Li kʼusitik tsjakʼ jkʼelvunetike
Li kʼusitik tsjakʼ jkʼelvunetike
¿Kʼu yuʼun chal li Vivlia: «li Mucʼul Diose tsots scʼoplal chaʼay cʼalal chchamic li bochʼotic xchʼunojique»?
▪ Ta melel, li Jeovae ep tajek sbalil chilbe xkuxlejal skotol li tukʼil yajtuneltake, jech xtok oy sbalil chil ta jujuntal. Jaʼ yuʼun li kʼusi chal ta Salmo 116:15 ti yakʼoj ta naʼel Diose oy to kʼusitik smakoj, maʼuk kʼalal chcham jun krixchanoe.
Li mantal ch-echʼ kʼalal oy buchʼu chchame, li versikulo liʼe mu me xuʼ jtunestik ta sventa li buchʼu chamem xae, akʼo mi jaʼ jun yajtunel Jeova ti tukʼ chame. ¿Kʼu yuʼun? Yuʼun li kʼusi skʼan xale oy to kʼusitik te smakojbe skʼoplal. Li kʼusi la skʼan yal li jtsʼibajom yuʼun salmoe, jaʼ ti kʼalal chcham skotol li tukʼil yajtuneltake toj kʼux chaʼi, jaʼ yuʼun mu xakʼ jech xkʼot ta pasel taje (kʼelo Salmo 72:14 xchiʼuk 116:8).
Ta melel, li loʼil taje jamal chal ti Diose muʼyuk chakʼ ti oy buchʼu xlajesbat skotol li tukʼil yajtuneltake. Jaʼ jech chakʼ ta ilel li sloʼil xkuxlejal yajrextikotak Jeova avie. Yuʼun lek xvinaj ti chabibilutik yuʼun Jeova kʼalal chkiltik kontrainel xchiʼuk nutsel sventa chkichʼtik lajesele.
Li Jeovae jaʼ Skotol xuʼ yuʼun xchiʼuk chakʼ kʼotuk ta pasel li kʼusi tskʼan tspase. Jech oxal, muʼyuk chakʼ akʼo xlaj skʼoplal li steklumale. Yuʼun mi jaʼ jeche, jaʼ mas xuʼ yuʼun chkom li yajkontratake, pe taje mu jechuk. Mi jeche muʼyuk chkʼot ta pasel li kʼusi tskʼan tspase, jaʼ ti chnoj ta tukʼil krixchanoetik li Balumile (Isa. 45:18; 55:10, 11). Li ta xchʼulna Jeovae, muʼyuk buchʼu chkom jechuk sventa chichʼ ta mukʼ Jeova xchiʼuk muʼyuk buchʼu tspas li chʼul abtelal liʼ ta Balumile. Jech xtok, muʼyuk krixchanoetik chkomik jechuk sventa tslikesik li «achʼ banamil», jaʼ xkaltik, li jtsop tukʼil krixchanoetik ti chnakiik ta jun Balumil ti ventainbilik xa talel ta jun «achʼ vinajel[e]» (Apo. 21:1). Ti chʼabaluk li buchʼutik chichʼik ventainel ta Balumile, mu me xkʼot ta pasel jechuk li Ajvalilal ta Jmil Jabil tspas Cristoe (Apo. 20:4, 5). ¡Taje mu me jechuk chkʼot ta pasel!
Ta yan xtoke, ti chakʼuk Jeova ti akʼo x-akʼbat slajeb li yajtuneltak ta Balumil ta stojolal yajkontratake, ti kʼuyelan tspas mantale xchiʼuk ti kʼuyelan skʼoplale ta sok un bi. Mi jaʼ jeche, chopol me skʼoplal chkom li Mukʼul Ajvalil ta vinajelbalumile. Ta skoj ti stsakoj sba ta venta xchiʼuk li xchʼul bie, muʼyuk chakʼ kʼotuk ta pasel kʼuchaʼal taje. Jaʼ yuʼun xi jnoptike: ta stojolal li Diose «muʼyuc cʼusi chopol oy ta yoʼnton», jaʼ yuʼun xuʼ jpat koʼontontik ti chchabi skotol li buchʼutik tukʼ yakʼoj sbaik ta stojolale (Deu. 32:4; Gén. 18:25). Yuʼun xi jamal chal li Vivliae: «Li Mucʼul Diose muʼyuc chascomtsanoxuc o sventa acʼo ichʼatuc ta mucʼ» (1 Sam. 12:22). Ta melel, li Jeovae muʼyuk tskomtsan li steklumale, muʼyuk chikta li buchʼutik tʼujbilik yuʼune (Sal. 94:14).
¡Toj echʼ noʼox lek ta aʼiel ti muʼyuk chlaj skʼoplal steklumal Dios liʼ ta Balumile! Jaʼ yuʼun chaʼa, tukʼ me koʼonton xkakʼ jbatik ta stojolal Jeova xchiʼuk jpat koʼontontik li kʼusi chal liʼe: «Pero muʼyuc spasojic jchopuc abtejebal ti xuʼ chayulesot oe. Voʼot chamacbe yeic li bochʼotic tstiqʼuic amule. Jaʼ jech smoton chcacʼbeic li bochʼotic chtunic cuʼune; vuʼun jtuc chcacʼ tal li coltael ta stojolique» (Isa. 54:17).
[Tsʼib ti mukʼtik sletraile ta pajina 22]
Li Diose muʼyuk chakʼ ti xichʼ ulesel li steklumale