«Jun pʼijil krixchanoe ta saʼ pʼijil beiltasel»

Li jkuxlejaltike xuʼ xichʼ koʼoltasel kʼuchaʼal jun xanvil ta varko. Kʼux ta alel, yuʼun ep buchʼutik mutʼijemik komel ta be, yuʼun muʼyuk xkoltaatik yuʼun li spʼijil krixchanoetike (Sal. 107:23, 27). ¿Kʼu yuʼun lek sta-o ti vaʼ yelan chichʼ koʼoltasele?

Li ta voʼnee, persa skʼan lek chanemik sventa xanavik batel ta jun varko. Toj echʼ noʼox ep kʼusitik skʼan chanel, jech oxal jaʼ chchanubtasatik yuʼun ti buchʼu lek xa chaneme, jech kʼuchaʼal li jtsʼot varkoe (Hech. 27:9-11). Epal voʼneal lokʼoletike, jaʼ mas tsots laj yalbeik skʼoplal li jtsʼot varkoe, jaʼ mu sta li yantike. Sventa xanavik ta varkoe skʼan skʼelik bu jotukal chbat li ikʼe, li kʼanaletike xchiʼuk yan kʼusitik ti tsotsik skʼoplale. Li Vivliae chal ti oy jtsʼot varkoetik ti «toj bijique» (Eze. 27:8).

Li vokoliletik ta jnuptan ta jkuxlejaltike xuʼ me toj tsots chkaʼitik jech kʼuchaʼal tsots chaʼi chanavik batel ta varko li krixchanoetik ta voʼnee. ¿Kʼusi xuʼ tskoltautik?

KʼUXI TA SAʼEL PʼIJIL BEILTASEL

Li kuxlejale xkoʼolaj kʼuchaʼal jun xanvil ta varko ta jun nab, jaʼ yuʼun jkʼeltik kʼusi chal li Vivliae: «Jun pʼijil krixchanoe ta xaʼi xchiʼuk ta to xchan batel. Jun pʼijil krixchanoe ta saʼ pʼijil beiltasel» (Pro. 1:5, 6, NM). Li «pʼijil beiltasel» chal ta hebreo kʼope, jaʼ skʼan xal ti lek xtojob ta spasel kʼusitik li jun kapitan ta varko ta voʼnee. Lek chanem xchiʼuk lek xtojob ta sbeiltasel batel li varkoe.

Akʼo mi skʼan tsots xkakʼ kiptik, jkotoltik xuʼ jtatik «pʼijil beiltasel» xchiʼuk xkoʼolaj ta jchantik chijxanav ta varko, jaʼ xkaltik ti xkuch batel kuʼuntik li kuxlejal avie. Jech kʼuchaʼal chal Proverbiose, skʼan xkakʼtik koʼol x-abtejik li «bijilile», «snaʼel smelol» xchiʼuk li «lecuc snopbenal[e]» (Pro. 1:2-6; 2:1-9, Ch). Mu me xchʼay xkaʼitik skʼanbel beiltasel li Jeovae, yuʼun li buchʼutik chopolik eke snaʼ kʼuxi chutik sventa xkʼot ta pasel li kʼusi tskʼanike (Pro. 12:5).

Jaʼ yuʼun, tsots skʼoplal ti akʼo jchantik lek li Vivliae, yuʼun ep kʼusitik ta jchantik ta stojolal Jeova xchiʼuk ta stojolal Jesús ti jaʼ laj yakʼ ta ilel lek li stalelaltake (Juan 14:9). Li ta tsobajel xtoke ep te ta jtatik lekil tojobtaseletik. Xchiʼuk ta jtabetik ep sbalil li buchʼutik ep kʼusi snaʼ ta xkuxlejalike, taje te me tsakal skʼoplal li jtot jmeʼtik eke (Pro. 23:22).

KAK KʼELO KʼUSI XUʼ XKʼOT TA PASEL XCHIʼUK KAK CHAPANO ABA

Toj tsots me skʼoplal ti «[jsaʼtik] pʼijil beiltasel» kʼalal chij-echʼutik ti bu oy ikʼal voʼe, jaʼ xkaltik kʼalal ta jnuptantik vokoliletike. Mi xchibet koʼontontik kʼalal ta jnuptan jvokoltike, xuʼ me mu xa jnaʼ kʼusi ta jpastik xchiʼuk xuʼ ep kʼusitik chopol chkʼot ta pasel yuʼun (Sant. 1:5, 6).

 Li jpʼel kʼop ti chal «pʼijil beiltasel» xie, chichʼ tunesel xtok ti kʼalal chichʼ albel skʼoplal paskʼope. Yuʼun xi chale: «Yuʼun cʼalal chichʼ pasel cʼope, tscʼan lec bij li bochʼo chchapane; cʼalal chichʼ pasel canale, tscʼan ep li bochʼo chchapanique» (Pro. 20:18; 24:6).

