Li Jeovae chchabiutik sventa xijkolutik

«Ta sventa xchʼunojel avoʼntonic ta stojol Dios, jech ta xchabioxuc ta svuʼel yuʼun jech xuʼ chataic li coltael xchapanoje; jaʼ to chayacʼboxuc avilic ta slajebal cʼacʼal.» (1 PED. 1:5)

¿KʼUSI TA JTAKʼTIK?

¿Kʼuxi laj yikʼutik tal ta melel relijion li Jeovae?

¿Kʼuxi chkakʼ sbeiltasutik Jeova li ta tojobtaseletik chakʼe?

¿Kʼuxi tspat koʼontontik li Jeovae?

1, 2. 1) ¿Kʼuxi jnaʼtik ti tskoltautik Dios sventa tukʼuk-o oyutike? 2) ¿Bu to kʼalal xojtikinutik li Jeovae?

«LI BOCHʼO ta xcuch yuʼun cʼalal to ta slajebe jaʼ ta xcol.» (Mat. 24:13.) Kʼalal jech laj yal Jesús taje, jamal laj yal sventa kuxul xijkom kʼalal chakʼbe stoj smul slumal Satanás li Diose, skʼan tukʼuk koʼontontik kʼalal to ta slajeb. Taje maʼuk me skʼan xal ti chalbutik Jeova ti jpat koʼontontik ta kiptik xchiʼuk ta jpʼijil jtuktik sventa xkuch kuʼuntike. Li Vivliae xi chalbutike: «Li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic» (1 Cor. 10:13). ¿Kʼusi skʼan xal taje?

² Taje lek xvinaj ti Jeovae tskʼan tsnaʼ li kʼusi chkʼot ta jkuxlejaltike, li vokoliletik ta jnuptantike, ti kʼu kelantike xchiʼuk li kʼusitik xkuch kuʼuntike, yuʼun mi jech la spas taje, jaʼ noʼox chakʼ li kʼusitik snaʼoj xkuch kuʼuntike. Pe, ¿mi melel ti lek xojtikinutike? Ta melel xojtikinutik. Li Vivliae chal ti snaʼoj kʼu kelantik ta jujuntale. Yuʼun xojtikin kʼuyelan li jkuxlejaltike xchiʼuk li kʼusitik nopem xkaʼitik spasele. Maʼuk noʼox taje, tskʼel li kʼusi oy ta jnopbentike xchiʼuk snaʼoj li kʼusi oy ta koʼontontik spasele (kʼelo Salmo 139:1-6).

3, 4. 1) Li kʼusi echʼ ta xkuxlejal Davide, ¿kʼuxi chakʼ ta ilel ti oyutik ta yoʼonton ta jujuntal li Diose? 2) ¿Kʼusi yan sba yutsil yakal tspas Jeova li avie?

³ ¿Mi mu yanuk yutsil ta aʼiel ti oyutik ta yoʼonton Dios ti jaʼutik noʼox krixchanoutik ti muʼyuk ep jbaliltike? Taje jaʼ jech laj yaʼi sba li Davide, yuʼun xi laj yalbe li Jeovae: «Cʼalal ta jqʼuel li vinajel ti jaʼ yabtel avoc acʼobe, xchiʼuc li u, li cʼanaletic apasoje, jech chcal ta coʼnton: ¿Cʼusi stu li cristianoetic ti tsta ta naʼele?» (Sal. 8:3, 4). Li kʼusi laj yal taje, jaʼ van la snop li kʼusi kʼotem ta xkuxlejale. Yuʼun akʼo mi jaʼ li mas kʼox li ta xnichʼnab Jesee, li Jeovae  laj yal ti jaʼ jun «vinic ti bu lec chile» xchiʼuk la stʼuj sventa chkʼot ta «banquilal yuʼun scotol li [steklumale]», manchuk mi jaʼ toʼox uni jkʼelchij (1 Sam. 13:14; 2 Sam. 7:8). ¡Nopo noʼox avaʼi kʼuyelan laj yaʼi sba David kʼalal jech kʼot ta stojolal taje!

