Snaʼoj kʼuxi tskolta steklumal li Jeovae

«Li Cajvaltique snaʼ cʼuxi chut tscolta ta svocol li bochʼo ta xʼichʼat ta mucʼ yuʼune.» (2 PED. 2:9)

¿KʼU YUʼUN XUʼ JPAT KOʼONTONTIK TA STOJOLAL JEOVA SVENTA:

ti lek snaʼojbe yorail li kʼusitik tskʼan tspase?

ti tstunes yip sventa tskolta li steklumale?

ti snaʼoj kʼuxi chkʼotanuk ta pasel li kʼusitik ta mukʼta tsatsal vokolil chtale?

1. ¿Kʼusitik chkʼot ta pasel kʼalal jaʼo oy «li tsots [vokolile]»?

KʼALAL mi laj yakʼbe slajeb Dios li kʼusitik chopolik ti ventainbilik yuʼun Satanase, ta anil noʼox me tspas (1 Tes. 5:2, 3). Kʼalal jaʼo «¡nopol xa scʼan sta li smucʼta cʼacʼalil Mucʼul Diose[!]», li balumil liʼe muʼyuk xa smelol chkom (Sof. 1:14-17). Li vaʼ kʼakʼal taje buyuk xa noʼox xvinaj li vokoliletik xchiʼuk ti muʼyuk mas kʼusi oy yuʼunik li krixchanoetike. Ta melel ta xtal tsots vokolil ti «muʼyuc onoʼox jech cʼalal ilic li banamile xchiʼuc cʼalal to tana» (kʼelo Mateo 24:21, 22).

2, 3. 1) ¿Kʼusi vokolil tsnuptan li steklumal Dios kʼalal jaʼo oy «li tsots vocole»? 2) ¿Kʼusi chakʼ kipaltik sventa xkuch kuʼuntik li kʼusi poʼot xa xtale?

² Kʼalal chkʼot xaʼox ta tsutsel «li tsots vocole», «li Gog te ta yosilal Magoge» ta stunes li kʼusitik x-ayan yuʼun sventa tstsak ta kʼop li steklumal Diose. Ta melel ta stunes li «epal soldadoetic cajajtic ta caʼ [...] jech chac cʼu chaʼal lumaltoc» (Eze. 38:2, 14-16). Kʼalal mi jaʼo jech kʼot ta pasel taje, mi junuk organisasion ta Balumil tskoltautik. Sventa xijkolutike, jaʼ tskoltautik stuk li Diose. ¿Kʼusi ta jpastik kʼalal mi kʼot yorail taje?

³ Li yajtunelutik Jeovae xi skʼan jakʼbe jbatike: «¿Mi jchʼunoj ta melel ti kuxul chiktaun Jeova kʼalal mi tal li tsots vokolile?». Xi la stsʼiba li jtakbol Pedroe: «Li Cajvaltique snaʼ cʼuxi chut tscolta ta svocol li bochʼo ta xʼichʼat ta mucʼ yuʼune, xchiʼuc snaʼ bu chacʼ batel li bochʼotic toj chopolique yuʼun jech te oyic o cʼalal to tsta yorail ta xichʼic chapanel» (2 Ped. 2:9). Mi ta jnopbetik skʼoplal ti kʼuyelan koltavanem Jeova ta voʼnee, jech chkuch kuʼuntik batel li kʼusi chtal ta jtojolaltik ta tsʼakale. Jkʼeltik oxib skʼelobil ti xuʼ spat koʼontontik ta stojolal Jeova ti oy sjuʼel sventa tspoj li steklumale.

 KUXUL KOMIK KʼALAL ECHʼ NOJELAL TA VOʼE

4. ¿Kʼusi toʼox skʼan spasik kʼalal skʼan toʼox xtal li Nojelal ta voʼe?

