Skotoluk koʼonton tunkutik ta stojolal Jeova
Skotoluk koʼonton tunkutik ta stojolal Jeova
«Nichʼon Salomón, cʼotuc me ta Dios avuʼun ti Dios yuʼun ti atote. Ta sjunuluc avoʼnton, tunan ta stojol.» (1 CRÓ. 28:9, Ch)
JSABETIK STAKʼOBIL LI SJAKʼOBILTAK LIʼE:
¿Kʼusi jaʼ ta melel li oʼontonale?
¿Kʼusi tskoltautik ta snaʼel kʼuyelan oy li koʼontontike?
¿Kʼuxi xuʼ jpastik sventa ta skotoluk-o koʼontontik xijtun ta stojolal li Jeovae?
1, 2. 1) Li ta Vivliae chalbe skʼoplal li jujutos kʼusitik ta jbekʼtaltike, ¿kʼusi jtosukal ti mas chalbe skʼoplale? 2) ¿Kʼu yuʼun tsots skʼoplal skʼan xkaʼibetik smelolal kʼusi skʼan xal li oʼontonale?
LI TA Skʼop Diose chalilanbe skʼoplal li jujutos kʼusitik ta jbekʼtaltike. Jech kʼuchaʼal liʼe, li Davide xi la stsʼibae: «Acʼo macuc o satic, [...] acʼo nicuc li yacanique, jech nicnunuc». Li Vivliae chal kʼusitik muʼyuk lek chil li Jeovae, jech kʼuchaʼal «li bochʼo chbat ta anil xchiʼuc yacan ta spasel cʼusi chopole». Li Jeova xtoke xi laj yale: «Qʼuelavil, liʼ locʼtabilot o ta yut jcʼob». Xchiʼuk li j-alkʼop Jeremiase xi laj yale: «Aʼyo avaʼyic bol cristianoetic ti mu cʼusi xʼoch ta avoʼntonique. Acʼo me oy asatic pero mu xavilic; acʼo me oy achiquinic pero mu xavaʼyic» (Sal. 69:23, Pro. 6:16-19; Isa. 49:16; Jer. 5:21).
2 Oy jtos ti kʼusitik ta jbekʼtaltike jaʼ mas chalbe skʼoplal li Vivliae, taje jaʼ li oʼontonale. Li Ana ti jaʼ tukʼil yajtunel Jeovae la stunes jun lokʼolkʼop kʼalal xi laj yal ta orasione: «Mucʼul Dios, toj xcuxet noʼox coʼnton ta atojol» (1 Sam. 2:1). Li jpʼel kʼop oʼontonal xie, jutuk mu jmil ta koj chal li ta Vivliae, kʼalal tstunes li jpʼel kʼop taje, jaʼ noʼox ta lokʼolkʼop. Yaʼibel smelolal kʼusi jaʼ li oʼontonale toj tsots me skʼoplal skʼan jnaʼtik, yuʼun li Skʼop Diose chalbutik ti skʼan jchabitike (kʼelo Proverbios 4:23).
LI KʼUSI SKʼAN XAL LI OʼONTONALE
3. ¿Kʼusi skʼan jpastik sventa xkaʼibetik smelolal li jpʼel kʼop oʼontonal ti chal Vivliae, xchiʼuk kʼusi xuʼ jkoʼoltastik-o?
3 Melel onoʼox ti muʼyuk chalbe smelolal kʼusi jaʼ li oʼontonal ta Vivlia jech kʼuchaʼal chal jun diksionarioe, pe chalbutik kʼusitik smakoj taje. ¿Kʼuxi? Xi jkoʼoltastike, jnoptik ta jun mosaiko ti oy skoloraltak ti te oy ta spakʼbal na ti pasbil ta epal tonetik sventa xvinaj junuk lokʼole. Sventa xkiltik lek kʼusi chakʼ ta ilel li epal bikʼtal tonetike, skʼan nomuk oyutik xchiʼuk jkʼeltik xpechlej. Jech ek, mi ta jkʼan chkaʼibetik smelolal kʼusitik smakoj li jpʼel kʼop oʼontonale, skʼan jkʼeltik skotol li epal versikuloetik ta Vivlia ti bu chalbe skʼoplal taje. ¿Kʼusi chtal ta joltik yuʼun kʼalal chalbe skʼoplal oʼontonal li Vivliae?