⁴ Ti kʼuyelan laj yaʼi sba li Davide, jech chkaʼi jbatik ek kalal chkiltik ti oyutik ta yoʼonton Jeova avie. Li Jeovae jaʼ tstunes li melel relijion sventa tstsob talel li buchʼutik jaʼik li kʼusitik lek ta jujun balumile xchiʼuk tskolta li krixchanoetik taje sventa tukʼuk-o oyik li ta spasbel yabtele (Ageo 2:7, NM). Sventa xkaʼibetik lek smelolal kʼuyelan tskoltautik Jeova sventa tukʼuk-o oyutik ta stojolale, baʼyuk kalbetik smelolal ti kʼuyelan chikʼ talel krixchanoetik li ta melel yichʼel ta mukʼe.

LI DIOSE LAJ YIKʼUTIK TALEL TA STOJOL XNICHʼON

5. ¿Kʼuxi chikʼ talel krixchanoetik Jeova ta stojolal li Xnichʼone? Albo junuk skʼelobil.

⁵ Xi laj yal li Jesuse: «Muʼyuc bochʼo xuʼ yuʼun ta xtal ta jtojol me muc icʼbiluc tal yuʼun li Jtot ti la stacun tale» (Juan 6:44). Li kʼusi laj yal taje, jaʼ chakʼ ta ilel ti kʼotemutik ta yajtsʼaklom Cristo koliyal ti la skoltautik li Diose. Pe, ¿kʼuxi ta xikʼ talel krixchanoetik li Jeova ta stojolal Xnichʼon ti jechik kʼuchaʼal manxo chijetike? Jaʼ tstunes li cholmantal tspas yajtsʼaklomtak Cristoe xchiʼuk li xchʼul espiritue. Jech kʼuchaʼal liʼe, kʼalal bat svulaʼanik Filipos li Pablo xchiʼuk li yan misioneroetike, te la staik jun ants ti jaʼ sbi Lidiae, vaʼun la xcholbeik li lekil aʼyeje. Xi chal li Vivliae: «Ijambat yoʼnton yuʼun Cajvaltic, jech scotol yoʼnton laj yaʼay cʼusi laj yal li Pabloe». Jech kʼuchaʼal chkiltike, li Diose laj yakʼbe xchʼul espiritu sventa xaʼibe smelolal li mantale, vaʼun laj yichʼ voʼ xchiʼuk li yutsʼ yalale (Hech. 16:13-15).

6. ¿Kʼuxi laj yikʼutik talel ta melel relijion li Diose?

⁶ ¿Mi jaʼ noʼox stuk kʼot ta stojolal Lidia taje? Mu jechuk. Mi jaʼutik yajtsʼaklom Cristo ti kakʼoj xa jbatik ta stojolal Jeovae, jech yikʼojutik tal ek kʼuchaʼal Lidia li ta melel yichʼel ta mukʼe. Li Jtotik ta vinajele oy kʼusi toj lek laj yilbe ta yoʼonton li Lidiae, jaʼ jech laj yil li koʼontontik eke. Kʼalal lik jchikintatik li lekil aʼyeje, li Jeovae la skoltautik ta yaʼibel smelolal koliyal ti laj yakʼbutik li xchʼul espiritue (1 Cor. 2:11, 12). Kʼalal laj kakʼtik persa chkakʼ ta jkuxlejaltik li kʼusi la jchantike xchiʼuk ti ta jpastik li kʼusi tskʼan yoʼontone, laj yakʼbutik sbendision. Kʼalal laj kakʼ jbatik ta stojolale toj echʼ noʼox muyubaj. Ta melel, kʼalal lik tunkutik ta stojolal li Jeovae te xchiʼinojutik ta jujuntal sventa tskoltautik ta kʼusuk noʼox ora.

7. ¿Kʼuxi jnaʼtik ti tskoltautik Jeova sventa tukʼukutik ta stojolale?

⁷ Li Jeovae skoltaojutik ta slikesel li yabtele xchiʼuk jech tskoltautik-o batel. Jaʼ yuʼun snaʼoj ti mu ta jtuktikuk noʼox li j-ochutik li ta melele, jaʼ jech snaʼoj ti mu xuʼ kuʼuntik ta jtuktik noʼox ti teukutik-o li ta mantale. Li jtakbol Pedroe xi laj yalbe li buchʼutik chbatik ta vinajele: «Ta sventa xchʼunojel avoʼntonic ta stojol Dios, jech ta xchabioxuc ta svuʼel yuʼun jech xuʼ chataic li coltael xchapanoje; jaʼ to chayacʼboxuc avilic ta slajebal cʼacʼal» (1 Ped. 1:5). Li kʼusi laj xa yichʼ alele te me tsakal skʼoplalik ek skotol li yajtsʼaklomtak Cristoe, jaʼ yuʼun skʼan oyuk ta koʼontontik ta jujuntal li avie. ¿Kʼu yuʼun?  Yuʼun jkotoltik chtun kuʼuntik ti akʼo skoltautik sventa tukʼuk xkakʼ jbatik ta stojolale.