⁴ Jnoptik baʼyel ta sventa li Nojelal ta voʼe. Li yorail taje toj tsots skʼoplal sventa xkʼot ta pasel li kʼusi tskʼan yoʼonton Diose. Kʼalal skʼan toʼox xtal li Nojelal ta voʼe, epal abtel toʼox skʼan pasel sventa xichʼ meltsanel li arkae xchiʼuk ti xichʼ tikʼel ochel ta arka li chonbolometike. Li Jeovae muʼyuk la smala ti baʼyuk tstsuts li arka sventa la snop li kʼusi ora chakʼ talel li Nojelal ta voʼe. Muʼyuk laj yal mi jaʼ to chtal mi tsuts yuʼunik li arkae, moʼoj, li slivroal Genesise chal ti epal jabiletik xaʼox yalojbe Noé ti akʼo smeltsan li arkae, xchiʼuk yakʼojbe xaʼox skʼakʼalil kʼusi ora chlik li Nojelal ta voʼe. ¿Kʼuxi jnaʼtik taje?

5. ¿Kʼusi jamal laj yal Dios li ta Génesis 6:3, xchiʼuk kʼusi ora laj yal?

⁵ Li ta Vivliae chal ti Jeovae laj xa onoʼox yal ta vinajel li kʼusi ta jtatik ta Génesis 6:3: «Mu xcacʼ ti toj jal chcuxiic li cristianoetique yuʼun oy sbecʼtalic, jech jaʼ xa noʼox ta xcacʼ cuxiicuc vacvinic (120) jabil». Taje, ¿mi jaʼ van te laj yalbe skʼoplal ti jayib jabil chkuxi li krixchanoetike? Moʼoj. Li kʼusi laj yale, jaʼ li kʼusi ora tslajes li kʼusitik chopol liʼ ta Balumile. * Li Nojelal ta voʼe kʼot ta pasel ta 2370 kʼalal maʼuk toʼox jkʼakʼaliltike, jaʼ yuʼun stakʼ chapel ti kʼusi laj yal Diose jaʼ ta sjabilal 2490. Li vaʼ kʼakʼal taje 480 jabil xaʼox yichʼoj li Noee (Gén. 7:6). Kʼalal mas xaʼox ta jtob jabil yechʼel li kʼusi laj yal Jeovae, li ta sjabilal 2470, li Noee vokʼ li oxvoʼ xnichʼnabtake (Gén. 5:32). Kʼalal skʼan toʼox sien jabil xtal li Nojelal ta voʼe, li Jeovae muʼyuk toʼox bu yalojbe Noé ti tsta jun abtelal ti tsots skʼoplal sventa kuxul xkom-o stsʼunbal li krixchanoetike. ¿Kʼu to sjalil la smala sventa laj yalbe?

6. ¿Kʼusi ora laj yichʼ albel Noé ti akʼo smeltsan li arkae?

⁶ Jech kʼuchaʼal chkiltike, li Noee mu toʼox snaʼ li kʼusi tspas Diose, jaʼ to ta mas tsʼakal la snaʼ. ¿Kʼu yuʼun jech chkaltik taje? Li Vivliae chal ti kʼalal albat ti akʼo smeltsan arka li Noee, li xnichʼnabtake mukʼtik xaʼox xchiʼuk oy xaʼox yajnilik. Li Jeovae xi laj yalbe li Noee: «Li voʼote ta xcom ta atojol li cʼusi chapanbil cuʼun ta sventa coltaele. Chaʼochic ta barco achiʼuc avajnil, anichʼnab, xchiʼuc avalibtac» (Gén. 6:9-18). Jaʼ yuʼun, kʼalal albat ti akʼo smeltsan arka li Noee, xuʼ van skʼan xaʼox 40 o 50 jabil skʼan xtal li Nojelal ta voʼe.

7. 1) ¿Kʼuxi laj yakʼ ta ilel xchʼunel yoʼonton Noé xchiʼuk li yutsʼ yalale? 2) ¿Kʼusi ora albat yuʼun Dios li mero skʼakʼalil Nojelal ta voʼe?