Jech kʼuchaʼal li buchʼu lek chchapan sba sventa xkuch yuʼun li jun paskʼope, jaʼ jech skʼan kak jkʼeltik kʼusi xuʼ xkʼot ta pasel xchiʼuk kak jchapan jbatik mi oy kʼusi chakʼ ta vokol li jlekilaltik ta mantale (Pro. 22:3). Jech kʼuchaʼal liʼe, jnoptik ti skʼan xanop mi chachʼam junuk abtelal o ti cha-akʼbat mas lek avabtele. Li kʼusi chapase, jaʼ ti chatsak ta venta kʼuyepal chapas kanal xchiʼuk ti kʼu sjalil chatekʼ batel kʼalal chabat ta avabtele. Pe oy to kʼusitik tsots skʼoplal skʼan xanop xtok, jech kʼuchaʼal mi muʼyuk tskontrain beiltaseletik ta Vivlia li abtelale xchiʼuk mi muʼyuk tsmakot ta spasbel yabtel Dios li kʼusi ora cha-abteje (Luc. 14:28-30).

Li Loretta ti jaʼ yajrextiko Jeovae oy toʼox lek yabtel ti bu tsmeltsanik veʼlile. Kʼalal yichʼ jelbel yavil yabtel li Lorettae, ta xaʼox xichʼ akʼbel jun abtelal ti mas tsots skʼoplale. Li buchʼu jaʼ oy ta sba li abtelale xi laj yalbe li Lorettae: «Mukʼta matanal ataoj ta akuxlejal maʼ taje. Jech xtok, laj xa jakʼkutik ti oy jun Salon sventa Tsobobbail tee». Pe li Lorettae laj yakʼ venta ti jutuk xa chkom yorail sventa tspasbe yabtel Dios ta skoj li abtelal taje, yuʼun li kʼusi tskʼane jaʼ ti tsjutukajes kʼusitik ta xkuxlejal sventa chtun mas ta stojolal li Jpasvanej yuʼune. Jaʼ yuʼun, manchuk mi albat yuʼun yajval yabtel ti stuk xa noʼox ch-akʼbat yabtel li Lorettae, laj onoʼox yikta komel. Li Lorettae, ti oy xa ta jtob jabil yochel ta prekursorae, laj yakʼ venta ti jaʼ mas lek ti kak la skʼel xchiʼuk la snop kʼusi tspase, jaʼ te la stunes li «pʼijil beiltasel» jech kʼuchaʼal chal Skʼop Diose. Mas xa lek ti kʼu yelan chil sbaik xchiʼuk li Jeovae, xchiʼuk staoj smoton ta skoltael jayvoʼuk krixchanoetik ta xchʼamel li kʼusi melel ta Vivliae.

Ti bu skʼan xa stunes li «pʼijil beiltasel» xtoke, jaʼ ta stojolal li utsʼ alalile. Xchanubtasel lek li alab nichʼnabiletike toj jal me yichʼoj, jech xtok, li kʼusitik chichʼ nopel ta sventa li mantale o ta sventa li takʼine xuʼ me oy kʼusi xkʼot ta pasel ta stojolal utsʼ alalil ta tsʼakal (Pro. 22:6). Li totil meʼiletik ti jaʼik yajtsʼaklom Cristoe, skʼan xi sjakʼbe sbaike: «¿Mi chkakʼbekutik yil kalab jnichʼnabkutik ta jloʼilkutik xchiʼuk ta jtalelalkutik ti jaʼ mas tsots skʼoplal li kʼusitik ta mantal ti jaʼ chkoltaatik-o kʼalal mi mukʼibike? ¿Mi chkakʼbekutik yilik ta jkuxlejalkutik ti ximuyubajkutik noʼox li kʼusi oy kuʼunkutike xchiʼuk ti jaʼ xakʼ ta yoʼontonik li spasbel yabtel Diose?» (1 Tim. 6:6-10, 18, 19).

Ta melel maʼuk te ta jtatik muyubajel li ta kʼulejal o li ta kʼusitik oy kuʼuntik ti jaʼ mas batem ta yoʼontonik saʼel li krixchanoetike. Li ajvalil Salomone lek laj yaʼibe smelolal taje xchiʼuk xi la stsʼibae: «Jaʼ noʼox ta jnaʼ ti lec onoʼox chbatic li bochʼo chichʼic ta mucʼ Diose, ti tspasbeic cʼusi tscʼane» (Ecl. 8:12). Ta melel, taje jaʼ chakʼ ta ilel ti kʼusi mas tsots skʼoplal skʼan jpastike jaʼ ti jsaʼtik li «pʼijil beiltasel» chakʼ Skʼop Diose (2 Tim. 3:16, 17).

[Lokʼol ta pajina 30]

Epal voʼneal lokʼoletike, jaʼ mas tsots laj yalbeik skʼoplal li jtsʼot varkoe, jaʼ mu sta li yantike

[Stojel ta vokol]

Su concessione del Ministero per i Beni e le Attività Culturali. Mu me stakʼ lokʼtael ta kʼuk yelan li lokʼol liʼe.