4. 1) ¿Kʼusi jaʼ li oʼontonale? 2) ¿Kʼusi skʼan laj yal Jesús li ta Mateo 22:37?
4 Kʼalal tstunes li jpʼel kʼop oʼontonal ta Vivliae jaʼ tskʼan chal li kʼusi oy ta yoʼonton li jun krixchanoe, taje te smakojbe skʼoplal ti kʼu kelantike, li kʼusi oy ta koʼontontike, li kʼusi ta jnoptike, jtalelaltik, kʼusitik jnaʼtik spasel, kʼusi oy ta koʼontontik xchiʼuk kʼusi ta jkʼan ta jtatik (kʼelo Deuteronomio 15:7; Proverbios 16:9 xchiʼuk Hechos 2:26). Jlik livroe chal ti jpʼel kʼop oʼontonale, jaʼ skʼan xal «ti kʼuyelan ta melel li jun krixchanoe». Pe li kʼusi chal taje oy onoʼox spajeb. Li Jesuse xi laj yale: «Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol» (Mat. 22:37). Li oʼontonal taje jaʼ chalbe skʼoplal ti kʼuyelan chaʼi sba, kʼusi tsnop xchiʼuk li kʼusi oy ta yoʼonton li jun krixchanoe. Kʼalal laj yalbe skʼoplal Jesús «avoʼnton», «achʼulel», xchiʼuk «ajol» xie, jaʼ tskʼan chal ti maʼuk noʼox chkakʼtik ta ilel ti kʼuyelan chkaʼi jbatik kʼalal jkʼanojtik li Diose, yuʼun skʼan xkakʼtik ta ilel xtok ti kʼusitik ta jpas ta jkuxlejaltike xchiʼuk li kʼusi ta jnoptike (Juan 17:3; Efe. 6:6). Pe kʼalal jaʼ noʼox te oy li jpʼel kʼop oʼontonale, jaʼ skʼan xal ti kʼuyelan yoʼonton ta melel li jun krixchanoe.
KʼU YUʼUN SKʼAN JCHABI LI KOʼONTONTIKE
5. ¿Kʼu yuʼun skʼan xkakʼbetik yipal ti ta sjunuluk koʼontontik chijtun ta stojolal li Jeovae?
5 Li ajvalil Davide xi la stojobtas li skereme: «Salomón, cʼotuc me ta Dios avuʼun ti Dios yuʼun ti atote. Ta sjunuluc avoʼnton, tunan ta stojol. Oyuc slequil ti ajol avoʼntone, yuʼun ti Diose chajal ta sba ta sat ti cʼusi ta xichʼ pasele, ti cʼu sʼelan ti snopbenale» (1 Cró. 28:9, Ch). Jech, li Diose jaʼ tskʼel stuk li oʼontonaletike, jaʼ yuʼun skʼeloj lek li koʼontontik eke (Pro. 17:3; 21:2). Ti kʼuyelan xkil jbatik xchiʼuk li Jeovae xchiʼuk ti kʼusi chkʼot ta pasel ta jkuxlejaltike, te me tsakal skʼoplal ti kʼuyelan chilutik li Jeovae. Jaʼ yuʼun, oy lek srasonal kuʼuntik sventa jchʼuntik li tojobtasel laj yal Davide xchiʼuk ti xkakʼbetik yipal ta sjunul koʼontontik chijtun ta stojolal li Jeovae.
6. ¿Kʼusitik skʼan xkakʼtik venta kʼalal chijtun ta stojolal Jeovae?
6 Kʼalal oy tajek ta koʼontontik spasbel batel yabtel li Diose, jaʼ te chvinaj ti chijtun ta stojolal Jeova ta sjunul koʼontontike. Pe skʼan xkakʼtik venta ti toj tsots li kʼusitik chakʼ li sbalumil Satanase xchiʼuk ta skoj ti jpasmulilutike xuʼ ta kʼunkʼun xchʼay ta koʼontontik spasel taje (Jer. 17:9; Efe. 2:2). Jech oxal, sventa lek tsots-o koʼontontik ta stojolal Jeovae, skʼan nopolik noʼox jkʼeltik kʼuyelan oy li koʼontontike. ¿Kʼuxi ta pasel taje?
