʼo julavemutik-o li ta chopol balumil liʼe.
LI KʼAKʼALETIK AVIE MAS XA TOJ TSOTS SKʼOPLAL
14-16. ¿Kʼu yuʼun toj tsots xa skʼoplal ti skʼan sujom xkalbetik skʼoplal li Ajvalilal yuʼun Diose?
14 Li cholmantal ta jpastike tsots onoʼox skʼoplal, pe li avie mas xa toj tsots skʼoplal. Ta 1914 laj xa onoʼox yilik skotol senyailtak li kʼusi chal ta Skʼop Diose (Mat. 24:3-51). Mas xa oy ta xiʼel xkuxlejal krixchanoetik li avie, taje muʼyuk toʼox jech ilbil-o. Jech kʼuchaʼal laj yichʼ alel jaʼtik toe, li jteklumetik ti mas tsots yipike oy yuʼunik jutuk mu chaʼmil to vomba atomikaetik ti kʼusuk noʼox ora xuʼ stʼomesike. Li j-abteletike yalojik ti oy ep ta velta «chʼayemik» jayibuk li vombaetike. ¿Mi jaʼ van kʼot ta skʼob li jterroristaetike? Jech kʼuchaʼal li buchʼutik lek chanemike, chalik ti ta anil noʼox xuʼ chlaj li krixchanoetik ta jun paskʼop ti jaʼ tslikes jun terroristae. Pe li paskʼope maʼuk noʼox xuʼ xcham yuʼun li krixchanoetike.
15 Jun revista ta 2009 ti jaʼ sbi The Lancet xchiʼuk li ta Universidad ta Londrese xi chal ta sventa li kʼakʼal kuxulutike: «Li kʼusi mas chakʼ ta xiʼel xkuxlejal kʼusitik kuxajtik ta spʼejel Balumile jaʼ ti chjelilan xkʼixnal-sikil li balumile». Chalik ti ta skoj ti chjelilan xkʼixnal-sikil li balumile, jaʼ chakʼ ipajuk jutuk mu skotol krixchanoetik xchiʼuk ti ta xiʼel chkom xkuxlejalik ta smiyonal noʼox li krixchanoetike. Epal lumetik xuʼ nojem xkom ta voʼ ta skoj ti chnoj tajek li mukʼta nabetike, ti muʼyuk chakʼ voʼe, nojelal ta voʼ, chameletik, tsatsal ikʼal voʼetik xchiʼuk paskʼopetik ta skoj ti muʼyuk xa mas li kʼusitik kuʼuntike. Jaʼ yuʼun, li paskʼop, nikel, nojelal ta voʼ o yan kʼusitike xuʼ slajesbe stsʼunbal skotol li krixchanoetike.
16 Xuʼ van oy buchʼutik tsnopik li jun mukʼta paskʼop ti bu tstunesik vomba atomikae, jaʼ la chakʼ kʼotuk ta pasel li senyailtak albil onoʼoxe. Pe akʼo mi jech, jutuk mu skotoluk krixchanoetik mu xaʼibeik smelolal li vaʼ senyailtak taje. Ta melel, leʼ xa ta sjaylajunebal jabil vinajem talele, taje jaʼ me skʼan xal ti melel onoʼox ti liʼ xa oy li Cristoe xchiʼuk li slajebal kʼusitik chkʼotanuk ta pasele, nopol xa tajek (Mat. 24:3, NM). Muʼyuk jech ilbil-o chkʼot ta pasel li senyailtak taje. Jaʼ xa me yorail ti xjulavik ta mantal li krixchanoetike, li cholmantal ta jpastike jaʼ me xuʼ chkoltaatik sventa xjulavik.
17, 18. 1) ¿Kʼusi chakʼ jpastik ta skoj ti jnaʼojtik xa ti kuxulutik ta slajebal kʼakʼale? 2) ¿Kʼusi xuʼ xtijbat-o yoʼonton krixchanoetik sventa xlik xchʼamik li aʼyej ta sventa Ajvalilal yuʼun Diose?
17 Toj echʼ noʼox jutuk xa skʼan xlaj yorail sventa xkakʼbetik ta ilel ti jkʼanojtik li Jeovae, xchiʼuk ti jtsutsestik li kampanya yakʼojbutik jpastik li ta slajebaltik xa kʼakʼal kuxulutike. Li Pabloe laj yalbe yajtsʼaklomtak Cristo ta Roma ti jaʼ xa mas tsots skʼoplal li kʼakʼal avie, xi laj yale: «Yuʼun chavilic li cʼusi chcʼotan xa ta pasele. Jaʼ xa yorail ta jvicʼ lec jsatic, yuʼun liʼ ta orae nopol xa xʼechʼ tal ta jtojoltic li coltaele; mu jechuc jech chac cʼu chaʼal cʼalal lic jchʼuntique» (Rom. 13:11).
