Jpat koʼontontik ta stojolal Jeova, ti jaʼ oy ta sba li orae xchiʼuk li jujun jabile
Jpat koʼontontik ta stojolal Jeova, ti jaʼ oy ta sba li orae xchiʼuk li jujun jabile
«Jaʼ tsjel ti cʼu xʼelan ora chtale, xchiʼuc jaʼ tsjel cʼu xʼelan chtal li jujun jabile. Jaʼ tsloqʼues, xchiʼuc jaʼ tsticʼ ta yabtel li ajvaliletique.» (DAN. 2:21)
¿KʼUSI CHATAKʼ?
Ta skoj ti jaʼ snaʼojbe lek yorail li Jeovae, ¿kʼuxi chakʼ ta ilel li kʼusitik pasbil xchiʼuk li albilkʼopetik ti kʼotemik xa ta pasele?
¿Kʼusi chakʼ jnoptik ti jaʼ Jeova li buchʼu jaʼ oy ta sba li orae xchiʼuk li jujun jabile?
¿Kʼu yuʼun maʼuk smalaoj ti kʼusitik chkʼotanuk ta pasel ta spʼejel Balumile o li kʼusi tsnop tspas krixchanoetik sventa tsjel li kʼusi tskʼan tspas li Jeovae?
1, 2. ¿Kʼuxi jnaʼtik ti xaʼibe lek smelolal Jeova li oraetike?
KʼALAL jal toʼox skʼan spas li krixchanoetike, li Jeovae oy kʼusi laj yakʼ sventa jchaptik li oraetike. Li ta xchanibal kʼakʼal kʼalal jaʼo tsmeltsan li kʼusitike, xi laj yale: «Acʼo oyuc cʼusitic chacʼ xojobal ta vinajel, yuʼun jaʼ ta sacubtasic li banamile, jech ta svocʼ sba li cʼacʼaltic xchiʼuc acʼubaltique. Xchiʼuc jech chichʼ naʼel bu chlic jujun cʼacʼal, jujun jabil, xchiʼuc yorail cʼusitic tsots scʼoplal» (Gén. 1:14, 19, 26). Taje jaʼ li kʼusi tskʼan yoʼonton Diose, jaʼ yuʼun jech kʼot ta pasel.
2 Pe akʼo mi jech, li sientifikoetike jech-o yakal tsabeik skʼoplal ta sventa ti kʼusi jaʼ li yoraile. Jun ensiklopedia xi chale: «Li yoraile jaʼ li kʼusi mas toj tsots ta aʼibel smelolale. Muʼyuk buchʼu snaʼ kʼusi jaʼ taje». Pe li Jeovae jaʼ «la spas [vinajel]» xchiʼuk «jaʼ li bochʼo la spas banamile», jaʼ yuʼun snaʼoj lek. Yuʼun jaʼ noʼox stuk xuʼ chal «li cʼusi chcʼot ta pasel ta tsʼacale; epal jabil toʼox scʼan xcʼot ta pasel ti cʼalal [chale]» (Isa. 45:18; 46:10). Li avie, ta jkʼelbetik batel skʼoplal jlomuk li kʼusitik spasojan Diose xchiʼuk li epal albilkʼopetik ti kʼotemik xa ta pasele. Yuʼun jaʼ tstsatsubtas xchʼunel koʼontontik ta Vivlia xchiʼuk ta stojolal Jeova, ti jaʼ snaʼojbe lek yoraile.
LI KʼUSITIK PASBILE TSTSATSUBTAS XCHʼUNEL KOʼONTONTIK TA JEOVA
3. ¿Kʼusi skʼelobil chakʼ kiltik li kʼusitik spasojan Jeova ti toj lek tukʼ xchiʼuk ti xchapet noʼox ch-abteje?