7. ¿Kʼuxi xuʼ jnaʼtik kʼuyelan oy ta melel li koʼontontike?
7 Jech kʼuchaʼal li jtekʼ tee, jaʼ noʼox xvinaj li spat xokone, yuʼun mu xvinaj li kʼusi oy ta yute, li kʼusi oy ta yoʼonton ta melel li jun krixchano eke, mu xvinaj. Jech kʼuchaʼal laj yal ta Mantaletik ta Vits li Jesuse, ta xvinaj ta sat kʼuyelan ta melel li jtekʼ tee, li kʼusitik ta jpastik eke te me chvinaj ta melel kʼuyelan oy li koʼontontike (Mat. 7:17-20). Jkʼeltik jtosuk taje.
JKʼELTIK LI KOʼONTONTIKE
8. Jech kʼuchaʼal chal li mantal ta Mateo 6:33, ¿kʼuxi chkakʼtik ta ilel li kʼusi oy ta koʼontontike?
8 Li ta Mantaletik ta Vits laj yal Jesuse, chalbe skʼoplal jtos li kʼusi skʼan spasik li buchʼutik te yakal chaʼiik ti skʼan xtunik ta stojolal Jeova ta skotol yoʼontonike. Xi laj yal li Jesuse: «Jaʼ yuʼun tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane, jech chayacʼboxuc scotol li cʼusitic ta xtun avuʼunique» (Mat. 6:33). Yuʼun li kʼusi baʼyel chkakʼ ta jkuxlejaltike jaʼ te chvinaj li kʼusi oy ta koʼontontik ta melele, kʼusi ta jnoptik xchiʼuk li kʼusi oy ta koʼontontik staele. Jaʼ yuʼun skʼan jkʼeltik lek li kʼusi baʼyel chkakʼ ta jkuxlejaltike sventa xkiltik mi ta sjunul koʼonton chijtun ta stojolal li Diose.
9. ¿Kʼusi takel ta ikʼel laj yalbe chaʼvoʼ viniketik li Jesuse, xchiʼuk kʼusi laj yakʼik ta ilel ti kʼuyelan la stakʼike?
9 Kʼalal laj xaʼox yalbe mantaletik yajtsʼaklomtak Jesús ti akʼo «baʼyuc [yakʼ sbaik] ta ventainel yuʼun li Diose», oy kʼusi kʼot ta pasel ti te vinaj li kʼusi baʼyuk chakʼ ta xkuxlejalik xchiʼuk li kʼusi oy ta yoʼontonik ta melele. Li Evanjelio yuʼun Lucase chal ti «solel sujbil yoʼnton tscʼan chbat ta Jerusalén» li Jesuse. Akʼo mi snaʼoj ti tsta svokoltak tee, pe solel oy onoʼox ta yoʼonton chbat. Ta tsʼakal jutuk «cʼalal jaʼo chanovic [batel]» xchiʼuk li yajtakboltake, te tal jun vinik, vaʼun li Jesuse xi laj yalbee: «Chiʼinun batel». Akʼo mi oy ta yoʼonton xchʼamel li takel ta ikʼel taje, xi la spak-o skʼoplale: «Cajval, coltaun to batel, chbat jmuc comel baʼyuc li jtote; jaʼ to chtal jchiʼinot». Yan vinik ti jech la stak ta ikʼel xtoke, xi la stakʼe: «Cajval, ta jcʼan ta jchiʼinot batel, pero coltaun to batel, yuʼun ta to xbat jcʼopan comel li bochʼotic te oyic ta jnae» (Luc. 9:51, 57-61). Lek xvinaj ti jelel tajek stalelal li vaʼ viniketike, yuʼun li Jesuse ta sjunul yoʼonton laj yakʼ sba, pe li viniketik taje jaʼ noʼox la saʼ kʼusi ta spak-o skʼoplalik ti mu tsotsuk sbalile. Kʼalal jaʼ baʼyuk laj yakʼ ta xkuxlejalik li kʼusi tskʼanike xchiʼuk ti jaʼ mu tsotsuk skʼoplal laj yilik li ventainel yuʼun Diose, laj yakʼik ta ilel ti muʼyuk ta yoʼontonik chtunik ta stojolal li Diose.