⁷ Kʼalal yakal tsmeltsanik arka li Noé xchiʼuk li yutsʼ yalale xuʼ van la sjakʼbe sbaik kʼuxi chkʼot ta pasel li kʼusi tskʼan yoʼonton Diose xchiʼuk li kʼusi ora chtal li Nojelal ta voʼe. Akʼo mi mu snaʼik lek kʼusi ora chkʼot ta pasel taje, muʼyuk chibajik-o ta stsutsesel li arkae. Xi chal li Vivliae: «Li Noee la spas scotol jech cʼu chaʼal iʼalbat yuʼun li Diose» (Gén. 6:22). Vaʼun, li Jeovae laj yalbe Noé ti skʼan xa vukub kʼakʼal xtal li Nojelal ta voʼe. Li kʼu sjalil taje, li Noé xchiʼuk yutsʼ yalale kʼajomal laj yakʼ ora yuʼunik sventa stikʼik ochel ta arka li chonbolometike. Jaʼ yuʼun chapal xaʼox kʼalal «ta svuclajunebal (17) cʼacʼal yochel li xchibal ue, vaquib xaʼox ciento (600) jabil yichʼoj li Noee», jaʼo kʼalal «lic tʼomanuc loqʼuel tal voʼetic ta banamil xchiʼuc ta yut nabetic» (Gén. 7:1-5, 11).

8. Li kʼusi kʼot ta pasel ta Nojelal ta voʼe, ¿kʼuxi xuʼ jpat-o mas koʼontontik ta stojolal Jeova ti snaʼojbe lek yorail kʼusi ora tskolta li yajtuneltake?

⁸ Li loʼil sventa Nojelal ta voʼe maʼuk noʼox chakʼ xchʼunel koʼontontik li kʼusitik spas yuʼun Jeovae, yuʼun chakʼ kiltik xtok ti snaʼojbe lek skʼakʼalil li kʼusi chkʼot ta pasele.  Jech xtok snaʼoj kʼuxi tspojutik. Jujun kʼakʼal mas xa jutuk skʼan li slajebal kʼakʼale, yuʼun skotol li kʼusi xchapoje chkʼot onoʼox ta pasel ti «cʼusi ora chcʼot [yorail]» yaloje (Mat. 24:36; kʼelo Habacuc 2:3).

LAJ YICHʼIK KOLTAEL LI TA TSAJAL NABE

9, 10. ¿Kʼuxi la stunes steklumal Jeova sventa xpʼajik ta spetsʼ li soltaroetik ta Egiptoe?

⁹ Li Jeovae jaʼ oy ta skʼob stuk sventa chakʼ kʼotuk ta pasel li kʼusitik tskʼane. Li ta xchibal skʼelobile chakʼ kiltik yan srasonal ti kʼu yuʼun xuʼ jpat koʼontontik ti tskolta li steklumale: tstunes sjuʼel sventa chkʼot ta pasel li kʼusi tskʼane. Li Jeovae ta melel xuʼ yuʼun tskolta li yajtuneltake, maʼuk noʼox taje, bakʼintike tstunes yajtuneltak sventa xpʼaj ta spetsʼ li yajkontratake. Jaʼ jech kʼot ta pasel ta stojolal j-israeletik kʼalal laj yichʼik koltael lokʼel ta mosoil ta Egiptoe.

¹⁰ Te van oxib miyon j-israeletik lokʼik li ta Egiptoe. Li Moisese albat yuʼun Jeova bu xuʼ xikʼ batel li j-israeletik sventa akʼo snop Faraón ti chʼayemike xchiʼuk ti mu xa snaʼ kʼusi tspasik yileluke (kʼelo Éxodo 14:1-4). Li Faraón xchiʼuk yajsoltarotake pʼajik li ta petsʼ taje, yuʼun bat snuts li buchʼutik jaʼik toʼox smosotake, yileluke muʼyuk xa bu xbatik li j-israeletik ta skoj ti te xa oyik ta stiʼil Tsajal Nabe (Éxo. 14:5-10). Pe li kʼusi melele, jaʼ ti muʼyuk kʼusi xiʼel tsnuptanike. ¿Kʼu yuʼun? Yuʼun jaʼ chpojatik yuʼun li Diose.