3 Li kʼusitik spasoj Jeova akʼo mi bikʼit o mi mukʼtik, toj lek tukʼ xchiʼuk xchapet noʼox ch-abtej. Jech kʼuchaʼal liʼe, li planetaetik xchiʼuk li kʼanaletike snaʼojik lek kʼuxi chbatik xchiʼuk bu yavilik. Li yavilik ta vinajele jaʼ chkoltaatik-o li krixchanoetik sventa snaʼik kʼuxi chbatik xchiʼuk sventa snaʼik kʼusi ora chlik li yorail kʼepelaltik o yorail voʼtike. Ta melel, lek xvinaj ti jaʼ la spas skotol li kʼusitik labalik sba kʼuyelan chanav li planetaetike «yuʼun toj echʼem stsatsal, toj echʼem svuʼel», jaʼ yuʼun sta-o ti jmuyubtatike (kʼelo Isaías 40:26).
4. ¿Kʼusi skʼelobiltak chakʼ ta ilel ti oy lek spʼijil Jeova xchiʼuk ti lek tukʼ chkʼotanuk ta pasel ta sventa li kʼusitik spasojane?
4 Skotol li kʼusitik kuxajtike toj labalik sba xchiʼuk oy lek yorailtak akʼbil. Jech kʼuchaʼal liʼe, li epal chonbolometik, li teʼetik xchiʼuk yantike, oy lek yorail ti kʼuyelan chchʼiike xchiʼuk ti kʼu sjalil chkuxiike. Epal mutetik snaʼojbeik lek yorail kʼusi ora tsut batel ti bu likemik talele (Jer. 8:7). Li krixchanoutik eke oy lek yorailtak li kʼusitik ta jpas ta jkuxlejaltike. Jech kʼuchaʼal liʼe, li jbekʼtaltike snaʼoj lek mi ikʼ xa osil o mi sak xa osil. Melel onoʼox kʼalal chijbat ta namal lum ti bu jelel yoraike, li jbekʼtaltike vokol chnop chaʼi li bu chijkʼototike. Ta melel, li kʼusitik spasojan Jeovae ep kʼusitik lek tukʼ chkʼotanuk ta pasel xchiʼuk jaʼ chakʼ ta ilel ti «jaʼ tsjel ti cʼu xʼelan ora chtale, xchiʼuc jaʼ tsjel cʼu xʼelan chtal li jujun jabile» ti jaʼ te chakʼ ta ilel ti oy spʼijile xchiʼuk ti mu albajuk yipe (kʼelo Salmo 104:24). Ta melel, li Jeovae snaʼojbe lek yorail xchiʼuk chakʼ kʼotuk ta pasel li kʼusi tskʼan yoʼontone.
TSTSATSUBTAS XCHʼUNEL KOʼONTONTIK TI CHKʼOTANUK TA PASEL LI ALBILKʼOPETIKE
5. 1) ¿Kʼuxi xuʼ jnaʼtik li kʼusi chtal ta stojolal krixchanoetik ta jelavele? 2) ¿Kʼu yuʼun snaʼoj Jeova kʼusi chtal ta jelavel xchiʼuk ti bakʼine?
5 Li kʼusitik pasbile ep kʼusitik xuʼ jchantik ta sventa li stalelaltak Dios «li cʼusi muʼyuc toʼox yacʼoj ta ilele». Pe muʼyuk chakʼbe stakʼobiltak kʼusitik ti toj tsotsik skʼoplal jech kʼuchaʼal liʼe, ¿kʼusi chkʼot ta stojolal li krixchanoetik ta jelavele? (Rom. 1:20.) Sventa jtakʼtik taje, skʼan jsaʼtik ta Vivlia yuʼun jaʼ te yakʼoj ta naʼel Dios. Te ta jtatik epal albilkʼopetik ti kʼotemik ta pasel ti kʼusi ora albil chkʼot ta pasele. ¿Kʼu yuʼun xuʼ xal Jeova li kʼusitik chkʼot ta pasel ta jelavele? Baʼyele, yuʼun oy spʼijil sventa snaʼ lek kʼusi chkʼot ta pasel li ta mas tsʼakale. Jech xtok, xuʼ yuʼun chakʼ kʼotuk ta pasel sventa jechuk xkʼot ta pasel kʼuchaʼal tskʼan yoʼontone xchiʼuk ti kʼuyelan xchapanojbe yoraile.