10. 1) ¿Kʼuxi jchʼamojtik li takel ta ikʼel yakʼojbutik Cristoe? 2) ¿Kʼusi laj yal Jesús li ta Lucas 9:62?
10 Li viniketik taje muʼyuk kʼotik ta yajtsʼaklomtak Cristo, pe li voʼotike mu jechuk la jpastik yuʼun jujun kʼakʼal chijtunotik ta stojolal li Jeovae. Kʼalal jech ta jpastik taje, jaʼ chkakʼtik ta ilel ti kʼuyelan jkʼanojtik li Jdiostike. Pe akʼo mi ta jpastik li kʼusi oy ta jbatik spasel ta tsobobbaile, skʼan me jchabi li koʼontontike, yuʼun oy kʼusi xibal sba te oy. ¿Kʼusi jaʼ taje? Xi pʼijubtasvan ta slivroal Lucas li Jesuse: «Li bochʼo stsacoj ta scʼob yabtejeb vacax sventa slocobil banamile, me ta sqʼuel sutel svaʼlupate, leʼe mu xtun ta sventa xcholel li ventainel yuʼun Diose» (Luc. 9:62). ¿Kʼusi xuʼ jchantik yuʼun taje?
«JAʼ ACʼO AVOʼNTONIC SPASEL LI CʼUSITIC LEQUE»
11. ¿Kʼusi kʼot ta pasel ta yabtel li jun vinik ti laj yalbe skʼoplal Jesuse, xchiʼuk kʼu yuʼun?
11 Sventa xkaʼibetik smelolal kʼusi chanubtasel chakʼ li Lucas 9:62 kalbetik batel mas smelolal li lokʼolkʼop ti te ta jtatik li ta versikulo liʼe. Jnoptik ti yakal tslok osil li jun vinike. Kʼalal jaʼo yakal ta abtele, jaʼ xnopnun-o li ta snae, ti te oy yutsʼ yalal xchiʼuk yamigotak ti xmuyubaj noʼox chveʼik xchiʼuk ti chaʼiik noʼox son xtoke. ¡Solel oy tajek ta yoʼonton ti teuk xa xchiʼukane! Kʼalal slokoj xaʼox kʼuk yepale, solel tsots chaʼi ta yiktael snopel ti kʼusitik yiktaoj komele, vaʼun lik skʼel sutel svalopat. Akʼo mi ep to kʼusitik skʼan spas kʼalal skʼan toʼox xlik tsʼunolajuke, li j-abtel ta osile chʼay yoʼonton, vaʼun muʼyuk xa lek chbat li yabtele. Pe maʼuk noʼox taje, ta skoj ti muʼyuk ta sjunul yoʼonton ch-abteje, muʼyuk xa bu lek ilat yuʼun li yajval yabtele.
12. ¿Kʼusi xuʼ xkoʼolaj-o li jun j-abtel vinik ti te chal ta Lucas 9:62 xchiʼuk li jlom yajtsʼaklomtak Cristo avie?