11, 12. 1) ¿Kʼuxi la skolta steklumal li Jeovae? 2) ¿Kʼusi kʼot ta pasel, xchiʼuk kʼusi xuʼ jchantik ta stojolal Jeova li ta loʼil taje?

¹¹ «Li toc» ti jaʼ baʼyuk be tal yuʼun j-israeletike jaʼ sventa ch-albatik ti bu xuʼ xbatike. Koliyal li tok taje jaʼ laj yakʼ sba ta patil sventa mu stsakatik ta kʼop yuʼun li yajsoltarotak Faraone. Jech oxal ta ikʼ osil komik li Faraón xchiʼuk li yajsoltarotake, pe li j-israeletike sakjaman kom ta stojolalik li ta ikʼ osil taje (kʼelo Éxodo 14:19, 20). Vaʼun li Jeovae la xchʼak ta oʼlol li Tsajal Nabe, laj yakʼ taluk tsots ikʼ ti xjumet ti lik talel ta slokʼeb Kʼakʼal sventa «la svocʼ sba ta oʼlol li nabe. Taquin icom li banamil ta yut nabe». Xuʼ van jalij jutuk sventa xkʼot ta pasel taje, yuʼun li loʼile chal ti «sbejel acʼubal ven tsots  li iqʼue», vaʼun jaʼ to xanavik «ochel ta taqui banamil ta yut nab» li j-israeletike. Li j-israeletike kʼun chanavik batel, pe li yajsoltarotak Faraón xchiʼuk li skaretaike solel anil batik. Pe akʼo mi jech, mu onoʼox xtaatik ta be yuʼun li soltaroetike, yuʼun jaʼ Jeova stuk li buchʼu chkoltaatike. «Li soldadoetic yuʼun egiptoe, jech te isoquic ta be. Xchiʼuc laj yacʼ noxtoc ti mu xa xjoyibaj lec yacan li scaretaique, jech solel mu xa xanov lec yuʼunic.» (Éxo. 14:21-25.)

¹² Kʼalal te xaʼox oyik ta jot stiʼ nab li j-israeletike, xi albat yuʼun Jeova li Moisese: «Toyo acʼob ta sba li nabe; acʼo snuʼp sba yan velta, yuʼun acʼo muquicuc ta voʼ li egiptoetique, xchiʼuc li scaretaic, xchiʼuc li scaʼique». Akʼo mi tskʼan ox chjatavik lokʼel kʼalal te xaʼox oyik ta oʼlol nabe, «li Mucʼul Diose te laj yacʼ muquicuc o ta voʼ». Mu xa kʼuxi laj yutik sventa xjatavik lokʼel. «Me junuc muʼyuc cuxul icom yajsoldado li faraone.» (Éxo. 14:26-28.) Jaʼ te vinaj ti oy ep sjuʼel Dios sventa xuʼ tspoj li steklumal kʼalal oyik ta vokolile.

KOLIK KʼALAL LAJ YICHʼ LAJESEL JERUSALENE

13. ¿Kʼusi mantaletik laj yalbe yajtsʼaklomtak li Jesuse, xchiʼuk kʼusi van la sjakʼbe sbaik?

¹³ Li Jeovae snaʼoj lek kʼuxitik chkʼot ta pasel li kʼusitik tskʼane. Taje tsots skʼoplal, jech kʼuchaʼal chakʼbutik iluk li yoxibal skʼelobile: jaʼo kʼalal la stsakik ta kʼop Jerusalén ta baʼyel sigloe. Li Jeovae laj yal ta stojolal Jesús li kʼusitik xuʼ spasik li yajtsʼaklomtak Cristo ta Jerusalén xchiʼuk ta Judea sventa xjatavik lokʼel kʼalal mi laj yichʼ lajesel li jteklume, taje kʼot ta pasel ta sjabilal 70. Xi laj yal li Jesuse: «Cʼalal chavilic ti chichʼ soquesel, ti chichʼ bolibtasel o chʼulna ta scoj ti te chichʼ vaʼanel li cʼusi toj chopol chil Dios jech chac cʼu chaʼal laj onoʼox yal li jʼalcʼop Daniel ta voʼonee, [...] voʼoxuc ti liʼ nacaloxuc ta Judeae, jatovanic batel ta anil ta vitsetic» (Mat. 24:15, 16). Jaʼ yuʼun chaʼa, ¿kʼuxi van chakʼik venta yajtsʼaklomtak Cristo ti yakal chkʼot ta pasel li albilkʼop taje?