6. ¿Kʼuxi xuʼ jnaʼtik ti oy ta yoʼonton Jeova ti akʼo xkaʼibetik lek smelolal li albilkʼopetike?
6 Li Jeovae oy ta yoʼonton ti akʼo xaʼibeik smelolal li albilkʼopetik ta Vivlia xchiʼuk ti akʼo stabeik sbalil li yajtuneltake. Jaʼ yuʼun, akʼo mi xaʼibe lek smelolal li stuke, kʼalal oy kʼusi chal ti chkʼot ta pasel ti oy lek yorail yakʼojbee, ta me xakʼbutik ta aʼyel sventa xkaʼibetik smelolal (kʼelo Salmo 90:4). Jech kʼuchaʼal liʼe, li ta slivroal Apocalipsise chalbe skʼoplal «chanib jʼalmantal [...] [ti] jaʼ noʼox tsmalabeic yorail, scʼacʼalil, yual, sjabilal», taje lek xkaʼibetik smelolal kʼusi skʼan xal (Apo. 9:14, 15). Kalbetik skʼoplal jayibuk albilkʼopetik ti kʼotanuk ta pasel li kʼusi ora yaloj Jeovae. Taje jaʼ chakʼ xchʼunel koʼontontik ta stojolal Dios ti «jaʼ tsjel ti cʼu xʼelan ora chtale, xchiʼuc jaʼ tsjel cʼu xʼelan chtal li jujun jabile» xchiʼuk jaʼ chakʼ xchʼunel koʼontontik li ta Skʼope.
7. Li albilkʼop yaloj Jeremías ta sventa Jerusalén xchiʼuk Judae, ¿kʼuxi chakʼ ta ilel ti lek xojtikinbe yorail sventa chkʼot ta pasel li kʼusi tskʼan yoʼonton Jeovae?
7 Kalbetik skʼoplal li ta siglo 7 kʼalal maʼuk toʼox jkʼakʼaliltike. «Cʼalal xchanibal jabil xaʼox yochel ta ajvalilal ta Judá li Joaci xnichʼon Josiase», li Jeovae laj yalbe Jeremías «cʼusi chcʼot ta pasel ta stojol li judaetique» (Jer. 25:1). Li Jeovae laj yal xa onoʼox ti ta xichʼ lajesel li Jerusalene xchiʼuk ti ta xichʼik ikʼel batel ta Babilonia li judioetike, ti «lajuneb xchanvinic jabil (70) ta xtunic yuʼun li ajvalil ta Babiloniae». Ta sjabilal 607 kʼalal maʼuk toʼox jkʼakʼaliltike, li soltaroetik ta Babiloniae la slajesik li Jerusalene, vaʼun chukbil batik ta Babilonia li judioetike. ¿Kʼusi van chkʼot ta pasel kʼalal mi tsuts li 70 jabile? Li Jeremiase xi onoʼox yaloje: «Jech yaloj li Mucʼul Diose: “Cʼalal me itsʼaqui li lajuneb xchanvinic (70) jabil te ta Babiloniae, ta xlic jcoltaoxuc, ta xcacʼ cʼotuc ta pasel li jcʼop ti laj cal ti chaquicʼoxuc sutel tal liʼ ta banamile”» (Jer. 25:11, 12; 29:10). Li albilkʼop taje kʼot onoʼox ta pasel jech kʼuchaʼal albil onoʼoxe, li ta sjabilal 537 kʼalal maʼuk toʼox jkʼakʼaliltike, li jmedoetik xchiʼuk li jpersiaetike la skoltaik lokʼel ta Babilonia li judioetike.
8, 9. Li albilkʼop laj yal Daniele, ¿kʼuxi chakʼ kiltik ti jaʼ oy ta sba stuk yorail xchiʼuk jujun jabil li Diose?
