¿Mi xvul ta ajol?

¿Mi oy akʼeloj lek li revista Li Jkʼel osil ta toyole, ti mas achʼik to lokʼeme? Mi jeche, paso preva mi xtakʼ avuʼun li kʼusitik liʼe:

¿Kʼu yuʼun chkaltik ti jaʼ jun pʼijubtasel li xkuxlejal Salomone?

Li Diose laj yakʼbe bendisionetik xchiʼuk la stunes li ajvalil Salomone. Pe kʼalal jaʼo ch-ajvalilaje laj yikta xchʼunel li tojobtaseletik chakʼ Diose. Li Salomone maʼuk noʼox nupun xchiʼuk stseb Faraón, yuʼun laj yikʼ epal antsetik xtok, vaʼun ta kʼunkʼun ikʼat batel ta yichʼel ta mukʼ jecheʼ diosetik li antsetik taje. Jaʼ yuʼun, tsots skʼoplal skʼan jkʼel jbatik sventa mu x-ayan ta koʼontontik li kʼusitik muʼyuk lekike (Deu. 7:1-4; 17:17; 1 Rey. 11:4-8) (15/12, pajina 10-12).

¿Mi chopol van ti tstunesik smakobil olol li jun nupultsʼakale?

Li ta Vivliae muʼyuk bu jotukal chal ti chopol ti chichʼ tunesel li smakobil olole. Jaʼ yuʼun, li jun nupultsʼakale tsnop stukik mi tskʼan yalab xnichʼnabik. Mi jaʼ ta stunes smakobil olol ti muʼyuk tsyales-oe, jaʼ me ta snop stukik xchiʼuk jaʼ me oy ta sbaik li kʼusi tspasike (Rom. 14:4, 10-13) (1/1, pajina 6).

¿Kʼu yuʼun jaʼ jun mulil li syalesel olole?

Li Diose chʼul chil li kuxlejale xchiʼuk manchuk mi yakal ta xchʼi ta yut xchʼut meʼil li jun olole, kuxul xa chil (Sal. 139:16). Jaʼ yuʼun laj yal Mantal ti akʼo xichʼ kastigo li buchʼu oy kʼusi chopol ta spasbe li jun olol ti oy to ta yut xchʼut smeʼe. Jech oxal, mi laj yichʼ lajesbel xkuxlejal jun olol ti muʼyuk to vokʼeme xkoʼolaj kʼuchaʼaluk chijmilvan (Éxo. 21:22, 23) (1/1, pajina 6).

¿Kʼuxi jnaʼtik ti muʼyuk chichʼ lajesel ta 2012 li Balumile?

Ti jech chchapik kʼuchaʼal voʼneal kalendario mayae, jlom krixchanoetike solel xchʼunojik ti chlaj ta 2012 li Balumile. Pe taje mu jechuk, yuʼun li Vivliae lek jamal chal ti laj yichʼ pasel sventa chnaki krixchanoetik xchiʼuk ti te oy-o sbatel osile (Ecl. 1:4; Isa. 45:18) (1/1, pajina 13).

¿Kʼuxi jnaʼtik ti oy onoʼox melel tʼujbil yajtsʼaklomtak Cristo ti te lik talel ta baʼyel sigloe?

Li ta lokʼolkʼop laj yal Jesús ta sventa li trigo xchiʼuk li «chopol jobele», «li batsʼi trigoe» jaʼ toʼox skʼoplalik «li xnichʼnab Diose» (Mat. 13:24-30, 38). Li chopol jobele xchiʼuk li trigoe koʼol chʼiik jaʼ to kʼalal laj yichʼ tsobele. Akʼo mi mu jnaʼtik buchʼu jaʼik li trigo taje, yuʼun oy onoʼox li ta jkʼakʼaliltik eke (15/1, pajina 7).

¿Kʼu yuʼun toj lek xtojob ta cholmantal li Pabloe?

Oy ep srasonaltak. 1) Jaʼ oy ta yoʼonton li Ajvalilal yuʼun Diose xchiʼuk ta stojolal li Jesucristoe. 2) Li kʼusi chakʼbe yil krixchanoetike chkʼot ta yoʼontonik. 3) Tslokʼes ta Vivlia li kʼuyelan snaʼ xrasonaje. 4) Maʼuk noʼox tsaʼ li kʼusi tskʼan stuke, yuʼun kʼalal la xchol mantale ta «sob la [sjapu] [...] cʼalal to ta mal cʼacʼal» (Hechos 28:23) (15/1, pajina 13).

¿Kʼuxi xuʼ stsal kuʼuntik li itʼix oʼontone?

Li kʼusitik xuʼ skoltautike jaʼ liʼe: skʼan jkʼantik xchiʼuk lekuk xkiltik li kermanotaktike, jaʼ jchiʼintik li buchʼutik lek oyik ta mantale, jpastik li kʼusitik leke xchiʼuk muyubajkutik xchiʼuk «li bochʼo xcuxet yoʼntone» (Rom. 12:15) (15/2, pajina 16, 17).

¿Kʼusi skʼan oyuk ta joltik kʼalal chkakʼtik junuk tojobtasele?

Kʼelo baʼyel ti kʼuyelan oye. Mu ta aniluk xatakʼbe. Tsako ta venta li Skʼop Diose. Mi jech sta-o chavile tuneso li vunetike. Mu xanop voʼot li kʼusi skʼan spas yantike (15/3, pajina 7-9).

¿Kʼu yuʼun laj yalbe li buchʼutik te chaʼiik kʼusi chal Jesús ti akʼo xanavikuk chibuk reva mi kʼanbatik ti akʼo xanavik junuk reva li ta Mateo 5:41?

Li vaʼ kʼakʼal taje, li jromaetike jaʼ tspasik ta mantal li j-israeletike, yuʼun buchʼuuk noʼox xuʼ sujik sventa spasik junuk abtelal. Jaʼ yuʼun mi kʼanbatik ti akʼo xanavik junuk revae akʼo la spasik chibuk reva, yuʼun kʼalal jech laj ya Jesús taje, jaʼ skʼan xal ti akʼo spasik ta sjunul yoʼontonik li kʼusi chkʼanbatik yuʼun li buchʼutik tsots yabtelike (1/4, pajina 9).