18 Mi laj yilik li kʼusitik chkʼotanuk ta pasel li krixchanoetike, xuʼ van xakʼik venta ti chtun yuʼunik mantal mi laj yilik li senyailtak ta slajebal kʼakʼale. Jlom xtoke chakʼik venta ti chtun yuʼunik koltael kʼalal chakʼik venta ti muʼyuk lek kʼusi chkʼot ta pasel yuʼunik li ajvaliletik ta balumil ta sventa li vokolil ta takʼine, li vomba atomikae, li majbaile xchiʼuk ti kʼalal chlaj li kʼusitik oy ta balumile. Li jlom xtoke jaʼ to tsvikʼ satik kʼalal oy kʼusitik chkʼot ta pasel ta yutsʼ yalalike, jech kʼuchaʼal tsatsal chamel, chtuchʼ snupunelik ta registro civil o jaʼo kʼalal chcham jun yutsʼ yalalike. Kʼalal ta jcholtik mantale, xuʼ me jaʼo te jkoltatik li krixchanoetik taje.
TSTIJ KOʼONTONTIK TI SKʼAN SUJOMUTIKE
19, 20. ¿Kʼuxi sjeloj xkuxlejalik epal yajtsʼaklomtak Cristo ta skoj ti skʼan sujom spasik li cholmantale?
19 Ta skoj ti oy kʼusi sujom skʼan jpastike, jaʼ me chtijbat yoʼonton epal yajtsʼaklomtak Cristo ti skʼan xepajesik li yabtelik ta cholmantale. Jech kʼuchaʼal liʼe, jun nupultsʼakal ti kerem tsebikto ti likemik ta Ecuadore, la snopik ti jaʼ lek ti sjutukajesik li kʼusitik ta xkuxlejalik kʼalal laj xaʼox yaʼiik li kʼusitik echʼ li ta jun mukʼta tsobajel ta jun kʼakʼal ta sjabilal 2006 ti jaʼ sbi: «Lekuk noʼox me li jsatike». La spasbeik jun slistail li kʼusitik muʼyuk chtun yuʼunike, oxib u ta mas tsʼakale, bat nakiikuk ta jun apartamento ti jun xa noʼox skuartoale, maʼuk xa oxib, oy kʼusitik la xchonik, vaʼun jaʼ la stoj-o li yilike. Ta tsʼakal jutuke ochik ta prekursor auksiliar, vaʼun jaʼ la spasik li kʼusi albatik yuʼun li jkʼelvanej ta sirkuito ti akʼo xbat tunikuk ti bu muʼyuk mas jcholmantaletike.
20 Jun ermano ta Estados Unidos xi la stsʼibae: «Kʼalal li aykutik ta jun mukʼta tsobajel xchiʼuk li kajnil ta 2006, oy xaʼox ta 30 jabil kichʼojkutik voʼ. Kʼalal jaʼo ta jtsʼot batel jkaro sventa xisut batel ta jnakutike, la jnopilankutik kʼuxi xuʼ xkakʼ ta jkuxlejalkutik li tojobtasel laj kaʼikutik ta sventa li sjutukajesel kʼusitik ta jkuxlejalkutike (Mat. 6:19-22). Oy toʼox oxpʼej jnakutik, kosilkutik, jkarokutik ti solel kʼupilik tajek sbae, jun lancha xchiʼuk jun jnakutik ti oy syantailtake. Ta skoj ti solel muʼyuk laj kakʼ ta ilel jpʼijilkutike, la jnopkutik ti ta jpasbekutik yabtel Dios ta tsʼakal orae. Li ta 2008 li-ochkutik ta prekursor regular, jech kʼuchaʼal li jtsebkutike. ¡Toj echʼ noʼox ximuyubajkutik ti jmoj chi-abtejkutik xchiʼuk li kermanotakkutike! Taje jaʼ yakʼoj ti xuʼ xitunkutik ti bu chtun yuʼunik mas jcholmantaletike, yuʼun jaʼ mas nopajemunkutik-o ta stojolal Jeova ti jech chitunkutike. Li kʼusi toj ep sbalil chkilkutike, jaʼ ti chkilkutik chjam satik li krixchanoetik kʼalal chaʼibeik smelolal li Skʼop Diose».
21. ¿Kʼusi tstij koʼontontik sventa sujom xa jpastik li cholmantale?
21 Jnaʼojtik xa li kʼusi chkʼot ta pasel ta stojolal li kʼusitik oy ta balumile: «Jaʼ yorail chbatic ta chʼayel li chopol cristianoetique» (2 Ped. 3:7). Li yojtikinel Skʼop Diose jaʼ tstij koʼontontik sventa xkaltik batel ta sjunul koʼontontik ti nopol xa skʼan xtal li tsots vokolile xchiʼuk ti chtal ta jelavel li achʼ balumile. Taje jech-o sujom skʼan xkalbetik krixchanoetik li melel spatobil oʼontonale. Kʼalal ta jpastik bu kʼalal xuʼ kuʼuntik li abtelal ti skʼan sujom jpastike, chkakʼtik ta ilel ti jkʼanojtik li Diose xchiʼuk li jchiʼiltaktike.
[Sjakʼobiltak sventa xchanobil]