8 Kalbetik skʼoplal yan albilkʼop ti kʼot ta stojolalik li steklumal Dios ta voʼnee. Kʼalal chib toʼox jabil skʼan xlokʼik ta Babilonia li judioetike. Li Diose laj yal ta stojolal j-alkʼop Daniel ti jaʼ to chvul ta lokʼel Mesías kʼalal mi echʼem xaʼox 483 jabil ti laj yichʼ alel mantal ti chichʼ chaʼmeltsanel li Jerusalene. Li ajvalil ta Medopersiae jaʼo laj yal mantal ta sjabilal 455 kʼalal maʼuk toʼox jkʼakʼaliltik ti chichʼ chaʼmeltsanel li Jerusalene. Jech onoʼox kʼot ta pasel, li 483 jabile tsuts ta sjabilal 29 ta jkʼakʼaliltik. Taje jaʼo laj yichʼ tʼujel ta chʼul espiritu li Jesús ta Nazaret xchiʼuk kʼot ta Mesías (Neh. 2:1, 5-8; Dan. 9:24, 25; Luc. 3:1, 2, 21, 22). *
9 Kalbetik batel skʼoplal li albilkʼopetik ta sventa li Ajvalilal yuʼun Diose. Li ta Vivliae yaloj xa onoʼox ti chlik ajvalilajuk ta 1914 ta vinajel li Mesiase. Jech kʼuchaʼal liʼe, li «senyail» ti kʼalal liʼ xaʼox oy li Jesuse laj yichʼ alel kʼusitik xibal sba chkʼot ta stojolal Balumil kʼalal mi laj xichʼ jipel talel li Satanase (Mat. 24:3-14; Apo. 12:9, 12). Yan albilkʼopetik ta Vivliae tskoltautik ta snaʼel lek yorail ti kʼusi ora «itsʼaqui scʼacʼalil yuʼuni[k]» li jyanlumetike, taje kʼot ta pasel ta 1914 kʼalal lik ajvalilajuk li Ajvalilal yuʼun Diose (Luc. 21:24; Dan. 4:10-17). *
10. ¿Kʼusi chkʼotanuk ta pasel ta jelavel ti albil xa lek kʼusi ora chkʼot ta pasele?
10 ¿Kʼusi chkʼot ta pasel li ta jelavele? Baʼyel, li Jesuse yaloj xa onoʼox ti chtal li jun «tsots vocole». Vaʼun, chlik ajvalilajuk ta Jmil Jabil li Cristoe. Melel onoʼox ti jech chkʼotanuk ta pasel ti kʼusi ora albil skʼoplale. Jvules ta joltik ti kʼalal liʼ toʼox ta Balumil li Jesuse, li Jeovae yalojbe xa onoʼox «cʼusi ora chcʼot [yorail]» ta melel (Mat. 24:21, 36; Apo. 20:6).
«TUNESIC LEC LI CʼACʼAL CHJELOV AVUʼUNIQUE»
11. ¿Kʼu yelan skʼan xkaʼi jbatik ti jnaʼojtik xa ti kuxulutik ta slajebal kʼakʼale?
11 ¿Kʼu yelan skʼan xkaʼitik ti yakal xa ch-ajvalilaj li ajvalilal yuʼun Diose xchiʼuk ti kuxulutik xa ta «slajebal cʼacʼale»? (Dan. 12:4.) Epal krixchanoetik chakʼik venta ti mas xa tsok batel li balumil liʼe, pe mu xakʼik venta ti jech xa onoʼox yalojbe skʼoplal Vivlia ta sventa li slajebal kʼakʼale. Jlome, xchʼunojik ti ta onoʼox xkʼot yorail chlaj li kʼusitik oy ta balumile, yantik xtoke tsnopik ti krixchanoetike xuʼ chichʼik talel «jun coʼntontic, muʼyuc cʼusi xiʼbal sba» ta Balumil (1 Tes. 5:3). Pe, ¿li voʼotik ne? Mi jnaʼojtik ti kuxulutik xa ta slajebal kʼakʼal ti jaʼo chichʼ akʼbel slajeb li slumal Satanase, ¿mi mu chkakʼtikuk persa stunesel lek jkʼakʼaltik ti jaʼ oy ta sba stuk yorail xchiʼuk jujun jabil li Dios sventa xijtun ta stojolale, xchiʼuk ti jkoltatik ta yojtikinel Dios li yantike? (2 Tim. 3:1.) Ta jujuntalutik skʼan jkʼeltik mi lek ta jtunestik li kʼakʼal chjelov kuʼuntike (kʼelo Efesios 5:15-17).