LI DIOSE TSKOLTAUTIK SVENTA MU XIJCHʼAY TA BE

8. ¿Kʼu yuʼun skʼan jkʼel jbatik sventa mu xijchʼay ta be?

⁸ Li vokoliletik ta jkuxlejaltike xchiʼuk ti jpasmulil krixchanoutike xuʼ me xchʼay koʼontontik yuʼun ta mantal. Taje xuʼ me xijchʼay ta be yuʼun ti mu xkakʼtik venta ta anile (kʼelo Gálatas 6:1). Jkʼeltik kʼuxi tskoltautik li kʼusi kʼot ta stojolal li Davide.

9, 10. Li Jeovae, ¿kʼuxi la skolta David sventa mu xchʼay ta be, xchiʼuk kʼuxi tskoltautik li avie?

⁹ Kʼalal nutsat David yuʼun li ajvalil Saule, li Davide laj yakʼ ta ilel ti snaʼ spajtsan sbae, yuʼun muʼyuk la spak skʼoplal ta stojolal li chopol ajvalile (1 Sam. 24:2-7). Pe mu jaluk noʼox bat, ta skoj ti jsaʼ mulile muʼyuk laj yaʼi kʼuxi chʼay tabe. Ta skoj ti oy kʼusitik chtun yuʼun David xchiʼuk li sviniktake ta slekil yoʼonton la skʼanbe koltael jun j-israelal vinik ti jaʼ sbi Nabale. Li Nabale la xchopol kʼopta li Davide xchiʼuk muʼyuk la skolta. Jaʼ yuʼun li Davide kap sjol, la snop bat smil skotol li buchʼutik te oy ta sna li Nabale. Li Davide muʼyuk la snop lek ti tsta smul ta skoj ti lajuk smil krixchanoetik ti chʼabal smulike. Koliyal ti ay pajtsanvanuk li Abigaile, ti jaʼ yajnil li Nabale, muʼyuk la spas li kʼusi chopol taje. Li Davide laj yakʼ venta ti jaʼ takbil tal yuʼun Dios li Abigaile, jaʼ yuʼun xi laj yalbee: «Acʼo ichʼatuc ta mucʼ li Mucʼul Diose, jaʼ li Dios yuʼun Israele, yuʼun jaʼ la stacot tal ti tal anupun ta bee. Acʼo ichʼatan ta mucʼ ec li voʼote yuʼun toj lec li cʼusi tal apase. Muc xavacʼ ti chbat milvancune, ti chbat jpac sutel ta jtuc noʼox li cʼusi lipasbate» (1 Sam. 25:9-13, 21, 22, 32, 33).

¹⁰ ¿Kʼusi xuʼ jchantik li ta loʼil taje? Li Jeovae la stunes Abigail sventa mu xchʼay ta be li Davide. Li avi eke tstunes krixchanoetik sventa tskoltautik. Jech xtok, mu me jmalatik ti oy buchʼu tstakbutik tal sventa mu xijchʼay ta be kʼalal ta jpastik mulil jujun veltae. Mu me jnoptik xtok ti jnaʼtik xa lek kʼusi tspas ta jujutos li kʼusi chkʼot ta pasele o chakʼ kʼotuk ta pasel o sventa xkʼot ta pasel li kʼusi tskʼan yoʼonton Diose (Ecl. 11:5). Pe jnaʼojtik ti Jeovae lek xojtikin kʼuyelan oyutik ta skotol ora xchiʼuk tskoltautik sventa tukʼuk oyutikuk ta stojolal. Yuʼun xi chalbutike: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol» (Sal. 32:8). Jaʼ yuʼun chaʼa, ¿kʼuxi tstojobtasutik li Jeovae? ¿Kʼuxi xuʼ jtabetik sbalil taje? Xchiʼuk, ¿kʼuxi xuʼ jnaʼtik ti tsbeiltas batel Jeova li steklumal avie? Jkʼeltik ta slivroal Apocalipsis li stakʼobiltak taje.

