Kʼalal muʼyuk lek chkichʼtik takʼbele skʼan oyuk slekil koʼontontik

KʼALAL la xcholbeik mantal jun yayil li Manon xchiʼuk George ti likemik ta Países Bajos ti jaʼik yajrextiko Jeovae muʼyuk bu lek takʼbatik. Laj yaʼiik ti chamem xa chaʼvoʼ smalal xchiʼuk chamem xa jun skerem xchiʼuk tsakbil ta tsatsal artritis chamel. Kʼalal yakal chloʼilajike, la spajtsan sba jutuk ti ch-iline, pe muʼyuk laj yakʼ ta ilel slekil yoʼonton.

Li Georgee laj yalbe Manon ti xuʼ van xichʼik batel jyomuk nichim li ta yan veltae, yuʼun laj yakʼik venta ti stuk nakal xchiʼuk ti muʼyuk noʼox xmuyubaj li yayile. Jaʼ jech la spasik, vaʼun li ants ti Rie sbie toj labal sba laj yaʼi. Ta skoj ti muʼyuk xokol li vaʼ kʼakʼal taje, laj yal ti jaʼuk to ta yan kʼakʼal xvulaʼanate. Pe kʼalal sutik batel ta yan kʼakʼale, muʼyuk buchʼu te la staik. Akʼo mi ep ta velta jech la spasik, muʼyuk la staik-o. La snopik ti yuʼun van mu xa skʼan xchiʼinatik ta loʼile.

Jun kʼakʼal li Georgee te la sta ta sna li Riee. Li antse la skʼan perton ta skoj ti chʼabal te ta sna li kʼusi ora yaloje xchiʼuk laj yal ti yuʼun tikʼil toʼox la ta ospitale. Vaʼun xi laj yale: «Pe mu xanaʼ kʼusi la jpas kʼalal labatik xaʼoxe. ¡Lik jkʼel li Vivliae!». Ti kʼuyelan lek la xchiʼin sbaik ta loʼile, li antse la xchʼam jun chanubtasel ta Vivlia.

Kʼalal mas xaʼox la xchan batel Vivlia li Riee, pas ta jun ants ti toj lek yoʼonton xchiʼuk ti xmuyubaj noʼoxe, maʼuk xa jun ants ti muʼyuk xmuyubaje. Manchuk mi mu stakʼ xlokʼ ta sna, pe li kʼusi la xchane, ta anil noʼox lik yalanbe li buchʼutik chvulaʼanate. Manchuk mi mu xuʼ yuʼun chbat skotol velta li ta tsobajeletik ta skoj ti ip noʼox chaʼie, pe lek chaʼi ti chbat kʼelatuk yuʼun li ermanoetike. Kʼalal jaʼo tsʼaki 82 sjabilale, bat ta jun Mukʼta Tsobajel ta chib kʼakʼal xchiʼuk laj yichʼ voʼ sventa chakʼ ta ilel ti yakʼoj xa sba ta stojolal Jeovae.

Kʼalal cham li Riee, te van jayibuk u ta tsʼakale, laj yichʼ tael jun nichimal loʼil ti jaʼ la stsʼibae. Li ta nichimal loʼil taje, te laj yal ti toj chopol tajek kʼalal stuk kom ti oy xaʼox sjabilale xchiʼuk laj yal xtok ti tsots skʼoplal li slekil oʼontonale. Li Manone xi chale: «Li ta nichimal loʼile la stijbun tajek koʼonton xchiʼuk ximuyubaj ti la skoltaunkutik Jeova ti ta slekil koʼonton la jkʼoponkutike».

Ta melel, li stalelal Jeovae jaʼ tstij koʼontontik ti akʼo xijkʼanvan xchiʼuk ti xkakʼtik ta ilel slekil koʼontontike (Efe. 5:1, 2). Lek me kʼusitik chkʼot ta pasel yuʼun li cholmantal ta jpastik mi jaʼ «[chkakʼtik] ta ilel ti ta melel [voʼotik] oy [kabteltik] ta stojol Diose, [...] ti oy slequil [koʼontontike]» (2 Cor. 6:4, 6).