12. ¿Kʼusi xuʼ jchantik li ta pʼijubtasel laj yal Jesús ta sventa li skʼakʼalil Noee?
12 Ta skoj ti solel noj ta chʼayob oʼontonal li balumil liʼe, jaʼ yuʼun tsots chkaʼitik ti «[jtunestik] lec li cʼacʼal chjelov [kuʼuntike]». Jech xa onoʼox pʼijubtasvan li Jesuse: «Jech chac cʼu chaʼal icʼot ta pasel ta yorail li Noee, jaʼ noʼox jech ta xcʼot ta pasel cʼalal chital [o «liʼ xaʼox oyun», NM], vuʼun ti Xnichʼon cristiano licʼote». ¿Kʼu toʼox yelan li ta skʼakʼalil Noee? Albil xa onoʼox skʼoplal ti ta xichʼik lajesbel skʼoplal li chopol krixchanoetik ta jun nojelal ta voʼe. Li Noee «laj yal ta jamal cʼusi tucʼ ta pasel» xchiʼuk laj yalbe mantal li xchiʼiltake (Mat. 24:37; 2 Ped. 2:5). Pe jaʼuk li stukike «jaʼ noʼox batem ta yoʼntonic saʼel sveʼelic, ta xnupinic, xchiʼuc ta xacʼ ta malijel stsebic [...]. Muc xchʼunic ti chtal li pulel ta voʼe. Jaʼ to la xchʼunic ti cʼalal itale, pero ilaj o scotolic». Li Jesuse xi tojobtasvane: «Jaʼ yuʼun li voʼoxuque, tscʼan ti lec chapaloxuque. Yuʼun ti cʼalal muʼyuc anopoj chamalaicune, jaʼo chital, vuʼun ti Xnichʼon cristiano licʼote» (Mat. 24:38, 39, 44). Li voʼotike skʼan jaʼ jchanbetik stalelal li Noee, maʼuk li krixchanoetik ta skʼakʼalile. ¿Kʼusi tskoltautik sventa lek chapalutik?
13, 14. Ti yakalutik ta smalael chtal li Xnichʼon krixchanoe, ¿kʼusi skʼan jvules ta joltik ta sventa Jeova yoʼ tukʼuk xijtun ta stojolale?
13 Li skʼakʼalil Xnichʼon krixchanoe, jaʼo chtal kʼalal muʼyuk jmalaojtike, jaʼ yuʼun skʼan teuk ta joltik ti Jeovae jaʼ oy ta sba li orae. Li kʼusi ora chtale, maʼuk smalaoj ti kʼusitik chkʼotanuk ta pasel ta spʼejel Balumile o li kʼusi tsnop tspas li krixchanoetike. Sventa xkʼot ta pasel li kʼusi tskʼan yoʼontone, li Jeovae xuʼ chakʼ kʼotuk ta pasel xchiʼuk ti kʼusi ora tskʼane (kʼelo Daniel 2:21). Proverbios 21:1 xi onoʼox chale: «Li Mucʼul Diose jaʼ tspasbe ta mantal yoʼnton li ajvalile jech chac cʼu chaʼal tsbeiltas batel ta sbe li ucʼumetique; ti cʼu xʼelan tscʼan yoʼnton stuc li Mucʼul Diose jaʼ jech tspas».
