«Qʼuelo me abaic ta sventa svolesubil xchʼut pan yuʼun li fariseoetique»

Li Jesuse xi la spʼijubtas li yajtsʼaklomtake: «Qʼuelo me abaic ta sventa svolesubil xchʼut pan yuʼun li fariseoetique, yuʼun jaʼ noʼox chloʼlavanic» (Luc. 12:1). ¿Kʼusi la skʼan laj yal Jesús taje? Oy jun loʼil ti jamal chal ti jaʼ skʼan xal ti kʼuyelan «ta xchanubtasvan» li fariseoetike (Mat. 16:12).

Kʼalal chalbe skʼoplal svolesobil xchʼut pan ta Vivliae, bakʼintike jaʼ chalbe skʼoplal li kʼusitik yakal xa tsoke. Taje, jaʼ jech tsokesvan li chanubtasel chakʼ fariseoetik xchiʼuk ti kʼuyelan chakʼ ta ilel stalelalik ta stojolal li buchʼu chchikintabatike. Pe, ¿kʼu yuʼun toj xibal sba ti kʼuyelan chchanubtasvanike?

1 Solel tukʼ xa noʼox chaʼi sbaik xchiʼuk spʼajojik li krixchanoetik ti muʼyuk mas tsots skʼoplalike.

Te chvinaj ta jun lokʼolkʼop laj yal Jesús ti solel tukʼ xa noʼox chaʼi sbaike, xi laj yale: «Li fariseoe te cʼot svaʼan sba ti cʼalal la scʼopan Diose, jech laj yal: “Dios, colavalbun ti mu jechuc coʼnton jech chac cʼu chaʼal li yan cristianoetique. Yuʼun li stuquique ta xʼelcʼajic, muʼyuc tucʼ yoʼntonic, ta xmulivajic. Mu jechuc coʼnton noxtoc jech chac cʼu chaʼal li jtsobpatan liʼi. Li vuʼune chib velta ta xquicta ixim ta jun xemuna. Scotol li cʼusitic ta jtae ta jloqʼues jun ta lajlajuneb sventa amoton”, xut li Diose. Yan li jtsobpatane nom noʼox vaʼal icom. Mu scʼan stoy sat ta vinajel. Jaʼ noʼox la smajilan sna yoʼnton, jech la scʼopan Dios: “Dios cuʼun, cʼuxubinun, yuʼun jpasmulilun”, xut» (Luc. 18:11-13).

Pe li Jesuse lek kʼopoj ta stojolal li jtsob patan ti bikʼit laj yakʼ sbae. Xi laj yale: «Chacalboxuc avaʼyic, li jtsobpatane muʼyuc xa smul ch-ilat yuʼun Dios ti cʼalal isut batel ta snae. Yan li fariseoe mu jechuc. Yuʼun li bochʼotic tstoy sbaique jaʼ ta sbicʼtajesatic. Yan li bochʼotic biqʼuit ta xacʼ sbaique jaʼ ta xʼacʼatic ta ichʼel ta mucʼ yuʼun li Diose» (Luc. 18:14). Akʼo mi solel ojtikinbilik ti muʼyuk lek stalelik li jtsob patanetike, li Jesuse la skolta bu kʼalal xuʼ yuʼun li buchʼu chikintabate. Jech onoʼox, yuʼun li Mateo xchiʼuk Zaqueoe kʼotik ta yajtsʼaklomtak.