12 Kalbetik skʼoplal kʼusitik xkoʼolaj-o li avi kʼakʼale. Li j-abtel vinik laj yalbe skʼoplal Jesuse xuʼ van jech xkoʼolaj kʼuchaʼal jun yajtsʼaklom Cristo ti lek ch-abtej ta tsobobbaile, pe xuʼ van oy ta vokol li yoʼontone. Akʼo mi chlokʼilan ta cholmantal xchiʼuk chbatilan ta tsobobbail, pe mu xkom yuʼun ta snopel jaytosuk kʼusitik lek chil liʼ ta sba balumile. Yuʼun li ta yut yoʼontone solel skʼanoj tajek li kʼusitik liʼ ta sba balumile. Vaʼun, kʼalal ep xaʼox jabil tukʼ yakʼoj sbae, solel tsots chaʼi ta yiktael snopel li kʼusitik xuʼ skʼupin li kʼusitik chakʼ li sba balumile, vaʼun «ta sqʼuel sutel [svalopat]», jaʼ xkaltik, li kʼusitik yiktaoj komele. Akʼo mi ep to kʼusitik skʼan pasel ta sventa li cholmantale, muʼyuk xa lek ta yoʼonton «li Lequil Aʼyej sventa cuxlejale», xchiʼuk li abtelaletik ta sventa Diose muʼyuk xa lek tspas (Fili. 2:16). Li Jeovae jaʼ li «Yajval cʼaoj[e]», ta me xkakʼbetik svul yoʼonton mi mu ta sjunuluk koʼontontik chij-abteje (Luc. 10:2).
13. ¿Kʼusi smakoj ti ta skotol koʼontontik chijtun ta stojolal Jeovae?
13 Li chanubtasele toj lek jamal ta aʼyel. Kʼalal chijkʼotilan ta tsobobbail xchiʼuk chijlokʼilan ta cholmantal o yantik kʼusitik skʼan pasel ta tsobobbaile, toj lek maʼ taje. Pe kʼalal ta skotol koʼontontik chijtun ta stojolal li Diose ep me kʼusitik te smakoj (2 Cró. 25:1, 2, 27). Mi solel oy to tajek ta yoʼonton stalel xkuxlejal balumil li jun yajtsʼaklom Cristoe, jaʼ xkaltik ti «ta sqʼuel sutel svaʼlupate», oy me ta xiʼel ti mu xa lekuk x-ilat yuʼun li Jeovae (Luc. 17:32). Sventa lek xijtun «ta sventa xcholel li ventainel yuʼun Diose» tsots me skʼoplal jchʼuntik li mantal liʼe: «Contrainic li cʼusitic chopole; jaʼ acʼo avoʼntonic spasel li cʼusitic leque» (Luc. 9:62; Rom. 12:9). Jaʼ yuʼun chaʼa, skʼan me jkʼel jbatik li kʼusitik chakʼ sbalumil Satanase, akʼo mi toj lek xchiʼuk ti toj ep ta jtabetik sbalil yileluke, yuʼun jaʼ chakʼ ti mu xa ta skotoluk koʼontontik chijtun ta stojolal Jeovae (2 Cor. 11:14; kʼelo Filipenses 3:13, 14).
VIKʼILUK-O ME JSATIK
14, 15. 1) ¿Kʼusi tstunes Satanás sventa tsokes li koʼontontike? 2) ¿Kʼuxi chakʼ ta ilel li loʼil chal ta parafo ti toj echʼ noʼox xibal sba li kʼusi tstunes Satanase?
14 Ta skoj ti jkʼanojtik li Jeovae, jaʼ la stij koʼontontik kʼalal laj kakʼ jbatik ta stojolale. Ti kʼu xa sjalil echʼem talele, eputik ti kakʼojtik ta ilel ti ta skotol koʼontontik chijtun ta stojolal li Jeovae. Pe li Satanase muʼyuk chikta sba, yuʼun skʼeloj-o li koʼontontike (Efe. 6:12). Yikʼaluk van yakʼoj xa venta ti muʼyuk chkiktatik ta anil li Jeovae. Pe xuʼ ta kʼunkʼun tskʼunibtas ti kʼuyelan ta sjunul koʼontontik chijtun ta stojolal li Jeovae, li kʼusi tstunese jaʼ «li cʼusitic oy liʼ ta banamile» (kʼelo Marcos 4:18, 19). ¿Kʼu yuʼun toj lek yiloj Satanás li kʼusi tstunes taje?