14 Ta melel, li Jeovae xuʼ chakʼ kʼotuk ta pasel li kʼusitik sventa xkʼot ta pasel li kʼusi tskʼan yoʼonton ti kʼusi ora yalojbe onoʼox skʼoplale. Ep li kʼusitik kʼotemik ta pasel ta spʼejel Balumile, jaʼ yakʼoj ti akʼo xkʼot ta pasel li kʼusitik albil xa onoʼox skʼoplal ta Vivliae, pe jaʼ mas te tsakal skʼoplal ta sventa li cholmantal ta spʼejel Balumile. Jnopbetik skʼoplal kʼalal la xchʼak sbaik li Unión Soviética xchiʼuk li kʼusi kʼot ta pasel yuʼune. Muʼyuk toʼox snopojik ti ep kʼusitik chjel ta sventa li politikae, ta skoj li kʼusitik kʼot ta pasele, xuʼ xa xichʼ cholel mantal ti butik toʼox mu stakʼe. Jaʼ yuʼun, skʼan jchʼakbetik skʼakʼalil sventa tukʼ xijtun ta stojolal Dios ti jaʼ oy ta sba li orae xchiʼuk li jujun jabile.
JPAT KOʼONTONTIK TI TSPAS KʼUSI ORA YALOJ LI JEOVAE
15. ¿Kʼuxi chkakʼtik ta ilel ti oy xchʼunel koʼontontik kʼalal oy kʼusitik chjel ta s-organisasion Jeovae?
15 Sventa jcholtik-o batel mantal li ta slajebal xa kʼakʼal oyutike, skʼan jpatojuk lek koʼontontik ta stojolal Jeova ti chakʼ kʼotuk ta pasel li kʼusi tskʼan yoʼonton ti kʼusi ora yaloje. Ta skoj ti chjel li kʼusitik oy ta balumile, xuʼ van skʼan jeltik jlomuk ti kʼuyelan ta jcholtik mantal xchiʼuk kʼalal ta jpastik ta yajtsʼaklom Cristo li krixchanoetike. Bateltik li s-organisasion Jeovae oy kʼusitik ta sjelik sventa tskoltautik yoʼ lek jcholtik mantal. ¿Kʼuxi chkakʼtik ta ilel ti oy xchʼunel koʼontontik ta stojolal li Dios ti jaʼ oy ta sba li orae xchiʼuk li jujun jabile? Jaʼo kʼalal ta jchʼamtik ta sjunul koʼontontik li kʼusitik chjel ta s-organisasion Jeovae xchiʼuk ti tukʼuk oyutik ta stojolal li Xnichʼon, ti «jaʼ Jolil cʼotem yuʼun scotol li steclumale» (Efe. 5:23).
16. ¿Kʼu yuʼun lek jpatoj koʼontontik ti tskoltautik Jeova «cʼalal yorail oy jvocoltique»?
16 Li Jeovae oy ta yoʼonton ti akʼo jkʼopontik mi jaʼo chkil jvokoltike. Yuʼun xuʼ jpat koʼontontik ta stojolal ti tskoltautik «cʼalal yorail oy jvocoltique» (Heb. 4:16). ¿Mi mu jaʼuk chakʼbutik ta ilel ti skʼanojutik xchiʼuk ti oyutik ta yoʼonton ta jujuntal li Jeovae? (Mat. 6:8; 10:29-31.) Kakʼtik ta ilel xchʼunel koʼontontik kʼalal ta jkʼanilanbetik koltael xchiʼuk jechuk jpastik kʼuchaʼal ta jkʼan ta j-orasiontike xchiʼuk li beiltasel chakʼbutike. Pe li kʼusi skʼan mu xchʼay ta joltike, jaʼ ti jpastik orasion ta stojolal li kermanotike.
17, 18. 1) ¿Kʼusi jutuk xa skʼan spas Jeova ta stojolal li yajkontratake? 2) ¿Kʼusi skʼan mu jpastik?