Ta skoj ti xatojob spasel kʼusitike, mi oy avabtel avichʼoj ta tsobobbail xchiʼuk kʼalal oy buchʼu mu xtojob lek o ti toj kʼun chavile o yan kʼusitike, xuʼ me xakʼ jnoptik ti mas lek xijtojobutike. Mi jech kʼot ta jtojolaltike, skʼan me jel jtalelaltik ta anil, yuʼun li Vivliae xi chchanubtasvane: «Li bochʼo chcʼanvane oy smucʼul yoʼnton, lec yoʼnton, mu xtiʼetuc yoʼnton. Mu xacʼ sba ta ichʼel ta mucʼ ta sventa cʼusi xuʼ yuʼun; mu stoyilan sba. Muc scʼaʼepal satinojuc xchiʼiltac; muc jaʼuc noʼox tsaʼ cʼusi lec chaʼay stuc; mu xlic scʼacʼal yoʼnton; mu xacʼ ta venta li cʼusi chopole. Mu xcuxetuc xa yoʼnton me oy cʼusi chopol chcʼot ta pasele. Jaʼ xcuxet yoʼnton me jaʼ chichʼ pasel li cʼusitic tuqʼue» (1 Cor. 13:4-6).

Jechuk jtalelaltik kʼuchaʼal jtakbol Pablo ti xi laj yale: «Li Jesucristoe iʼay ta banamil, ay scolta jpasmuliletic», xi to laj yale: «Vuʼune echʼem la jsaʼ li jmule; jaʼ mu sta jech li yantique» (1 Tim. 1:15).

Sventa jnopbetik skʼoplal:

¿Mi jnaʼoj ti jpasmulilune xchiʼuk ti jaʼ noʼox ta jta-o jkolel ta sventa li xkʼuxul yoʼonton Jeovae? ¿O mi mas van xitojob chkaʼi jba ta skoj ti jal xa tunemun ta stojolal Jeova, ta skoj ti ep kʼusitik jbainoj ta steklumal Dios ti jaʼ mu sta li yantike?

  2 Li fariseoetike tskʼanik ti labaluk xilik yantik ta sventa ti tukʼ chakʼ sbaike. Lek chaʼiik ti mukʼ yabtelike xchiʼuk ti lekuk ojtikinbilike.

Xi pʼijubtasvan li Jesuse: «Scotol ti cʼusi tspasique jaʼ noʼox tscʼanic ti acʼo yil li cristianoetique. Smuqʼuibtasojbeic xcaxail li smantal Dios ta snaban ta scʼobic o me ta stiʼbaique, xchiʼuc snatubtasojbeic stsitsumal li snatilcʼuʼ slapojique. Jaʼ lec chaʼyic ti chchotiic ta sliqueb chotlebal cʼalal yorail jujun qʼuine, xchiʼuc jaʼ tsmaquic li chotlebaletic ti bu ichʼbilic ta mucʼ ta yut nail tsobobbailetique. Jaʼ tscʼanic noxtoc ti nupbil scʼobic ta xoraltique, xchiʼuc ti “Jchanubtasvanej” xi scʼoplalique» (Mat. 23:5-7). ¡Pe li Jesuse mu jechuk stalelal! Manchuk mi jaʼ Xnichʼon Dios xchiʼuk jaʼ tukʼil vinik, lek bikʼit laj yakʼ sba. Kʼalal lekil jchanubtasvanej x-utat yuʼun jun kereme, xi la stakʼ li Jesuse: «¿Cʼu yuʼun chavalbun ti lecune? Muʼyuc onoʼox bochʼo lec; jaʼ noʼox lec stuc li Diose» (Mar. 10:18). Jun veltae laj yakʼbe yil yajtsʼaklomtak ti skʼan bikʼit xakʼ sbaike, jaʼ yuʼun la spokanbe yakan (Juan 13:1-15).

Li melel yajtsʼaklomtak Cristoe ta sjunul me yoʼonton chtunik ta jtojolal li xchiʼiltak ta chʼunolajele (Gál. 5:13). Taje jaʼ me jech skʼan spasik li buchʼutik tskʼan tsta yabtelik li ta tsobobbaile. Muʼyuk chopol «me oy bochʼo tscʼan ta xʼoch ta jqʼuelvanej yuʼun jcholcʼopetique», pe skʼan me jaʼ oyuk ta yoʼonton skoltael li yantike. Li buchʼu tskʼan tsta yabtele maʼuk me ch-ichʼat-o ta mukʼ yuʼun li yantike xchiʼuk ti mas xa tsots skʼoplale. Skotol li jkʼelvanejetik ta jun tsobobbaile skʼan «biqʼuit» xakʼ sbaik, jech kʼuchaʼal la spas li Jesuse (1 Tim. 3:1, 6; Mat. 11:29).