15 Sventa jtakʼtik taje, kalbetik junuk skʼelobil. Nopo ti yakal chakʼel jlikuk livro ta akʼobaltik ti bu oy jpʼej lus ti lek sakjamane, pe ta tsʼakale kʼakʼ li afokoe. Ta anil noʼox laj avakʼ venta ti ikʼmutsʼan kome. Jaʼ yuʼun la ajel li fokoe, vaʼun lek xa sakjaman li kuarto xtoke. Li ta yan akʼobal xtoke, laj achan yan velta alivro ta skoj ti lek xa sakjamane. Pe li kʼusi mu xa naʼe jaʼ ti oy buchʼu la sjel afoko ti mas xa jutuk yipe, taje xuʼ van mu xavakʼ venta ta anil. Mi oy buchʼu la sjel yan velta li afoko ta yokʼomal ti mas xa tajek jutuk yipe, xuʼ van mu xavakʼ venta xtok. ¿Kʼu yuʼun? Yuʼun ta kʼunkʼun chyal yip li xojobale, jaʼ yuʼun mu xavakʼ venta. Taje xuʼ me jech chkʼot ta pasel ti kʼuyelan jpʼel koʼontontik chijtun ta stojolal Jeovae, yuʼun li kʼusitik chakʼ Satanase ta kʼunkʼun chijlubtsaj yuʼun. Mi oy jun yajtsʼaklom Cristo ti muʼyuk lek vikʼil sate, muʼyuk me chakʼ venta ta anil ti ta kʼunkʼun tslubtsaj batele, vaʼun jaʼ me jech chkuch yuʼun li Satanase (Mat. 24:42; 1 Ped. 5:8).
TOJ TSOTS SKʼOPLAL LI ORASIONE
16. ¿Kʼusi xuʼ tskoltautik sventa jchabi jbatik li ta kʼusitik tstunes Satanase?
16 Jaʼ yuʼun chaʼa, ¿kʼusi xuʼ tskoltautik sventa jchabi jbatik li ta kʼusitik tstunes Satanás xchiʼuk ti ta skotoluk koʼontontik chijtun ta stojolal Jeovae? (2 Cor. 2:11.) Toj tsots skʼoplal li orasione. Li jtakbol Pabloe laj yalbe xchiʼiltak ta chʼunolajel ti skʼan skʼel sbaik li ta «loʼlael chacʼ tal li pucuj ti toj lec yaʼyele». Ta tsʼakal jutuk xtoke xi laj yalanbee: «Ta sventa ti chacʼopanic Dios scotol orae, cʼanbeic Dios» (Efe. 6:11, 18; 1 Ped. 4:7).
17. ¿Kʼusi xuʼ jchantik ti kʼuyelan la spas orasion li Jesuse?
17 Sventa mu stsalutik li Satanase, skʼan jech jpastik kʼuchaʼal li Jesuse. Li stuke laj skʼanbe koltael Stot ta orasion, taje jaʼ te laj yakʼ ta ilel ti tskʼan chtun ta skotol yoʼonton ta stojolal li Jeovae. Kalbetik skʼoplal ti kʼuyelan la spas orasion kʼalal jun xaʼox akʼobal skʼan xchame. Li Lucase xi la stsʼibae: «Cʼalal mu noʼox albajuc ta xaʼi ti vocole, xʼechʼ to tsots lic cʼopoj tiʼinuc» (Luc. 22:44, Ch). Akʼo mi tsots xa onoʼox la skʼopon li Stote. Pe kʼalal mas tsots tajek chil svokol liʼ ta Balumile mas «xʼechʼ to tsots lic [skʼopon]» li Stote, vaʼun takʼbat. Li kʼusi la spas Jesuse jaʼ te chakʼ ta ilel ti jelajtik stsatsal stakʼ jpastik li orasione. Jaʼ yuʼun, kʼalal mas tsots li preva ta jtatike xchiʼuk kʼalal mas tsots li petsʼ chakʼ Satanase, skʼan «xʼechʼ to tsots» jkʼanbetik koltael xchiʼuk ti akʼo xchabiutik li Jeovae.
18. 1) ¿Kʼusi skʼan jakʼbe jbatik ta sventa ti kʼuyelan ta jpastik orasione, xchiʼuk kʼu yuʼun? 2) ¿Kʼusitik skʼan jpastik sventa lekuk noʼox li koʼontontike, xchiʼuk kʼuxi xuʼ jpastik? (Kʼelo li rekuadro ta pajina 16.)