LI TOJOBTASELETIK CHAKʼ DIOSE CHCHABIUTIK

11. ¿Bu to kʼalal xojtikin Jeova li kʼusitik chkʼot ta pasel ta tsobobbailetike?

¹¹ Li kʼusi chakʼ ta ilel Apocalipsis kapitulo 2 xchiʼuk 3, jaʼ ti Ajvalil Jesucristoe tskʼel li kʼusitik yakal chkʼot ta pasel li ta vukub tsobobbailetik ta Asia Menore. Li kʼusi chal li livro taje, chakʼ ta ilel ti Jesuse tskʼel skotol li kʼusitik chkʼot ta pasele xchiʼuk tskʼel xtok li kʼusi tspas li jujun krixchanoe. Kʼusuk ti chkʼot ta pasele, li stuke tspatbe yoʼonton xchiʼuk chakʼbe tojobtasel tsobobbailetik xchiʼuk ta jujuntal. ¿Kʼusi xuʼ jchantik li ta loʼil taje? Kʼalal kʼot ta pasel li kʼusi yakʼoj xa onoʼox ta ilel li Diose, te lik kʼotuk ta pasel ta 1914. Li vukub tsobobbailetik ti te chal ta Apocalipsise jaʼ skʼan xal li buchʼutik chbatik ta vinajele xchiʼuk li tojobtasel akʼbatike te me tsakal skʼoplal ek skotol li tsobobbailetik ta steklumal Dios ti oy ta spʼejel Balumile. Jaʼ yuʼun, xuʼ xkaltik ta melel ti ta stojolal Xnichʼon li Jeovae tskʼel stuk li steklumale. ¿Kʼusi skʼan jpastik sventa jtabetik sbalil li beiltasel chakʼe?

12. ¿Kʼuxi chkakʼtik akʼo sbeiltasutik batel li Jeovae?

¹² Jtos ti kʼuxi xuʼ jtatik li beiltasel  chakʼbutik Jeovae jaʼo kʼalal ta jchan jtuktik li Vivliae. Li vunetik chakʼ li j-abtel ti tukʼ yoʼonton, ti lek pʼije te chakʼbutik epal tojobtaseletik ta Vivlia (Mat. 24:45). Mi ta jkʼan ta jtabetik lek sbalile, skʼan me jchʼakbetik yorail ta xchanel xchiʼuk xkakʼ ta jkuxlejaltik. Melel onoʼox li xchanel Vivlia ta jtuktike jaʼ jtos ti kʼusi tstunes Jeova sventa chchabi li yajtuneltake xchiʼuk sventa «mu [xyalik] ta spasel li cʼusi chopole» (Jud. 24). ¿Mi oy akʼeloj junuk mantal ta jlikuk vun ti jaʼ xa chalbe skʼoplal yilel li vokolil anuptanoje? Mi jaʼ jeche, chʼamo, nopo ti jaʼ tstukʼibtasot li Jeovae. Bateltike xuʼ van chalbot junuk avamigo ti oy kʼusi skʼan xa pase. Li Jeova eke xuʼ tstunes xchʼul espiritu sventa xavakʼ venta jtosuk atalel ti bu skʼan xatukʼibe, taje jech chkʼot ta pasel ek ta stojolal li yantik yajtuneltak Diose. Mi ta jchʼamtik ta anil li beiltasel chakʼbutik li chʼul espiritue, jaʼ skʼan xal ti chkakʼtik ti akʼo sbeiltasutik batel li Jeovae (kʼelo Salmo 139:23, 24). Kalbetik batel mas smelolal ti kʼuyelan yakalutik ta xchanel li Jvivliatike.

13. ¿Kʼu yuʼun lek ti jkʼeltik li kʼuyelan ta jchan li Jvivliatike?