17 Maʼuk me yorail chloʼilaj koʼontontik, jaʼ lek jtsatsubtas li xchʼunel koʼontontike (Rom. 4:20). Li yajkontratak Diose, li Satanás xchiʼuk skotol li buchʼutik oy ta skʼobe, oy ta yoʼontonik ti akʼo mu xa xichʼ pasel li abtelal laj yalbutik Jesús ti akʼo jpastike (Mat. 28:19, 20). Li Diabloe tsaʼutik ta kʼop, pe li voʼotike jnaʼojtik lek ti Jeovae jaʼ «li cuxul Diose, jaʼ li Jcoltavanej yuʼun scotol cristianoetique, pero jaʼ echʼem ta xcoltaatic li bochʼotic xchʼunojique». Jech xtok, «li Cajvaltique snaʼ cʼuxi chut tscolta ta svocol li bochʼo ta xʼichʼat ta mucʼ yuʼune» (1 Tim. 4:10; 2 Ped. 2:9).
18 Li Jeovae jutuk xa skʼan xakʼbe slajeb li chopol balumile. Li Cristoe chakʼbe slajeb li yajkontratak Diose, vaʼun li mukʼul pasmantal yuʼun Jeovae ta xichʼ chʼultajesel. Mu jnabetik lek yorail kʼusi ora chkʼot ta pasel xchiʼuk kʼuxi, pe jnaʼojtik lek ti jaʼo chkʼot ta pasel ti kʼusi ora yaloj li Jeovae. Taje jaʼ tskoltautik sventa jtsaktik-o ta venta ti kuxulutik xa ta skʼakʼalil ti «jayib cʼacʼal, ti jayib jabil» yakʼojbe yorail li Jeovae. Mu me jnoptik ti jech-o «ti cʼu onoʼox xʼelan ta sliquebal cʼalal imeltsaj li banamile, jaʼ jech o cʼalal to tana» (1 Tes. 5:1; 2 Ped. 3:3, 4).
«JAʼ NOʼOX TA JMALA[TIK]»
19, 20. ¿Kʼu yuʼun skʼan «jaʼ noʼox ta jmala[tik]» ta stojolal li Jeovae?
19 Kʼalal la spas krixchanoetik li Diose, li kʼusi oy ox ta yoʼontone jaʼ ti sbateluk osil kuxulik yoʼ xchanik mas ta stojolale xchiʼuk xchanik mas ta sventa li kʼusitik la spase. Ta Eclesiastés 3:11 xi chal ta stojolal li Jeovae: «Toj lec cʼupil sba la spas scotol li Diose; lec oy yorail la yacʼbe. Jech noxtoc laj yacʼbe ta yoʼnton cristianoetic ti muʼyuc spajeb cʼusitic tspas li Diose, acʼo me mu xlaj yotquinic scotol li cʼusi spasoj Dios ta sliqueb xchiʼuc cʼalal to ta slajebe».
20 ¡Solel xijmuyubaj snaʼel ti muʼyuk jelem-o li kʼusi oy ta yoʼonton tspas Jeova ta sventa li krixchanoetike! (Mal. 3:6.) Li Jeovae jaʼ «li Mucʼta Ajvalil cuʼuntic ta sbatel osile», xchiʼuk li yorail yakʼoj sventa tspas li kʼusitike, maʼuk tstsak ta venta li kʼusi snaʼ spas jun krixchano sventa li yorail yakʼojbee, jech kʼuchaʼal kʼalal chanav li Balumile (1 Tim. 1:17). Jaʼ yuʼun, skʼan «jaʼ noʼox ta jmala [tskoltautik] li Diose, jaʼ li jcoltavanej [kuʼuntike]» (Miq. 7:7). Jaʼ lek jchʼuntik li tojobtasel chal ta Salmo 31:24: «Oyuc me lec stsatsal avoʼntonic, voʼoxuc ti nabaloxuc o ta stojol Mucʼul Diose; mu me xchibaj avoʼntonic».
[Tsʼibetik ta yok vun]
[Sjakʼobiltak sventa xchanobil]
[Lokʼol ta pajina 19]
Li Daniele la spat yoʼonton ti chkʼot ta pasel li albilkʼopetik yaloj Diose
[Lokʼol ta pajina 21]
¿Mi lek chatunes li kʼakʼal chjelov avuʼun sventa chapas li kʼusi tskʼan yoʼonton Jeovae?