18 ¿Kʼusi van xuʼ chkʼot ta pasel ti kʼuyelan ta jpastik orasione? Li jtakbol Pabloe xi laj yale: «Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol. Jech chaspasboxuc o ta jun avoʼntonic li Diose» (Fili. 4:6, 7). Jaʼ jech, sventa skotoluk koʼontontik chijtunutik ta stojolal li Jeovae, skʼan x-echʼ to jpastik orasion xchiʼuk ti nopolik noʼoxe (Luc. 6:12). Jaʼ yuʼun, li voʼotike skʼan xi jakʼbe jbatike: «¿Mi x-echʼ to ta jpas orasion xchiʼuk mi nopolik noʼox?» (Mat. 7:7; Rom. 12:12). Ti kʼuyelan ta jtakʼtike, jaʼ me te chakʼ ta ilel ti kʼu to yepal ta jkʼan chijtun ta stojolal li Jeovae.
19. ¿Kʼusi chapas sventa skotoluk-o avoʼonton chatun ta stojolal li Jeovae?
19 Jech kʼuchaʼal laj xa jkʼeltike, kʼalal ta jkʼeltik lek kʼusi ti mas tsots skʼoplal chkaʼitik ta jkuxlejaltike, jaʼ tskoltautik sventa xkakʼtik venta kʼuyelan oy li koʼontontike. Jaʼ yuʼun toj tsots skʼoplal ti julavemukutik noʼox sventa mu jaʼuk jkʼeltik sutel li kʼusi kiktaojtik xa komele xchiʼuk mu xkakʼtik ti akʼo skʼunibtas ti kʼuyelan ta skotol koʼontontik chijtun ta stojolal Jeova li spetsʼtak Diabloe (kʼelo Lucas 21:19, 34-36). Pe jech kʼuchaʼal la spas li Davide, skʼan tsots jkʼanbetik Jeova ti akʼo ta sjunuluk koʼonton xijtun ta stojolale (Sal. 86:11, Ch).
[Sjakʼobiltak sventa xchanobil]
[Rekuadro ta pajina 16]
OXTOS KʼUSITIK XUʼ JPASTIK SVENTA JKʼEL LI KOʼONTONTIKE
Oy ep kʼusitik stakʼ jpastik sventa lekuk noʼox ch-abtej li jbatsʼi oʼontontike, li koʼontontik chal ta Vivlia eke oy kʼusitik xuʼ tsokes sventa mu xa lekuk x-abtej. Ta jkʼeltik oxtosuk taje.
1 Veʼlil. Li batsʼi oʼontonale skʼan me lekuk li veʼliletik jlajestik sventa jtatik li kʼusitik chtun yuʼune. Li jun yajtsʼaklom Cristoe skʼan me lekil veʼliletik ta mantal skʼan slajes, jech kʼuchaʼal li xchanel Vivlia ta jtuktik noʼoxe, snopilanel xchiʼuk ti chijbatilanutik ta tsobajeletike (Sal. 1:1, 2; Pro. 15:28; Heb. 10:24, 25).
2 Ejersisio. Sventa lekuk noʼox ch-abtej li batsʼi oʼontonale, bateltike skʼan xkakʼtik tsots x-abtej. Li koʼontontik chalbe skʼoplal ta Vivlia eke, sventa lekuk noʼox oye skʼan xijlokʼilanutik ta cholmantal, akʼo mi ta jsujbatik bakʼintik (Luc. 13:24; Fili. 3:12).
3 Li kʼusitik oy ta jpat jxokontike. Li ta balumil bu nakalutik xchiʼuk li kʼusitik oy ta jpat jxokontike chakʼbe svokol li jbatsʼi oʼontontike xchiʼuk li koʼontontik chal ta Vivliae. Li kʼusi xuʼ xkutik sventa mu kʼusi spasbe koʼontontik li kʼusitik oy ta balumile, jaʼ ti mas jchiʼintik li ermanoetik ti oyutik ta yoʼontonik xchiʼuk ti ta skotol yoʼonton chtunik ta stojolal Jeova (Sal. 119:63; Pro. 13:20).