14. ¿Kʼuxi kʼunkʼun jam batel smelolal li kʼusitik laj yal Jesuse?

¹⁴ Li kʼusi laj yal Jesuse, jaʼ to te laj yichʼ aʼibel smelolal kʼalal yakal xaʼox chkʼot ta pasele. Li ta sjabilal 66, li jromail soltaroetik ti jaʼ jbabe yuʼunik li Cestio Galoe bat skontrainik Jerusalén ta skoj li kʼopetik yuʼun judioetike. Li jtoybaetik ti ojtikinbilik kʼuchaʼal zeloteetike laj snakʼ sbaik ta yut chʼulna, vaʼun li jromaetike lik sjinesik li smuroaltak chʼulnae. Li yajtsʼaklomtak Cristo ti lek vikʼil satike, la snaʼik kʼusi skʼan xal li kʼusitik kʼot ta pasele: «li cʼusi toj chopol[e]», jaʼ xkaltik li soltaroetik xchiʼuk li lokʼoletik yuʼunike, yuʼun te kʼotik ta smuroal «chʼulna». Taje jaʼ xa me yorail ti xjatavik lokʼel «ta anil ta vitsetic» li yajtsʼaklomtak Cristoe. Pe, ¿kʼuxi van xuʼ xjatavik lokʼel ti joyobtabil li slumalike? Jutuk xaʼox skʼan xkʼot ta pasel li kʼusi muʼyuk jech smalaojike.

15, 16. 1) ¿Kʼusi mantaletik lek laj yakʼ li Jesuse, xchiʼuk kʼu yuʼun tsots skʼoplal ti akʼo xchʼunik li yajtsʼaklomtake? 2) ¿Kʼusi skʼan jpastik sventa jta li jkoleltike?

 ¹⁵ Ta anil noʼox, li Cestio Galo xchiʼuk yajsoltarotake sutik batel ta slumalik, vaʼun li zeloteetike bat snutsik. Jaʼ yuʼun, xuʼ xaʼox xjatavik lokʼel li yajtsʼaklomtak Cristoe. Li Jesuse lek onoʼox jamal yalojanbe ti akʼo yiktaik komel li kʼusitik x-ayan yuʼunike xchiʼuk ti ta anil noʼox xlokʼik batele (kʼelo Mateo 24:17, 18). ¿Mi tsots van skʼoplal ti xlokʼik ta anile? Mu xa jaluk skʼan staik li stakʼobil taje. Jun-chib kʼakʼal ta mas tsʼakale, li zeloteetike sutik talel, vaʼun lik sujik li jnaklejetik ta Jerusalén xchiʼuk ta Judea ti akʼo skoʼoltas sjolike. Ta skoj ti tspasik kʼop li jaychop judioetik ti tskontrain sbaik sventa xkuch yuʼun li paskʼope, jaʼ yuʼun li jteklume solel ta anil noʼox sok batel, vaʼun sventa xjatavik lokʼel li jnaklejetike mas to tsatsaj batel, pe kʼalal kʼotik li jromaetik ta sjabilal 70 mu xa stakʼ xlokʼik batel (Luc. 19:43). Li buchʼutik muʼyuk xlokʼik ta anile te xa komik-o. Pe li yajtsʼaklomtak Cristo ti la xchʼunik li kʼusi albatik yuʼun Jesús sventa xjatavik batel ta vitsetike, muʼyuk xchamik. Jaʼ yuʼun, laj yil stukik ti snaʼ kʼuxi tskolta yajtuneltak li Jeovae. ¿Kʼusi xuʼ jchantik li ta loʼil taje?