¹³ Mi solel jaʼ mas batem ta koʼontontik li chʼayob oʼontonale, muʼyuk xa me yorail kuʼuntik ta xchanel li Vivlia ta jtuktike. Xi laj yakʼ venta jun ermanoe: «Toj anil noʼox xuʼ xkiktatik xchanel li Vivlia ta jtuktike. Li avie mas xa kʼun ta tael xchiʼuk mas xa yalel li kʼusitik sventa chʼayob oʼontonale. Xuʼ te chkiltik ta television, ta komputadora xchiʼuk ta selular. Taje buyuk xa noʼox xvinaj». Mi jaʼ bat ta koʼontontik taje, li yorail sventa ta jchan jtuktik li Vivliae ta kʼunkʼun me chchʼay batel (Efe. 5:15-17). Jaʼ yuʼun, skʼan xi jakʼbe jbatike: «¿Mi ta jchʼakbe yorail ta xchanel lek li Skʼop Diose o mi jaʼ noʼox van ta jpas kʼalal jaʼo oy jparte ta tsobajel o yantik kʼusitik chketʼes ta tsobajele?». Mi jech kʼotem ta jtojolaltike, skʼan me xkakʼbetik yipal sventa jtabetik sbalil li yorail jchʼakojbetik ta sventa li yichʼel ta mukʼ Jeova ta kutsʼ kalaltike o jaʼo kʼalal ta jchantik li Vivlia ta jtuktike. Kʼalal jech ta jpastik taje, xuʼ me jtabetik sbalil li epal mantaletik ti chakʼbutik Jeova sventa kuxuluk xijkomutike (Pro. 2:1-5).

LI DIOSE TSPAT KOʼONTONTIK YOʼ XKUCH KUʼUNTIK

14. ¿Kʼuxi chakʼ ta ilel Vivlia ti oy ta yoʼonton Jeova ti kʼuyelan chkaʼi jbatike?

¹⁴ Li Davide ep laj yil svokol ta xkuxlejal (1 Sam. 30:3-6). Li kʼusi la stsʼiba ti jaʼ akʼbat snaʼ yuʼun Diose, jaʼ chakʼ ta ilel ti tstsak ta venta Jeova ti kʼuyelan laj yaʼi sbae (kʼelo Salmo 34:18 xchiʼuk 56:8). Melel onoʼox ti tstsak ta venta ek ti kʼuyelan chkaʼi jbatike. Mi jaʼo chkat koʼontontik xchiʼuk mi «oy svocol» koʼontontik o mi «lajem stsatsal» koʼontontik chkaʼitike, ta me xnopaj talel ta jtojolaltik li Jeovae. Taje tspat koʼontontik, jech kʼuchaʼal kʼot ta stojolal David ti te chal ta jun kʼejoj ti xi la stsʼibae: «Xitseʼin noʼox, xcuxet noʼox coʼnton yuʼun li xcʼuxul avoʼntone. Aviloj xa cʼu xʼelan li jvocole; laj xa anaʼ ti ep at-oʼnton chcaʼye» (Sal. 31:7). Li Diose maʼuk noʼox snaʼoj li jvokoltike, yuʼun tspat koʼontontik sventa xkuch kuʼuntik batel. Jtos ti kʼusi tstunese jaʼ li tsobajeletike.

15. ¿Kʼusi xuʼ jchantik ta stojolal li Asafe?

¹⁵ Li kʼusi kʼot ta stojolal Asafe jaʼ tskoltautik  sventa xkaʼibetik smelolal kʼusitik sbalil xuʼ jtabetik li tsobajeletike. Li pale taje, ep kʼusitik laj yil ti muʼyuk tukʼike, vaʼun la snop ti muʼyuk sbalil ti chtun ta stojolal li Diose, jaʼ yuʼun lubtsaj. Xi laj yale: «Toj ven stʼuset coʼnton laj caʼay; oy cʼusi te pajal ta yut coʼnton laj caʼay». Ta skoj taje, jutuk xa mu laj yikta ti chtun ta stojolal li Diose. Pe, ¿kʼusi koltaat ta snopel lek li Asafe? Chal stuk ti jaʼ to kʼalal «[och] ta chʼulna» yuʼun li Diose. Te joyol ta stojolal yermanotak, vaʼun jaʼ te tukʼib li snopbene. Laj yakʼ venta ti muʼyuk jal ti lek noʼox chbat xkuxlejalik li buchʼutik chopolike xchiʼuk ti chakʼbe slajeb Jeova skotol taje (Sal. 73:2, 13-22). Li avie jech chkʼot ta jtojolaltik ek. Xuʼ van mu xa stsʼik kuʼuntik ti chkiltik muʼyuk tukʼilal ta balumil ta skoj ti jaʼ oy ta skʼob Satanase. Pe kʼalal ta jtsob jbatik xchiʼuk li kermanotaktike ta jtatik koltael xchiʼuk spatobil koʼontontik sventa xijmuyubaj noʼox chijtun ta stojolal Jeova.