Sventa jnopbetik skʼoplal:

¿Mi mas van lek jkʼopon li buchʼutik oy yabtelik ta tsobobbaile, ta skoj ti ta jkʼan ti lekuk ojtikinbil xikʼot o sventa xkichʼ akʼbel yan abtelaletike? ¿Mi jaʼ mas chkakʼbe yipal stael jtosuk matanal ta tsobobbail sventa mas xkichʼ ojtikinel ta stojolal yantik xchiʼuk ti xkichʼ kʼupil kʼoptaele? ¿Mi voʼon noʼox ta jkʼan toyol jkʼoplal?

  3 Epal mantaletik laj yakʼik ti jaʼ noʼox la snop stukike xchiʼuk kʼusitik yan, vaʼun vokol ta chʼunel laj yaʼiik li krixchanoetik ti muʼyuk tsots skʼoplalike.

Li Smantal Moisese te yichʼoj mantaletik sventa yichʼel ta mukʼ Jeova ta Israel, pe muʼyuk chal kʼutik yelan ta pasel jujutos taje. Jech kʼuchaʼal liʼe, mu xuʼ x-abtejik li ta sabadoe, pe muʼyuk chal kʼusitik ti stakʼ pasele o li kʼusitik mu stakʼe (Éxo. 20:10). Pe li fariseoetike laj yakʼik yan mantaletik ti ta snopben xa noʼox stukike, taje jaʼ la sventa tstsʼakubtasik li mantaletik ta alele. Li Jesuse la xchʼun li Smantal Moisese, pe jaʼ muʼyuk la spas li mantaletik yakʼoj stukik li fariseoetike (Mat. 5:17, 18; 23:23). Li stuke jaʼ chakʼ venta kʼusitik yichʼoj li Mantale xchiʼuk snaʼoj ti kʼu yuʼun laj yakʼ li Diose, vaʼun laj yaʼibe smelolal ti skʼan xakʼ ta ilel li slekil yoʼontone. Lek laj yaʼibe smelolal kʼalal oy kʼusi muʼyuk la spas li yajtsʼaklomtake. Jun veltae, li ta yakʼobalil ti chichʼ xaʼox chukel batel li Jesuse, laj yalbe oxvoʼ yajtsʼaklomtak ti akʼo mu xvayike, pe li stukike ep ta velta och svayelik. Li Jesuse ta slekil yoʼonton xi laj yalanbee: «Li avoʼntonique tscʼan tscʼopan Dios, pero li abecʼtalique muʼyuc stsatsal» (Mar. 14:34-42).

Sventa jnopbetik skʼoplal:

¿Mi chkakʼ mantaletik ti solel mu stakʼ jelele xchiʼuk ti jaʼ noʼox li kʼusi ta jnop jtuke? ¿Mi jaʼ xa jun mantal chkal li kʼusi ta jnope? ¿Mi toj tsots koʼonton ta stojolal li yantike?

Ta jujuntal skʼan jnoptik ti kʼusi jelel-o li chanubtasel yuʼun li Jesuse xchiʼuk li chanubtasel yuʼun fariseoetike, vaʼun jkʼeltik mi oy bu skʼan jlekubtas li jtalelaltike. Ta melel, toj lek me mi jech la jpastike.

[Lokʼol ta pajina 28]

Li fariseoetike snabanoj ta skʼobik o ta stibaik li xkaxail smantal Diose (Mat. 23:2, 5)

[Lokʼol ta pajina 29]

Li jtoyba fariseoetike toj mukʼ skʼoplal chaʼi sbaik, pe jaʼuk li moletik ta tsobobbaile bikʼit chakʼ sbaik, yuʼun chtunik ta stojolal yermanoik

[Lokʼol ta pajina 30]

¿Mi ta jchanbetik stalelal li Jesuse?