¹⁶ Kʼalal jaʼo xa yorail li tsots vokole, kʼalal yakal xa chkʼot ta pasel li kʼusitik albile, li yajtsʼaklomutik Cristoe skʼan me jchʼuntik li mantaletik yakʼojbutik ta Vivlia li Diose xchiʼuk li ta s-organisasione. Jtsaktik ta venta li mantal laj yal Jesús liʼe: «Jatovanic batel ta anil ta vitsetic». Akʼo mi skʼan jchʼuntik li mantal taje, mu to jnaʼtik kʼuxi ti chijatavutik lokʼele. * Pe jnaʼojtik lek ti chalbutik to lek Jeova kʼusitik skʼan jpastik kʼalal mi kʼot yoraile. Yuʼun sventa jta li jkoleltike, skʼan jchʼuntik li kʼusi chalbutike, skʼan xi jakʼbe jbatike: «¿Kʼu yelan chkaʼi li mantaletik chakʼbe yajtuneltak Jeova avie? ¿Mi ta jchʼun ta anil o ta to jnopilan?» (Sant. 3:17).

TSPAT KOʼONTONTIK DIOS TA SVENTA LI KʼUSITIK CHTAL TA JELAVELE

17. ¿Kʼusi chakʼ ta naʼel li albilkʼop ta Habacuc ta sventa ti chtal yichʼ tsakel ta kʼop li steklumal Diose?

¹⁷ Kalbetik mas skʼoplal kʼalal mi tal spas kʼop li Gog ti laj kalbetik skʼoplal ta slikebale. Ta jun albilkʼop ti te tsakal skʼoplal taje, xi laj yal li Habacuque: «Cʼalal laj caʼye lixiʼ, xnechnun xa ta xiʼel li yanal quee. Solel iʼalub li cacane, mu xa xuʼ xivaʼi; iʼalub scotol noxtoc li jbecʼtale. Jech te xa noʼox ta jmala caʼay cʼusi ora ch-acʼbat svocolic yuʼun Dios li jʼutsʼintavanejetic cuʼuncutique» (Hab. 3:16). Jech kʼuchaʼal chkiltike, jaʼ noʼox ti laj yaʼi kʼusitik chkʼot ta pasel ta sventa ti chtal tsakatuk ta kʼop li steklumal Diose, li Habacuque xiʼ, lik tʼeltʼunuk li yee xchiʼuk alub li sbekʼtale. Ti kʼuyelan laj yaʼi sba li Habacuque, jaʼ te chkaʼibetik smelolal ti toj echʼ noʼox tsots chkil jvokoltik kʼalal mi tal stsakutik ta kʼop li soltarotak Goge. Pe jech kʼuchaʼal li j-alkʼope, skʼan jmalatik xchiʼuk jpat koʼontontik ti ta onoʼox skolta steklumal Jeova kʼalal mi tal li skʼakʼalile (Hab. 3:18, 19).

18. 1) ¿Kʼu yuʼun muʼyuk srasonal chijxiʼutik mi tal li tsakel ta kʼope? 2) ¿Kʼusi ta jchantik li ta yan xchanobile?

¹⁸ Li oxib skʼelobil laj xa jchantike, jaʼ chakʼ ta ilel ta melel ti snaʼoj kʼuxi tskolta steklumal li Jeovae. Ta onoʼox me xkʼot ta pasel li kʼusi tskʼan tspase. Jech xtok, ta onoʼox xkuch yuʼun. Jaʼ yuʼun chaʼa, mi ta jkʼantik chkiltik ti chkuch yuʼun li Jeovae, skʼan me tukʼ chkakʼ jbatik kʼalal to ta slajebal. Pe, ¿kʼuxi tskoltautik Jeova sventa tukʼuk oyutik li avie? Taje ta jchanbetik skʼoplal ta yan xchanobil.

[Tsʼibetik ta yok vun]

[Sjakʼobiltak sventa xchanobil]

[Lokʼol ta pajina 24]

¿Mi solel van xiʼik li j-israeletik ta stojolal yajsoltarotak li Faraone?