16. ¿Kʼusi xuʼ jchantik ta stojolal li Anae?

¹⁶ Jaʼ yuʼun chaʼa, ¿mi oy van jtaoj jvokoltik ta tsobobbail ti jaʼ xa tsmakutik ti mu xa jkʼan xijbatutike? Xuʼ van muʼyuk xa lek chkaʼi jbatik ta skoj ti laj kiktatik jtosuk abtelal ta tsobobbaile. O xuʼ van la jta jvokoltik xchiʼuk junuk ermano o ermana ta skoj ti lik jkʼoptik xchiʼuke. Mi jeche, chtun me kuʼuntik li kʼusi kʼot ta stojolal li Anae (kʼelo 1 Samuel 1:4-8). Jvules ta joltik ti ep laj yil svokol ta skoj li Peninae, ti jaʼ yan yajnil li smalale. Mas to tsatsaj svokol kʼalal chkʼot skʼakʼalil chbat yakʼbeik smoton Jeova ta chʼulna ta Silo ti jech tspasik jujun jabile. «Jaʼ yuʼun li Anae chocʼta sba; mu xveʼ o» ta skoj li svokole. Pe li kʼusi kʼot ta stojolale maʼuk laj yikta-o sba ta yichʼel ta mukʼ li Jeovae. Jaʼ yuʼun li Jeovae laj yilbe stukʼil yoʼonton xchiʼuk laj yakʼbe bendision (1 Sam. 1:11, 20).

17, 18. 1) ¿Kʼuxi ta jtatik spatobil koʼontontik li ta tsobajeletike? 2) ¿Kʼu yelan chavaʼi aba kʼalal chanopbe skʼoplal ti ta slekil yoʼonton chchabiutik Jeova sventa jtatik li pojelale?

¹⁷ Li yajtsʼaklomutik Cristoe oy lek srasonal kuʼuntik sventa xijbatilanutik li ta tsobajeletik jech kʼuchaʼal la spas li Anae. Jnaʼojtik ti xuʼ te jta stsatsal koʼontontik ti solel chtun kuʼuntik li avie (Heb. 10:24, 25). Li ta tsobajeletike te chkiltik slekil yoʼontonik li kermanotike xchiʼuk tspatbutik koʼontontik. Xuʼ van li kʼusi tstij koʼontontike jaʼ li mantal ch-echʼe o sloʼil junuk kermanotik. Jech xtok, xuʼ van jaʼo kʼalal chaʼibutik kʼusi chkaltik junuk ermanoe. O kʼalal chijloʼilaj xchiʼuk junuk ermano kʼalal skʼan to xlik o jaʼo kʼalal mi laj xaʼox li tsobajele (Pro. 15:23; 17:17). Ta me spat koʼontontik xtok mi koʼol chijkʼejin xchiʼuk li kermanotike. Melel onoʼox ti kʼalal «chloʼilaj [koʼontontike]» mas chtun kuʼuntik ti spatbutik koʼontontik li mantaletik ch-echʼ ta tsobajeletike. Yuʼun li tsobajeletike jaʼ tstunes Jeova sventa tsmukʼibtas koʼontontik xchiʼuk tstsatsubtasutik sventa tukʼuk-o xijtun ta stojolal (Sal. 94:18, 19).

¹⁸ Ta skoj ti jnaʼojtik ti ta slekil yoʼonton chchabiutik li Jeovae, jech chkaʼi jbatik kʼuchaʼal li Asaf ti xi la skʼejinta Jeovae: «Laj atsacbun jbatsʼicʼob. Laj atuqʼuibtasun batel ta sventa li taqʼuiel avuʼune» (Sal. 73:23, 24). ¡Toj echʼ noʼox ta jtojbetik ta vokol Jeova ti xchabiojutik sventa kuxul xijkome!

[Sjakʼobiltak sventa xchanobil]

[Lokʼol ta pajina 28]

Li Jeovae yikʼojot tal ek

[Lokʼol ta pajina 30]

Li tojobtasel chakʼ Diose jaʼ sventa jchabieltik

[Lokʼol ta pajina 31]

Li spatobil oʼontonale tskoltautik sventa xkuch kuʼuntik